Поиск по сайту: 
 

Архив
 май 
 2019 
пн вт ср чт пт сб вс
  12345
6789101112
13141516171819
20212223242526
2728293031  

 
 

 

Наши мокшанские сыновья и дочери

23 февральста—Отечествань аралаень шись


А вов мезе азондови земляконьконь колга «Сёрматф сембе пингс» книгаса. (Моску ошсь. Политическяй литературань издательствась. 1990 кизось. Авторхне А.Д.Зайцев, И.И.Рощин, В.Н.Соловьев).
«Иван Семенович Пьянзин Военно-Морской Флотса служаманц ушедозе 1938 кизоня. 1940 кизоня лац тонафнезь аделазе Севастопольскяй зенитнай артиллериянь училищать. Ульсь батареянь командиронь помощникокс, меле путфоль командиркс.
1941 кизонь 22 июньцта зенитнай батареясь, коса командиркс ульсь Пьянзин, ушедсь ляцендема врагть самолетонзон каршес, конат ёрасть ёрямс бомбат Севастопольть лангс. А мзярда фашисттне маладсть ошти, зенитчикне толса васьфнезь противникть и сухопутнай войсканзон. Войнань кизотнень батареясь прафтсь врагонь 11 самолет.
Севастопольть араламста аф пелезь тюрсть Черноморскяй флотонь моря трвань оборонань ПВО-нь 110-це зенитно-артиллерийскяй полконь 365-це зенитнай батареянь воиттне. Синь позициясна ащесь панда пряса, Мекензиевы Горы разъездть ваксса. Гитлеровецне пяк пельсть тя батареять эзда, кирдсть кяж сонь расчетонц лангс. Вдь батареясь ащесь синь инь оцю вийснон каршеса. Нинге эста, мзярда синь ётафнезь Севастопольть каршес васенце и омбоце штурматнень, батареясь фалу персезе киснон. Артиллеристтне прафнезь фашистонь самолеттнень, крьвяснезь танкаснон, шавондозь пехотинецснон.
Фкя бойть пингста ранендавсь батареянь командирсь Советскяй Союзонь Геройсь Н.Воробьев. Сонь полафтозе старшай лейтенантсь Пьянзин.
Мзярда фашисттне ушедозь Севастопольть каршес колмоце штурмать, синь састь мяльс машфтомс тя батареять. Ушедомок 1942 кизонь 31 майста сявомок 7 июнти молемс фашисттне апак лотксек ерясть бомбат сонь позициянзон лангс. Стаянь-стаянь батареять вельхксса лиендсть самолеттне, сядот тёжятть снаряд ёрдасть немецкяй артиллеристтне. Но батареясь кирдсь. Тапась атакас моли врагть эса.
9 и 10 июньцта гитлеровецнень кафта батальонцна тага тушендсть атакас. Но советскяй артиллеристтне васьфнезь синь толса и шавсть эздост пяк лама. Меле врагсь кафта шит апак лотксек ляцендсь батареять лангс орудияста и минометста. Модась, кона кепсевсь вяри сязевоматнень эзда, прашендсь орудиятнень лангс, снарядонь пяльксне тапсезь цельсемань приборхнень. Мярьгат, мезевок аф ляды тя вастса кшнинь даволда меле. Но кодак аньцек фашистскяй пехотась тушендсь инголи, батареясь одукс живолготкшнесь. Орудиянь и пулеметонь толса потафнезь врагть эсь вастозонза.
13 июньцта рана шобдава немецнень батальонцна, кона кяшфоль качамса инголи моли танкатнень фтала, тусь атакас. Синь маладсть батареяти и ушедсть ляцендема пушкатнень лангс. Миннетне стане жа апак лотксек ляцендсть. Кой-кона танкатне крьвязсть. Фкять противотанковай ружьяса ляцендезь лоткафтозе Пьянзин.
Но вийхне аф фкя лацоннетольхть. Пушкатне фкя-фкянь мельге лисендсть стройста.
Верботмоса стакаста ранендафста Пьянзин стаки вятсь бой. Няемок, што тевсь ёфси кальдявгодсь, сон ПВО-нь штабу кучсь радиограмма: «Тюремс аш мезьса. Пцтай сембе личнай составсь лиссь стройста. Анатама пушкань тол минь позицияньконь команднай пунктонц лангс».
Фашисттне ни арьсесть, што сяськозь и фатязь батареять, пуромсть марс. Но тя пингть лангозост ушедсть ляцендема шабрань ниле батареятне. Гитлеровецне пильгонь-прянь синдезь тусть ласькозь…
СССР-нь Верховнай Советонь Президиумть Указонц коряс 1942 кизонь 24 июльста старшай лейтенантти И.С.Пьянзинонди куломда меле максфоль Советскяй Союзонь Героень лем. Казьф Ленинонь орденца. Сембе пингс сонь лемоц сувафтф Черноморскяй флотонь моряконь спискати.
Челябинскяй областень Верхнеуральск ошса и Ольховатка велеса И.С.Пьянзинонь честьс путфт мемориальнай доскат. Геройть лемса Карталы ошса и Севастопольса азфт ульцят. Севастополь ошса сонь лемонц каннесы 14 № школась.
 
Ф.ГАВРИЛОВ,
Россиянь Журналистонь

26.02.2018 №
 
 
 

 
НОВОСТИ
 
 
 
 
 
 
 
 

Полафтови пенсиятненди социальнай доплатань максомась

Ня шитнень Мордовия Республикать эзга Россиянь Пенсионнай фондть Отделениясонза ётась пресс-конференция, конань вятезе Управляющайсь В.И.Василькин.
Пуромксть панжемста Владимир Ильич азозе, што аф кунара Россиянь Пенсионнай фондсь тись итокт 2018 кизонь работать коряс ПФР-нь инь цебярь территориальнай органть кочкаманкса конкурсти. Мордовиянь Отделениясь азф инь цебярькс Приволжскяй федеральнай округса и сувафтф ПФР-нь фкя инь цебярь отделениятнень лувксс Российскяй Федерацияса.
Сяда тов пачфтьфоль аф работай пенсионерхненди, конатнень пенсиясна регионца ладяф прожиточнай минимумда кржа, социальнай доплататнень максомаснон полафтоманц и пенсияснонды индексациянь тиемать колга. «Государственнай социальнай лезксть колга» и «Российскяй Федерацияса прожиточнай минимумть колга» федеральнай закоттненди сувафтф полафткснень мяльс сявозь прожиточнай минимумда кржа пенсияти индексациясь тяни тиеви тяфта. Васенда аф работай пенсионерть доходоц пачфтеви прожиточнай минимумть лувксс пенсияти социальнай доплатать вельде (кда сявомс Мордовиять, пенсиясь касфтови 8522 цалковайс) и аньцек тяда меле тиеви индексация пенсияти и эрь ковонь ярмаконь выплататненди (кда тяфтамот пандовихть пенсионерти). Тяфта, индексациять вельде сатф суммась кармай сяда оцю регионца ладяф прожиточнай минимумть коряс. Мордовияса пенсиятнень перерасчетсна тиеви майста ни. Республикаса прибавка получайхть 24 тёжянь пенсионерсь.
30.04.2019  № 17
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин