Поиск по сайту: 
 

Архив
 апрель 
 2019 
пн вт ср чт пт сб вс
1234567
891011121314
15161718192021
22232425262728
2930     

 
 

 

Люди и дела

ПЕРХЛЯЙСЬ ИСЯК И ТЯЧИ…

Саранскяйть эзда комозьда цють лама вайгяльбе вастса ащи мокшень велесь—Перхляйсь. Велесь кода веле. Салайхть сельмованф куттне, аф ашуста эряйхть ломаттневок. Аньцек коласы мяльцень ся, што ряцок пайгокс ащи куттнень ваксса пяк лама катфта, шавода. А вдь нинге ёфси аф кунара велеса эряфсь лаказь-лакась. Перхляень средняй школав тонафнема сашендсть мянь шабрань велетнень эзда. Тяни тянь аш кода азомс.
Козя мокшень тя аймакть историяц. Ичкоздень ся пинкнень перхляряйхне сявозь павазу эряфть баярхнень кядьста. Арасть синць азоркс и ушедсть од эряфонь строяма. Но вов кизефкссь: кода строямс од эряф содамошифтома? Сяс тостонь эряйхне сиренек-однек озсесть школьнай партатнень ваксс.
Удалась эсь пингстонза корхнемс Перхляень школань васенце пионерхнень эзда фкять, тяни покойнайть Алексей Максимович Тингаевонь мархта.—Стакаль эста эряфоньке,—лятфнесь оцю стаж мархта педагогсь.—Аф юкставихть и коллективизациянь, и кулаконь панцемань кизотне. Но эряфсь мольсь…
Эстонь стака пинкнень аф содафоль, мес паньфтольхть велеста Дальняй Востоку ламоц велеряйхне. Кепотьксонди, веньгучкать сявфтольхть и прважафтольхть масторбев П.И.Польдяефнень, Кубанцефнень и ламотнень лиятнень семьясна. 1938 кизоня муворукс лувфтольхть и паньфтольхть тага колма земляконьке. Нят ульсть Попов, кона ся ичкоздень пинкнень работцесь колхозонь пчеловодкс, Макулов и Кизолов. Коза сявозь, мезе мархтост, кодамовок куля тянь колга апак маряколь.
Эрясть Перхляень, да аф аньцек тястонь эряйхне пяк ашуста, сембе вастова азорондась рдазсь, урматне. Кулакне сембе вийса старандасть шорямс од эряфонь строяйхненди, активисттненди, кода маштсть тиендезь эсь равжа тевснон. Но сембе сяка видешись сяськсь. Валом-валом одкс кармась латцевома эряфсь. Коль сяда кемокснесь, пуропнесь вий марстонь хозяйствась. Но народть сембе цебярь планонзон, валда арьсеманзон колазень Великай Отечественнай войнась. Седиень сязьфти тя кулясь курокста шарозе сембе масторть. Ламоц алятне и цератне тусть Родинаньконь аралама. Ниле сядода лама аля вайме прважафоль войнас и Перхляй велеста, синь пялесна ашесть мрда меки—максозь эряфснон тячиень валда эряфть инкса…
Коль шуромкшнихть фронтовиконь ряттне. Но мялямста сембе сяка аф нардавихть сятнень лемсна, конат, эряфонь аф ужяльдезь, тюрсть кяжи врагть каршес. Лятфтасаськ эздост фкять, Отечественнай войнань I степенень, Якстерь Звездань орденонь, аф фкя медалень кавалерть Н.Н.Трякинонь. Велеса мярьгондсть теенза «Латыш». Сон, мяляфтса, азонкшнезе, што тя лемсь педсь теенза нинге войнань кизотнень, мзярда арась ялгакс латышскяй содаф писательть Соломон Эйдусонь мархта. Улендсь ингольдень фронтовиксь и Ригаса, коса васетькшнесть фронтовой ялгатне и лятфнесть толу киснон-янцнон колга. А геройти Трякинонди ульсь мезе азондомс, вдь сон машфтсь лама фашист.
Великай Отечественнай войнань геройть и мокшень содаф писательть Леонид Федорович Макуловонь, кона шачсь-кассь мокшень тя велеса, брадоц Иван Макулов. Вов мезе серматф сонь колганза «Очерки истории Мордовской АССР» книгать омбоце томсонза: «Афкуксонь геройкс тюрсь фашисттнень каршес Сталинградть маласа Рузаевскяй райононь Перхляй велень эряйсь Иван Макулов. Фкя бойть пингста сонь танкац стройсоль кемнилие част. Экипажец машфтсь кемзисемге пушка, сисем танкат, кафта сятт ведьгемоньда лама фашист. Сонць Макулов стакаста ранендафоль, но тюремань паксять ашезе кадонда. Аньцек бойхнень сетьмомда меле прважафоль госпитали».
Войнаста велень сембе шумбра алятне тушендсть фронту, но ашесть вельхнев сор тишеса паксятне. Тракторонь рычакнень ваксс мирдьснон вастс озсесть аватне, шобдаста шобдас работцесть колхозонь паксятнень лангса атятне и шабатне. Пцтай сембе урожайсь прважсевсь фронту. Лятфтасаськ пара валса сятнень, кит войнань кизотнень работцесть тракторса. Шарьхкотьф, ашет ни синь шиса, но колгаст аф юкснема тяниень поколенияти. Нят К.П.Стеклянникова, М.И.Ильина, Е.И.Ильина, М.А.Исаева и лиятне.
Кизотне лиихть нармонь лаца и мрдафневихть аньцек мялямса. Афкукс, колхозса эста ашель кинди работамс велень хозяйствань техникать мархта. И кой-кодама содамошинь сатомда меле озсесть тракторс аватне-стирьхне. Содаф, лама ли тиеви авань вийти, но сембе сяка кятть ашесть ноля. Кой-коста паксясольхть шобдаста шобдас, сизсесть аф азовомшка кода, но аньцек лятфнезь, што тиендихть странати пяк эрявикс тев, и тага эрьгя сашендсь эзост.
Лядсть фталу войнань, войнада мельдень стака кизотне. Сембе вастова кярьмотьфоль мирнай трудти. Велеряйхне ингольцекс мяляфтыхть Ерофеефнень династияснон колга, Тингаефнень, Макулофнень и ламотнень лиятнень квалма. Гордостень маряма вастокс велеряйхне лувондозь и лувондсазь педагокнень И.П. Пьянзовонь, В.М.Федотовать, К.Н.Надоровать, Н.П.Чигиревать, Т.И.Ильинать и ламотнень лиятнень, конат сембе эряфснон лемдезь сянди, штоба велень иттнень еткса сяда лама улель разнай направлениянь специалистта. И тя теест удалсесь.
Етай веконь 20-це кизотнень песта и 30-тнень ушетксста Перхляйса, кода и сембе вастова, ульсь коллективизация. Ульсть тоса кафта колхост. Нят «1-я пятилетка», а меле XVIII партсъездть лемса. Председателькс разнай кизотнень ульсть П.Г.Исаев, А.И.Ерофеев, П.Н.Тихонов и лиятне. Войнада меле ня кафта колхосне шовордафтольхть марс и тяфта «тиевсь» «Мир» колхозсь. Реорганизациясь ашезь ета и Перхляень колхозть вакска. 60-це кизотнень «Мир» хозяйствась арась «Шишкеевский» совхозти отделениякс. А 80-це кизотнень ушетксста пуроптфоль «Подлесный» совхозсь. Тифоль Рузаевкаста Перхляи асфальтса ацаф ки. Васенце директоркс ульсь В.Н.Ильин, меле—В.М.Лапштаев (тяни аш шиса). Синь руководстваснон пингста тифоль пяк лама. А инь главнайсь—пачкодсь вели газсь, эвондась Молодежнай ульцясь, тиевсь лама лия полафткс. Кода совхозонь директорсь, стане и эстонь парткомонь секретарсь В.Н.Архипов лац содазь, што цебярь кадрафтома ичкози аф пачкодят. Сяс сембода лияда башка, оцю мяль шарфтсть кадрань кизефксненди.
«Подлесный» совхозть сатфксонза кепсесть мяль. Но     90-це кизотнень ушетксста совхозсь арась частнай предприятиякс, тифоль крестьянско-фермерскяй хозяйства, конанди руководителькс Николай Васильевич и Юрий Васильевич Сардаефне. Синь аф кржа тиендихть сянкса, штоба велесь, катк и ламода кирсь-шамсь, стаки эряль. И ули надияма—тя теест сатови.
Н.КУБАНЦЕВА.

15.03.2018 №10
 
 
 

 
НОВОСТИ
 
 
 
 
 
 

МОРДОВСКЯЙ ГОСУНИВЕРСИТЕТСА ПАНЧФ УЧЕБНО-НАУЧНАЙ ЛАБОРАТОРИЯ

2 апрельста Мордовиянь Оцюнясь В.Д.Волков ульсь Н.П.Огаревонь лемса      МГУ-са, коса ванозе лекарственнай средствань технологиянь учебно-научнай лабораториять и корхнесь од ученайхнень и студенттнень мархта.
Лекарственнай средствань технологиянь учебно-научнай лабораториясь панчфоль Физикань и химиянь институтть видеса 2019 кизоня университетть и «Биохимик» АО-ть марстонь вийса. Тянкса нолдафоль пцтай 4 миллиотт цалковай (фкя миллион цалковайсь—предприятиять). Лабораториясь козякофтф тяниень пингонь оборудованияса, кона максси возможность етафнемс аф аньцек учебнай занятият, но и фармацевтическяй субстанциятнень и анок лекарственнай форматнень технологияснон анокламанц коряс научнай исследованият. Лабораторияса студенттненди ули кода пяшкодемс лекарственнай препараттнень производстваснон действующай веществать синтезонц эзда сявомок анок продукцияти молемс. Лиякс мярьгомс, тевса варчсесазь университетса получаф содамошитнень.
11.04.2019  № 14
 

1 апрельста ушедсь 2019 кизоть омбоце пяленцты газетас и журналс сёрматфтомась

11.04.2019  № 14
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин