Поиск по сайту: 
 

Архив
 декабрь 
 2018 
пн вт ср чт пт сб вс
     12
3456789
10111213141516
17181920212223
24252627282930
31      

 
 

 

Национальная тематика

МЯЛЯМСЬ КОЛГАНЗА ФАЛУ ЭРЯЙ ЛОМАТТНЕНЬ СЕДИСА

Пяле кизода сяда сиресь ульсь Николай Иосифович Черапкин, а сяда одсь—Григорий Яковлевич Меркушкин. Шачсть Инсарскяй райононь Од Исапря велеса. Фкя пингть—1938 кизоня—шумордазь тонафнемаснон Мокшэрзянь пединститутса. Григорий Яковлевичень кучезь историянь тонафтыкс Темникавонь педучилищав, а Николай Иосифович вятезень рузонь кяльть и литературать мянь Иркутскяй областьса и Бурятияса. Меле служасть армияса, и кодак ушедсь войнась—кафцьке фронтсот, войнать аделамс тюрсть фашисттнень каршес. Куване ётасть, коза пачкотькшнесть, мзярксть варжакснесть куломать сельмос, кода лядсть шиса, тянь колга, шять, улель кода сёрмадомс башка книга.
Мрдатама тоза, коза синь озасть цють ваймама, хуш ваймосемс теест пяк ашель мзярда. Кизефнесть фкя-фкянь, кода молихть сёрмадомань тевсна. Николай Иосифович азондозе, аделазе тяштеманц «Горькаень заветонзон коряс» книганц. А Григорий Яковлевич лятфтазе—сёрмадсь од пьеса, лемоц «Шинь стяма». Но аф фалу мушенды пинге сёрмадомс.
Кафта учёнай алятнень тя васедемасноль 1960-це кизотнень ушетксста, мзярда Григорий Яковлевич Меркушкин ульсь ни Н.П.Огарёвонь лемса Мокшэрзянь университетса ректоркс, а Николай Иосифович Черапкин—профессоркс, кона крхкаста содазень и азонкшнезень рузонь литературать и мокшэрзянь литературать касомань киснон-янцнон.
Кода ни азфоль, кафцьке шачсть 1917 кизоня. Николай Черапкин 21 майста, и сонь лятфнемань илац етась  кода университетса, стане и лияса. 100 киза топодсь шачема шистонза.
Григорий Яковлевич Меркушкинонь шачема шистонза 100 кизоц улель 23 ноябрьста.
Григорий Яковлевичень васенцеда няине 1950-це кизотнень кучкаста, мзярда сон обкомонь секретарель и кирдезень сельминголе журналист-тнень и писательхнень. Шарьхкотьф, ульсть сталмот, сембода пяк велеса: кржа пандсть трудошить инкса или ефси ашесть панда, куттне вельхтяфтольхть шужярьса, кржаль колхоснень эса техникада, модась шувондовсь кшнинь каймоса. Кой-кона райононь оцюнятне сембе сяка шнафтсть пря: колхозниксна эряйхть пяк цебярьста, кштийхть и морайхть. Кштиманц-мораманц народоньке ашезе юксне стака пингстонга, а кодама нужат и сталмот няйсь, тянь колга пяк лама серматкшнемс ашесть мярьгонде.
Григорий Яковлевич Меркушкин семботь тянь няезе и содазе, пичедсь седиец и старандась ломаттненди лездомс. Сидеста улендсь велеса, пшкятькшнесть теенза идь мархта удаватне, сире ломаттне—изь сатне кшисна, ашельхть уштомс пенгасна. И тозк райононь оцюнятнень мархта Г.Я.Меркушкин вешендсь, кода мярьгихть, резерват теест лезксонь максомс.
Лац содазе Меркушкин «Красная Мордовия» (тяни «Известия Мордовии») газетать корреспондетонц Иван Антоновонь. Кирдезе ширенц, мзярда ся печатлазе Москуса «Ухабы на дорогах» очерконц, коса няфтезе эсь прянь няи райкомонь секретарть Бурмистровонь. Сон най шнафтсь пря оцюнятнень инголе—сембода лац вятьсыне тевонзон, хуш ашезень ужялькшне ломаттнень, корхнесь мархтост цють аф таматрей сюцезь, киньге изь кулхцонда. Велеса аф теждя тефнень колга лиссь Иван Антоновонь «Трудоши» очеркоцка, нолдазе башка книганякс Мокшэрзянь книжнай издательствась. Москуса «Советский писатель» издательстваса печатлафоль «Свежий ветер» очерконь книгац, Саранскяйса—«Разлив на Алатырь-реке», «Записки корреспондента» книганза.
Иван Антонов эрзяль. Сермадсь рузкс. 1954 кизоня Саранскяйса лиссь «В семье единой» романоц.
Мокшекс и эрзякс сермадыхнень книгасновок лисендсть Мокшэрзянь издательстваса. Шурода весть нолявсть «Сяськома» и «Изнямо» альманахне. Ашесть лисенде нинге войнать пингста селкф «Колхозонь эряф» и «Сятко» журналхне. Ашесть лисенде «Мокшень правда» и «Эрзянь правда» газетатне. А мокшень и эрзянь писателень юром кочкавсь ни. Мрдасть войнаста Илья Девин, Александр Щеглов, Александр Малькин, Илья Кишняков, Кузьма Абрамов. Сермадсть эряфкшу писательхне Никул Эркай, Андрей Куторкин, Максим Бебан, Михаил Сайгин, Александр Мартынов.
Григорий Меркушкин аф кржа тев якафтсь, штоба одукс ушедовольхть нолявома мокшень и эрзянь газетатне и журналхне, путнезе тя кизефксть Мордовиянь правительствать инголи, аф весть якась Москуву оцюнятненди, эняльдсь лездомс.
И кармасть одукс лисендема «Мокшень правда» и «Эрзянь правда» газетатне. «Колхозонь эряф» журналть лемдезь «Мокша» журналкс. «Сяткось» кой-мзярс лисендсь «Сурань толхт» лемса, а меле мрдась ингольдень «Сятко» лемонцты.
Г.Я.Меркушкин сидеста сувсесь газетань и журналонь редакциятненди, кизефнесь, кода молихть тевсна, лезнесь газетас и журналс серматфтомати, нльне сонць макссесь командировкат вели якайхненди.
Оцю мяль шарфтсь Григорий Яковлевич ссылкаста саф кафта писательхненди Василий Виардонди и Петр Левчаевонди, конат 1937 кизоня повондсть репрессиянь шарыть алу. Валхтозь муворшиснон и мрдасть куду. Мрдасть, а эрямс коса? Аш кудсна, аш квартирасна. Якасть ризфснон азондома Иван Павлович Астайкинонди, Григорий Яковлевич Меркушкинонди.
Саранскяйса од кудонь строямась аньцек ушеткшнесь. Мувсть кафта писательхнень семьяснонды квартиранят шуфтонь кудса. Эряда! Сермадода! И сермадсть синь од книгат. Мокшэрзянь издательствать книгань ноляма планонза кемокснезь оцюнятне. Обкомонь секретарть Меркушкинонь тя тевса валоц ульсь вяре и кеме. Сонь лезксонц вельде Петр Левчаевонь и Василий Виардонь книгаснонды максфоль ки. Ся кизотнень и лиссть П.Левчаевонь «Вирсь увнай», «Повестть и расскаст», «Аляшка церокш» книганза, а В.Виард казезень лувихненди «Кешань приключениянзон», «Оха скрипаченц», «Колянь каникуланзон», «Хрусталень седенц», «Вирень вайгялензон».
А.Тяпаев,
Мордовия Республикань Народнай писатель.
(Полатксоц моли)

20.11.2017 №
 
 
 

 
НОВОСТИ
 
 

Единороссы Мордовии направили свои предложения для работы на предстоящем Съезде Партии

Обсуждение предложений, направленных на совершенствование основных принципов работы  партии  и повышении ее роли в современном обществе, прошло в ходе  региональной  партийной  дискуссии «Обновление -2018»,   которая состоялась 16 ноября в Саранске. Дискуссия  объединила   четыре  тематических блока,  касающихся обновления партии и создания эффективной политической организации; повышения коммуникаций и  взаимодействия с общественными институтами; технологических подходов в избирательных кампаниях и в межпартийной конкуренции; реальных  дел в решении проблем  конкретных людей  и  развития   всех сфер жизни общества. Итогом  стало пленарное заседание, в ходе которого была обобщена работа дискуссионных площадок  и рассмотрены наиболее интересные предложения, прозвучавшие в ходе обсуждений.  Лучшие из них  направлены   Региональным  отделением   «Единой  России»  в   Центральный исполнительный комитет Партии для обсуждения  во время работы    площадок первого дня Съезда Партии.  В ходе  региональной дискуссии был представлен широкий спектр мнений  по  вопросам, касающимся  сохранения  доверия к партии избирателей и повышения эффективности работы партийных структур.

 

20.11.2018
 
 
 
 
 

УШЕДСЬ «Шумбрат, Мордовия!»—«Vivat, Чемпионат!» ФЕСТИВАЛЬСЬ

25.10.2018  № 42
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин