Поиск по сайту: 
 

Архив
 ноябрь 
 2018 
пн вт ср чт пт сб вс
   1234
567891011
12131415161718
19202122232425
2627282930  

 
 

 

Национальная тематика

МОКШЕНЬ КОМПОЗИТОРТЬ Н.В.КОШЕЛЕВАТЬ ТВОРЧЕСТВАНЦТЫ ВЕШФКССЬ ФАЛУ ОЦЮ

16-17 ноябрьста Саранскяйса М.Е.Евсевьевонь лемса Мордовскяй государственнай педагогическяй институтса ётась «Н.В.Кошелевать творчествац Россиять музыкальнай культуранц контекстса» лем ала Всероссийскяй научно-практическяй конференция. Мокшавась Н.В.Кошелевась аф аньцек Мордовияса, но и марнек Россияса содаф композитор, Мордовия Республикать Гимнанц музыканц, «Алёна Арзамасская» национальнай васенце балетть авторсна, Мордовия Республикань Композиторонь союзть Правлениянц Председателец, казьф Славань III степенень орденца.
Вяре азф конференциясь ётафтовсь Нина Васильевнань Россиянь музыкальнай культурать виияфтомаса путксонь путоманцты питнень максоманкса, тяниень пингонь композиторхнень творчестваснон содафокс тиеманкса. Участникокс ульсть ученайхне-исследовательхне, музыковеттне, композиторхне, музыканттне-исполнительхне, преподавательхне, культуролокне, краеветтне аф аньцек Мордовияста, но и Москуста, Казаньцта, Ульяновскяй областьста, Марий Эл Республикаста. Теест ульсь кода полафтомс фкя-фкянь мархта Россиянь региоттнень эса тяниень пингонь музыкальнай практикать коряс опытса. Тя пуромкссь нинге весть няфтезе, што Саранскяйсь и М.Е.Евсевьевонь лемса Мордовскяй государственнай педагогическяй институтсь—культурнай, научнай и образовательнай центрат.
Васенце шиня, 16 ноябрьста, ульсь пленарнай заседаниясь, конань эса примасть участия Российскяй Федерациянь Композиторонь Союзть, Мордовия Республикань Композиторонь Союзть, Мордовиянь кой-кона министерстватнень и ведомстватнень представительсна.
Пленарнай заседаниять панжезе и вятезе М.Е.Евсевьевонь лемса педагогическяй институтть научнай работать   коряс  проректороц  Т.И.Шукшина.
Сяда тов вал максфоль Мордовия Республикань культурань, национальнай политикань, туризмань и архивнай тевонь министрть васенце заместителенцты А.И.Карьгинонди. Александр Иванович А.М.Чушкинонь лемста и эсь эздонза азсь седиста моли лямбе валхт Н.В.Кошелевати и шарфтсь башка мяль сянди, што Нина Васильевна фалу маштозь нолясыне тевс лама вайгяльса морамать, мокшэрзянь моротнень.
Мордовскяй (мокшень и эрзянь) народть Межрегиональнай общественнай организациянц Исполкомонц председателец А.С.Лузгин лятфтазе композиторть эряфонц и творчествань кинц. Сонь моронзонды, кле, оцю вешфкссь, морсесазь синь рузонь ломаттне, мокшетне, эрзятне, татархне… «Лица России» альбомти сон сувафтф Мордовиять эзда ськамонза.
Пуромксса корхтасть и лия региоттнень эзда саф инжихне: профессорсь Э.Б.Абдуллин (Моску ошсь), искусствоведениянь докторсь О.В.Радзецкая (Моску ошсь), а стане жа сят, кит лац содасазь Нина Васильевнань, работайхть мархтонза: Л.П.Кирюковонь лемса Саранскяень музыкальнай училищать директоронц заместителец О.В.Якунчева, МАССР-нь искусствань Заслуженнай деятельсь А.И.Макарова (Буянова), ламотне лиятне.
Тяка шиня ётась Н.В.Кошелевать произведениянзон концертсна. Пингстонза эсь искусстваснон няфтезь И.М.Яушевонь лемса Государственнай музыкальнай театрань артисттне, Л.П.Кирюковонь лемса Саранскяень музыкальнай училищань и М.Е.Евсевьевонь лемса Мордовскяй государственнай педагогическяй институтонь преподавательхне и студенттне.
17 ноябрьста Всероссийскяй научно-практическяй конференциясь работась секциява. Ванфтольхть Н.В.Кошелевать творческяй биографиянцты, музыкально-общественнай и педагогическяй тевонзонды лемтьф и лама лия кизефксне.
Т.АЛЬШИНА.

23.11.2017 №46
 
 
 

 
НОВОСТИ
 

УШЕДСЬ «Шумбрат, Мордовия!»—«Vivat, Чемпионат!» ФЕСТИВАЛЬСЬ

25.10.2018  № 42
 
 
 

Панчфт и казнет—республикань учительхненди

Торжественнай мероприятияс, кона лемтьфоль Международнай учителень шити, И.М.Яушевонь лемса музыкальнай театрав пуромкшнесть учительхне марнек республикаста. Профессиональнай праздник мархта синь поздравляндазень Мордовиянь Оцюнясь Владимир Волков.
—Учительсь—тя аф аньцек профессия, тя ваймонь венемома, аф тёждя, ответственнай и оцюдонга оцю труд,—мярьгсь Владимир Дмитриевич.—Афкуксонь учительсь максси иттненди сяда лама азф школьнай программать коряс. Сон лезды ученикти шарьхкодемс эсь прянц, няфтемс ломанень цебярь ширензон, мумс эсь кинц эряфса.
Республикань Оцюнясь азсь кафта важнай цельхть, конат ащихть отечественнай образованиянь системать инголе. Васенцесь—сувамс мирса инь цебярь кемоттнень лувксс. Омбоцесь—тиемс воспитаниянь система. Тянди водендаф «Образование» од национальнай проектсь.
11.10.2018  № 40
 
 
 

Республикань предприятиятнень продукциясна пачфневи миронь 80 странас

Пяденцяста, 28 сентябрьста, Мордовия Республикань Оцюнясь В.Д.Волков примась участия торжественнай пуромксса, кона лемтьфоль Машиностроителень шити. Мероприятиясь етась Рузонь Государственнай драматическяй театраса. Залу пуромкшнесть республиканскяй предприятиянь представительхне, отраслянь ветераттне.
Пуромфнень поздравляндамста В.Д.Волков лемдезе машиностроениять республикань экономикать  седикс и моторкс, вдь сонь эздонза ламода ащи лия сфератнень работасна.
Азфоль, што тяддень кафкса ковста промышленнай производствань индекссь арась 111 процент. Странаса тя фкя инь цебярь показательсь. 2018 кизоня республикаса нолдаф 119 миллиард цалковаень питнеса промышленнай продукция, мезсь 13 процентта сяда лама мелянь кизоть коряс. Республиканскяй кемготува предприятиятнень эса эряфс етафневихть производствать  келептеманц и одкстопнеманц коряс проектт. Касонды инновационнай продукциять лувксоц. Производствань марстонь объемть эса сонь талекац—29 процент. А тяфтама отраслятнень эса, кода электроннай и оптическяй изделиянь производствась, тя показательсь пачкодсь 77 процентс.
04.10.2018  № 39
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин