Поиск по сайту: 
 

Архив
 февраль 
 2019 
пн вт ср чт пт сб вс
    123
45678910
11121314151617
18192021222324
25262728   

 
 

 

Юмор и сатира

Синтьф пейхть

Пятарять пяли сувась Филянь Стёпась. Шамац сюнера. Модань тюсса. Сельмонянза цють няевихть таргозьф сельмокабанзон ёткса. Лафтувонза нолдафт.
—Мес, Стёпа? Стака исякта меле?—пеедезь кизефтезе азоравась.—Афи мяляфтсак, улема, кода куду вятедязь? А тяни, пожалы, пряце сргавозь лаца?
—Прязе пря, а вов душазе сяряди.
—А мезе ся стамсь—душаце?
—Вов тяса сяряди,—и Стёпа няфтсь мяштезонза.
—Седице, штоли?
—Да аф седиезе, сянь тевоцка сяка: цяткофни и цяткофни, а душазе. Сембе мяштезе.
—Тевлафне, шять, кельмофтевсть? Тяла вдь.
—Ашесть кельмофтев! А мезе-бди потмосон сяряди. Фкя вастса ащемс аф максы. Сяряди и сяряди.
—Ваймоце, штоли?
—Во-во, вчёк сон.
—Ся, Степа, грехтот лама. Озонтт ладняс Шкайти, сон милостю, простятанза.
—Ага! Щас! Конязеньге лазса кияксти! Эка кльдяфнян лангозонза! Вов кда вярде сон сиволь пакш ёрдаль—озондолень. А тяфтак мезенкса? Или хуш цюгуннясон похлебка эвондаль—эстонга озондолень. А тяфтак аш мезенкса.
—Наказатанза Шкайсь тяфта корхтаманкса.
—Ага, катк наказасамань! Катк валги лямбе вастонястонза и сай тяза, а мон сонь седялу озафтса кеветие суткас. И сембе пенгянень керфтсайне кядьстонза.
—Ну, эста тонць кодавок пчкафтк ваймоцень.
—Сон аф пчкафтови. Аф таблетка пуняняса, аф путерьксса, аф вадемаса. Аш теенза надобия.
—Капотть стакан-кафта сяпиняда и лоткай.
—Аш, ся аф лезды. Ся прязень петьсы, а душазень аф.
—Да вдь кода-бди ётафнесазь? Тяни сембе сярятьфнень пчкафнесазь.
—Так ся вдь сярятьфнень: пильгцень керсак или кядцень яжасак. А монь душазти аф лездоват таблетка пуняняса. Теенза эряви мезе-бди сяда оцю.
—Ся кода стане?! Сталботь, тейть эряви симомс аф стаканцта, а лапшаваста?
—Аф шарьхкодьсамак, Пятарясь. Оцю тев эряви тиемс, эста, шять, ётай. Эрька вов тейть куд путтама!
—Ащек ни, назола! Куд путы!.. Тон куцемапрязон седяфкя шаволеть, ато пильгозеньге синдьса, куд путы!..
—Седяфкя? Щас тисаськ... Аф лама пингта меле Стёпа сувась меки.
—Ётась душаце?—кизефтезе Пятарясь.
—Аш, ашезь ёта. Тейне эряви тиемс кодамовок оцю цебярь, эста, шять, ётай.
—На вов, лядондсь аф ламня сюлека потмаксти, копордак.
—Тянь можна,—и Стёпа фкя копорксса шамдозе стопкать.
—Суск кши пакшкада, ато тонць, пади, модамарьхтьке ашеть пиде.
—Исяк мезе-бди пицень.
—Ётась душаце?—пеедезевсь Пятарясь.
—Тянди аф ётай. Теенза тага кати-мезе эряви.
—Пяль теенза эряви! Аш сяда лама.
—Тонь аф улефтяряй, эста ни мле траксце кургованза вазыяй.
—Кда ни лятфтайть траксозень, архта карденяста наземнятнень ёряйте...
—А тага сюлека потмакссот ашезь ляда косовок?
—Архт васенда тик, мезе мярьгонь.
—Сянь минь тяниёк...
Аф лама пингонь ётазь Стёпа сувась меки.
—Урядайть?—кизефтезе Пятарясь.
—Сяшкава аруста, хуш тонць тоза матт.
—Да мес карденяв матсамак, дурак улефтярят?!
—Ся мон мярьгокшнень—хуш монць тоза мадолень, да келдане аш кинди андомс.
—Келдатневок, штоли, улихть?
—Эрь, а кода мле? Ськамот скушна, Пятарясь, а нят сё живой ваймот, стаки пульхкихть, бзмоляйхть перьфкат.
—На вов тейть тага стопка, да архт тяста, ато моньге кудозень пяшкодьсак веронь потяйда.
—Тят пеле, Пятарясь, синь кудланга аф лтайхть.
—Да щапнень мархта кандат!
—Синь лямбонять кельгсзь, сяс ланга аф якайхть, а кяшихть сяда ронгозень малас.
—Да лангсот мезе? Куфайкацень ала панар и—сембе. Коза теест кяшемс?
—Одарненди, Пятарясь, одарненди.
—Ну, симк и саты. Тяни душаце хуш прянц лангс шароза, а сяда лама аш.
—Сяда лама афи эряви.
—Петевсь душаце?—пеедезевсь Пятарясь.
—Аф прокс, нинге кати-мезе аф сатни.
—Ну, шять, нинге Боран Шура ялгацень васьфтьсак, эста ни педа-пес сатфтсасть.
—Сянь мархта сатфтсаськ, Пятарясь, сатфтсаськ...
Филянь Стёпа аньцек пачкодсь кудонц малас, нажядсь ваксозонза Боран Шура, ушедсь куфкснема.
—Мес, Шурик? Прясь сяряди?—мзолдозь кизефтезе Стёпа.
—Кда аньцек сярядель? Ато лопадемс ёрай, кода вельф уфаф машинань шары. Хуш пинкстак!..
—Петемс, Шурик, эряви, петемс.
—Мезьса петьсак, кда аш тити-митихть.
—Мумс, Шурик, эрявихть, мумс костовок.
—Коста муят, кда кивок ашезь юмафта?
—Арьсемс, Шурик, эряви, ладняс арьсемс.
—Кда прясь арьсель, ато вдь сон аньцек читордозь шары, кода апак ватть крандазонь шарысь.
—Тяни сятка аф читордыхть, петькольхне кшнинь,—пеедсь Степа.—А тейне кандат, кда азса, кода тя прябаласта лисемс?
—Марса симсаськ, мзяра афолень му.
—Нява, няйсак акациятнень фтала кудть? Ня шитнень азороц коста-бди таргазе бабанц самоваронц. Сяда ведьгемонь киза теенза. Монцьке няине. Латуннай. Нльне качамонь молемацка стамка. Ускса, корхтай, Саранскяи, пяле сядошка цалковай инксонза максыхть. А месть сяшка васта усксемс, кда тязк кодама-повсь кшнит рамсихть? И нинге корамнясонза оцю киренкс люменевай пролопоц. Сонць больницяса, пелемс аш мезьда.
—А мон эздонза афи пелян. Весть польтядьса и ляци ваксстон вете метрас.
—Ляци, ляци...—полаксазе Степа.—Мзярс тонафтомат: эрь мезне, штоба сембось шита-крыта улель, понял? Кода, муят мезьса ускомс?
—А кода мле! Равжа Толянди мзяра тевда тиендень? Бта батракоц урафтан—кали аф макссы алашанц?
—Ся, конешна, макссы. Кода тейть аф максомс?—петезе мяленц Степа.—Вов и шаронтт. Да тямак юкста самда меле!
...Илять Стёпань шири кочкавсть сембе ялгатне. Винась хуш аф ляйкс шудесь, но сатомшкаль. Боран Шура азондсь, кода якась кшнинь максома:
—Тя самоварть, корхтай тейне кшнинь сявись, аньцек музеи вастоц, а тон тяза вятерьфтить. Кода ни лемдезе? Ожу, ожу, лятфтаса... Антикварат, кле, тя! Вов кода.
—А люменть? Люменть квалма мезевок ашезь аза?—кизефтезе Степа.—Фкя пролопсь, няить, сурда эчке. Стама ни, шять, тяни афи нолнихть.
—А тянь, кле, куду эряви сявомс. Кудъёткса сембось эрявксты. А сембода пяк тусь мялезонза алименень трубась.
—Кда сембось сяшкава тусь мялезонза, тейть ламоня норгомаль кядьстонза. Ашеть шарьхкоде, дураконя!—апряказе Стёпа.
—Кода норгат? Эрь кшнить сонцень питнец, сяда лама аф максы,—аралась пря Шура.
Апак учсек панжевсь кенкшсь, и сувась Сёмань Гриша. Сон маладсь Шуранди и сетьмоста кизефтезе:
—Тон мезенди трубазень салайть?
—Мон?.. Трубацень?.. Сельмосонга ашине няе.
—Сянкса тонь няедязь саламда. А монць няихтень кшнинь ускомда, вчёк работаста сань,—стаки сетьмоста корхтась Гриша.—Милиция аф серьгядян, а тейть тага костовок сави саламс кшнит пеенди!
Ня валда меле сон стане тескафтозе Шурань ула пакарьс, сянь нльне пряц люкштядсь фталу.
Шурань ялганза комотнесть вастстост: кие ёрдась пря кенкшть шири, а кие Шурань аралама. Сёмань Гриша кенерсь бярнофтомс сонь аньцек весть, но ширептезе салайть улалонц и синдезень колма пеензон.
Ф.ПЬЯНЗИН.

16.02.2018 №
 
 
 

 
НОВОСТИ
 
 

ВАЛЕНТИН ВАСИЛЬЕВИЧ КОНАКОВ

2019 кизонь 27 январьста 80 кизонц лангса стакаста сярядемда меле тусь эряфста Валентин Васильевич Конаков—содаф государственнай и общественнай деятельсь, образованиянь и наукань пуроптысь, ученайсь.
Валентин Васильевич Конаков шачсь 1939 кизонь      9 июньцта Мордовскяй АССР-нь Атяшевскяй райононь Кулясово велеса крестьянонь семьяса.
Армияса служамда меле 1961 кизоня В.В.Конаков работась автомеханикокс Атяшевскяй «Сельхозтехникаса», а сяльде поступась Мордовскяй государственнай университету. Аделамок 1966 кизоня тонафнеманц, Валентин Васильевич кармась покодема образованиянь сфераса, 1966 кизоста сявомок 1979 кизоти молемс работась Мордовскяй государственнай университетса ассистентокс, старшай преподавателькс, металлонь технологиянь и машинань петемань кафедрань доцентокс, велень хозяйствань механизациянь факультетонь деканонь заместителькс. 1978 кизоня В.В.Конаков аделазе Московскяй лесотехническяй институтонь аспирантурать, теенза максфоль техническяй наукань кандидатонь лем.

31.01.2019  № 4
 

ДИПЛОПТ И ПРЕМИЯТ—АСУ ЛОМАТТНЕНДИ

Ётай недялять, 25 январьста, Российскяй студенчествань шиня Мокшэрзянь государственнай национальнай драматическяй театраса етась торжественнай пуромкс, конань пингста МР-нь Оцюнясь В.Д.Волков макссь казнет асу од ломаттненди. Мероприятияс пуромкшнесть аф фкя лацонь конкурсонь и олимпиадань сяськихне и призерхне, а стане жа  синь тонафтысна и тядясна-алясна.
Республикань Оцюнясь азозе, што асу од ломаттнень ширеснон кирдеманкса меля примафоль решения ладямс од премият школьниконь международнай и всероссийскяй олимпиадань сяськихненди и призерхненди.
«Международнай уровеньца сатфксонь сатоманкса премиять лувксоц 100 тежянь цалковайста сявомок 300 тежянь цалковайти молемс. Всероссийскяй олимпиадань мекольце этапонь сяськихне и призерхне получайхть 60 и 30 тежянень цалковай,—азозе Мордовиянь Оцюнясь.—Тядде лауреатокс арасть 43 школьниконьке. Тяда башка, казнет получайхть нинге 40 стирсь и церась, конат лац няфтезь пряснон  исследовательскяй тевса, социальнай и общественнай работаса, научно-техническяй творчествань и  профессиональнай мастерствань конкурснень эса».
31.01.2019  № 4
 

МОРДОВИЯНЬ ОЦЮНЯСЬ ВАНОНДОЗЕНЬ САРАНСКЯЙСА ОПТОВОЛОКОННАЙ ПРОИЗВОДСТВАТЬ ВИИЯФТОМАНЦ КОРЯС КИЗЕФКСНЕНЬ

Мордовиянь Оцюнясь Владимир Волков 22 январьста ётафтсь рабочай васедема «Оптиковолоконные системы» АО-ть генеральнай директоронц Андрей Николаевонь мархта. Ванондовсть предприятиять 2018 кизонь работань итогонза, а стане жа 2019 кизонди платтне. Ня кизефкснень ваномаса примась участия Правительствать Председателенц заместителец—промышленностень, наукань и од технологиянь министрсь Александр Седов.
Лятфтасаськ, оптическяй волокнань Саранскяй заводсь—фкясь и сякось странаса. Сон нолдафоль колма кизода инголе. Тя эсь лацонь производствать виияфтомань сембе этапонза етасть Россиянь промышленностень и торговлянь министрть  участиянц мархта. Владимир Волков аф весть васетькшнесь Денис Мантуровонь мархта, получсемок тя проектть, конанди вийс коре ладямс оптическяй волокнань производствать замкнутай цикланц марнек странать вешфксонзон мяльс сявозь, эряфс етафтоманц коряс республикать инициативанзонды ширень кирдема.
31.01.2019  № 4
 

МОКШЭРЗЯНЬ МАСТОРСЬ ТАГА ПУРОПТСЫНЕ ЭСЬ СТИРЕНЗОН И ЦЁРАНЗОН

Мордовскяй (мокшень и эрзянь) народть vii съездоц ётай тяддень
23-25 октябрьста республиканьконь столицаса
Мордовиянь Оцюнясь Владимир Волков 22 январьста Саранскяйса етафтсь мордовскяй (мокшень и эрзянь) народть VII съездонц, кона кармай тядде 23-25 октябрьста, етафтоманцты анокламать коряс совещания.
Совещанияса примасть участия Россиянь финно-угорскяй народонь Ассоциациять председателец Петр Тултаев, а тяфта жа мордовскяй народонь общественнай организациять Межрегиональнай представителенза, тяконь лувксса РФ-нь лия     субъекттнень эзда.
Владимир Волков мярьгсь, што мордовскяй народть съездоц работать важнай пяльксоц, кона мольфтеви властень оргаттнень и общественнай институттнень мархта традициятнень и межэтническяй ладямать ванфтоманц и ламолгофтоманц коряс—тя задачать путнесы странань Президентсь. Сай пингонь съездть инь главнай темац—«Мордовскяй (мокшень и эрзянь) народсь лама нациянь Россиять единай культурнай кодса».
31.01.2019  № 4
 
 

Мордовиянь Оцюнясь Владимир Волков Ётафтсь национальнай проекттнень эряфс етафтомаснон коряс рабочай совещания

17.01.2019  № 2
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин