Поиск по сайту: 
 

Архив
 ноябрь 
 2018 
пн вт ср чт пт сб вс
   1234
567891011
12131415161718
19202122232425
2627282930  

 
 

 

Наши мокшанские сыновья и дочери

СЕДИЕЦ ПАНЖАДА СЕМБОНДИ

Юбилей мархта!
9 декабрьста топоди 65 киза республикасонк содаф мокшаляти Николай Михайлович Палаевонди, «Мокшень правдать» цебярь ялганцты, пяк асу и смузю руководительти, лямбе седи ломанти. Сон сембе эряфонц етафнесы мокшэрзянь крайсонк, виензон, ёненц и тевонзон макссесыне республикать и сонь ломанензон эряфснон цебярьгофтоманкса.
Шачсь Н.М.Палаев Ковылкинскяй райононь Сире Драка мокшень велеса колхозниконь трудонь кельги семьяса. Нинге идькс пингстонза сон тонадозень велень пцтай сембе тефнень. Пирьфсост кирдсть жуватат, куднармотть, касфнесть перень сёрот, лядендсть тише, аноклакшнесть уштомбяль тялонди. Сембе тевса лезнесь сон аф аньцек родителензонды, но и велеряензонды.
А школань каникулатнень пингста, мзярда тонафнесь ни оцю класса, тушендсь ярмаконь добувама велеряензон мархта шабрань Пензенскяй области. Тоса, Мокшанскяй райононь «Отрадный» совхозса, ульсь постуфокс, разнорабочайкс, покодсь подсобнай рабочайкс стройкаса.  А армияв тумдонза инголе работась трактористокс Новосибирскяй областень Искитамскяй райононь «Улыбино» совхозса. Н.М.Палаевонь трудовой биографияц ушедсь пяк рана. И сонь ульсть оцю сатфксонза и асувоц аф аньцек тевонь тиендемста, но и тонафнемаса. Цебярьста аделамок Драка велень средняй школать, а сяс мес ульсь музыкальнай асушиц, эстокиге сявозь работама художественнай руководителькс Курня велень Культурань куду.
1971-73  кизотнень служась Советскяй Армияса, ульсь отделениянь командиркс, батареянь старшинакс. Армияда меле вете кизот  сон покодсь учителькс Васильевка велень основной школаса и тяка пингть заочна аделазе М.Е.Евсевьевонь лемса Мордовскяй пединститутонь физико-математическяй факультетть. Школаса ульсь васенда комсомольскяй секретарькс, а сяльде кочказь цеховой парторганизациянь вятикс.
1978 кизоня  сон кочкафоль парткомонь освобожденнай  секретарькс «Мичуринский» совхозу, а кизода меле етафтфоль работама КПСС-нь Ковылкинскяй горкому инструкторкс.
1987 кизоня Н.М.Палаев получазе омбоце высшай образованиять: аделазе Н.П.Огаревонь лемса МГУ-нь экономическяй факультетть. Кода трудонь кельги и перспективнай ломанень, сонь путозь эсь районозонза «Покровский» совхозонь директоркс, коса работась мянь кефкие киза. Пяк лама вий и эрьгя савсь путомс Н.М.Палаевонди, штоба кеподемс пильге лангс тя срафтф-калафтф хозяйствать. Маштсь Николай Михайлович, кода цебярь дипломат, вяре ащихнень мархта корхтама, лезксонь анама. Н.М.Палаев пяк лама цебярь тев тись Покровскяй велети и тостонь марстонь хозяйствати: полафтозе велеть «шамаликонц», одкстоптозе хозяйствать сембе инфраструктуранц.
Мзярда сась сон вели работама, школаса ульсь 30 ученик. Тумдонза меле средняй школаса тонафнесь ни 87 ученик. Сонь пингстонза строяфоль и  панчфоль средняй од школа, административнай цебярь зданият, совхознай, од специалист-тненди и рабочайхненди 26 квартира. Нинге строяфтольхть водопровод, нолдафоль ведь, жуватань механизированнай 2 од картт, зерносушилка, зерноток, утопт, мастерскойхть, гарашт, рамафоль велень хозяйствань лама инвентарь и техника. Но ульсь оцю прябала: ашесть сатне цебярь кадратне и специалисттне хозяйстваса. Од директорти савсь вешендемс кадрат райононь велетнень эзда, а грамотнай специалистт—ошста. И сон мушендсь, сяс мес киньге вестевок ашезе васькафне, мезе надияфнесь—семботь тиендезе. Кепотьксонди, аньцек шабрань Ежка велеста етасть работама и тоза эряма 12 од семья, конатненди максфтольхть квартират.
Сире ломаттне корхнихть: «Кодама азорсь—стапт работникневок». Ваномок Н.М.Палаевонь лангс, хозяйствань работникневок работасть виень аф ужяльдезь, сяс мес азорсь трудонь дисциплинать мельге ванць  кемоста. Ашезень кельге нолатнень, васькафнихнень и симихнень. А цебярь работникне фалу ульсть почетса: казендевсть питни казнеса, премияса, санаторияв путевкаса и стак тов. Тячемс Покровскяй  велеса однек-сиренек лятфнесазь Н.М.Палаевонь аньцек шнама валса, спасибакшнихть теенза. Цебярь тевонзон и оцю авторитетонц инкса 1994 кизоня кочкафоль Ковылкинскяй райононь оцюнякс. Аф тёждяль ся пингсь. Полафтфоль марнек странаса эряфсь перестройкать мархта. Лама вий и эрьгя савсь путомс Н.М.Палаевонди, штоба полафтомс Ковылкинскяй районца тефнень цебярь шири. Шобдаста-шобдас сашендовсь работамс теенза, васетькшнемс ломаттнень мархта, улендемс лама вастова. Кода и лия вастова, районца шамордсть тефне. Пцтай киза ашезь работа Силикатнай кирпицень заводсь. 300 ломань лядсть работафтома, ушедсть оборудованиять салсема. Тевфтома лятф ломаттне трясть пря салазь-колазь. Заводть пяк ламоль лия шумодонза: ЖКХ-нь услуганкса, 27 квартирань эрямань апак аделак кудть строяманкса  и стак тов. Эрявсь  анамс лезкс Правительствать ширде, штоба валхтомс коммунальнай шумотнень заводть лангста. 1995 кизоня панчфоль районнай ЖКХ-сь. Н.М.Палаевонь пингста работама нолдафоль аф аньцек заводсь, но и лама тифоль сянкса, штоба нолдамс  ячеисто-бетоннай блоконь од цех. Тяка пингть поселкав нолдафоль газ. Оцю кенярдемакс ульсь заводонь рабочайхненди 27 квартирань од кудть эксплуатацияс максомац. Валом-валом петневсть тефне лия вастсовок. Сонь пингстонза рамафоль лофцти переработкань тиемс оборудования. Лездсь Москувонь Правительствась и Н.И.Меркушкин. Ковылкинскяй лофцонь заводсь ушедсь ноляма 35 видонь лофцонь продукта. Лама цебярь тев тись Н.М.Палаев эсь райононцты. Сонь пингстонза  району пачкодсь газсь, мезсь цебярьгофтозе ломаттнень эряфснон. Строяфоль 12 вайгяльбень кувалмоса оцю давлениянь газопровод Краснослободскяй райононь Ефаево велеста сявомок Ковылкинскяй райононь велетненди и хозяйстватненди.
Газть етафтомста пяк ламоль прябалада: эрявсь кочксемс ярмак ломаттнень кядьста, анцемс Мордовиянь Правительстваста, рамсемс  питни оборудования, техника, нолдамс газопроводть модать алга и модать ланга, ломаттнень кудга. Н.М.Палаевонь пингста лисьфоль предложения мархта Мордовиянь Правительствати, штоба тиемс и поладомс Ковылкино-Торбеево кить, лама велес нолдафтольхть автобуст. Ушетфоль и мольсь стройка Рузонь Лашма и  Михайловка велеса. Сяс тячемс райононь ломаттне лятфнесазь сонь аньцек шнамань валса.  Сембе содасаськ, конашкава стакатольхть ся пинкне сембе странати, а Н.М.Палаев ашезь ащекшне озада кресла лангса, фалу ульсь ломаттнень ёткса и арьсесь колгаст.
Николай Михайлович видешинь кельги, оцю ответственностень маряй ломань, ломанень психологиянь содай. Сон афоль безярде киньге эзда. Ашель стама веле или веленя, коса сон ашезь уленде и коса сонь афолезь сода. Сон корхнесь виде ваймот сембонь мархта, кит пшкятькшнесть теенза. Николай Михайлович аф прянь няи ломань, вестевок ашезе  «юксне» родной мокшень кяленц. Мокшетнень мархта фалу корхнесь мокшекс  хуш ошса, хуш велеса, мезсь нинге сяда малакс ломаттненди тиендезе сонь.
А мон, луви ялгась, азондса аньцек сянь, мезе тифоль сонь пингстонза монь шачема  Ежка велесон. Сон сидеста улендсь минь велесонк и сонь пяк кельгозь ежкяряйхне нинге эста, мзярда работась совхозонь директоркс Покровскяй велеса. Содамок сонь панжада ваймокс улеманц, велеряйхне пшкятькшнесть теенза аф виздезь-пелезь, а надиязь, што сон лезды теест. Аф аньцек башка ломаненди, а сембе Ежка  велети сон тись лама цебярьда.
Кепотьксонди, сонь пингстонза  минь велесонк строяфоль асфальтонь ки, кафта железобетоннай сетть ляйнятнень туркс, ёжкяряйхне тячемс лемнесазь сонь лемсонза: «Палаевонь киц», «Палаевонь седенза».
Оцюволь кенярдемась, мзярда вели кармась сашендома рейсовай автобус. Тячемс эрь шиня ошста сашендыхть «Палаевонь киге» ежкяряйхнень идьсна тядяснон-аляснон варжама и теест лездома. Велеряйхне спасибайхть тянкса Палаевонди и корхнихть эсь етковаст:
—Кда аф «Палаевонь киц», тячи Ежкав фкявок ломань афоль ляда. Сембе ворьгодельхть тяста. А тяни вели мянь Америкаста сашендыхть.
Велезонк ся пингть нолдафоль газ, ташта медпунктсь етафтфоль кирпицень од зданияс. Сонь лезксонц вельде Ежка велень Советти максфоль грузовой автомашина, мезе велень Советса мзярдовок ашель. Сон пяшкотькшнезень велеряйхнень пцтай сембе наказснон, эняльдемаснон. Ежка велень эряйхне А.Веряскин и А.Тремаскин сермадсть и нолдасть книга эсь велеснон и сонь цебярь ломанензон колга, кона канни «Мордовия моя! Наша малая родина—Ежовка» лем. Тя книгась лятфнема аф аньцек Ежка велеть и велеса шачфнень, но и азондови Н.М.Палаевонь сембе пара тевонзон колга. Ежкяряй  «американкась» Наталья  Козеева книгать колга «Праздник села» иласа мярьгсь:
—Оцюдонга оцю сюкпря книгань тяштихненди-нолдайхненди. Мархтон сявса Америкав аф аньцек шачема велезень историянц, «эсь велеряйнень», но и аф юкстаса вестевок Н.М.Палаевонь паронц асфальтонь кинь строяманкса шачема-касома велезон. А Ёжкань «зрнянь кядь» ломанць В.Ф.Кижваткин отмечазе Н.М.Палаевонь эсь лацонза: тиезе сонь бюстонц тяфтама тяштьфкс мархта: «Н.М.Палаеву, построившему «дорогу жизни» в Ежовку, от благодарных сельчан», конань ванфнесы культурань коллекциясонза. Кода няйсаськ тяфтама ломаттнень народсь пяк кельгсыне и вестевок аф юкснесыне.
Ковылкинскяй райононь эряйхне Николай Михайловичень кочксесазь депутатокс. А 1990-99 кизотнень сон ульсь кочкаф МАССР-нь Верховнай Советонь и Госсобраниянь депутатокс. Сон работась Мордовия Республикань Госсобранияса аграрнай, экологиянь и природопользованиянь комитетса председателькс.
Тяда башка, 2000 кизоста сявомок 2008 кизоти молемс ульсь директоркс «Биохимик» оздоровительнай комплексса. Сон ульсь мордовскяй народть съездса делегатокс. 2008 кизоста сявомок и тячемс сон работай Ковылкина ошса Ковылкинскяй райононь казначействань оцюнякс. Коса афоль работа, сембе вастса сонь оцю авторитетоц и ломаттне корхтайхть колганза аньцек шнама валса.
Аф кунара васетькшнеме мархтонза кабинетсонза. Инголенза ульсь «Мокшень правда» газетась. Сон лувондсы газетать эрь номеронц. Кизефксозень лангс «Ашить юкста ли ошса эрязь мокшень кяльть и мокшень газетать?!», сон отвечась тяфта:
—Мзярдовок аф верондан ся ломаттненди, конат бта «юкстазь» шачема родной кяльснон. Тяфтапне, монь койсон, ширде няевихть аф еню ломанькс.
А «Мокшень правдась»—инь кельгома газетазе. Пичедян аньцек сянкса, мес «кулсихть» и шамондыхть мокшень велетне, мес тянь сюнеда кири мокшень фкя тяка газетаньконь тиражец. Арьсян, велетне эрявихть ванфтомс.
Мзярда улень оцюнякс районца, сонь тиражец пачкотькшнесь 5 (вете) тежянти, а тяни лядсь сянь пялец—2720 экземпляр. Тя таколфты.
Тячи,  аш стама ломань Ковылкинскяй районца, кие афолезе сода и афолезе шна Н.М.Палаевонь цебярь тевонзон и пара ваймонц инкса. Миньге, кафта велень эряйхне, седи ваксста поздравляндасаськ сонь, пяк цебярь мокшень ломанть шачема шинц мархта. Арьсетяма теенза кеме шумбраши лама кизос, фалу лядомс лямбе седи ломанькс и кельговикс сембонди. Шкабавазсь максоза  семьянцты и теенза мезе мялец, а сонць лядоза тяфтак эрекста, одста. Ульхть фалу шумбра и павазу, кельгома Николай Михайлович!
В. Илькаев,
Россиянь Журналистонь союзонь член.
А. Тремаскин,
«Мокшень правдать» аф штатнай корреспондентонц.

07.12.2017 №48
 
 
 

 
НОВОСТИ
 

УШЕДСЬ «Шумбрат, Мордовия!»—«Vivat, Чемпионат!» ФЕСТИВАЛЬСЬ

25.10.2018  № 42
 
 
 

Панчфт и казнет—республикань учительхненди

Торжественнай мероприятияс, кона лемтьфоль Международнай учителень шити, И.М.Яушевонь лемса музыкальнай театрав пуромкшнесть учительхне марнек республикаста. Профессиональнай праздник мархта синь поздравляндазень Мордовиянь Оцюнясь Владимир Волков.
—Учительсь—тя аф аньцек профессия, тя ваймонь венемома, аф тёждя, ответственнай и оцюдонга оцю труд,—мярьгсь Владимир Дмитриевич.—Афкуксонь учительсь максси иттненди сяда лама азф школьнай программать коряс. Сон лезды ученикти шарьхкодемс эсь прянц, няфтемс ломанень цебярь ширензон, мумс эсь кинц эряфса.
Республикань Оцюнясь азсь кафта важнай цельхть, конат ащихть отечественнай образованиянь системать инголе. Васенцесь—сувамс мирса инь цебярь кемоттнень лувксс. Омбоцесь—тиемс воспитаниянь система. Тянди водендаф «Образование» од национальнай проектсь.
11.10.2018  № 40
 
 
 

Республикань предприятиятнень продукциясна пачфневи миронь 80 странас

Пяденцяста, 28 сентябрьста, Мордовия Республикань Оцюнясь В.Д.Волков примась участия торжественнай пуромксса, кона лемтьфоль Машиностроителень шити. Мероприятиясь етась Рузонь Государственнай драматическяй театраса. Залу пуромкшнесть республиканскяй предприятиянь представительхне, отраслянь ветераттне.
Пуромфнень поздравляндамста В.Д.Волков лемдезе машиностроениять республикань экономикать  седикс и моторкс, вдь сонь эздонза ламода ащи лия сфератнень работасна.
Азфоль, што тяддень кафкса ковста промышленнай производствань индекссь арась 111 процент. Странаса тя фкя инь цебярь показательсь. 2018 кизоня республикаса нолдаф 119 миллиард цалковаень питнеса промышленнай продукция, мезсь 13 процентта сяда лама мелянь кизоть коряс. Республиканскяй кемготува предприятиятнень эса эряфс етафневихть производствать  келептеманц и одкстопнеманц коряс проектт. Касонды инновационнай продукциять лувксоц. Производствань марстонь объемть эса сонь талекац—29 процент. А тяфтама отраслятнень эса, кода электроннай и оптическяй изделиянь производствась, тя показательсь пачкодсь 77 процентс.
04.10.2018  № 39
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин