Девинскяй Республиканскяй IV лувомаста

«СИНЕМАСУ ТЕРДЯН ИНЖИХТЬ»
30 ноябрьста Старошайговскяй муниципальнай райононь Сире Теризморгань Национальнай Культурань центраса мазыста и келиста «Синемасу тердян инжихть» лем ала ётасть Девинскяй Республиканскяй IV лувоматне. Тядде синь лемтьфтольхть Мордовия Республикань Народнай поэтть шачема шиста 95 кизонь топодемати.
Национальнай Культурань центраса покодихне Девинскяй лувоматненди анокласть козя программа, коса няфтьфтольхть концерт, И.М.Девинонь прозанц коряс инсценировкат, документальнай видеофильмат, книгань и мокшэрзянь щамбялень выставкат.
Девинскяй Республиканскяй IV лувомаса тяфта жа ульсть Мордовиянь писательхть и поэтт, артистт, журналистт и общественнай деятельхть.
Минь справканьке:
 Мордовия Республикань Народнай поэтсь и Заслуженнай писательсь, Государственнай премиянь лауреатсь, Российскяй Федерациянь культурань Заслуженнай работниксь, мокшэрзянь литературань классиксь Илья Максимович Девин шачсь 1922 кизонь 20 июльста Мордовиянь Старошайговскяй райононь Сире Теризморга велеса крестьянинонь семьяса.
Старошайговскяй средняй школать аделамда меле, 1940 кизоня, сон ушедсь покодема корреспондентокс «Мокшень правда» газетаса. 1941 кизоста сявомок и 1945 кизоти молемс тюрсь фашисттнень каршес Великай Отечественнай войнаса.
Войнада меле покодсь «Мокшень правда» газетаса, «Мокша» журналса. 1971-1984 кизотнень ульсь Мордовиянь писателень Союзть правлениянцты председателькс.
Сай пингонь Народнай поэтть васенце стихотворенияц «Сиде моронят» печатлафоль «Колхозонь эряф» журналса 1939 кизоня, мзярда И.М.Девин нинге тонафнесь школаса. А стихонь васенце сборникоц «Шобдавань заря» лиссь Мордовский книжнай издательстваса 1945 кизоня, мзярда  сонь  автороц солдат ялганзон мархта анокласть Берлин ошть сявоманцты!
Войнада меле И.М.Девин сермадсь и нолдась мокшень и рузонь кяльса поэзиянь и прозань кемотть книга. Стихонза тяфта жа етафневсть Россиянь лия народонь и венгрань, финонь и эстонецонь кяльс. Ламотне эздост, конатнень лангс сермадсть музыка содаф композиторхне Г.И.Сураев-Королев и Н.В.Кошелева, арасть содаф морокс. Прозаса серматф произведениянзон эзда васенце вастса ащи «Нардише» романоц.
Творческяй тевда башка, И.М.Девин республикаса вятсь оцю общественно-политическяй работа. Кочксевсь Саранск ошень Советонь и Мордовиянь Верховнай Советонь депутатокс, КПСС-нь Мордовскяй обкомонь членкс, партиянь XXVI съездонь делегатокс.
Народнай поэтсь казьф Якстерь Тяштень, Трудовой Якстерь Знамянь, Народонь Ялгаксшинь орденца, «За боевые заслуги» медальса. Мордовиянь Верховнай Советонь Почетнай Грамотаса и государственнай лия казнеса.
Кулось Илья Максимович Девин 1998 кизонь 13 ноябрьста. Калмаф Саранскяйса.
Старошайговскяй муниципальнай райононь Сире Теризморгань Национальнай Культурань центрать директороц, Российскяй Федерациянь культурань Заслуженнай работниксь Н.М.Кадерова:
—Тячи Национальнай Культурань центраса минь марняса лятфтасаськ кельгома велеряеньконь, седи ваксстонь питнидонга питни ломаненьконь, Мордовия Республикань Народнай поэтть Илья Максимович Девинонь.
И.М.Девин пяк крхкаста содазе мокшэрзянь народть козя творчестванц. И ламоть народнай творчествать козяшинзон эзда сон сувафтозе эсь поэзиянцты и прозанцты. Сяс синь фалу кармайхть малакс и питникс тячиень и сай пингонь лувити.
Сон тейне ульсь афкуксонь наставникокс. Сидеста сашендсь Сире Теризморгав, сувсекшнесь Национальнай Культурань центрав и фалу макссесь эрявикс лезкс.
Ломаттнень ёткса Илья Максимович ульсь Ломанькс! Сяс, койсон, сонь и бславазе Шкайсь арамс Мордовия Республикаса Народнай поэтокс!
Сире Теризморгань средняй школань директорсь  С.А.Видясова:
—Кельгома ялгат, ванан залть лангс—лад мялезон, мес сон пяшксе. А кочкамазь минь сембонь тяза Илья Максимович Девин, минь земляконьке, Мордовия Республикань Народнай поэтсь.
Сембе минь, тяза пуромфне, лац содасаськ Илья Максимовичень творчестванц, ушедомок «Панжи, панжи лайме порась» стихонц эзда и «Нардише» романонцты молемс. И марятама гордость поэтть и сонь творчестванц инкса, конань вельде сон тиезе содафокс эсь веленц, республиканц и народонц.
Тяса тячи лама идьта. Сяс теест пара ули содамс, кода тонафнесь школаса И.М.Девин. Сяда сире ломаттне мяляфтсазь, што эстонь пингть Сире Теризморгаса шабатне аделсесть аньцек сисем класст. А тяда меле тонафнема яксесть Сире Шайгав шабрань вели. Вов и И.М.Девин Сёвонь ляйть туркс, аф ваномок пизепнень, тялонь якшапнень лангс, яксесь тоза тонафнема. И школаса тонафнемстонза сон ашезь нолда фкявок ши, кочкамок эрявикс содамошит. И ня содамошитне, койсон, лездсть И.М.Девинонди эряфса и творчестваса сатомс ся тёкшнень, конат сатневихть аф сембонди.

Старошайговскяй муниципальнай райононь администрациять оцюнянц заместителец Н.А.Желвакова:
—Минь сатомшка сидеста васетькшнетяма мархтонт аф фкя лацонь иласа. Но Девинскяй IV лувоматне, конат тячи лемтьфт Народнай поэтть 95 кизонь юбилеенцты, эздост, конешна, ащихть башка вастса. И синь тейнек тя пингс арасть ни цебярь койкс.
2015 кизоня Старошайговскяй муниципальнай райононь администрациять оцюняц ладясь премия Искусствань и культурань областьса, конанди максфоль Мордовия Республикань Народнай поэтть И.М.Девинонь лемоц. Конкурснай комиссияти райононь педагокне и школаса тонафнихне фалу кучсесазь эсь стихснон, азксснон и творческяй лия работаснон, конат сёрматфт мокшень кяльса. Тя кизоня И.М.Девинонь лемса Искусствань и культурань областьса премияса казьфт: Сире Теризморгань средняй школань 9 и 11 класса тонафнихне Ирина Пивкина и Ангелина Назарова, Новотроицкяй средняй школань педагогсь А.И.Пронина и Старошайговскяй муниципальнай райононь школань лия тонафнихне и тонафтысна.
Оцю мяль вельде сембе азфнень казьсайне И.М.Девинонь лемса премияса.
Мордовия Республикань А.С.Пушкинонь лемса Национальнай библиотекать главнай библиотекарец В.И.Пронина:
—Илья Максимович Девинонь лемонц кулемста инголет фалу эвондакшни весяла, эряфонь кельги ломань, оцю поэт и писатель. Сон фалу маштсь ломаттнень мархта корхтама, синь шарьхкодема и эрявикс лезксонь максома.
Поэтсь, улема, аф стак шачсь Сире Теризморга мазы велеса, кона келемсь мазыдонга мазы вастса, и коса тя пингс козят национальнай культурась, мокшень койхне-обуцятне, мокшень ваймось. И сембе ня козяшитне сувасть И.М.Девинонь поэзияс и прозас и синь вельдест пачкодсть мокшэрзянь сембе народти.
1938 кизоста сявомок, мзярда «Колхозонь эряф» журналса печатлафтольхть И.М.Девинонь васенце стихотворениянза, и тя пингс сонь творчествац тонафты эсонк кельгома эряфть, эсь моданьконь, эсь народоньконь и оцю родинаньконь—Россиять. И, койсон,  И.М.Девинонь поэзияц и прозац кармай тонафтома цебярти сай пингонь поколениятнень эса!
«Мокша» журналса поэзиянь отделть редактороц, Мордовия Республикань Заслуженнай поэтсь Р.К.Орлова:
—Кода содаф, мокшэрзянь литератураса сатомшка лама цебярь поэтта и писательда. Аньцек синьге ётксост эсь творчестванц коряс Илья Максимович Девин ащи эсь башка вастсонза.
Сонь творчествазонза тяльгсть сонь веконц сембе сяськоманза, сталмонза-зиянонза, кенярдеманза и павазоц. Сяс, койсон, И.М.Девинонь поэзияц и прозац фалу кармайхть тердема инжихть Сенем мастору, Синемасу, конань арьсезе-тиезе сонць Народнай поэтсь!
«Якстерь тяштеня» идень журналть главнай редактороц, Россиянь Писателень союзонь членць В.И.Брындина:
—Кельгома ялгат, пяк пара, што минь тячи тага васедеме и лятфнетяма Илья Максимовичень эса пара валса. Сон афкукс ся ломаттнень эздоль, конатнень ваксса фалу сяда лямбе, фалу сяда валда ушесь, фалу сяда мазы перьфпяльсь. И тянь, койсон, азсы эрь ломанць, кие хуш весть васетькшнесь И.М.Девинонь мархта.
И.М.Девин пяк лац содазень мокшень кяльть козяшинзон и маштозь нолязень синь тевс. Тяфта жа маштозь сон творчестванц вельде пачфнезе лувити ваймонь лямбонц и валдонц. И тянь мархта сонь поэзияц и прозац фалу кармайхть питникс лувити!
Мокшэрзянь народонь Межрегиональнай общественнай организациять Исполкомонц председателец, профессорсь А.С.Лузгин:
—Тейне пяк пара улемс тячиень мероприятияса, кона лемтьф Мордовия Республикань Народнай поэтть И.М.Девинонь творчестванцты и 95 кизонь юбилеенцты.
Конешна, И.М.Девинонь юронза тясот, Сире Теризморгаса, но эсь творчестванц питненц коряс сон сувси Россиянь лама национальностень литературати. Сонь поэзияц и прозац ётафневсть лама кяльс, сяс синь цебярьста содафт и тя пингонь Россияса.
Тяка пингть, И.М.Девин содаф кода общественнай и государственнай деятель, кона эсь тевонзон вельде тись лама цебярьда ломаттненди.
Сяс, койсон, И.М.Девинонь творчествац и сонь лемоц фалу кармайхть эряма народть ваймоса!
В.НЕСТЕРОВ.