Поиск по сайту: 
 

Архив
 март 
 2019 
пн вт ср чт пт сб вс
    123
45678910
11121314151617
18192021222324
25262728293031

 
 

 

Тема дня

КАТК ФАЛУ КАЙГИ ТЯДЯТЬ ЛЕМОЦ!

27 ноябрьста Саранскяйса Республикань Кудть Оцю залсонза ётась Тядянь шити лемтьф пуромкс, конань пингста Мордовия Республикань Оцюнясь В.Д.Волков казезень Мордовия Республикань Оцюнять Лама идень тядянь Почётнай Дипломонзон, «Иттнень воспитандамаса оцю заслуганкса» Почётнай Дипломонзон.
Васенда Владимир Дмитриевич седи ваксста поздравляндазень саф тядятнень и мирт-тнень-рьвятнень Тядянь шить мархта. Сон эрь кизоня уленди ноябрь ковть мекольце недляшистонза, сяс тядде васьфтьфоль 26 ноябрьста.
—Тядять кивок аф полафтсы. Кивок аф машты тяфта кельгома, кода тянь тисы тядясь. Карксэземга сюконятама аватненди-тядятненди!—мярьгсь республикань Оцюнясь.
В.Д.Волков корхтась сянь колга, кодама лезкс государствась максси лама идень касфты тядятненди-алятненди и од семьятненди. Мяльса кирдеви демографическяй ситуациять цебярьгофтомац, ипотечнай эряма вастонь, школань, идень садонь строямась. Башка васта занци республиканскяй тядянь капиталсь, конань максоманц колга сертификаттнень получазь Мордовиянь ламоц семьятне.
—Мекольдень кизотнень аф кржа тиф тядякс улемань и идькс пингонь институтть кемокстаманц инкса. Ламода виияфтфт лама идень и социальнайста аф аралаф семьятнень ширень кирдемаснон коряс мератне,—азозе Владимир Дмитриевич.
Васенцекс казьфтольхть Лама идень тядянь I-це степенень Почётнай Дипломонь сатыхне. Ётксост Ковылкинаста кудазоравась, кафкса идень тядясь Е.Н.Калагина, Старошайговскяй райононь «Идень творчествань центрась» учрежденияста гардеробщицась, сисем идень тядясь Н.А.Марканова. Дипломда башка, эрь тядяти максфоль 30 тёжянь цалковай.
II-це степенень Почётнай Диплопне и ярмаконь премиятне—25 тёжянь цалковай—максфтольхть кота идень шачфты-касфты тядятненди. Тяфтапнень ёткс сувсихть Зубово-Полянскяй районцта школань директорть заместителец Л.Л.Адайкина, Саранск ошста мишендись-кассирсь О.А.Аношкина, лиятне.
III-це степенень Почётнай Дипломса и ярмаконь премияса (20 тёжянь цалковай) казьфтольхть вете идень шачфты-касфты тядятне: Ельниковскяй районцта  идень садонь воспитательсь Т.П.Чекмарева, Торбеевскяй райононь Салазгорь велеста кудазоравась Е.Т.Эрькина, Саранск ошста учительсь Н.М.Самарина, лиятне.
Лама идень тядянь Почётнай Дипломса сембе казьфненди максови эрь кизонь фкя пингонь ярмаконь выплата общественнай транспортса ардоманди—6 тёжятть цалковай.
Тя шиня иттнень воспитандамаса оцю сатфксонкса, семьянь инь цебярь койхнень вельмофтемаса и виияфтомаса оцю путксонкса Мордовия Республикань Оцюнять «Иттнень воспитандамаса оцю заслуганкса» Почётнай Дипломонц мархта казьфтольхть Рузаевкаста Людмила Анатольевна и Олег Николаевич Алехиттне—семьясост касыхть ниле итть, Кадошкинскяй райононь Паево велеста К.Д.Наумова, лиятне. Клавдия Даниловна образованияс коре учитель, касфтсь сисем шабат. Нилетне эздост тяниень пингть работайхть преподавателькс. Клавдия Даниловнань валонзон коряс, Наумофнень династияснон педагогическяй марстонь стажсна 400 киза. Диплопнень мархта максфтольхть ярмаконь премият 20 тёжянень цалковай.
Сембе тядятненди, конат састь васедемас, казьфтольхть павловопосадскяй руцят.
Т.АЛЬШИНА.

07.12.2017 №48
 
 
 

 
НОВОСТИ
 
 
 
 
 
 
 
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин