Поиск по сайту: 
 

Архив
 январь 
 2019 
пн вт ср чт пт сб вс
 123456
78910111213
14151617181920
21222324252627
28293031   

 
 

 

Национальная тематика

«МОКША» и «СЯТКО» журналхненди—90 юбилей мархта!!


15 февральста Мордовия Республикань Пресс-центраса ётась торжественнай пуромкс, кона лемтьфоль «Мокша» и «Сятко» литературно-художественнай, публицистическяй и общественно-политическяй журналхнень 90 кизонь топодемаснонды.
Тя шиня изданиятнень эса покодихнень лемс азфоль лама пара валда. Мордовиянь Оцюнять В.Д.Волковонь и республикань Правительствать лемста журналонь коллектифнень поздравляндазень МР-нь печатень и информациянь министрсь В.А.Калугин. Виталий Анатольевич лувозень региононь вятить приветствиянзон, конатнень эса тяконь лувксса азф, што «Мокша» и «Сятко» журналхнень оцюдонга оцю путкссна мокшэрзянь кяльхнень, культурать ванфнемаса, нароттнень ёткса ялгаксшинь соткснень кемокснемаса.
 
Журналхнень редакцияснон стане  жа поздравляндазь МР-нь Государственнай Собраниять Председателенц заместителец И.М.Москаев, Мордовиянь образованиянь министрть заместителец И.К. Дугушкин, республикань культурань, национальнай политикань, туризмань и архивнай тевонь министрть васенце заместителец А.И.Карьгин, Саранск ошень округонь оцюнясь П.Н.Тултаев, Мордовскяй (мокшень и эрзянь) народть Межрегиональнай общественнай организациянц председателец Ю.А.Мишанин и Организациять Исполкомонц председателец А.С.Лузгин, Финно-угорскяй народонь культурань Поволжскяй центрать директороц Р.И. Акашкина, ламоц республиканскяй журналхнень и газетатнень главнай редакторсна.
«Мокша» журналть главнай редактороц В.М.Лобанов и «Сятко» журналть главнай редактороц Т.В.Разгуляева азондсть изданиятнень эвондамаснон и эряфонь киснон колга.
1928 кизоня Пенза ошса лиссь «Валда ян» лем ала мокшень кяльса васенце журналсь. 1931 кизоста сявомок 1941 кизоти молемс изданиясь лисендсь «Колхозонь эряф» лем ала. 1941-1955 кизотнень журналсь ашезь нолнев, а 1956 кизоня сон мрдась лувити «Мокша» лем ала. Васенце шиста сявомок изданиясь арась цебярь ялгакс мокшень ломаттненди, конатнень мархта сон фалу корхтась ару мокшень кяльса. Стака ункстамс журналть путксонц мокшэрзянь литературать виияфнемаса. Сонь лопанянзон лангса макссевсть и тянивок макссевихть мокшень содаф писательхнень  и  поэт-тнень—Илья Девинонь, Максим Бебанонь, Михаил Сайгинонь, Тимофей Кирдяшкинонь, Михаил Безбородовонь, Василий Виардонь и лиятнень произведениясна. «Мокшеста» сидеста ули кода лувомс марийскяй, удмуртскяй, коми кяльста ётафтф стихт, азкст, повестть. Аф ёмла васта изданияса макссеви од сёрмадыхненди. Синь прозаическяй и поэтическяй произведениясна лисендихть «Од вайгяльхть» рубрикать ала.
«Сятко» журналсь ушедсь лисендема 1929 кизоста сявомок. Васенце номеронза нолдафтольхть Самараса. Тя пингста аф весть полафневсь изданиять лемоц, но сон фалу ульсь и лядонды эрзянь кялень, культурань ванфни арзянякс. «Сяткоса» макссевихть эрзянь, финно-угорскяй писательхнень произведениясна, фольклорнай материалхт, юмор, сатира, лувихнень сермасна.
Эряви азомс, «Мокша» и «Сятко» журналхне лувондовихть и кельговихть аф аньцек минцень республикасонк, но и странань лия региоттнень эсовок—Оренбургса, Самараса, Ульяновскяйса, Пензаса, Нижняй Новгородса, Тюменьца, Красноярскяйса, Сахалинца, Татарстанца, Башкортостанца, Чувашияса. Пачфневихть изданиятне омба масторувок: Финляндияв, Эстонияв, Венгрияв. Синь арсихть лездыкс школань учительхненди, идень садса, библиотекаса покодихненди.
Илань шиня «Мокша» и «Сятко» журналса работайхненди казьфтольхть государственнай и ведомственнай казнет. Мордовия Республикань Оцюнять В.Д.Волковонь эзда редакциятненди казьфтольхть автомобильхть.
 
О.ЕВДОКИМОВА.
Снимкатнень эса:
Юбилейти лемтьф илать пингста

26.02.2018 №
 
 
 

 
НОВОСТИ
 

Мордовиянь Оцюнясь Владимир Волков Ётафтсь национальнай проекттнень эряфс етафтомаснон коряс рабочай совещания

17.01.2019  № 2
 
 
 

Ули мезенкса кеняртькшнемс

Монь, кода од ломанень, пяк лад мялезон ся, кода кизоста кизос коль сяда и сяда мазыкс и арукс арси республиканьконь столицац—Саранскяйсь. Тяни ётат сонь ульцянзон, проспектонзон, парконзон, лия вастонзон эзга и седице пяшкоди кенярьдемада, гордостьта и ошть, и марнек Мордовиять инкса. Сембода лама полафткста, конешна, эвондась тяса футболть коряс Миронь чемпионатти анокламста. Ваносте, кодамот тяни ошень китне, вокзалхне! Мяльцень стане жа саласазь «Тавла» гостинично-жилой од комплекссь и Экопарксь. Марнек полафтсь, лиякс арась аэропортсь. Тяни тяста самолетса можна пачкодемс Москуву и Санкт-Петербургу. А мзяра строяф идень садта, школада, гипермаркетта, лама лия пяк эрявикс объектта. А кода аф лятфтамс уникальнай спортивнай объектть—«Мордовия Арена» стадионть. Сон сембоса отвечай тяниень пингонь инь оцю вешфксненди. Аф стак самай тяса меля налхксть миронь инь вии футбольнай командатне. Тя ли аф фантастика, тя ли аф честь сембонди тейнек. А ёфси аф кунара Саранскяйса ётафтфоль эйть лангса конькаса фигурнайста куркснемать коряс Россиянь чемпионатсь. И тяконь лаца спортонь оцю праздникт миньцонк ётафневихть аф шуроста.
Спортсь лихтезе столицаньконь пяк няевикс вастс, тиезе сонь содафокс аф аньцек Россияса, а марнек мирса-масторса. «Саранскяйсь—тя афкуксонь Европейскяй ош, тяса сембось тиф-ладяф оцю уровеньца»,—тяфта азондсазь эсь мяльснон-арьсемаснон столицаньконь колга тяза сашенды инжихне.
Мария Тарасова.
10.01.2019  № 1
 

10 январьста—Мордовиять шачема шиц

Панчфокс панчт, мокшэрзянь краеньке!
Тячи Мордовия Республиканьконь шачема шиц. Топодсь 89 киза, кода теенза максф государственность. 1930 кизонь 10 январьста ВЦИК-ть Президиумоц примась постановления Мордовскяй округть Мордовскяй автономнай областекс тиеманц колга. Тя шись и лувондови мокшэрзянь республикати шачема шикс. А ниле кизода меле тифоль Мордовскяй АССР-сь.
Тянь мархта путфоль цебярь ушеткс касоманди-виияманди. Ётаф пингста ламода кассь республикать экономическяй виец, кеподсь культурась, образованиясь, наукась. Ламоц земляконьке арасть гордостекс аф аньцек Мордовияса, но и сембе Россияса.
Сембода оцю сатфкст миньцонк сатфт мекольдень кизотнень. Мордовиясь путневи примеркс лиятненди, тяза сашендыхть опытонкса, тонафнема. И ули мезти тонафнемс. Республиканьке тячи—странать инь  вишкста вииякшни региононзон эзда фкясь.
10.01.2019  № 1
 

Мордовия Республикань культурань, национальнай политикань, туризмань и архивнай тевонь министрсь А.М.ЧУШКИН: «ЛАДЯМА СЕМЬЯСОНТ И САТФКСТ ТЕВСОНТ!»

28.12.2018
 

Н.П.Огарёвонь лемса Национальнай исследовательскяй Мордовскяй государственнай университетонь ректорсь С.М.ВДОВИН: «КАТК ЁТАФТОВИХТЬ ЭРЯФС СЕМБЕ ВАЛДА МЯЛЕНТЕ И ПЛАНОНТЕ!»

28.12.2018
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин