Поиск по сайту: 
 

Архив
 ноябрь 
 2018 
пн вт ср чт пт сб вс
   1234
567891011
12131415161718
19202122232425
2627282930  

 
 

 

Обо всем понемногу

КОЗА ЭРЯСКОТТАДА

Светлана Немоляева режиссерхнень, продюсерхнень и кельгомать колга
—Тячи киноть колга мезе аньцек аф корхтайхть, и кой-кона артисттневок эсь квалмаст азондыхть мезе-повсь. И киньге пряс аф сашенды мяль, штоба сетьмофтемс синь и мярьгомс, што ули граница, конань вельхкска аф мярьгондеви ётнемс киндинге и мзярдовок. Койсон, актёрскяй занятиясь должен улемс сёлкфокс марстонь публикать эзда. Должен улемс и тайна: тя кода сценась театраса—сон метра пяледа сяда сери вастса зрительнай залть коряс, и явфтови занавесса. И ванысь, кда сон аф ёньда лисьф, аф эци сценав действиять пингста артистть мархта корхнема.
Идькс пингстон и одонь кизоста искусствань мирсь эрясь лия законц коре и теенза пяк оцюволь интерессь. Эста кельгома актёрхнень мельге якасть ламонь ломань, конат азондсть теест благодарностень валхт и кельгозь синь.
Оцю павазсь, мзярда профессияса васьфневи знаковай ломань. Тейне тя Эльдар Александрович Рязанов.
Рязанов сявондемань налхкома «Гусарскяй балладав», но тевсь ашезь лисе. Монь сидеста ашемазь сявонде картинатненди, сембось аделсевсь пробатнень мархта.
Пяк таколкшнень, конешна, но монь ули потмонь кодама-бди аралаезе: таколдан, таколдан и сяда тов эрян. Аф лотксян тяфтама таколдоматнень лангс.
Минь творческяй ялгаксшиньке мархтонза ушедсь сяда меле, мзярда театраса налхкине главнай рольть сонь пьесасонза. Мялезонза тусь работазе и мярьгсь: «Ну сембе, Светлана, тяни карман снимандамот». Сонь оцюволь мялец снимандамс «Ирония судьбы» фильмаса, мяляфтса, ётафтонь кафкса пробат главнай роленди. Сяшкава оцюволь мялезе, штоба сяволемань, но монь мезевок ашезь лисе. Мяляфтса, сон тейне мярьгсь: «Света, конешна, можна налхкомс и тяда кальдявста, но стака…» Арьсень, што тяфтама валда меле туян модать пачк сянь эзда, мес тя ульсь афкукс тяфта.
Меле сон сявомань «Служебнай роману»—и сембось лиссь. Тя фильмась арась тейне визитнай карточкакс. Тяни эряфонь кизе пачкотькшни кафксогемонти, а ульцяса тянемс сотцесамазь тя работать коряс. Кали тя аф паваз?!
Пичефкс, мзярда
продюсерсь—главнайсь
Мес ётась афкуксонь кинонь пингсь? Тя пяк стака кизефкссь, конань лангс аф тёждя отвечамс. Искусствати вешфкссь кирсь, сяда кальдявкс арась качествась, а васенце вастти лиссть ярмакне. Мон фалу мярьгондян: «Ну коза эряскоттада?», мзярда снимандасазь сембе ня сериалхнень.
Съемкатне ётафневихть сяшкава вишкста, што артистсь кенерькшни аньцек валхнень тонадомс и азомс синь.
Оцю талант мархта любой ломанць мезевок аф тии, кода вийс коре тиеволь лия киноса. Афкуксоннеса. Коса аш эряскодома. Артистсь должен педа-пес арьсемс, азомс, и эрямс тя рольса.
Гениальнай Рязановонди аф стака улель кадомс съемкать лия пингонди, мзярда приметнезе, што мезсь-бди аф лисенди.
Тячи снимандайхть кемгафтувонь, а то и кемнилиень част шити. Тя вдь афизиологична! «Вай, простямасть, продюсерсь лиякс аф мярьгонди»,—тяфтама валхт сидеста кулендевихть съемочнай площадкаса. Тячи продюсерсь главнайсь, вов мезьса тячиень пингонь киноть пичефксоц и трагедияц. Сяс цебярь артисттне якайхть киноса стане, кода кудсост кухняса.
Паваз, конань лемоц Саша
Павазуван, шта, тячи? Аф кельгса тя кизефксть, сон пяк аф простой, павазукс улендихть аф сембе и аф фалу. Минь Сашань мархта ульсь афкуксонь павазу оцю пингоньке, пяле векта лама пинге эряме марса.
Ся, мезе ульсь минь Сашань мархта, и ся, мезсь ётафтовсь эряфс профессиясон,—тя, конешна, паваз. Павазсь—тя монь пяк цебярь цёразе, кона лангозон кой-мзярда кяжиякшни. Сонць артист, а тядять-артисткать аф фалу может шарьхкодемс…
Уноконе—стане жа монь павазозе. Вов няйсасть, мзярксть павазуван.
А.ЯРОШЕНКО.

07.12.2017 №48
 
 
 

 
НОВОСТИ
 

УШЕДСЬ «Шумбрат, Мордовия!»—«Vivat, Чемпионат!» ФЕСТИВАЛЬСЬ

25.10.2018  № 42
 
 
 

Панчфт и казнет—республикань учительхненди

Торжественнай мероприятияс, кона лемтьфоль Международнай учителень шити, И.М.Яушевонь лемса музыкальнай театрав пуромкшнесть учительхне марнек республикаста. Профессиональнай праздник мархта синь поздравляндазень Мордовиянь Оцюнясь Владимир Волков.
—Учительсь—тя аф аньцек профессия, тя ваймонь венемома, аф тёждя, ответственнай и оцюдонга оцю труд,—мярьгсь Владимир Дмитриевич.—Афкуксонь учительсь максси иттненди сяда лама азф школьнай программать коряс. Сон лезды ученикти шарьхкодемс эсь прянц, няфтемс ломанень цебярь ширензон, мумс эсь кинц эряфса.
Республикань Оцюнясь азсь кафта важнай цельхть, конат ащихть отечественнай образованиянь системать инголе. Васенцесь—сувамс мирса инь цебярь кемоттнень лувксс. Омбоцесь—тиемс воспитаниянь система. Тянди водендаф «Образование» од национальнай проектсь.
11.10.2018  № 40
 
 
 

Республикань предприятиятнень продукциясна пачфневи миронь 80 странас

Пяденцяста, 28 сентябрьста, Мордовия Республикань Оцюнясь В.Д.Волков примась участия торжественнай пуромксса, кона лемтьфоль Машиностроителень шити. Мероприятиясь етась Рузонь Государственнай драматическяй театраса. Залу пуромкшнесть республиканскяй предприятиянь представительхне, отраслянь ветераттне.
Пуромфнень поздравляндамста В.Д.Волков лемдезе машиностроениять республикань экономикать  седикс и моторкс, вдь сонь эздонза ламода ащи лия сфератнень работасна.
Азфоль, што тяддень кафкса ковста промышленнай производствань индекссь арась 111 процент. Странаса тя фкя инь цебярь показательсь. 2018 кизоня республикаса нолдаф 119 миллиард цалковаень питнеса промышленнай продукция, мезсь 13 процентта сяда лама мелянь кизоть коряс. Республиканскяй кемготува предприятиятнень эса эряфс етафневихть производствать  келептеманц и одкстопнеманц коряс проектт. Касонды инновационнай продукциять лувксоц. Производствань марстонь объемть эса сонь талекац—29 процент. А тяфтама отраслятнень эса, кода электроннай и оптическяй изделиянь производствась, тя показательсь пачкодсь 77 процентс.
04.10.2018  № 39
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин