Поиск по сайту: 
 

Архив
 апрель 
 2021 
пн вт ср чт пт сб вс
   1234
567891011
12131415161718
19202122232425
2627282930  

 
 

 

Демография

КАТК СЕМЬЯСА ЭВОНДАЙ СЯДА ЛАМА ШАБАНЬ ВАЙГЯЛЬДА

 
Тяддень ноябрь ковть песта Российскяй Федерациянь Президентсь В.В.Путин Кремляса васетькшнесь «Семья года»  Всероссийскяй  конкурсса сяськихнень мархта, коса примась участия РФ-нь 85 субъектста 322 семья. Маластонь сай пингонди примаф программаса корхтамась мольфтеви сянь колга, коза можна ули карьхцямс материнскяй капиталть. Программась вийса ули 2023 кизоти молемс. Тя эвондафни надияма, што миньцонк сяда товга оцю васта кармай макссевома семьяти, штоба тоса эвондаль сяда лама одс шачиень вайгяль. Идень шачемась афкукс оцю паваз. Аф стак мярьгондеви: мзяра идьтот, сняроксть павазуват. Ужяль, но аф сембе шарьхкотькшнесазь тянь. А кда шарьхкоделезь-смекалезь, то сяда кржа тядя, мярьголень, нужа-тядя, атказаль иденц эзда. Кода сотцеви, ламоц иттне ляткшнихть урозкс шачемдост меле эстокиге шумбра-таза тядяснон пингста. Кали тя аф социальнай зиян?
Фкя пингть тейне савсь корхнемс районнай больницянь шачфтома отделениянь заведующаень мархта. И вов мезе сон пачфтсь. Оксана Ивановна виденцясь, што васенда, мзярда аньцек сась работама, ламос якась колаф мяльхть, мзярда тя или тона авась атказакшнесь иденц эзда. Тя и шарьхкотьф, вдь сон васенцекс кулендьсы седиень таколфты кулять тядятнень-кукуфнень эзда. И лиятнень коряс, улема, сяда крхкаста шарьхкотькшнесы тяфтама атказаматненди туфталть. Синь, кле, синць ня аватнень эзда ламотне повсть зиянц, тапарясть эряфонь сталмотнень потмос. Сяда сидеста тяфтама прябалас повондыхть аф опытнайхне, семботи верондайхне. Кажнайсь арьсекшни павазу семьянь колга, мялец, штоба улель нежедема вастоц. А «нежеть», кода сотцеви сяльде, серьезнаень колга арьсемска аш мялец. И сай пингонь тядясь ляткшни ськамонза: аш ярмаконза, аш эряма вастоц и стак тов.
Оксана Ивановнань валонзон коряс, идень кадыхнень эзда ламотне кальдяв семьяннет. Тяфтама семьяса касфне-воспитандафне старандайхть сяда курок тумс тядянь-алянь кудста, коса аш фкя-фкянь шарьхкодема. Но аф шуроста «пицевихть». Аф фкя лацонь мяльхть можна азомс колгаст. Но эрь случайсь, кода корхнихть, ункстама эсь «аршинцонза». А лиятнень можнат аньцек апрякамс-муворгофтомс, сяс мес синь мяльсост аф идьсна, аньцек весяла эряфсь. А минь, мархтост ряцок эряйхне, бта афи приметнесаськ, бта тя кальдявть эзда аш кодамовок зиян. И сидеста тяфта озадонь седихть ащематне эвондафнихть тядят-кукуфт.
—Мяляфтса, атказась иденц эзда колмогемонь кизоса авась,—лятфтась корхни ялгазе.—Ламос корхнеськ, штоба тянь сон афолезе тие, но шавос. Валонзон коряс шарьхкодевсь, што шоряйсь теенза идсь. Пингонь ётазь шоворсь аля мархта, шачсь марстонь идьсна, но сон эрясь ёфси аф ламос—кулось. А сяда тов шаба ашесть водендав. Виденцясь мирденцты, што ули сонь идец, кона касфтови идень кудса. Састь мяльс сявомс сонь тоста. Но ашезь удала тянь тиемс—иднять ульсть ни лия родителенза.
Кодама катф иттнень сяда товолдонь судьбасна? Старандави, штоба синь повольхть цебярь семьяс. Сидеста лисенди ёфси лиякс. И эста синь тага мрдафневихть идень куду. Катк сон валда и лямбе, катк аф кальдявста щафт-каряфт иттне и топодьстот, но сембе сяка иттнень сельмоса пичефкс, сембе сяка тядяннесь-аляннесь аф полафтови. Государствась лама средства ноляй катф иттнень воспитандамс-касфтомс и мельгаст якайхневок пичедихть иднятнень инкса, но тя заботась коллективнай, аш ётксост башка кельгомат, а кельгомат сембе фкакс. Ктмордасак-эждьсак фкять, эстокиге сембе нежедихть, вешихть, штоба мяштезост люпшталезь, кядезост сяволезь сонь, а аф лиять. А лиякс, седиень лямбофтома, кири идть аф аньцек нравственнай, но и физическяй развитияц. Сяс и тяфта казямста (а лиякс аш и кода) корхневи ся тядятнень колга, конат кадозь мезьсовок аф муворуфнень родной кудонь лямбофтома. Аш кода мирендамс сянь мархта, што коса-бди эряйхть урозкс лятф ня иттнень шумбра-таза родительсна (кодавок аф шарфтови кяльце синь тяфта лемдемс), конат юкстазь, копорязь-симозь тядянь долгснон. И кали аф муцси эсост совестьсна? Кали минь, вакссост эряйхне, аф машттама сргозьфтема эсост родителень ваймоть, кали аф лазови-ляпоптеви синь кевонь седисна?
 
Н.КУБАНЦЕВА.

14.12.2017 №
 
 
 

 
НОВОСТИ
 

КИЗОНЬ КОФНЕНЬ ИТТНЕНЬ ВАЙМАМАСНОН И ШУМБРАШИСНОН ПЕТЕМАСНОН ЛАНГС ШАРФТОМА БАШКА МЯЛЬ

7 апрельста МР-нь Оцюнять аф лама пингс тевонзон тиендиснон Артём Здуновонь видеса совещанияса ванондовсть кизонь кофнень иттнень ваймамаснонды лемтьф кизефксне. Региононь руководительсь ётафтф работать мзярс лувондсы аф педа-пес лац-ряц тифокс. Тя важнай направлениясь веши сяда цебярьста аноклама, инь пяк сянь эса, мезсь токсесы досугонь ладямать и иттнень ваймама пингть аралафшиснон обеспечендамаснон.

 

 

 
Кода азозе МР-нь Правительствать Председателенц заместителенц тевонзон тиендисна Галина Лотванова, тядде планц коре кармай работама 337 лагерь, эздост 22-сь стационарнай (санаториятнень базаса), и шитемба улемань 315 лагерь образовательнай организациятнень и социальнай учреждениятнень базаса. Тяконь мархта Галина Лотванова отмечазе, што инголи работай 23 лагерсь тяни республикаса сёлкфт ташта, калада инфраструктураснон инкса, хуш синь ащихть Мордовиять инь мазы вастонзон эса.

 

15.04.2021  № 14
 

МОРДОВИЯНЬ УЧЁНАЙХНЕ ТИСТЬ НАУЧНАЙ ПОДВИГ!

15.04.2021  № 14
 
 
 

ЛОМАТТНЕНЬ ЭРЯФСНОН ЦЕБЯРЬГОФТОМАНКСА

31 мартста Мордовиянь Оцюнять аф лама пингс тевонзон тиендисна Артём Здунов ВКС-нь режимса примась участия МР-нь Промышленностень, наукань и од технологиянь министерствать расширеннай коллегиясонза. Совещанияса примасть участия Россиянь Промышленностень и торговлянь министерствать региональнай промышленнай политикань и проектнай управлениянь Департаментонц директороц Виталий Хоценко, региональнай отраслевой министерствань представительхне, республикань инь оцю производствань вятихне тисть итокт кизоньберьфонь работаснонды.

 

Артём Здунов шарфтсь мяль, што регионца трудса заняфнень нилецекс пялькссна покодихть промышленностьса, тя республикань экономикать флагманонзон эзда фкясь. Мордовиянь Оцюнять аф лама пингс тевонзон тиендисна азозень тематнень, конатнень коряс эряви мольфтемс корхтама коллегиять пингста. Васендакиге тя собственностень и предприятиятнень вятемаснон коряс кизефксне. Эряви содамс, кие ащи выгодань получайкс, кие отвечай трудовой коллектифнень инкса. Прябалакс арси собственностень праватнень кядьста кядьс ламоксть ётнемасна, мезсь шоряй предприятиятненди лац-ряц вииякшнемс.

 

08.04.2021  № 13
 

ЗАСЕДАНИЯСЬ ЛЕМТЬФОЛЬ КОРРУПЦИЯТЬ КАРШЕС ТЕВОНЬ МОЛЬФТЕМАТИ

МР-нь Оцюнять аф лама пингс тевонзон тиендисна Артём Здунов 30 мартста ётафтозе Мордовия Республикаса коррупциять каршес тевонь вятемать коряс Комиссиять заседаниянц. Заседанияса ванондозь 2020 кизоня коррупционнай преступлениятнень мархта сотф ситуациять. МР-ть эзга МВД-ть информациянц коряс, ётай кизоня сембе провоохранительнай оргаттне мусть коррупциять мархта сотф 205 преступления, инь оцю талекасна тиф государственнай властень сфераса и сотф разнай уровенень должностной лицатнень оцю вастса улемста закононь колсемать мархта. Приоритетнай направлениятнень эзда фкясь—национальнай       проекттнень эряфс ётафтомста правонарушениятнень инголдамасна, 2020 кизонь работань итокнень коряс, внутренняй тевонь оргаттнень мархта лихтьф 14 тяфтама преступления, корязост карьхцне лувондовсть 1 миллион цалковайть малава, синь мрдафтфт меки. МР-нь Оцюнять аф лама пингс тевонзон тиендисна азозе, што карьхцнень мрдафтомаснон коряс работась пяк важнай—средстватне улест мрдафтфт экономикати и нолдафт республикать виияфтоманцты.

 

08.04.2021  № 13
 

АРТЁМ ЗДУНОВ АЗСЬ СТРАНАНЬ ПРЕЗИДЕНТТИ РЕГИОТТНЕНЬ ФИНАНСОВАЙ СИСТЕМАСНОН ШУМБРАЛГОФТОМАСНОН КОРЯС ПРЕДЛОЖЕНИЯТ

Россиянь Президентсь Владимир Путин мярьгсь кафта недяляньберьф арьсемс тядде региоттнень дополнительнай финансовай ширень кирдемаснон коряс параметрат, штоба сявомс мяльс тя кизефксть Федеральнай Собранияти сай пингонь посланиясонза. Тянь колга азфоль Правительствань члеттнень мархта совещанияса, кона ётафтовсь 31 мартста.

 

«Федерациянь субъекттнень  финансовай положенияснон минь сембе пингть кирдьсаськ контроль ала,—мярьгсь Владимир Путин.—Мекольдень пингть эряфс ётафтовсь лама мера, штоба кирдемс региоттнень ширеснон и максомс теест эрявикс лезкс—васендакиге, конешна, сявоньдсайне мяльс решениятнень, конат примафтольхть пандемиять пингста». Странань Президентсь лятфтазе, што меля нолдафоль 280 миллиард цалковай прямой дотация и нинге 223 миллиард цалковай специальнай бюджетнай кредитт. «Российскяй экономикать пильге лангс стяфтоманцты тенденциятне нинге аньцек кемокснихть, минь тянь лац содасаськ. Аф сембе субъекттнень эса минь няйсаськ деловой активнайшить касоманц, сяс региоттнень доходнай базасна ламода аф стабильнай. Тянкса мялезе кулемс коллеганень, губернаторхнень эзда регионцнон финансовай состоянияснонды анализ, а стане жа предложеният сянь колга, кодама од решеният эрявихть, штоба аф аньцек обеспечендамс региональнай финанснень стабильнайшиснон, но и касфтомс экономическяй вииямать, вов мезсь ащи тейнек целькс—тиемс РФ-нь эрь субъектть кемоста виияфтоманкса основа».

 

08.04.2021  № 13
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин