КОФКАЙКИН И РОНАЛДО

Анисим Анисимович Кофкайкинонь отделса кельгозь. Сетьме, сятяв аля, комсь киза марса работамста фкявок таматри вал ашесть куле эздонза. Мзярда нинге ошста колхозга кучсельхть якстеряпсонь кочкома, спискаса васенцекс фалу ащесь Кофкайкинонь фамилияц. «Эряви дак эряви»,—сяка валоц. Аф атказай, аф пеняцяй. Бывала, выходнойда меле цёратнень прясна сярядихть, лезксонкса—Кофкайкинонди:
—Анисимыч, народнай банкса ули мезнявок?
—Улема.
Кофкайкин таргасы шрастонза чаень кшнинь банканять, максы анайти прянь пчкафтоманди.
—Кемонць саты. Сяда ламось лишнай ули...
Анисим Анисимович кельгозень рьванц Агрань, хуш тона авась збойдонга збоель, стирняснон Наташать, кельгозень мархтонза покоди ломаттнень. Ашезь арьсекшне кодамовок вельф оцю павазонь колга, сембе шумбрат, эряфсь моли—и пара. Седиень эжнеманякс теенза арась футболсь. Аньцек лиси телепрограммась, Кофкайкин якстерь кружоконяса фатясыне футболонь шитнень.
—Пара тя недялясь, аф шава,—сетьмоста мярьги эстеенза.
Отделса содазь: «Спартакть» инкса Кофкайкин седиенц путы. Сяс пингстонза фкявок сялдомань вал тя командать колга ашезь корхнев. А мекольдень кизотнень Кофкайкинонь появась нинге фкя кенярдемац—Роналдо.
«Кельгсы Шкабавазсь Бразилиять,—лямбоняста арьсекшнесь эсь пачканза Кофкайкин.—Кучсезь теест Пелень, а тяни, няк, Роналдонь. Аш лия тяфтама цёра масторлангса.
Прафтсазь, прянц вельф кеворьфтьсазь, а сон стяй и аньцек мзолды. А кда ни мяни ортатнень шири—сатыец ашезь шаче...»
Тунда Анисим Анисимыч сувась отделонь оцюняти заявления мархта: «Эняльдян... колма шит без содержания... по семейным обстоятельствам...»
Венептезе кагодть, сонць сельмонзон аф кепсесыне. Ашезь тонада васькафнема Кофкайкин, месть тят тиенде. Оцюнясь кизефтексолезе: «Мезе лиссь, Анисим Анисимыч?» Но апак кизефттьке шарьхкодсь: кда ни Кофкайкин анай пря—сталботь, эряви.
Шинь етазь гайфтсь Агра, Кофкайкинонь рьвац:
—Тя кодама тяфтама командировкас кучесть Анисимонь?
—Командировкас? Да минь кафтошка киза ни киньге аф кучсетяма командировкас. Сон сявсь без содержания, по семейным обстоятельствам.
—Цебярьхть обстоятельстватне!.. Москуса стадионца пиже тётьмакокс юватькшни, а вакссонза акша пря краля. Телевизорса няеськ.
«Кофкайкин стадионца тётьмакокс юватькшни? Да нинге краля мархта?»—тихтедсь оцюнять пряса. И аньцек тяни фатясь: вдь итальянскяй «Интерсь», Роналдонь командац, сась Москуву «Спартакть» мархта налхкома. «Ах, Анисим Анисимыч, ашезь кирде ваймоце, туть ваномост...» Кайгиста оцюнясь мярьгсь Агранди:
—Лисенди, васькафтомазь Кофкайкин ялгась... А тон, Аграфена Парфёновна, сяфть да пантт кяж Анисим Анисимовиченди.
—Кода?
—Сай недялять Таиландса ётай авань чемпионат боксса... Пежетьтоба, тонь мялезт туль. Озак самолетс и сембот тефне...
—Арьсень, руководительхне сурьезнай ломатть,—путозе трубкать Агра.
«А видец Анисим Анисимычень. Тяфтама рьвять эзда колма шис мянемаське—«семейнай обстоятельства»,—изь кяжия отделонь оцюнясь.
Ся тевсь тундаль. А киза кучкать вчек футболонь чемпионатсь Францияса. Матчнень няфнезь поздна, но Анисим Анисимович фкявок ашезь нолда. Лиятне сайхть, нувайхть шраснон ваксса, а Кофкайкин, мярьгат, апак удок нинге сяда эрьгавготкшнесь.
—Ниле ни чинькатсь,—пиндолды сельмот корхнесь сон шобдава.
—Кие?
—Содаф кие. Роналдо!
А весть сон сась шамордозня. Види пильголапац сотнефоль, туфлянц вастс щафоль пиндолды галоша. Отделстотне дивандазь варжакснесть, но кизефнема ашесть эряскода.
—Роналдо топть ширезон эрьхтезе... И лисень видеста француснень ортаснонды. Шаван, шаван—коданга аф сувафтови. Пара, рьвясь стяфтомань, месть, кле, пильгса стенать эса шават... Оцю сурсь муводсь...
—Сай чемпионатсь, Анисимыч, коса ули?—кяшезе пеетьфканц оцюняньке.
—Да мянь кафта странаса. Японияса и Кореяса.
—Мзярс тоза топсь кевори—пильгцевок пчкяй...
«Пара, мзярда шарьхкодице ули»,—теждяста куфкстсь Кофкайкин.
В.ЛОБАНОВ.