Поиск по сайту: 
 

Архив
 март 
 2019 
пн вт ср чт пт сб вс
    123
45678910
11121314151617
18192021222324
25262728293031

 
 

 

Национальная тематика

—Светлана Ивановна, кодамкс   ульсь   тяддесь  Мокшэрзянь национальнай драматическяй театрати?
—Январьста сявомок и декабрти молемс Национальнай драматическяй театрась, мярьголень, кода и меля—работась виень аф ужяльдезь. Путфтольхть од спектакльхть оцю и емла ваныти, конат, кода няфтезе прокатсь, тусть мялезост. Удалафста етасть театрать гастроленза кода Мордовия Республикаса, стане и Россиянь лия региоттнень эса, коса компактнайста эряйхть мокшэрзят.
Цебярь сатфксокс арасть творческяй од сотксне, конатнень Мокшэрзянь национальнай драматическяй театрась ладязень лия народонь национальнай театратнень мархта.
—Кода ащихть тефне театраса творческяй вийхнень мархта?
—Театрать труппаса работайхть Мордовия Республикань Народнай, Заслуженнай и асу од артистт. Теест вийс коре сценать лангс лихтемс и кеподемс драматическяй, комедийно-музыкальнай спектаклень формаса драматургическяй эрь материалть.
Тяка пингть, фалу вешенттяма смузю од артистт, конат лац содасазь мокшень и эрзянь кяльхнень, мокшэрзянь национальнай и российскяй театральнай культуратнень.
—Тяддень постановкать эзда конат тусть мялезт сембода пяк?
—Аф карман сепондома мялезень од постановкатнень коряс сяс, мес синь сембе тусть и тя пингс тушендыхть монь и ваныеньконь мяльс.
Кепотьксонди, «Кяльготни» («Лгун») спектакльсь, конань итальянскяй классикть-драматургть К.Гольдонинь пьесанц коряс путозе Санкт-Петербургонь содаф режиссерсь Олег Куртанидзе. Койсон, тя арась од и няевикс аськолксокс Национальнай театрать творчестваса. Творческяй козяшинзон коряс мархтонза ряцок ащи «Ретро» спектальксь. Национальнай театрать сценанц лангса сонь путозе Россиянь содаф режиссерсь Юрий Хвостиков.
Башка вастса ащи «Огниво» ефкссь, конань оцю мяльса ванондсы емла ванысь кода Мордовия Республикаса, стане и Россиянь ся региоттнень эса, коса Национальнай театрась ульсь гастрольса.
—Пяк пара, мзярда театрась уленди гастрольса, сяс мес няеви, што творчестванте тушенды лия региоттнень ваныснон мяльс.
—Тя тяфта. Ноябрьста Национальнай театрась гастрольсоль Тольятти ошса. Няфтеськ тоса «Лгун» и «Огниво» спектакльхнень. Ули кода азомс, што театраньконь гастроленза етасть Тольяттиса удалафста, тостонь организаторхне тердемазь самс ширезост нинге. Сай кизоня тяфта и тихтяма.
—Кода содаф, Национальнай театрась эрь Од кизода инголе кеняртьфнесы эсь ваныенц Од кизонь од постановкаса.
—Ня шитнень тихтяма «Туфелька для Золушки» лем ала Од кизонь од постановка. Сценариенц тяштезе Национальнай театрань актрисась Екатерина Исайчева, а путсы  сонь содаф актероньке Андрей Анисимов.
Надиян, театрать Од кизонь постановкац туй оцю и емла ваныть мяльс.
—Кодамот сай кизонди постановкань и гастролень планонте-арьсеманте?
—Ня шитнень азоме национальнай драматургонь конкурс, конань вешфксонзон коряс—тейнек кармайхть кучсема эсь пьесаснон мокшэрзянь драматуркне, конат эряйхть Мордовияса и Россиянь лия региоттнень эса. Конкурсть итогонзон коряс, ня пьесатнень эзда инь цебярьхне путовихть Национальнай театрать сценанц лангса.
Нинге путтама спектакльхть мокшэрзянь, Россиянь и омба масторонь содаф драматуркнень пьесаснон коряс.
Надиян, сай кизонь гастрольс, конат арьсевихть етафтомс кода Мордовияса, стане и Россиянь лия региоттнень эса, коса компактнайста эряйхть мокшэрзят, мольхтяма мялень салай од спектаклень мархта.
—Сюкпря, Светлана Ивановна. Удалаза арьсефонте!
В.ИОСИФОВ.

14.12.2017 №
 
 
 

 
НОВОСТИ
 
 
 
 
 
 
 
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин