Поиск по сайту: 
 

Архив
 август 
 2020 
пн вт ср чт пт сб вс
     12
3456789
10111213141516
17181920212223
24252627282930
31      

 
 

 

Демография

МЗЯРА ИДЬТОТ, СНЯРКСТЬ ПАВАЗУВАТ

Лама ведьта шудесь ся пингста, ламось полафтсь Смолякофнень семьяса. Одонь кизотнень отец Сергий афи арьсекшнесь сянь колга, што арай священникокс. Но Шкайсь, улема, бславазе тянди.
Пингсь мольсь. Вейхксогемонце кизотнень песта Смолякофне састь Мордовияв радня ломаньцнон шири инжикс. Тусь мялезост мокшэрзянь краеньке. Эста и арьсесть: а мес аф ётамс тяза эряма. Самай эста, ардомок Саранск-Ульяновск трассава, шарфтсть мяль кить эзда ширеняса вяре вастса ащи храмть лангс. Тя мазышись и салазе Смолякофнень мяльснон. Тяка пингть прязостка ашезь сашенда мяль, што кой-мзяра пингта меле отец Сергий арай тя храмти настоятелькс. Мордовияв эстонь сашендомстост якасть синь Чуфаровскяй алянь монастыри, коса отец Феофан (эста нинге шисоль) бславазень ётамс Мордовияв. Мрдамок Самарскяй областень Жигулевск ошу (тоса эрясь семьясь), састь мяльс мимс квартираснон и ётамс Мордовияв эряма. Рамасть Чамзинкаса куд, сидеста улендсть Чуфаровскяй монастырьса. Эстонь наместниксь (отец Лазарь) азсь мяль, штоба араль священникокс. 2000 кизоня отец Сергий арась Никольскяй церькавонь настоятелькс.
Смолякофне фалу арьсекшнесть оцю семьянь квалма. И мяльсна пяшкодсь. Фкя-фкянь мельге шачендсть семьясост идьсна. Васенда Шкайсь макссь колма цёранят: Антон, Михаил, Анатолий, сяда тов Белай свету эвондасть Татьяна, Ольга, Катя и Анюта. Мзярда Аннаснонды топодсь кизоня, тусть Смолякофне фкя идень куду Роштувань казнень казема. А казнетне кодамот: церькаву сашенды велеряйхне кодайхть понань носокт, пидихть-панихть   и   тянь  пачфнезь  иттненди. Казнетнень максозь, мяльсноль ни тумс куду. Эста матушкась Ольга азсь мяль сявомс идь—уроскятнень лангс ваномста пяк ни колавсь мялец. Аф лама пингта меле тяфта и тисть. Кизотне мольсть, семьяське кассь. Сембоц Смолякофнень семьяса иттнень лувкссна валом пачкодсь кемгафтувоти и эрь  идть колга родительхненди ули мезе азондомс пефтома и аньцек цебярь. Кажнайть синь пяк кельгсазь, кажнайсь эздост асу эсь лацонза. Смолякофнень идьсна, эряви азомс, морсесть и морсихть церковнай хорса, сатнихть музыкальнай образования. Семьясост ули фортепиана, баян. Стирнясна Татьяна и Ольга пяк лац морайхть музыкальнай инструментса. Цёранятневок аф ляткшнихть эздост. Тяда башка, синь пяк цебярь мастерхт. Кудса ремонтонь тиемась—тевсь синь. Конешна, примси участия алясновок. Главнай специалистсь кудса—колмоце церасна Анатолий. Родительсна мярьгондихть, што щятякс, улема, тусь. Дивандафнесы эсь маштомошинц мархта мянь алянцка.
Отец Сергий сембода лияда башка кельгсы модать лангса работать. Касфнихть перень серот, вятихть хозяйства. Но васень пингть мельгаст кемокстафтольхть аньцек кафкса соткат мода. А тя касы семьяти мезевок ашель. Тяса оцю спасиба азонкшнихть республикань Правительствати и республикань ся пингонь Оцюняти Н.И.Меркушкинонди. 2004 кизоня Смолякофнень семьяснонды максфоль миллион цалковай, рамасть нинге кемонь соткат мода, коза пингонь ётазь строясть од куд, кона нюрьхкяня пингста пяшкодсь идень вайгяльда. Иттне шабакскиге касфневсть-воспитандавсть Шкаень валть мархта, озондозь, фкя-фкянди лездозь, молитваса. Кой-конат кочказь аляснон кинц, седисна-ваймосна вешезь тянь, мезсь кепсесы родительхнень мяльснон.
…Мекольдень кизотнень ламотне сашендыхть мяльс шачфтомс колмоце-мзяра идть. Тянди ламода лездыхть властьса ащихнень мархта тиф цебярь аськолксне. Лятфтасаськ «Материнский капитал» программать, кона кармай мольфтевома 2021 кизоти. Кепотьксонди, ся семьятнень эса, коса касфтови колмонь и сяда ламонь идь, ипотекать вельде макссевихть процентфтома кредитт квартирань рамамс, а сятненди, кинь мялец строямс куд, стане жа максовихть процентфтома кредитт и модань участкат.
—Тя аньцек шнама,—мярьгсь священнослужительсь.—Лац тиендихть оцюняньке, шарфтомок демографическяй кизефксненди башка оцю мяль. Афкукс, оттнень аш мяльсна водендамс оцю семьят, кода миннесь. Кафта, колма идень шачфтыхне цють ни аф геройкс лувондовихть. Стаки оцю пичефксокс ляткшнихть катф иттне.
Отец Сергиень, кода священниконь, и кода простой ломанень, озадонь седихть ащема аф кадондсазь шумбра-таза родительхнень пингста урозкс лятф иттне. Сувада, кле, идень куттненди, ваймозт арси стака. Пуромихть урозкс лятфкятне перьфкат, ваныхть сельмозт и сяконь учихть, што сявсак сонь кядезт, ктмордасак ваймоёжезт и мярьгат: «А мон инксот сань». Разнай кизоннет: и сяда оцюнят, и сяда ёмланят, и ёфси атнайнят. Шкабаваз, мярьгат, кали синь тядяснон мяштьса седи пиксы? Аф, улема, сонь вастсонза   кев.
Виде, удалси кой-конатненди, сявондьсазь синь семьяс, кода тяниень героеньке, а оцюшкасна сереснон касондсазь идень куттнень эса, коса и валда, и лямбе. Но ся лямбось эжди аф стане, кода родителень кудса.
 
Н.КУБАНЦЕВА

26.02.2018 №
 
 
 

 
НОВОСТИ

Ушедсь сёронь урядама пингсь

Эрь гектарста ули кочкаф 50 центнер сёра

 

Тяфтама ни велень эряфсь, фкя тевсь полафнесы омбоцеть. Нинге исяк республикань велень хозяйстватнень эса инь оцю мяль шарфневсь и водендафоль лама вий кормань анокламати,  тячи лама вастова кярьмодсть ни сёронь урядамати. Лихтезь паксятнень лангс эсь комбайнаснон и Рузаевскяй райононь «Агросоюз—Левженский» ООО-нь механизаторхне.

 

 

—Сёронь урядама пингти маладоме сембе ширде аноклафста,—азонды хозяйствань вятись, Мордовия Республикань велень хозяйствань Заслуженнай работниксь В.И.Сетин.—Комбайнатне пцтай сембе отт, мяльце касы мархтост работамс. Сёронь урядама пингть синь фалу паксясот, кой-кона участкатне ащихть кемоньшка вайгяльбень вастса и техникась мековасу аш месть панцемс. Марнек сёротне видефтольхть фкя тёжянь гектар лангса. Урожайсь пяк цебярь, эрь гектарста сяфтяма аф ведьгемоньда кржа центнер сёра. Кда кармай цебярь погодась, сембе  ня площаттнень  урядасаськ кафта-колма недяляста.

 

30.07.2020  № 29
 

МОРДОВИЯ РЕСПУБЛИКАНЬ ОЦЮНЯСЬ ВЛАДИМИР ВОЛКОВ ВАНОЗЕНЬ РЕСПУБЛИКАНЬ РАЙОТТНЕНЬ ЭСА СОЦИАЛЬНАЙ ОБЪЕКТТНЕНЬ СТРОЯМАСНОН КОРЯС РАБОТАТНЕНЬ МОЛЬФТЕМАСНОН

Краснослободскяй районца

 

 

24 июльста МР-нь Оцюнясь Владимир Волков ульсь Краснослободскяй районца, коса ванозе, кода мольфтевихть Бобылевские Выселки велеса «Комплексное развитие сельских территорий» программать коряс комплекснай компактнай строямать коряс проектть эряфс ётафтомац.

 

Проектть коряс арьсекшневи строямс спортивнай комплекс и  модань 132 участкаса эряма кутт. Бобылевские Выселки велесь ащи маласа Краснослободск ошти, сяс тя пцтай фкя агломерация.

 

Кода няезе Мордовиянь Оцюнясь, спортивнай сооружениять строямац мольфтеви сембе вийса и нльне графикта инголе. Республикаса тя фкя и сяка спортивнай объектсь, коса фкя вельхкс ала кармай ледовай арена, оцюфненди и иттненди бассейнат, тренажернай и фитнес-залхт. Лама функцияса спортивнай сооружениясь арай межрайоннайкс.

 

Кда сявомс проектть омбоце пяльксонц—комплекснай компактнай застройкать, тячиень шити площадкаса аделсеви газопроводонь и водопроводонь ётафтомась, тиф 1,4 вайгяльбень кувалмоса ки, лядыкс 1,7 вайгяльбесь—сай кизонь планца.

 

Владимир Волков путсь Краснослободскяй районть оцюнянц Алексей Буйновонь инголе задача—сяда виияфтомс аноклаф  территорияса куттнень строямаснон, тяконь лувксса льготнай велень ипотекать вельде.
 

 

 
30.07.2020  № 29
 
 
 
 
 
 
 

ВЛАДИМИР СУШКОВ ВЕШСЬ СЯДА ЭРЕКЛАФТОМС ТЕФНЕНЬ И КЕМОСТА ВАНОМС КАЧЕСТВАТЬ МЕЛЬГЕ

6 июльста Мордовиянь Правительствань члеттнень мархта совещанияса ванондовсть национальнай проекттнень эряфс ётафтомаснон коряс кизефксне. Республикань Правительствать Председателец Владимир Сушков отмечазе, што социальнай ширде важнай кой-кона объекттнень эса заняф аф сатомшка ломаньда и аф марнек нолявихть тевс графикнень ванфтозь работатнень пяшкотькшнеманкса строительнай механизматне.

 

 
Ётай ваймама шитнень региональнай кабминонь премьер-министрсь ванозень Идень республиканскяй клиническяй больницять хирургическяй корпусонц и Республиканскяй онкологическяй диспансерть поликлиническяй отделениянц, конат строявихть «Здравоохранение» нацпроектть рамкаса, строямаснон. Владимир Сушков мярьгсь работамс        объекттнень эса сутканьберьф и кемоста ваномс тиеви работатнень качестваснон мельге. Тяфта жа Правительствать Председателец мярьгсь анокламс уликс онкодиспансерть зданиянц петеманкса сембе документациять. Тядде нацпроектть рамкаса кармайхть одкстоптфт 70 фельдшерско-акушерскяй пункт и фкя врачебнай амбулатория.

 

09.07.2020
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин