Поиск по сайту: 
 

Архив
 ноябрь 
 2019 
пн вт ср чт пт сб вс
    123
45678910
11121314151617
18192021222324
252627282930 

 
 

 

Тема дня

Пресс-конференцият

—Мордовиянь эряйхне няевиста сяда кирдезь президентонди инь достойнай кандидатть—В.В.Путинонь ширенц,—пара мяльса азозе Владимир Дмитриевич.—Тяда башка кеняртьфти ся, што избирательнай участкатненди сашендсь лама ломань. Странать эзга примасть участия избирательхнень пцтай 67 процентсна, миньцонк—пцтай 78 процентсна. ПФО-са Мордовиясь занязе васенце вастть тя показательть коряс. Тя корхтай сянь колга, што кармаме сяда оцю ответственностень марязь малаткшнема тячиеньконди и вандыеньконди.
Республикань Оцюнясь башка лотксесь сянь лангс, кода ётась вайгялень максомась республикань райоттнень эзга. Сембода оцю активность тя тевса няфтсть Атяшевскяй, Дубенскяй и Теньгушевскяй райононь эряйхне. Кочкаматнень эса тяса примась участия избирательхнень 90 лама процентсна. «Но сембода главнайсь—13 райоттнень эса кочкайхнень 90 лама процентсна максозь вайгяльснон Владимир Путинонь инкса»,—сяда тов поладозе В.Д.Волков.
Республикань Оцюнясь лама лямбе вал азсь избиркомонь члеттнень лемс. Содаса, кле, теест ульсь аф тёждя, но синь семботь тиезь сянкса, штоба кочкаматне ётальхть организованнайста и активнайста. Афкуксонь порядка ульсь ошнень, райцентратнень и нльне инь ёмла веленятнень эса. Благодарностень валхт сон стане жа азсь инициативнай группатнень лемс, конат ётафтсть оцю работа сянь коряс, штоба ломаттне 18 мартста сальхть избирательнай участкатненди.
Шнафтольхть и медикнень, и полицейскяйхнень, и коммунальнай службатнень работасна.
Кода азозе пресс-конференцияса Владимир Дмитриевич, тяни сембонь минь учсамазь цебярь тефт: кармайхть строявома од учебнай заведеният, больницят, башка мяль шарфтови тяниень пингонь од технологиятненди. Кле, экономикаса тиеви оцю аськолкс инголи. Няевиста кармай цебярьгофневома эряфсь, касфтови зарплатась.
Сяльде республикань Оцюнясь лоткась кадровай кизефксть лангс. Сонь валонзон коряс, тяни аф сатнихть грамотнай специалисттне. И тя сотф 1990 кизонь событиятнень мархта. Эста лама-мезе юмафтфоль. Тя кандсь зиян странати. И курокста петемс семботь аф тёждя. Но улихть и пара кулятка. Меки мрдафневи тейнек сембода цебярсь, питнись. Цёратне и стирьхне старандайхть кандомс польза обществати, водендакшнихть кеме семьят, шачфнихть итть. Оттне ушеткшнихть шарьхкодемонза, што эряви сяда лама лувондомс. И тя пяк пара, тя максси надияма, што миньцонк эвондайхть тяниень руководительхненди достойнай полафтыхть. «Минь сембоса карматама лезнема талантливай цёратненди и стирьхненди»,—мярьгсь Владимир Дмитриевич.
Тиемок итокт 18 мартонь президентскяй кочкаматненди, В.Д.Волков отвечась журналисттнень кизефксснон лангс.
Пресс-конференциять работаса примась участия Мордовия Республикань Оцюнять Администрациянц руководителенц васенце заместителец В.В.Маресьев.

22.03.2018 №
 
 
 

 
НОВОСТИ
 
 

ЭСОНЗА АФ МАДОНДЫ ТОЛКС ЮРНАЙ МИНЦЕННЕТИ КЕЛЬГОМАСЬ

 
Родной кялень кельги, национальнай коень-обуцянь ванфты, афкуксонь патриот. Тянь ули кода азомс Мордовиянь Инсарскяй райононь Пою велеса шачф-касф мокшавать Анастасия Афанасьевна Шумкинать (Акшаевать) колга. Аф ваномок сянь лангс, што сон лама киза ни аф эряй мокшэрзянь масторса, эсонза аф мадонды толкс юрнай семботи минценнети кельгомась. Мзярда корхнень Анастасия Афанасьевнань мархта, тя шарьхкодевсь эстокиге. А ушедозе азондомать аф эсь колганза, а ёмла родинанц эзда.

 

Уликс легендать мяльс сявозь, атянзон атясна эрясть оцю губор лангса, конань лемоцоль Ош панда ляй, кона кафта ширде шарфоль вирьхнень мархта, а нинге кафта ширде ульсть сери крутоярхт, конатнень ала шудесь Исса ляйсь. Пингонь ётазь карафне ушедсть пяярема и ляйсь полафтозе ведень шудема вастонц, вов эста родонь плямась сась мяльс ётамс эряма такор вастти, коса ульсь кода касфнемс козя урожай, а Иссать трвава кассь поювонь оцю и туста вирь. Вельденза алятне шапондсть од кутт семьяснонды. Тяфта и эвондась велеть лемоц—Пою.

 

Школаса тонафнемстонза Анастасия сидеста ванондсь раскопкатнень мельге, конатнень Ош панда ляйса ётафнезь Мордовскяй госуниверситетонь студенттне и преподавательхне. Синь мушендсть сёвонень кядьгонь пакшт, трудонь кевонь орудият, налонь пет, авань мазоптомат, монетат и лама мезе лия. Кунардонь эряма вастста ламоц муфкснень ули кода няемс Саранск ошса Краеведческяй музейса, улихть синь и велень школань музейса.

 

24.10.2019  № 42
 
 
 

Россиянь и Мордовиянь Народнай артисткась, Мордовия Республикань Почётнай гражданинць Александра КУЛИКОВА:

 «ПАВАЗУВАН, МЕС ЭРЯН МОРДОВИЯСА!»
 
Тячи республиканьконь столицаса, Саранскяйса, ушедсы эсь работанц Мордовскяй (мокшень и эрзянь) народть Межрегиональнай общественнай организациянц Всероссийскяй VII съездоц. Пингстонза вановихть кизефксне, конат оржаста ащихть мокшэрзянь нациять инголе. Тя оцю пуромксть карша тейнек удалась корхнемс Россиянь и Мордовиянь Народнай артисткать, Мордовия Республикань Государственнай премиянь лауреатть, Славань III степенень орденонь кавалерть, Мордовия Республикань, Рузаевкань и Темников ошень почётнай гражданинть Александра Куликовать мархта. Александра Николаевна сувси съездонь делегаттнень лувксс.

 

Александра Куликовать лемоц лац содаф аф аньцек эсь республикасонк, но и ламоц лия вастова. Вии, седиень-ваймонь токай вайгялец лездсь велень стирняти арамс кельговиксокс тежятть ваныти. Эсь творческяй кинц артисткась ушедозе 1962 кизоня «Умарина» моронь и кштимань государственнай ансамбльса. Лама киза А.Куликова кеняртьфнесыне ломаттнень сольнай мораманц мархта.

 

Александра Николаевнань творческяй киц козя гастролень ширде. Вайгялец кайгсь аф аньцек Россияса, но и лия ширеса: Германияса, Чехословакияса, Финляндияса, Польшаса, Венгрияса, Китайса, Белоруссияса, Украинаса, Молдавияса, Киргизияса, Таджикистанца, Чувашияса. Лия регионца и нльне омба масторса улемста артисткати удалси васьфнемс-корхнемс тоса эряй мокшетнень и эрзятнень мархта, а сяс аф кулемас коре содасы, мезсь синь пичефтьсыне-таколфтсыне.

 

Корреспондентоньконь мархта корхнемста артисткась азозе, мезе ученды мокшэрзятнень оцю пуромксснон эзда, мезть колга мялец корхтамс сонцень, а стане жа отвечась и лия кизефкснень лангс.

 

 

 
24.10.2019  № 42
 
 
 

МОКШЕНЬ И ЭРЗЯНЬ КЯЛЬХНЕ ТОНАФНЕВИХТЬ ШКОЛАТНЕНЬ

Понедельникста Саранск ошень округонь Администрацияса ётафтф оперативнай совещанияса ванондовсь лама кизефкс. Башка мяль шарфтфоль Мордовскяй (мокшень и эрзянь) народть Межрегиональнай общественнай организациянц VII съездонцты анокламати. Тяса азфоль, што Саранскяень 45 сембе школатнень эса 2 класста сявомок 7 классти молемс тонафневихть мокшень и эрзянь кяльхне. Тя тевса заняф 94 педагог. Тонафнемаса фатяф 17916 ученик. Недяляти макссеви 1-2 част. Тяда башка, тяконди водендафт кружокне, музейхне. Саранскяень идень сембе саттнень эса тевс ноляви «Минь эрятама Мордовияса» этнокультурнай компонентсь. Дошкольнай учреждениятнень эса мокшэрзянь народть историянц, коензон-обуцянзон и культуранц мархта иттне содафневихть культорологическяй аспектть, налхксематнень вельде. Стане жа работай этнокультурнай (кштимань, музыкальнай, народнай творчествань) 93 кружок, коса заняф 2160 шаба. Тянь и ламоть лиять колга заседанияса пачфтсь социальнай политикать коряс Департаментть директоронц заместителец—Образованиянь управлениять начальникоц Оксана Шуляпова.

 

24.10.2019
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин