Поиск по сайту: 
 

Архив
 декабрь 
 2018 
пн вт ср чт пт сб вс
     12
3456789
10111213141516
17181920212223
24252627282930
31      

 
 

 

Национальная тематика

«АЛЯЗТИ КЕМЕ НЕЖЕКС ФАЛУ УЛЬСЬ МОКШЭРЗЯНЬ МАСТОРСЬ!»

Профессорсь Т.Г.Меркушкина:
Аф кунара Саранскяйса ётасть государственнай и общественнай деятельть, учёнайть и педагогть Г.Я.Меркушкинонь шачема шистонза 100 кизонь топодемати лемтьф оцю пуромкст. Эсост примась участия Григорий Яковлевичень стирец Татьяна Григорьевна Меркушкина, кона эряй Москуса.
Т.Г.Меркушкина шумордазе В.В.Куйбышевонь лемса Москувонь инженерно-строительнай институтть. 1979 кизоста сявомок сон СССР-нь МВД-нь ВНИИПО-нь старшай научнай сотрудниколь, 1986-1990 кизотнень—отделонь начальниколь и СССР-нь МВД-нь ВИПТШ-нь докторскяй диссертационнай советть учёнай секретарецоль («Пожарнай безопасностсь», «АСУ», «Социальнай и экономическяй систематнень эса управлениясь» специальносттнень коряс).
Татьяна Григорьевна отставкаса внутренняй службань полковник, техническяй наукань кандидат, работай Россиянь МЧС-нь Противопожарнай государственнай службань Академияса, коса ПБС-нь кафедрань профессор.
Аф ваномок Саранскяйть, целайнек Мордовиять эзда ичкозе эрямать лангс, Т.Г.Меркушкина мзярдовок аф юксни мокшэрзянь масторть колга. Теенза кельгомать и ламоть лиять квалма азондсь корреспондентоньконди.
—Татьяна Григорьевна, сидеста улендят ёмла родинасот? Лажаткшнят-аф Саранскяйти?
—Саранскяи сашендан эстокиге, кода эвондай ётка пингозе. Тяса пяк лама раднядон, кафкса двоюроднай сазорне и брадне мирдьснон и рьваснон, идьснон, унокснон мархта. Сяс, мзярда семьянь келеса озсетяма шрать ваксс, эздонк уленди кодгемонть малава ломань. Старандан улендемс мала ломаннень шачема шистост. Кда аш праздник, сембе сяка сашендан кафта шис, сяс мес тяса калмафт алязе, тядязе, альняказе. Кода шарьхкодьсасть, мокшэрзянь масторть мархта сотксне пяк кемот.
—Ванат Мордовиять касоманц-виияманц, тяса мольфтеви тефнень, ётафневи пуромкснень мельге?
—Конешна! Аф аньцек ванан сембе вяре азфть мельге. Ламоц ялгане пуромкшнихть ширезон «мокшэрзянь илядьс». Мордовияв эрь сашендомстон Москуву усксян варения сазорнень эзда, медь, панкт и нльне мокшэрзянь масторса касфтф модамарь, республикаса тиф колбаса и сыр. Москуву мрдамдон меле тернесайне ялганень. Азондан теест, кода ащихть тефне Мордовияса. Сяс содафоне, кулемок телевиденияста или нинге костовок мокшэрзянь крайть колга, эстокиге гайфнихть тейне. Кой-конат ёрайхть пачфтемс сянь, мезть, кода арьсихть, аф содаса.
Фалу кельгине, кельгса и марян гордость родиназень инкса. Сидеста усксесайне мархтон ялганень Саранскяи, штоба няфтемс тя ошть мазышинц и, конешна, С.Эрьзянь лемса музейть. Аф ламотне содасазь, што алязе ульсь тевонь ушедыхнень эзда фкясь и участникокс, мзярда сивотьфоль корабль скульпторть С.Д.Эрьзянь Аргентинаста работанзон страназонк ускомаснонды. Тянь колга мес-бди юкстаф, но тя тяфта. Эрьзянь галереянц содаса идькс пингста. И хуш скульптуратнень кядьса токсемс аф мярьгондеви, сембе сяка музейса эрь улемстон малаткшнян Венера скульптурати и токсеса сонь.
—Татьяна Григорьевна, шамас коре пяк шарфтат аляцень лангс. А мезе азат характерцень колга?
—Спасиба. Кизефксцень васенце пялец—инь оцю шнамась эряфсон. Кда корхтамс характерозень квалма, то кой-мезе сявонь и тядязень и алязень эзда. Алязе ляпе седиель, а мон, коста эряви, улендян кемокс. Кепотьксонди, тянь или тонань сатомста. Аф содаса, кода алязти вийс коре ульсь фалу ляткшнемс тяфтамкс. Нльне эряфонц ся пингста, конань колга аньцек тяни ушедсть корхтама, ашеме куленде эздонза кяжи, казяма фкявок вал ся ломаттнень лемс. Сон корхнесь тяфта: «Синь эльбятькшнихть, синь ужяльдемат. Пинге ётай—семботь шарьхкодьсазь». Нят алязень валонза.
—Эста, улема, ули кода азомс, што Григорий Яковлевич тонафтонзе инь эрявиксти: кяжень аф пандомати, простямати, каршезт тиф кальдявонь юкстамати?
—Тя тяфта. Аф ваномок вяре азфть лангс, алязе пцтай фалу заняфоль работанц мархта. Кудъетконь и семьянь ламоц тефнень вятезень тядязе. Кда арьсетяда, што семьяньке ащесь вете ломаньцта—шачфтыне-касфтыне и минь—колма иттне, то эльбятькшнетяда. Сяс мес тядязе лям пицесь кемонь литрань тяльги кастрюляса. И эрь недляшиня срхкафнесь шапакс эмалированнай оцю ведаркас. Инжикс киньге ширезонк ашеме терне, сяс мес радняньке ульсть эсь ломанькс и сашендсть мзярда мяльсна. Ваймама шитнень кудоньке пяшксель ломаньда! Сувамс Гриша оцять ширес корхнема. Тя, можна мярьгомс, святой теволь. Недяляньберьф, эрь шиня, ширезонк сашендсть ломатть кодамовок тев мельге. Мрдан школаста, а порогть маласа щапт-каряпт. Кие-бди сась алязти велеста. Кудсонк фалу ульсь тяфтама закон: «Эрь сайть лац-ряц васьфтьк, каваняк, а сяльде ни корхнек мархтонза». Сяс, мзярда касонь и ушедонь ярхцамбялень аноклама, то талакодонь, што тянь тейне ули кода тиемс аньцек лама ломаненди, кемонь литрань тяльги кядьгоса, а аф ёмла семьянди. Ям мархта оцю кастрюля, котлета мархта оцю пачкалга—вов мезсь лядсь мялямозон сембе пингс.
—Улема, тоньге мельгат ульсь кодамовок тев?
—Мзярда шабалень, якань кшинь рамама—котонь батон и нилень буханка равжа кши.
—Татьяна Григорьевна, мезть, койсот, аляце эсь эряфсонза путнезе васенце вастти?
—Аф ваномок стакатнень-сталмотнень лангс, алязе мзярдовок ашезень ноля кядензон. Коса афоль уле, эсонза фалу юрнась шачема-касома ширети кельгомань толсь. Теенза кеме нежекс фалу ащесь мокшэрзянь масторсь. Афкуксонь патриотоль.
—Тячиень пуромксса щафат-каряфат офицеронь кительса. Отставкаса внутренняй службань полковникат, Россиянь     МЧС-нь государственнай Противопожарнай службань Академиянь профессорат. Мезсь кошардонзе кочкамс эряфсот тя кить?
—Великай Отечественнай войнать пингста алязе, Григорий Яковлевич Меркушкин, гвардейскяй дивизиянь штабонь инь од начальниксель. Демобилизовандазь майоронь званияса. Арамс подполковникокс теенза ашезь удала стака ранениять сюнеда. Но сянь, мезсь ашезь сатов тядятненди-алятненди, тиема иттненди. Сяс ётафтыне эряфс касфтыезень мяленц. И тя оцю пуромксти сань внутренняй службань полковникокс щафста. Тя служебнай формазе. Мзярдовок ашень тиенде карьера карьеранкса, а сембе вийнень макссине тевозти, куцень служебнай куцеманятнень эзга.
—Мзяра кизоцель, мзярда эвондасть васенце поготтне?
—Комсь ветие кизоса аралайне кандидатскяй диссертациязень. Меле сань Противопожарнай оборонань НИИ-в и получайне старшай лейтенантонь васенце званиязень. Тяда меле, кода азыне, касонь служебнай куцеманява. Старшай научнай сотрудниколень, группань руководителелень, отделонь начальниконь заместителелень, учёнай секретарелень и стак тов. Тяни Академиянь профессоран.
—Мезе арьсят «Мокшень правда» газетать морафтыензонды и Мордовиянь сембе эряйхненди?
—Эряфса васенцесь—кельгомась. Кельгость эсь прянтень, мала ломанентень и Мордовиянтень!
—Спасиба!
Т.АЛЬШИНА.

07.12.2017 №48
 
 
 

 
НОВОСТИ
 
 

Единороссы Мордовии направили свои предложения для работы на предстоящем Съезде Партии

Обсуждение предложений, направленных на совершенствование основных принципов работы  партии  и повышении ее роли в современном обществе, прошло в ходе  региональной  партийной  дискуссии «Обновление -2018»,   которая состоялась 16 ноября в Саранске. Дискуссия  объединила   четыре  тематических блока,  касающихся обновления партии и создания эффективной политической организации; повышения коммуникаций и  взаимодействия с общественными институтами; технологических подходов в избирательных кампаниях и в межпартийной конкуренции; реальных  дел в решении проблем  конкретных людей  и  развития   всех сфер жизни общества. Итогом  стало пленарное заседание, в ходе которого была обобщена работа дискуссионных площадок  и рассмотрены наиболее интересные предложения, прозвучавшие в ходе обсуждений.  Лучшие из них  направлены   Региональным  отделением   «Единой  России»  в   Центральный исполнительный комитет Партии для обсуждения  во время работы    площадок первого дня Съезда Партии.  В ходе  региональной дискуссии был представлен широкий спектр мнений  по  вопросам, касающимся  сохранения  доверия к партии избирателей и повышения эффективности работы партийных структур.

 

20.11.2018
 
 
 
 
 

УШЕДСЬ «Шумбрат, Мордовия!»—«Vivat, Чемпионат!» ФЕСТИВАЛЬСЬ

25.10.2018  № 42
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин