Поиск по сайту: 
 

Архив
 ноябрь 
 2018 
пн вт ср чт пт сб вс
   1234
567891011
12131415161718
19202122232425
2627282930  

 
 

 

Национальная тематика

ЭРЬ ТЕВСАСАФТСЫ И СЕМБОСА КЕНЕРИ

Шачсь-кассь Перхляй мокшень велеса. Школать шумордамдонза меле поступась тонафнема Саранскяень училищав кондитеркс. Нинге тонафнесь Зубово-Полянскяй педагогическяй училищаса воспитателькс. Меле мрдась ёмла родиназонза. Перхляй велень школаса ушедсь работама пионервожатайкс. Сяльде кота кизот велень Советса секретарель. 1990-1996-це кизотнень заведующаель идень садса, сёлгомдонза меле Лидия Викторовна мусь страховой агентонь васта Рузаевкаса. Тяда башка, кемонь кизот работай Перхляень клубса художественнай руководителькс.
—Пяк кельгса велень клубса работамазень, оцю мяльса васьфнесайне иттнень, конат сашендыхть кружокненди. Шабатнень мархта тиенттяма ванфты няканят. Кой-коста мишендьсаськ праздникнень, лия пуромкснень пингста. Эсь кядьса аноклафти вешфкссь фалу оцю, сяс мес тя тевти путнесаськ седиеньконь лямбонц,—мярьгсь Лидия Викторовна.
Мокшавась машты рисавама. Эрь пуромксти декорациятнень тиендьсыне сонць, аф ваномок сянь лангс, мезьста синь ащихть: картонцта, архтфксста, кагодста, нуласта.
Нинге Л.В.Аршинова сташенды котфста някат, тяконь лувксса и заказс коре.
«Ляйне» коллективонь участницатне сценать лангс лисендихть мокшень стама щамса, кодамса инголи якасть Рузаевскяй райононь мокшень велетнень эса аватне и стирьхне. Сельмос пови рукаватнень, лия щапнень—сембонь стазень Л.В.Аршинова. Кода и кельгома лия тевонзонды, костюмонь сташендомати мокшавась аф ужяльдьсы пингонц. Лама мезе содай рузонь щапнень колгавок. Аф фкя кокошник аноклась.
Коллективонь эрь участницать пряс Лидия Викторовна маштозь сотнекшнесы руцять «мокшавакс». Кочксесы и латцесы эрь панчфть, сюролданять.
Перхляй. Мокшень тя велеть лемса эрсь эздонк кульсы ляй валть. Сонь и нолдазе тевс Лидия Викторовна, мзярда сась велень клубу работама и пуроптозень аватнень и стирьхнень фольклорнай ансамбльс, конанди максфоль «Ляйне» лем.
Валонзон коряс, тяни тя коллективса кемгафтува ломань. Морсихть рузонь, мокшэрзянь морот. Л.В.Аршиновась пяк кельгсыне «Панда пряса тол палы», «Солдат Яшкась», «Ехали цыгане», «Эх, по сёлам» моротнень. Инь оцю казнекс лувондсыне ваныхнень кядень кайги цяпамаснон. Вдь ломаттне тяфта няфнесазь, што морось или лия выступлениясь ашезень када синь озадонь седихть ащема: кеняртьфтезень, кошардозень арьсема, токазень седиснон.
Сценарийда и сценкада башка, Лидия Викторовна тяшни баснят мокшень кяльса, конат нолявихть тевс концерттненди, лия пуромксненди анокламста.
—Оцю спасиба мялезе  азомс Перхляй велень клубть директоронцты Людмила Павловна Качкаловати. Эрь тевса фалу лезды, сяс семботь сатнесаськ марстонь вийса,—азозе Л.В.Аршинова.
Велень клубса ули «Шаг вперёд» кштимань коллектив, конанди сувсихть кота стирнят. Синь кштишендихть рузонь и мокшень кштимат.
Кода азфоль сяда вяре, Лидия Викторовна пяк кельгсы клубса работаманц. И нят аф шава валхт. Тянь колга корхтайхть сатфксонза, эрь шинь тевонза, ломаттне, конат содасазь мокшавать.
Сельмоц няи, кядец тии. Эрь тевсь кядьсонза «палы». Эрь тевть пачк сязьсы. Машты ломанць машты сембоса. Ня и лама лия валхне сонь—мокшавать Л.В.Аршиновать колга.
Кудса сон кельгома рьвя и тядя. Мирдец, Михаил Георгиевич, пара вайме, эрь тевса лезды ломань. Перхляй велень клубса ламоть тиезе сон, тяконь лувксса сценкатненди реквизиттнень. Кепотьксонди, «Кургоня» фестивальти Аршинофне аноклазь эшить, пянакудть.
Лидия Викторовна и Михаил Георгиевич касфтсть кафта стирьхть. Оцють, Светлана Михайловнать, кафта высшай образованиянза. Сон рекламист-маркетолог. Башка мяль шарфни национальнай ширети, пуроптозе «Арона» кштимань коллективть. Ёмлась, Ангелина, Н.П.Огарёвонь лемса Мордовскяй государственнай университетонь студентка, сай пингонь филолог. Тонафни рузонь кялень и литературань, мокшень кялень и мокшэрзянь литературань специальностьса. Кота кизоста сявомок ушедсь лисендема выступандама сценати, тяфта тевсь ащи тянемс. Примси участия вузса етафневи творческяй пуромкснень эса, кирди соткст Саранск ошень Культурань фкя кудть мархта.
Кда Л.В.Аршинова аноклай кодамовок пуромксти, кудса етни эсь лацонь планёрка: семьянь келеса арьсесазь, кода сяда цебярьста семботь тиемс.
Сембе цебярть тейть, мокшава!
Т.АЛЬШИНА.

25.09.2017 №37
 
 
 

 
НОВОСТИ
 

УШЕДСЬ «Шумбрат, Мордовия!»—«Vivat, Чемпионат!» ФЕСТИВАЛЬСЬ

25.10.2018  № 42
 
 
 

Панчфт и казнет—республикань учительхненди

Торжественнай мероприятияс, кона лемтьфоль Международнай учителень шити, И.М.Яушевонь лемса музыкальнай театрав пуромкшнесть учительхне марнек республикаста. Профессиональнай праздник мархта синь поздравляндазень Мордовиянь Оцюнясь Владимир Волков.
—Учительсь—тя аф аньцек профессия, тя ваймонь венемома, аф тёждя, ответственнай и оцюдонга оцю труд,—мярьгсь Владимир Дмитриевич.—Афкуксонь учительсь максси иттненди сяда лама азф школьнай программать коряс. Сон лезды ученикти шарьхкодемс эсь прянц, няфтемс ломанень цебярь ширензон, мумс эсь кинц эряфса.
Республикань Оцюнясь азсь кафта важнай цельхть, конат ащихть отечественнай образованиянь системать инголе. Васенцесь—сувамс мирса инь цебярь кемоттнень лувксс. Омбоцесь—тиемс воспитаниянь система. Тянди водендаф «Образование» од национальнай проектсь.
11.10.2018  № 40
 
 
 

Республикань предприятиятнень продукциясна пачфневи миронь 80 странас

Пяденцяста, 28 сентябрьста, Мордовия Республикань Оцюнясь В.Д.Волков примась участия торжественнай пуромксса, кона лемтьфоль Машиностроителень шити. Мероприятиясь етась Рузонь Государственнай драматическяй театраса. Залу пуромкшнесть республиканскяй предприятиянь представительхне, отраслянь ветераттне.
Пуромфнень поздравляндамста В.Д.Волков лемдезе машиностроениять республикань экономикать  седикс и моторкс, вдь сонь эздонза ламода ащи лия сфератнень работасна.
Азфоль, што тяддень кафкса ковста промышленнай производствань индекссь арась 111 процент. Странаса тя фкя инь цебярь показательсь. 2018 кизоня республикаса нолдаф 119 миллиард цалковаень питнеса промышленнай продукция, мезсь 13 процентта сяда лама мелянь кизоть коряс. Республиканскяй кемготува предприятиятнень эса эряфс етафневихть производствать  келептеманц и одкстопнеманц коряс проектт. Касонды инновационнай продукциять лувксоц. Производствань марстонь объемть эса сонь талекац—29 процент. А тяфтама отраслятнень эса, кода электроннай и оптическяй изделиянь производствась, тя показательсь пачкодсь 77 процентс.
04.10.2018  № 39
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин