Поиск по сайту: 
 

Архив
 январь 
 2019 
пн вт ср чт пт сб вс
 123456
78910111213
14151617181920
21222324252627
28293031   

 
 

 

Наши мокшанские сыновья и дочери

Ванфтсаськ седисонк лемонц

Николай Степановичень ламоль содайдонза, ялгадонза, учениктонза.
Шачсь Н.С.Алямкин 1947-це кизонь 22-це сентябрьста Старошайговскяй райононь Сарга мокшень велеса. Тя велеста Алямкин ялгадонк башка лиссть и содаф лия ломатть. «Мокшень правда» газетать главнай редактороц И.С.Лушкин, военнай наукань кандидатсь, Нижегородскяй Архитектурнай институтонь военнай кафедрать заведующаец М.Пьянзин, КПСС-нь Мордовскяй обкомонь секретарсь А.С.Чалдаев, писательсь Ф.Ф.Пьянзин, лиятне.
Кода азондозе И.С.Лушкин, кельгома ялгац нинге од церакс арьсекшнесь учителькс арамать колга. Университетть шумордамдонза меле арьсеманза ётафтовсть эряфс: мзяра пинге учителель Саргаса, Рузаевскяй райононь Цифтамаз мокшень велеса.
Мокшень цёрать пряс састь мяльхть-арьсемат сяда тов тонафнемать колга, сяс поладозе тонафнеманц СССР-нь Наукань Академиять видеса Кялень институтса А.П.Феоктистовонь вятеманц ала. Сяда тов кочксесь кеме содамошит, вдь тонафтыенза ульсть масторлангонь содаф учёнайхне: академиксь Б.А.Серебренников, К.Е.Майтинская, В.И.Лыткин и лият.
Шнафтан пря: моньге синь тонафнемазь. Тянемс мяляфтсайне лекцияснон.
Эряви азомс, и республикасонк, университетсонк стане жа  пяк  цебярьхтельхть  Н.С.Алямкинонь тонафтыенза: землякоц П.Г.Матюшкин, мокшень кялень кафедрань вятись С.И.Липатов. Липатовонь куломдонза меле кафедрати оцюнякс путфоль Николай Степанович.
Н.С.Алямкин тяштсь лама статья, конат пяк эрявихть школатненди, студенттненди, кядялдонза лиссь аф кржа учебник. Кепотьксонди, 8-це классонди Мокшень кялень грамматика, Мокшень кяль: морфология (вузонь мокшень и финно-угрань отделениянь тонафнихненди учебник), Мокшень кяль. Синтаксис, Мокшень кялень морфологиять коряс практикум.
2011-це кизоня Венгрияса, Бадачоньтомай ошса мокшень школатненди лиссь терминологиянь валксоц—«Словарь терминов по истории на мокшанском языке для общеобразовательных школ» лем ала.
1993-це кизоня Саранскяйса ётафтфоль кялень пуромкс. Тя пуромкста меле Н.С.Алямкин, марса ученай ялганзон С.И.Липатовонь, О.Е.Поляковонь мархта анокласть и 1995-це кизоня нолдасть «Мокшень кяльса сёрмадомань корхтамань, пунктуациянь норматне» пяк эрявикс книга.
Н.С.Алямкинонь вятеманц ала (кода мокшень кафедрань оцюня) мокшэрзянь кяльхнень виияфтомаснон инкса васенцеда нолдафтольхть «Мокшень кяль. Морфология», «Мокшень кяль. Синтаксис» учебникне. Синь эрявихть кода студентоньконди, стане и школаса тонафнихненди.
Николай Степанович аноклась оцю пялькс «Мокшень-рузонь валксти», кона нолдаф Москуса «Русский язык» издательстваса. Валкссь явф аф аньцек Мордовиянь, а марнек Россиянь школатнень эзга. Тя валксть анокламанц инкса Н.С.Алямкин и лия авторхне 1999-це кизоня сатсть Мордовия Республикань Госпремиянь лауреатонь лепт.
Наукада башка, Н.С.Алямкин тиендсь лия тефт, тяконь лувксса и общественнайхть. Сон ульсь Мордовия Республикань Правительствать видеса Орфографиянь комиссиянь членкс, Мокшэрзянь народонь Межрегиональнай общественнай движениять Советонц Исполкомонц вятиенцты полафтыкс, «Народное образование» журналса, «Якстерь тяштеня» журналса редколлегиянь членкс.
Эряфоньберьф карман ванфнема Н.С.Алямкинонь книганц, конань казезе сон тейне пяк цебярь арьсема мархта. Путнян и карман путнема вийхть, штоба сатомс ся тёкшнень, конатнень сатозь Николай Степанович, и марстонь учителеньке А.П.Феоктистов.
О.ПОЛЯКОВ,
филологиянь наукань доктор, профессор,      Н.С.Алямкинонь ялгац.

25.09.2017 №37
 
 
 

 
НОВОСТИ
 

Мордовиянь Оцюнясь Владимир Волков Ётафтсь национальнай проекттнень эряфс етафтомаснон коряс рабочай совещания

17.01.2019  № 2
 
 
 

Ули мезенкса кеняртькшнемс

Монь, кода од ломанень, пяк лад мялезон ся, кода кизоста кизос коль сяда и сяда мазыкс и арукс арси республиканьконь столицац—Саранскяйсь. Тяни ётат сонь ульцянзон, проспектонзон, парконзон, лия вастонзон эзга и седице пяшкоди кенярьдемада, гордостьта и ошть, и марнек Мордовиять инкса. Сембода лама полафткста, конешна, эвондась тяса футболть коряс Миронь чемпионатти анокламста. Ваносте, кодамот тяни ошень китне, вокзалхне! Мяльцень стане жа саласазь «Тавла» гостинично-жилой од комплекссь и Экопарксь. Марнек полафтсь, лиякс арась аэропортсь. Тяни тяста самолетса можна пачкодемс Москуву и Санкт-Петербургу. А мзяра строяф идень садта, школада, гипермаркетта, лама лия пяк эрявикс объектта. А кода аф лятфтамс уникальнай спортивнай объектть—«Мордовия Арена» стадионть. Сон сембоса отвечай тяниень пингонь инь оцю вешфксненди. Аф стак самай тяса меля налхксть миронь инь вии футбольнай командатне. Тя ли аф фантастика, тя ли аф честь сембонди тейнек. А ёфси аф кунара Саранскяйса ётафтфоль эйть лангса конькаса фигурнайста куркснемать коряс Россиянь чемпионатсь. И тяконь лаца спортонь оцю праздникт миньцонк ётафневихть аф шуроста.
Спортсь лихтезе столицаньконь пяк няевикс вастс, тиезе сонь содафокс аф аньцек Россияса, а марнек мирса-масторса. «Саранскяйсь—тя афкуксонь Европейскяй ош, тяса сембось тиф-ладяф оцю уровеньца»,—тяфта азондсазь эсь мяльснон-арьсемаснон столицаньконь колга тяза сашенды инжихне.
Мария Тарасова.
10.01.2019  № 1
 

10 январьста—Мордовиять шачема шиц

Панчфокс панчт, мокшэрзянь краеньке!
Тячи Мордовия Республиканьконь шачема шиц. Топодсь 89 киза, кода теенза максф государственность. 1930 кизонь 10 январьста ВЦИК-ть Президиумоц примась постановления Мордовскяй округть Мордовскяй автономнай областекс тиеманц колга. Тя шись и лувондови мокшэрзянь республикати шачема шикс. А ниле кизода меле тифоль Мордовскяй АССР-сь.
Тянь мархта путфоль цебярь ушеткс касоманди-виияманди. Ётаф пингста ламода кассь республикать экономическяй виец, кеподсь культурась, образованиясь, наукась. Ламоц земляконьке арасть гордостекс аф аньцек Мордовияса, но и сембе Россияса.
Сембода оцю сатфкст миньцонк сатфт мекольдень кизотнень. Мордовиясь путневи примеркс лиятненди, тяза сашендыхть опытонкса, тонафнема. И ули мезти тонафнемс. Республиканьке тячи—странать инь  вишкста вииякшни региононзон эзда фкясь.
10.01.2019  № 1
 

Мордовия Республикань культурань, национальнай политикань, туризмань и архивнай тевонь министрсь А.М.ЧУШКИН: «ЛАДЯМА СЕМЬЯСОНТ И САТФКСТ ТЕВСОНТ!»

28.12.2018
 

Н.П.Огарёвонь лемса Национальнай исследовательскяй Мордовскяй государственнай университетонь ректорсь С.М.ВДОВИН: «КАТК ЁТАФТОВИХТЬ ЭРЯФС СЕМБЕ ВАЛДА МЯЛЕНТЕ И ПЛАНОНТЕ!»

28.12.2018
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин