ЛЯМБЕ ВАЛХТ И КАЗНЕТ—ЖУРНАЛИСТТНЕНДИ

Миньцонк кунара ни арась пара традициякс Российскяй печатень шиня Саранскяйса Республикань кудса ётафнемс журналисттненди торжественнай приём. Тяфта ульсь тяддевок. Кода фалу, торжественнай приёмть ётафтозе Мордовия Республикань Оцюнясь В.Д.Волков. Журналистта башка тяса ульсть республикань Правительствать заместителенза Г.А.Лотванова, Г.П.Комусов, Мордовиянь Оцюнять Администрациянц руководителенц заместителец—внутренняй политикать коряс управлениять начальникоц В.В.Маресьев, МР-нь печатень и информациянь министрсь В.В.Калугин и лиятне.
Печатень шити лемтьф мероприятиять панжезе вступительнай валса В.Д.Волков. Сон седи ваксста поздравляндазень пуромфнень профессиональнай праздникснон мархта и арьсесь теест кеме шумбраши, паваз и од творческяй сатфкст. Сон макссь цебярь оценка прессать работанцты.
Сяда тов Владимир Дмитриевич нюрьхкяняста пачфтсь республикасонк тефнень и инголенк ащи задачатнень колга. Васендакиге сон пара мяльса азозе, што, аф ваномок аф тёждя экономическяй ситуациять лангс, 2017 кизоня минь сатоме цебярь сатфкст производстваса, рекорднай результатт велень хозяйстваса. Кочкаф 1 миллион 450 тёжянь тоннада лама сёра, зерновойхнень урожайностьсна ульсь 34,4 центнер гектарста.
Пяшкодеськ сембе социальнай обязательстватнень и обеспечендаськ зарплатать сяда оцюста касоманц инфляциять касоманц коряс. Касыхть эряма вастонь и кинь строямань объёмтне, тиендеви тяниень пингонь инфраструктура, кона водендаф эрь ломанть эряфонь условиянзон цебярьгофтомаснонды. Меля Мордовияса строяф 350 тёжянь квадратнай метра эряма васта. Максф 5 тёжятть ипотечнай кредит 7,5 миллиартта лама цалковаень питнес. Тя пцтай 1,5-крда сяда лама тяда ингольдень кизоть коряс.
Республикаса зарплатать колга корхтамста азфоль, што меля средняй зарплатась ульсь пцтай 25 тёжянь цалковай. Тядде сонь арьсекшневи кеподемс 8,2 процентта. Лиякс мярьгомс, средняй зарплатась ётасы 27 тёжянь цалковайть.
Эсь выступлениясонза В.Д.Волков стане жа лотксесь тяддень 18 мартста Российскяй Федерациянь Президентонь кочкаматнень лангс.—Пяк важна,—мярьгсь сон,—лацкас теест анокламс и организованнайста ётафтомс синь.
Конешна, Владимир Дмитриевич азондсь и футболть коряс  Миронь чемпионатти анокламать колга. Тяни, кле, сембе вийхне водендафт чемпионатти анокламань сембе мероприятиятнень шумордамаснонды. Тейнек эряви примамс 200 тёжяньшка инжи и ётафтомс матчнень инь оцю уровеньца.
Тяда меле максфтольхть казнет сятненди, кит лама киза седикс-ваймокс покодихть массовай информациянь средстватнень эса. Оцю казне получась и «Мокшень правдань» электроннай наборонь операторсь Н.В.Якушкина. Лама киза и пяк цебярьста работаманкса сон казьф Мордовия Республикань Почетнай грамотаса.
Казнет получасть и творчесскяй конкурснень эса сяськихне. Пара азомс, што минь газетаньке тага сатозе васенце вастть «ИнтоНАЦИЯ» конкурсса. Стане жа пара казне получась и минь журналистоньке и поэтоньке В.И.Нестеров.
Итокне тифт. Ушедсь од рабочай кизось. Минь арьсетяма сембе журналисттненди кеме шумбраши и од творческяй сатфкст.