Поиск по сайту: 
 

Архив
 ноябрь 
 2018 
пн вт ср чт пт сб вс
   1234
567891011
12131415161718
19202122232425
2627282930  

 
 

 

Тема дня

МР-нь ГОССОБРАНИЯТЬ ПРЕДСЕДАТЕЛЕЦ В.В.ЧИБИРКИН ВАСЕТЬКШНЕСЬ ПРОЛЕТАРСКЯЙ РАЙОНОНЬ ЭРЯЙХНЕНЬ МАРХТА

1 декабрьста Депутатонь шить рамкаса Мордовия Республикань Государственнай Собраниять Председателец В.В.Чибиркин ётафтсь васедема Пролетарскяй райононь эряйхнень мархта.
Обедъёткть Владимир Васильевич ульсь  ошень 2№ поликлиникаса (ингольдень 14№ поликлиникась). Содафтсь пчксемань учреждениять работанц мархта, ванозень медицинскяй кабинеттнень, регистратурать, 40 вастонди шинь стационарть, корхнесь коллективть и сярядихнень мархта.
2№ поликлиникати канневи микрорайононь 90 тёжянь эряйсь. Меля тяса, кепотьксонди, кемокстафоль 550 тёжянь посещения. Медучреждениясь козякофтф тяниень пингонь оборудованияса, тяса ладяф врачненди электроннайста тяштьфтемась.
Коллективть мархта корхнемста В.В.Чибиркин азсь благодарностень валхт цебярь работанкса, а стане жа отмечазе, што 2018 кизонди федеральнай бюджетста здравоохранениять виияфнеманкса ладяф средстватне аф аньцек ашесть кирьфтав, но и касфтфт.
Эсь ширдест медработникне эняльдсть В.В.Чибиркинонди максомс лезкс диагностическяй оборудованиянь рамамаса, кона лезды мушендомс онкологическяй таргозьфнень и лия урматнень эсь пингстонза. Тяда башка, синь эняльдсть лездомс зданияти ремонтонь тиемаса, а стане жа поликлиникать пирьфонц благоустроендамаса.
Шить омбоце пялестонза МР-нь Госсобраниять Председателец ётафтсь васедема «Луч» Культурань кудса. Пролетарскяй районца тя инь оцю Культурань кудсь. Эрь шиня «Лучсь» примси 100 тёжяньда лама ломань. Райононь эряйхне, а стане жа Культурань кудть видеса работай творческяй коллектифне кунара ни арьсекшнихть зданиять капитальнай ремонтонц колга. В.В.Чибиркин надияфтсь, што ремонт обязательна кармай тиф.
О.КОЛЕДИНОВА.

07.12.2017 №48
 
 
 

 
НОВОСТИ
 

УШЕДСЬ «Шумбрат, Мордовия!»—«Vivat, Чемпионат!» ФЕСТИВАЛЬСЬ

25.10.2018  № 42
 
 
 

Панчфт и казнет—республикань учительхненди

Торжественнай мероприятияс, кона лемтьфоль Международнай учителень шити, И.М.Яушевонь лемса музыкальнай театрав пуромкшнесть учительхне марнек республикаста. Профессиональнай праздник мархта синь поздравляндазень Мордовиянь Оцюнясь Владимир Волков.
—Учительсь—тя аф аньцек профессия, тя ваймонь венемома, аф тёждя, ответственнай и оцюдонга оцю труд,—мярьгсь Владимир Дмитриевич.—Афкуксонь учительсь максси иттненди сяда лама азф школьнай программать коряс. Сон лезды ученикти шарьхкодемс эсь прянц, няфтемс ломанень цебярь ширензон, мумс эсь кинц эряфса.
Республикань Оцюнясь азсь кафта важнай цельхть, конат ащихть отечественнай образованиянь системать инголе. Васенцесь—сувамс мирса инь цебярь кемоттнень лувксс. Омбоцесь—тиемс воспитаниянь система. Тянди водендаф «Образование» од национальнай проектсь.
11.10.2018  № 40
 
 
 

Республикань предприятиятнень продукциясна пачфневи миронь 80 странас

Пяденцяста, 28 сентябрьста, Мордовия Республикань Оцюнясь В.Д.Волков примась участия торжественнай пуромксса, кона лемтьфоль Машиностроителень шити. Мероприятиясь етась Рузонь Государственнай драматическяй театраса. Залу пуромкшнесть республиканскяй предприятиянь представительхне, отраслянь ветераттне.
Пуромфнень поздравляндамста В.Д.Волков лемдезе машиностроениять республикань экономикать  седикс и моторкс, вдь сонь эздонза ламода ащи лия сфератнень работасна.
Азфоль, што тяддень кафкса ковста промышленнай производствань индекссь арась 111 процент. Странаса тя фкя инь цебярь показательсь. 2018 кизоня республикаса нолдаф 119 миллиард цалковаень питнеса промышленнай продукция, мезсь 13 процентта сяда лама мелянь кизоть коряс. Республиканскяй кемготува предприятиятнень эса эряфс етафневихть производствать  келептеманц и одкстопнеманц коряс проектт. Касонды инновационнай продукциять лувксоц. Производствань марстонь объемть эса сонь талекац—29 процент. А тяфтама отраслятнень эса, кода электроннай и оптическяй изделиянь производствась, тя показательсь пачкодсь 77 процентс.
04.10.2018  № 39
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин