Поиск по сайту: 
 

Архив
 январь 
 2019 
пн вт ср чт пт сб вс
 123456
78910111213
14151617181920
21222324252627
28293031   

 
 

 

Национальная тематика

«КУЛЬТУРНАЙ ПОЛИТИКАНЬ СТРАТЕГИЯТЬ—ЭРЯФС!»

1 февральста Москуса Победань музейса ётась Россиянь военно-историческяй обществать съездоц, коза пуромкшнесть Обществать региональнай 83 отделенияста оцюнятне и лия кучфне, Обществань почётнай, Центральнай, Попечительскяй советонь члеттне.
Мордовияста съездса делегатокс ульсь Россиянь военно-историческяй обществань членць, Мордовия Республикань культурань, национальнай политикань, туризмань и архивнай тевонь министрсь А.М.Чушкин.
Газетаньконь тячиень номерсонза сон азондсыне эсь мялензон-арьсеманзон Всероссийскяй тя форумть работанц колга.
—Кода содасаськ, российскяй нациянь нароттнень мяльса-арьсемаса эсь историяньконь кизефксонза фалу ащесть и тя пингс, койсон, ащихть пцтай васенце вастса. Сяс Россиянь военно-историческяй обществать съездонц колга азондомазень ушедса Обществать историянц эзда.
Ётай векть ушетксста, мзярда Россияса уфазевсть революциянь варматне, военнай историкне, архивисттне, армиянь и флотонь офицерхне, коллекционерхне и историянь лия кельгихне састь мяльс панжемс Россияса военно-историческяй общества. Арьсесть, мзярда народсь сяда цебярьста кармай содама эсь армиянц и флотонц воинскяй коензон-обуцянзон, синь тяда ингольдень оцюдонга оцю тюремаснон, сяськомаснон и эрь шинь эряфснон, тя эвондафты ломаттнень ваймоса гордость инксост. И тянь вельде кемокстайхть Российскяй государствать неженза.
1907 кизонь сентябрьста кемокстафоль Обществать Уставоц. Императорсь Николай II, кона арась Обществати почётнай председателькс, лемдезе сонь Императорскяйкс. Ся пингста сявомок и 1917 кизонь октябрти молемс, Императорскяй Рузонь военно-историческяй обществась мольфтсь странасонк патриотическяй и историческяй оцю работа. Лезксонц вельде путфтольхть памятникт А.В.Суворовонди Измаилса и Рымникса, М.Д.Скобелевонди—Москуса, Пётр I—Кексгольмса, М.И.Кутузовонди—Крымса, Шумы селениять маласа.
Обществать ульсть печатнай органонза. Нолявсть «Журнал Императорского Русского военно-исторического общества», «Труды Императорского Русского военно-исторического общества» и «Записки разряда военной археологии и археографии» изданиятне.
Обществаса сембе тефнень вятезень Общественнай советсь, коза кочкафоль 12 ломань. Председателькс Советса ульсь генералсь Дмитрий Антонович Скалон.
Васенце Мировой войнать ушедомста Обществань пцтай сембе члеттне тусть воявама. Сяс тефнень лувкссна, конатнень эса тиендсь Обществась, няевиста кирсь, хуш формальнайста синь вятевсть 1917 кизонь октябрть самс.
2012 кизонь 29 декабрьста Российскяй Федерациянь Президентсь В.В.Путин «О создании Общероссийской общественно-государственной организации «Российское военно-историческое общество» 1710 №-нь Указсонза макссь Обществати од эряф. Эсонза азф: «Российское военно-историческое общество создано в целях консолидации сил государства и общества в изучении военно-исторического прошлого России, содействия изучению отечественной военной истории и противодействия попыткам её искажения, обеспечения популяризации достижений военно-исторической науки, воспитания патриотизма и поднятия престижа военной службы».
—Анатолий Михайлович, кода ётась съездсь? Кодама кизефкст кепсевсть и кемокстафтольхть эсонза? И конат сембода пяк шарфтозь эсь лангозост мяльцень?
—Россиянь военно-историческяй обществать съездоц, койсон, ётась гражданско-патриотическяй атмосфераса. Делегаттне васенда ванозь, кода ётафтовсть эряфс Обществать етай кизонь инь няевикс проектонза и арьсесть теенза од тефт, конат эрявихть тиемс тя кизоть кувалмоста. Делегаттне тяфта жа сувафтсть эрявикс полафткст Обществать Уставс, Центрально-ревизионнай комиссиять составс, фкя мяльса кемокстазь Обществань Почётнай знакса каземать колга положениять и 2017 кизонь работанц квалма отчётть.
Съездть  делегатонзон инголе тись программнай доклад Россиянь военно-историческяй обществать председателец, Российскяй Федерациянь культурань министрсь В.Р.Мединский. Эсонза Владимир Ростиславович шарфтозень пуромфнень мяльснон инь няевикс тефненди, конат Обществати эрявихть тиемс тядде и маластонь пингть. Нят—од ломаттнень афкуксонь патриотокс касфтомасна, Отечествань аралайхнень и подвигснон колга мялямть кемокстамац,  Россияса патриотическяй и лия маршрутова туризмать виияфтомац, государственнай и общественнай лия организациятнень мархта сембе ширдень соткснень кемокстамасна.
Тяка пингть азома: Россиянь военно-историческяй обществать работац ащи сяшкава лама ширеста, и сембе синь няевихть тяшкава эрявиксокс Российскяй нацияти и государствати, што эрь ширесь арси приоритетнайкс.
Кепотьксонди, сявсаськ историческяй, ваймонь и лия духовно-культурнай козяшитнень, конат пуропнихть марс российскяй нациянь нароттнень. Эздост Россиять историяса ламодонга лама. Сяс, кода мярьгсь В.Р.Мединский, тейнек эряви марямс гордость ся тефнень и ся Геройхнень инкса, конат арасть тейнек кепотьксокс, конат тиихть эсонк фкя народкс и конат пуроптыхть эсонк марс сай пингонь марстонь эряфоньконь строямста.
Тяфта жа, койсон, пяк эрявксты тяниень пингонь обществаньконди В.Р.Мединскяень тезисоц Россиять историянцты и историческяй деятеленьконди питнень максомать колга. Россиянь военно-историческяй обществать председателец арьси тяфта: пинкне, мзярда историянь учебникста сашендовсь сязендемс лопат, мзярда историческяй деятеленьконь тевснонды питнетне сидеста полафневсть, ётасть. И меки синь вестевок аф мрдайхть. Сяс мес, кда ёрдамс историястонк тя или тона тефнень, нардамс тя или тона эльбятькснень аф арьсезевомок, мес синь лиссть—тя сяда процентонь гарантия, што минь синь тисаськ оду.
Сяс съездонь делегаттне тя тезисть колга эсь мяльснон азозь фкакс: ащетяма сянкса, штоба историясонк эрь эпохась араль эсь вастозонза и лядоль тоса сембе пингс!
—Съездса кульфть и кемокстафть эзда мезть ётафтолить эряфс тевсот?
—Ламотне кизефкснень эзда, конат кепсевсть и кемокстафтольхть съездса, эсь ширеснон коряс малат или ёфси фкат Российскяй Федерациянь государственнай культурнай политикать Стратегиянц вешфксонзон мархта. Сяс Стратегиять вешфксонзон коряс Мордовия Республикаса кармайхть касонкшнема и вииякшнема культурась, национальнай политикась, туризмась и архивнай тевсь. Тяфта жа Стратегиять вешфксонзон коряс эсь тевонзон кармай вятемост «Россиянь военно-историческяй обществась» Общероссийскяй общественно-государственнай организациять Мордовскяй региональнай отделенияцка.
—Сюкпря! Удалаза сембе арьсефонте.
 
В.НЕСТЕРОВ.

16.02.2018 №
 
 
 

 
НОВОСТИ
 

Мордовиянь Оцюнясь Владимир Волков Ётафтсь национальнай проекттнень эряфс етафтомаснон коряс рабочай совещания

17.01.2019  № 2
 
 
 

Ули мезенкса кеняртькшнемс

Монь, кода од ломанень, пяк лад мялезон ся, кода кизоста кизос коль сяда и сяда мазыкс и арукс арси республиканьконь столицац—Саранскяйсь. Тяни ётат сонь ульцянзон, проспектонзон, парконзон, лия вастонзон эзга и седице пяшкоди кенярьдемада, гордостьта и ошть, и марнек Мордовиять инкса. Сембода лама полафткста, конешна, эвондась тяса футболть коряс Миронь чемпионатти анокламста. Ваносте, кодамот тяни ошень китне, вокзалхне! Мяльцень стане жа саласазь «Тавла» гостинично-жилой од комплекссь и Экопарксь. Марнек полафтсь, лиякс арась аэропортсь. Тяни тяста самолетса можна пачкодемс Москуву и Санкт-Петербургу. А мзяра строяф идень садта, школада, гипермаркетта, лама лия пяк эрявикс объектта. А кода аф лятфтамс уникальнай спортивнай объектть—«Мордовия Арена» стадионть. Сон сембоса отвечай тяниень пингонь инь оцю вешфксненди. Аф стак самай тяса меля налхксть миронь инь вии футбольнай командатне. Тя ли аф фантастика, тя ли аф честь сембонди тейнек. А ёфси аф кунара Саранскяйса ётафтфоль эйть лангса конькаса фигурнайста куркснемать коряс Россиянь чемпионатсь. И тяконь лаца спортонь оцю праздникт миньцонк ётафневихть аф шуроста.
Спортсь лихтезе столицаньконь пяк няевикс вастс, тиезе сонь содафокс аф аньцек Россияса, а марнек мирса-масторса. «Саранскяйсь—тя афкуксонь Европейскяй ош, тяса сембось тиф-ладяф оцю уровеньца»,—тяфта азондсазь эсь мяльснон-арьсемаснон столицаньконь колга тяза сашенды инжихне.
Мария Тарасова.
10.01.2019  № 1
 

10 январьста—Мордовиять шачема шиц

Панчфокс панчт, мокшэрзянь краеньке!
Тячи Мордовия Республиканьконь шачема шиц. Топодсь 89 киза, кода теенза максф государственность. 1930 кизонь 10 январьста ВЦИК-ть Президиумоц примась постановления Мордовскяй округть Мордовскяй автономнай областекс тиеманц колга. Тя шись и лувондови мокшэрзянь республикати шачема шикс. А ниле кизода меле тифоль Мордовскяй АССР-сь.
Тянь мархта путфоль цебярь ушеткс касоманди-виияманди. Ётаф пингста ламода кассь республикать экономическяй виец, кеподсь культурась, образованиясь, наукась. Ламоц земляконьке арасть гордостекс аф аньцек Мордовияса, но и сембе Россияса.
Сембода оцю сатфкст миньцонк сатфт мекольдень кизотнень. Мордовиясь путневи примеркс лиятненди, тяза сашендыхть опытонкса, тонафнема. И ули мезти тонафнемс. Республиканьке тячи—странать инь  вишкста вииякшни региононзон эзда фкясь.
10.01.2019  № 1
 

Мордовия Республикань культурань, национальнай политикань, туризмань и архивнай тевонь министрсь А.М.ЧУШКИН: «ЛАДЯМА СЕМЬЯСОНТ И САТФКСТ ТЕВСОНТ!»

28.12.2018
 

Н.П.Огарёвонь лемса Национальнай исследовательскяй Мордовскяй государственнай университетонь ректорсь С.М.ВДОВИН: «КАТК ЁТАФТОВИХТЬ ЭРЯФС СЕМБЕ ВАЛДА МЯЛЕНТЕ И ПЛАНОНТЕ!»

28.12.2018
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин