Поиск по сайту: 
 

Архив
 июнь 
 2019 
пн вт ср чт пт сб вс
     12
3456789
10111213141516
17181920212223
24252627282930

 
 

 

Юмор и сатира

КОДА ПЯТУНЧИК ЛЯДСЬ СЬКАМОНЗА

Ташта Кушманьцяста
 васьфтине Айгоронь
 Пятунчикть.
—Кода эрят, ялгай?—кизефтине од алять.
—Баяркс,—отвечась.
—Ся пара. Сюкпря Анюцти, цёратненди.
—Азса, конешна. Тонць сувак кодавок калякондама. Учтядязь…
Омбоце шиня сувань Пятунчиконь ширес.
—Ськамотат, штоли?—кизефтине щамонь каямста.
—Мес ськамонан. Ниленектяма…
—А мес-бди кивок аф няеви?
—Мес аф няеви? А нят кит,—няфтсь попугаензон лангс.—Тяни синь эряй ялгане. Мархтост аф скушна. Шиньберьф аш покойсна. Пешкоткшнихть да лябайхть фкя-фкянь. Фкясь стирь, кафттне женихт. Вов и аф явови кодавок ётксна.
—А кода тон ни лядоть ськамот?
—Кода? Кода? Кода и сембе.
Пяту нолдазе салдорксонц:
—Семьяти эряват эста, мзярда зепсот титихне-митихне. Ашет синь, и шава кяскавса калтатьфат, и ёньда лисьфат, и алянди аф кондястят. Ярмакнень мархта алят и лемцевок Пят Пятыч.
Ялгазе ушедсь азондома, мезе лиссь мархтонза, мес кадозе семьяц.
Якай ошу ярмаконь добувама. Весть зепе ярмак усксь, омбоцеда, колмоцеда… А мекольдень пингть, мярьгат, равжа ката кинц перязе. Ушедсть добувафонц кирнема, аф эсь пингстонза макссема. Сась ошста пульзяфста, обжафста.
Рьвац эстокиге:
—Ярмакнень салафтыть?!
—Ашине салафта. Мельган надияфтсть кучемс.
—Кие мельгат кучсыне, ёньфтома ломань?
Штазь пилетнень так штазь.
—Кда и тяфта, мон мезе тиян?
—Мезе тият?! Ломатть содасазь, мезе тиемс. Молелеть погонцотненди, пеняцялеть.
—Пеняцялень?! Тяда меле кода мархтост покодема?
—А кода тейнек улемс? Тянь квалма арьсеть? Петёконь аш мезьса алиментонза пандомс, судебнай пристафнень эзда кяшенди. Андювонь рьвац, сяконь пельхть, айдясы. Семьяц аш мезьса трямс. Монць шееронь сивф кямоса якан.
—Петёк мархта Андювонди эстеест арьсемаль семьяснон колга. Рьвяяма, шабань тиема маштсть, а ярмаконь добувама аф маштыхть, аляснон лангс надияйхть.
—Тонга ни тиить тевть. Аля аньцек лемце, а тяфтак кивок ашат.
Анзясь, анзясь Аню, меки прважазе ошу Пятунчиконь добувафонц инкса.
Ётазень алясь погонцотнень. Ульсь полицияса, прокуратураса. И максозь добувафонц. Кургоц пиледа пилес.
—А кяскав мархтот сявоть?—кизефтезе мзолдозь кассирсь.
—Сняра ярмак макстада, што кяскавфтома афи сявовихть,—кторды Пяту.
—Видеце, кяскавфтома аф сявовихть.
Пятунчик цють боком ашезь веля, мзярда кассирсь ушедсь трёшник мархта кяскавнятнень венепнема. Фкя, кафта… комсь, колмогемонь… Кяскавса кемонень, ведьгемонень трёшникт, цалковайхть.
—Лувомост кармат?—кизефтезе пеедезь кассирсь.
—Рахсетяда, штоли, лангсон? Кода пачфтьсайне куду, кие сявсы кядьстон тняра трёшникть?
—Мезе тиян? Сувак эстеенза баярняти, кода мярьги.
Пяту сувсесь оцюнятивок. Сянь корхтамац нюрьхкяняль.
—Лия ярмакт кассаса аш. А учема тонць ашеть карма.
Кие аф няйсы Пятунчиконь «хэ-хэ-хэ» лангсонза. Пара ярмаконяц мархтонза ульсь, меки кудувок афоль пачкоде. Сявсь такси, ускфтозе добувафонц вокзалу. Инь мялень салайсь ушедсь кудса, Ташта Кушманьцяса. Фкя лавкав ласьки, омбоце лавкав моли. Трёшникнень сявисна аш. Сембе «хэ-хэ-хэ» да «хэ-хэ-хэ». Сяконь и кулят: «Кие, шта, тяшкава аердазе алянять?» Рьвацка понашкофтозе шаманц, ломанькс аф пшкятькшни.
Пятунчиконь Маря сазороц стирь рьвакс макссь. Пиравама тердезь Петю мархта Анювоньге.
—Лия казненьке аш,—мярьгсь Аню мирденцты,—трёшникнень и казьсаськ. Вов ули казнесь!
Аню вяри кеподезе види кядень пяльхканц.
—Тон месть?—абондозь кизефтезе Пяту рьванц.—Маряньконь, лия радняньконь кяжияфтсаськ. Тя, мярьгихть, пеедьсамазь, аердамс ёрасамазь.
—Катк кяжияйхть, сяда вишкста якама ушедыхть. Аф сякот ярмакне, штоли?
—Сяка кода-бди аф ломанькс.
—Ломанькс аф ломанькс. Кодама ярмакт кандоть, стапт и каятама.
Гульбань шра ваксса одонь поздравляндама стясь сонць Аню. Азсь мзяра-бди валня, а меле поладозе:
—А казненди Пяту альнякантень добувафонц.
И маразень шра лангс трёшник мархта кяскавнятнень. Инжихне «хэ-хэ-хэ» рахазевсть. Оттневок эрекласть.
—Тя мезе мархтот, Анна?—обжафста кизефтезе Маря.—Цебярь вастозень пахерямс ёрасак?
—Ёфси аф. Мезе оттне кармайхть тиендема свадьбадост меле? Мезевок аф. А тяни появай тевсна. «Горько!» «Горько!»
Оттне ктмордасть фкя-фкянь. А меле нолдась вайгяль гармониясь. Аню комотсь кштима:
Пятунчикозе фалендай:
«Мон аф алян, штоли»?
Кда карман анзяма,
Лия авас моли.
Лия аванди максса,
Аф эряви мирде,
Тя паршивайть ваксса,
Кивок афоль кирде.
Пятунчиконь раднянза нолдазь пряснон, ашезь ту мялезост.
—Ломань пингста ни, Анна, тяфта афоль эряв пахерямс мирдце. Кафта цёрат шачфтоть эздонза. А тон мезе ащат, Петька. Кяльце, штоли, аш?!
Пятувок лиссь морама:
Ожу, азса тонць кият,
Пильгосурозень аф
 тият,
Шочконят пилькне,
Шалхкопрясот цилькне.
—Тейть нуласа якамаль,—сельксь Аню Пятувонц шамас.—Кодама тон алят.
Авась шарфтсь и тусь. Тяда меле Айгоронь Пятусь лядсь ськамонза. Аш анзяец, аш парафтыец. Аньцек кулхцонкшнесыне попугаензон аф сетьмоси вайгяльснон. Мархтост аф скушна. Хуш и алясь нинге од и отькорь, но лия авас аф моли. Надияй, Анювоц мрдай. Лажадсь сюцеманзонды, тонафтоманзонды. А ся аньцек понашкофнесы шаманц, низелды лангсонза. Варжак, кле, моньфтемон эряк, кда тейть аф цебярян.
                                                                                                                                        Илья ВЕШКИН.

02.03.2018 №
 
 
 

 
НОВОСТИ

Минь поздравленияньке

13.06.2019  № 23
 
 
 
 
 

«Рузаевкаса мольфтевихть анокламатне стекольнай заводть панжеманцты»

Мордовиянь Оцюнясь Владимир Волков:
Мордовиянь Оцюнясь Владимир Волков 29 майста ётафтсь рабочай васедема Рузаевскяй райононь руководительть Вячеслав Кормилицынонь мархта. Ванондовсть территориять социально-экономическяй виияфтоманц коряс кизефксне. Тяконь лувксса корхтамась мольфтевсь социальнай объекттнень строямаснонды анокламать колга: Рузаевкаса Паровознай ульцяса 160 вастонди идень садть, Татаронь Пишляса 250 вастонди школать, фельдшерско-акушерскяй пункттнень.
Ванондовсть районца водоснабжениянь и водоотведениянь систематнень одкстоптомаснон, а стане жа «Безопасные и качественные автомобильные дороги» национальнай проектть эряфс ётафтоманц рамкаса китнень строямаснон и петемаснон коряс кизефксне. Тядде, кода отмечазе Вячеслав Кормилицын, петевихть-одкстоптовихть 13 вайгяльбень кувалмоса кит.
06.06.2019  № 22
 

Аделсеви «Мокшень правдати» сёрматфтомась

Эряскодода!
Кельгома ялгат!
2019 кизоть омбоце пяленцты «Мокшень правдати» сёрматфтомать шумордамс ляткшни аньцек кафта недялят.  И ули тячи мяленьке нинге весть азомс нюрьхкяняста: мес именна «Мокшень правда» эряви тинь семьянтенди.
Кода аф ужяль, мокшэрзятнень лувкссна стаки кири. А «Мокшень правдась» семботь тиендьсы сянкса, штоба аф нолдамс тянь. Кода ванфтомс и виияфтомс кяленьконь, культураньконь, аф юкстамс эсь коеньконь-обуцяньконь—вов мезть колга мольфтеви корхтамась сонь лопанянзон эса. Пцтай эрь номерса макссевихть материалхт мокшэрзятнень историяснон, содаф ломаньцнон колга, азонкшневи народоньконь арьсеманзон и пичефксонзон колга.
«Мокшень правдаса» макссевихть медицинскяй темас советт и рекомендацият, советт перень сёронь касфнихненди и жувата мельге якайхненди. Эрь номерса ули юморонь и сатирань уженя, рузонь кяльса печатлакшневихть недялянди ламоц телевизионнай программатне.
«Мокшень правдась» республиканскяй газетатнень эзда фкя инь интереснай и уцез газетась. Сон нльне сяда уцез ламоц «районкатнень» коряс.
Теенза тяшфтемать питнец:
6 ковонди—336 цалковай,
3 ковонди—168 цалковай.
Газетать индексоц П4719.
 Эряскодода почтав. Тоса учихть эсонт. Пингсь содай ётаманц.
06.06.2019  № 22
 
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин