Поиск по сайту: 
 

Архив
 октябрь 
 2018 
пн вт ср чт пт сб вс
1234567
891011121314
15161718192021
22232425262728
293031    

 
 

 

Наши мокшанские сыновья и дочери

Григорий Яковлевич Меркушкинонь шачема шиста 100 кизонь топодеманцты

Мокшэрзянь народть кайги лем цёрац
Тячи Г.Я.Меркушкинонди—учёнайти, педагокти, драматургти, государственнай деятельти топодель 100 киза. Григорий Яковлевич шачсь Инсарскяй райононь Исавеле мокшень велеса 1917 кизонь 23 ноябрьста. Великай Отечественнай войнань участник. Ранендафоль. Сяльде заняфоль мирнай трудса. Ульсь научно-исследовательскяй институтонь директоркс, просвещениянь министркс, республикань Министронь Советть Председателенцты заместителькс, партиянь Мордовскяй обкомонь секретарькс. Г.Я.Меркушкин лама киза ульсь Мордовскяй госуниверситетонь ректоркс. Нльне стака азомска, мзяра вий и эрьгя сон макссь, штоба университетсь ушедоль работама, кеподель кеме пильге лангс, кочкаль-пуроптоль вийхть. Сонь лемоц сембе пингс сувай странань фкя инь оцю вузть историяс.
Г.Я.Меркушкин лац содаф и кода драматург. Народоньконь инголе заслуганза пефтомот. Сон сембе эряфонц максозе сянкса, штоба няфтемс кить содамошитненди, валда эряфти.
 
ЭРЯСЬ ПАРОНЬ ТИЕНДЕЗЬ
—Григорий Яковлевич Меркушкинонь эряфоц кемоста сотфоль Мордовскяй государственнай университетть мархта. 1960 кизоста сявомок 1969 кизоти молемс ульсь тоса ректоркс. Сонь пингстонза од университетсь пяк курокста кассь оцю учебнай заведениякс и арась фкя инь содафокс странаса.
Г.Я.Меркушкин ульсь аф аньцек пяк цебярь руководителькс, учёнайкс, драматургокс, но и пяк цебярь ломанькс. Сон маштсь и фалу эряскодсь лиянди лездома. Азондан аньцек фкя пример.
Весть «Мокшень правдать» редакцияс, коса мон покодень, сувась ичкоздень раднязе Галя Васинась—Мокшень Баймакста стирнясь. Сон аделазе средняй школать, кирдезень экзаметтнень университету, но ашезь ёта конкурсс коре. Стирнясь авардсь, кле, семьястонк кефкие шабаста мон ськамон сатонь средняй образования и надиянь поступамс университету. Тя мяльть мархта сави пращамс.
Галять аляц войнань инвалид, тядяц синдезе пильгонц и стане жа арась инвалидокс.
Мон сёрмадонь стирть алянц лемста заявления, конань мархта молеме университетонь ректорти Г.Я.Меркушкинонди. Лувозе сон сёрматфть и мярьгсь:
—Да мес стирнясь ашезь са сяда инголе. Тяфтама биография мархта Васинать вастоц университетсонк!
Григорий Яковлевич арьсезевсь, сёрмадсь мезе-бди и пшкядсь:
—Моледа химико-биологическяй факультетонь деканть ширес и максость тя кагодть.
Минь молембачк лувоськ резолюциять: «Мук возможность примамс тя стирнять тонафнема». Деканць путозе сонцень резолюциянц: «Примамс». И Галясь кармась тонафнема, лац аделазе университетть. Эздонза лиссь цебярь педагог.
Григорий Яковлевич пара седи ломанель. Тяфтамкс сон ляды сятнень мялямса, кит содазь Г.Я.Меркушкинонь, кит покодсть мархтонза, сатнесть эздонза лезкс.
М.БЫЧКОВ,
журналист, войнань и трудонь ветеран.
 
ТЯШТЕНЦ КРЬВЯСТЕЗЕ СОНЦЬ
—Г.Я.Меркушкин васендакиге мяляфтови тейне кода университетонь ректор. Сон тиезе вузть авторитетнайкс, панжемок тяса од кафедрат, лабораторият и факультетт стама специальностень коряс, конатнень тя крайса мзярдовок ашеськ куленде. Тиемок научнай проектт, сон аноклась теест кеме базат, сотнезень синь странать заводонзон и оцю вузонзон мархта. Тоса тястонь преподавательхне и студенттне ётнесть эрявикс практика. Меркушкинонь пингста университетонь библиотекась арась афкуксонь научнай библиотекакс, козякодомок лама книгаса, конат кучфтольхть Москувонь и Ленинградонь исследовательскяй центратнень эзда. И арьсемок Григорий Яковлевичень колга, сонь эряфонь кинц колга (школань и училищань учитель, национальнай институтонь директор, народнай образованиянь министр, идеологиянь коряс обкомонь секретарь, оцю учебнай заведениянь ректор), шарьхкодьсак: сон тейнек сась аф стак, сонь вятезе тейнек сонць эряфсь, а эряфозонк максозе сонць Шкайсь. Тиемок университетть наукань и культурань оцю центракс, Меркушкин панчсь од кит республиканьконь виияфтоманцты.
Григорий Яковлевичень лямбе валса лятфнесазь Мордовиять сембе ломаненза, сонь учителенза, инженеронза, писателенза, наукань деятеленза. Сон ульсь ламонди кельгови ломанькс.  Г.Я.Меркушкинонь куломац кандсь оцю ризф марнек народоньконди.
А.ШУЛЯЕВ,
Россиянь Писателень союзонь член, Мордовия
Республикань культурань Заслуженнай работник.
 
ЛЯМБЕ ВАЙМЕ
Мордовиянь Народнай поэтть И.М.Девинонь лятфнеманза
—Кода драматург и историк, Г.Я.Меркушкин башка мяль шарфнесь эсь творчествасонза учителень образть няфтеманцты, и тя персонажсь васьфневи пцтай сембе пьесанзон эса. Улема, тя сяс, мес сон шачфоль учителькс. И ульсь учителькс аф аньцек эста, мзярда сувсесь школань классу или вузонь аудиторияв, но и эсь кабинетсонза—кода институтонь директор, просвещениянь министр или университетонь ректор. Сон ульсь учителькс эстовок, мзярда лисендсь народть ёткс—хуш ошса, хуш велеса, хуш коса...
Прафтозь прафтсь народоньконь историянц тонафнеманцты. «Шинь стяма» драмац лемтьф гражданскяй войнати. Ся войнаса шавовсь Григорий Яковлевичень аляц—Яков Семенович, и пьесать идеяц шачсь писательть пряса кода цёрань мялям сонцень алянц и лиятнень аляснон, атяснон колга. Драмась серматф аф эста, мзярда Меркушкин работась научно-исследовательскяй институтонь директоркс, афи эста, мзярда ульсь просвещениянь министркс, а сянкса эрявсь ровна кемонь кизот, штоба сембе ширде тонафнеф материалсь гражданскяй войнать колга строчканянь строчка валголь акша кагодс и араль ломаттнень сельминголест живойкс ётаф пингоньконь лятфнеманкса.
Историческяй темась, а сонь мархтонза и учителень темась няфтьфт «Поэтть тяштец» сценатнень эсовок, коса налхкихнень ламосна аф сурста потяф ломатть, а мокшэрзянь народть ёткста лисьф поэтсь Захар Федорович Дорофеев, ученайсь Макар Евсевьевич Евсевьев и мокшэрзянь васенце композиторсь Леонтий Петрович Кирюков.
Сон кельгозень историять и литературать. Кельгозе поэзиять, А.Пушкинонь, М.Лермонтовонь, В.Маяковскяень, С.Есенинонь, А.Твардовскяень стихснон эзда лама содась. Азондозе сонць, кода повондсь фкя палас Твардовскяень стихонзон мархта Высшай и специальнай образованиянь министерстваса, коза яксесь сидеста университетонь тев мархта:
—Сувань министрть приемнаезонза, эстеенза азорти аф ноляйхть эсон, кле, пяк заняф, архт тяза, архт тоза. Якан и косовок аф лисенди тевозе. Эста сувань министрть фкя заместителенцты. А ся кизефни: «Мес мондине, аф сянди-сянди сувать?» Кяжиянь и лувине теенза: «В том-то вся и закавыка и особый наш уклад, что от мала до велика все у нас руководят…»—«Что-о-о?!—ювадсь лангозон министрть замоц.—Как вы смеете?!» «Нят, мярьгонь, аф монь валхне, а «Теркин на том свете» поэмаста экскурсоводсь тяфта корхтай. «Какой еще экскурсовод?!»—«Известия» газетаса, мярьгонь, печатлаф, ваность тоста». И тунь ширденза. А министрти сяка сувсень, виде, аньцек омбоце шиня...
Палозь палома—тяфта ётась сонь марнек эряфоц, конань кувалмоц ульсь сембоц кодгемонь фкя киза и кафта кофт. Калмамстонза университетонь студенткатне якстерь атласонь тодуня лангса кандозь сонь орденонзон: Ленинонь ликонц мархта—республикасонк всеобщай семилетняй образованиять ётафтоманц инкса, Боевой Якстерь Знамянь—фронтса подвигонзон инкса. «Знак Почета»—мирнай пингста цебярьста трудендаманкса и ламоль медальдонза. Сон—МАССР-нь народнай просвещениянь Заслуженнай работниколь, исторический наукань кандидатоль… А сембода оцю званияцоль: сон лямбе седи Ломанель.
 
МЯЛЯМСЬ КОЛГАНЗА ФАЛУ ЭРЯЙ ЛОМАТТНЕНЬ СЕДИСА
Григорий Яковлевчень седи маласонзольхть Мордовиянь сембе писательхне, конат 1950-це кизотнень кеподезь литературать од серес, няфтезь—ули мезень колга сермадомс. Мордовиясь—аф аньцек сёронь касфни республика, сонь касыхть заводонза, сонь электрическяй лампанза валдопнесазь аф аньцек мокшэрзянь крайть, но и Москувонь ульцятнень и дворецнень.
Строявсь Чамзинкать маласа Алексеевскяй цементнай заводсь. Григорий Яковлевич кучсь тоза писательхть. «Цементнай заводонь строяма» тусть Никул Эркай и Тимофей Якушкин. Тумстост Г.Я.Меркушкин мярьгсь: «Ваность, кода тоса работайхть, кода стяфтсазь пильге лангс странасонк инь оцю цементнай заводть. Няйсасть, кода эряйхть строительхне, мезе теест аф сатни. Лездода, кда эряви лезкс».
Мезе няйсть тоса писательхне, кеподезе мяльснон. Акша пуркс ащи кувака  панттнень ваксс стясть стройкань кратт. Сядот рабочай илештень кятть тиендезь тевснон: маразь заводть стенанзон, усксть кирпицьт, бетон.
Писательхневок аноктольхть куцемс стенань марама, а каменщикне ашезь нолда. Ваность, кле, кода маратама и кда тонаттада, эста, пади, нолдатядязь. Тонафнесть писательхне эздост, етка пингста корхнесть мархтост, сотцезь тевснон, сотцезь эряфснон, арасть теест ялгакс. А стройкань вагоннянь стенаса эвондакшнесть «боевой листокт» и стенгазетат, коса писательхне азондозь, кие кода покоди, кода касы менели цементнай заводсь, шнашендозь цебярьста покодихнень, повондсь кой-коста нолатненди. Сятнень колга сермадсть «Не жди цемента от такого элемента».
Аф стак ащемда ульсть Никул Эркай и Тимофей Якушкин цементнай заводонь строяйхнень ширеса кой-мзяра недяля, аф весть сашендсть сей и сяда меле. И шачсть Никул Эркаень од стихонза и поэманза од заводонь строяйхнень колга, синь инь оцю арьсемаснон колга. А Тимофей Якушкинонь тяда меле эвондась «Лысая гора» романоц ся пандть колга, конань ваксс стясь республикасонк инь оцю заводсь и ушедсь цементонь ноляма марнек странаньконди.
Григорий Яковлевич пара мяльса ванць писательхнень лангс, няезень синь асуснон. Лиссь Тимофей Кирдяшкинонь «Кели Мокша» романоц. Лиссь «Зарево над Рузаевкой» повестсь 1905 кизонь революциять колга. Сермадозе аф кунардонь фронтовиксь Федор Андрианов. Рузонь кяльс етафтф Василий Коломасовонь «Лавгинов» романоц. Сермадозе нинге войнада инголе. Кой-кона критикне апряказь—бта Лавгинов арась рахсеви геройкс, аф пара ширде няфнесы велень ломанть эряфонц. Но кода няевсь, Лавгинов аф аньцек рахсефти, возси сяванц мархта, сон и панжада вайме ломань, арьси ладямс эсь эряфонц кода эряви, анок лездомс ломаттненди эрь тевса.
Григорий Яковлевич сонцьке кунара ни писателель. Аньцек ашезь энялькшне примамс Писателень союзонь членкс. Тяфтаконга содазь. 1955 кизоня Саранскяйса няфтьфоль «Народть лемста» пьесац.
Тя пьесаса Меркушкин няфтезе мокшень велеть эряфонц колмогемонце кизотнень, мзярда пуропневсть колхосне, а сяда тов—кода вятезь пряснон героенза войнаса. Лиякс мярьгомс, кие кода тюрсь врагть каршес: кие виде мяльхть и эряфонь аф ужяльдезь, а кие пелезня и эсь прянь ванфтозня. Тянь сюнеда эвондакшни конфликт-каршек ащема дивизиянь штабонь оцюнять Михаил Тумовонь и инженерть-капитанть Куштаевонь еткса.
Лиякс мярьгомс, Григорий Яковлевич панжезе сельминголен войнаса улемстонза сембе няйфть, а няйсь сон аф кржа, кода дивизиянь оцюнятнень эзда фкясь. Аф весть аноклакшнезень врагть каршес солдаттнень и сонцьке, майорсь, ульсь етксост, а аф косовок ширеса лямбе землянкаса. Соньге ашезь ужяльде врагть снарядонза и пулянза. 1944 кизоня Григорий Яковлевич стакаста ранендафоль, и пчксема меле прважафоль куду.
Мокшэрзянь шачема крайсь, мярьгат, учендозе сонь, аф кунардонь командирть, эсь народонц кунардонь и тяниень пингонц лац содаенц, историкть.  Тяка  1944  кизоня  Г.Я.Меркушкин путфоль оцюнякс Мокшэрзянь научно-исследовательскяй институту,  а колма кизода меле сон—Мордовиянь просвещениянь министр, сяда тов—Мордовиянь Министронь Советонь председателень полафты.
Тага етатама 1960 кизоти, мзярда Григорий Яковлевич арась университетонь ректоркс.
Университетоньконь лангс тяниень сельмоса ванозь дивандат, конашкава сон полафтсь. Инь вяри стясь главнай корпуссь. Строяф тяниень вешфкснень коряс. Сувасть эзонза компьютерхне, электроникась. Сембось, мезе эряви содамс студентти—инголенза, кядялонза. А кит тяса тонафнихть? Мордовиянь ошнень и велетнень эзда церат и стирьхть. И аф аньцек эсь республикастонк. Тяса тонафнихть од ломатть Россиять лама уженянзон эзда—Дальняй Востокста, Сибирьста, Ульяновскяй, Ростовскяй и лия областтнень эзда. И аф аньцек тоста. Университетсонк студентокс арасть церат и стирьхть Таиландста, Пакистанцта, Америкаста.
Григорий Яковлевич университетса студенттнень  лувксснон пачфнезень кемготува тежяньц. Эрь кизоня касфнезе университетть уликсонц. Строяфтольхть общежитият. Тя ульсь аньцек ушеткс.
А писательхнень мархта кеме соткст Григорий Яковлевич стаки кирдсь. Пяк смузю поэтокс лувондозе Александр Малькинонь. Александр Степанович аделазе Темникавонь педучилищать. Меркушкинонь пяк мялецоль, штоба Малькин тонафнель университетса. Нльне экзаменфтома сермадозе студентокс. Малькин кой-мзярс якась лекциянь кулхцондома, ульсь нльне зачеткац, путнесть теенза отметкат. Но сяда тов тевсь ашезь ту. Малькин прянек-мезнек «пезсь» поэзияти. Сермадсь од стихт. Лисендсть поэманза: «Аф куломать колга», «Мода», «Шинельса стирь», «Алдуня» и лиятне.
Меркушкин лац содазе, кода эрясть и мезе сермадсть мокшень и эрзянь васенце писательхне. Сидеста лувондозень Захар Дорофеевонь и Михаил Безбородовонь стихснон. А Захар Дорофеевонди лемдезе «Поэтть тяштец» пьесанц. Няфтезе, кода Захар Федорович тонафнесь Казанень инородческяй семинарияса, кода тоста панцезь, а профессорсь М.Е.Евсевьев мрдафтозе меки тонафнема, арась теенза васенце лездыкс.
Григорий Яковлевич лац содазе мокшэрзянь фольклорть, марса лия ученайхнень мархта аф кржа вий путсь «Масторава» эпость кочкаманцты, конань 2011 кизоня нолдазе Мокшэрзянь книжнай издательствась.
Содазень Григорий Яковлевич Мордовиянь сембе писательхнень, фалу лезнесь теест. Синцьке писательхне ульсть теенза пяк маласа, ванондозь театраса пьесанзон, няендезь пара и оцю тевонзон. Ульсь Григорий Яковлевич Меркушкин и писателькс, а сембода пяк эряфонь кельги и эсь народонц колга арьси ломанькс, кона кадсь эсь колганза инь пара лятфнемат.
Анатолий ТяпаеВ,
Мордовия Республикань Народнай писатель.
КОДАМА КЯЛЬСА ТЯШНЕМС?
А вага кода Г.Я.Меркушкин тяштсь рузонь и мокшэрзянь литературатнень сотксснон колга:
—Мокшэрзянь и рузонь литературатне сюлмафт, синь марстоннет историческяй судьбасна, марстонне эряма вастсна, фкя лацоннет эряма усолсна,   психологиясна. Тя соткссь лама веконь.
Нинге комозце кизотнень мокшэрзянь од литераторсь козякофневсь рузонь литератураста ётафнефса. А.Пушкин, М.Лермонтов, Н.Некрасов, А.Кольцов кайгозевсть мокшекс З.Дорофеевонь ётафтфса. 30-це кизотнень ушедсть ётафнемост кяленьконди Л.Толстоень, А.Чеховонь, М.Горькаень, В.Маяковскяень, рузонь и советскяй лия классикнень произведенияснон. Сяка пинкнень кемокснихть сотксне разнай национальностень писательхнень мархта, тонафневи лия нароттнень культурасна.
Тяни рузоннеста мокшэрзяннес ётафневи сяда кржа мокшэрзяннеста рузоннеть коряс. Туфталсь сянь эса, мес мокшэрзянь лувихнень культурнай уровеньцна сяшкава кассь, што синь рузонь авторхнень тяштьфснон шарьхкодьсазь апак ётафнек. Мекольдень кизотнень мокшэрзянь авторхнень произведенияснон сяда сидеста кармасть печатлакшнемост странань лия нароттнень кяльс. Н.Эркаень «Алешка» повестец ётафтф таджиконь, молдовань, литовскяй, белорусонь кяльс. М.Бебанонь, И.Девинонь, А.Мартыновонь стихсна кайгихть рузонь, грузинонь, чувашень, мариецонь, эстононь, белорусонь, коми, удмуртонь и лия кяльса.
Мокшэрзянь литературась рузонь лувити содаф аф аньцек ётафнемать вельде. Сонь эсонза васень пинкнень эзда сявомок ульсть мокшэрзянь писательхть, кит синць маштсть тяштема рузкс. Нят А.Завалишин, А.Дорогойченко, З.Дорофеев, Д.Морской. Синь пяк содафтольхть 20-це, 30-це кизотнень сембе союзонь лувихненди.
Кода содаф, кафта кяльса тяштемась пяк стака. Тянемс спорсихть: лувомс или аф лувомс писательхнень национальнайкс, кда синь тяштихть аф эсь кяльсост, но няфнесазь эсь народснон эряфонц. Тейнек-арам, кодама кяльса тяштьф произведениясь—хуш и важна, но тя аф тяка национальнай компонентсь эсонза. Важна сявок, кода писательсь панчсесы-няфнесы эряфть, ваны ли сон лангозонза эсь народонц сельмоса, панчсесы ли сон народонц ваймонц. И.Антонов и И.Пиняев лувондовсть мокшэрзянь авторкс, хуш и тяштсть рузонь кяльса. Сяка пингть Д.Морскоень кой-кит ашезь лувонда эрзянь авторкс, аф ваномок сянь лангс, што тематикац эрзяннель. Конешна, мокшэрзятнень колгавок можна тяштемс мокшекс, эрзякс, но стане, што, валда башка тоса мезевок аф ули мокшэрзянь.
Литератураньке колма кялень. И тя сонь козякофнесы, виияфнесы, кемокснесы.

23.11.2017 №46
 
 
 

 
НОВОСТИ
 

Панчфт и казнет—республикань учительхненди

Торжественнай мероприятияс, кона лемтьфоль Международнай учителень шити, И.М.Яушевонь лемса музыкальнай театрав пуромкшнесть учительхне марнек республикаста. Профессиональнай праздник мархта синь поздравляндазень Мордовиянь Оцюнясь Владимир Волков.
—Учительсь—тя аф аньцек профессия, тя ваймонь венемома, аф тёждя, ответственнай и оцюдонга оцю труд,—мярьгсь Владимир Дмитриевич.—Афкуксонь учительсь максси иттненди сяда лама азф школьнай программать коряс. Сон лезды ученикти шарьхкодемс эсь прянц, няфтемс ломанень цебярь ширензон, мумс эсь кинц эряфса.
Республикань Оцюнясь азсь кафта важнай цельхть, конат ащихть отечественнай образованиянь системать инголе. Васенцесь—сувамс мирса инь цебярь кемоттнень лувксс. Омбоцесь—тиемс воспитаниянь система. Тянди водендаф «Образование» од национальнай проектсь.
11.10.2018  № 40
 
 
 

Республикань предприятиятнень продукциясна пачфневи миронь 80 странас

Пяденцяста, 28 сентябрьста, Мордовия Республикань Оцюнясь В.Д.Волков примась участия торжественнай пуромксса, кона лемтьфоль Машиностроителень шити. Мероприятиясь етась Рузонь Государственнай драматическяй театраса. Залу пуромкшнесть республиканскяй предприятиянь представительхне, отраслянь ветераттне.
Пуромфнень поздравляндамста В.Д.Волков лемдезе машиностроениять республикань экономикать  седикс и моторкс, вдь сонь эздонза ламода ащи лия сфератнень работасна.
Азфоль, што тяддень кафкса ковста промышленнай производствань индекссь арась 111 процент. Странаса тя фкя инь цебярь показательсь. 2018 кизоня республикаса нолдаф 119 миллиард цалковаень питнеса промышленнай продукция, мезсь 13 процентта сяда лама мелянь кизоть коряс. Республиканскяй кемготува предприятиятнень эса эряфс етафневихть производствать  келептеманц и одкстопнеманц коряс проектт. Касонды инновационнай продукциять лувксоц. Производствань марстонь объемть эса сонь талекац—29 процент. А тяфтама отраслятнень эса, кода электроннай и оптическяй изделиянь производствась, тя показательсь пачкодсь 77 процентс.
04.10.2018  № 39
 
 
 

Турчак: В парламенты всех 85 субъектов России внесены законопроекты о сохранении региональных льгот для людей предпенсионного возраста

На сегодняшний день в парламенты всех субъектов Российской Федерации внесены
законопроекты о сохранении региональных льгот для женщин, достигших 55 лет, и для
мужчин 60 лет. Об этом сообщил секретарь Генерального совета «Единой России»
Андрей Турчак.
«На сегодняшний день в парламенты 85 субъектов РФ внесены законопроекты о
сохранении региональных льгот для граждан предпенсионного возраста – женщин 55 лет
и мужчин 60 лет. В 37 регионах законы о сохранении региональных льгот в прежних
возрастных границах уже приняты законодательными собраниями. Из них в 18 субъектах
РФ документы подписаны губернаторами. Еще в трех регионах данные законопроекты
рассмотрены и приняты в первом чтении. В 45 регионах России законопроекты будут
рассмотрены в самое ближайшее время: в большинстве – до конца сентября и в
нескольких – в октябре», – заявил Турчак.
По его словам, сохранение региональных льгот для людей предпенсионного возраста –
один из важнейших вопросов, который поднимался в субъектах РФ при обсуждении
совершенствования пенсионной системы. «Поэтому на совместном заседании
Генерального совета и Совета руководителей фракций мы приняли решение рассмотреть
вопрос о сохранении региональных льгот для людей предпенсионного возраста в
осеннюю сессию. Нашу инициативу в своем обращении поддержал Президент России
Владимир Путин», – напомнил Турчак.
24.09.2018
 
 

РЕГИОНАЛЬНАЙ ЛЬГОТАТНЕ ПЕНСИОНЕРХНЕНДИ ВАНФТОВИХТЬ

20.09.2018  № 37
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин