Поиск по сайту: 
 

Архив
 март 
 2024 
пн вт ср чт пт сб вс
    123
45678910
11121314151617
18192021222324
25262728293031

 
 

 

КОДА ВАНТЕЙ АВА ВИДЕШИ ВЕШСЬ

Вантей ава ащи Мохрань
 районнай больницяса,
 «ой да ай». Мярьгат, кулома срхкась, а нинге кафтошка шида инголе ластя афоль сатов, велеть туркс-накось етнезе. Но аф содасак, коса пупордат. Лиссь шобдава ульцяв. Крыленцянц лангса шабранц пинец.
—Ворть тяста, полда сельме!—пешкодсь авась.
Пинесь низелгофтозень пеензон, цап фталда. Ляпе вастти пезфтазень. Авась сяшкава эводсь, прась мянь.
—Караул, лездода, сивомань врьгаз пинесь!—ушедсь пешкоткшнема.
Марязе Пичкасов шабрац.—Мезе лиссь? Мес тяшкава тетьксесак кргацень?
—А тонць аф няйсак?! Пинеце нарамань.
—Нарават пинезти. Тонць кафта пинет нарат.
Тяда меле гайфтсь Вантей ава больницяв, тердсь «скорай помощень» машина. Ся ускозе больницяв. Тяни ваймоси-пчкси больницяса. Ляди мялезонза шабранц пинец, ливозь валсы, кеподи давленияц. Кроватец кштий, ков-бди лийфти эсонза.
—Аванят, аванят! Кундамасть, кирдемасть! Вальмять пачк лиян.
Сят аньцек ктордыхть лангсонза:
—А коза бта лият, Маря?
—Атянь куду позада симома. Вдь содасасть, мезе уленди оцю давленияса.
—Аф, аф содасаськ,—пшкядсь сяда од авась.—Давленияса ковга ашень лиенде. А вов комлявняста видекс кроватезе «гр-гр-гр» да «гр-гр-гр» ков-бди арды. Аф аньцек атянь куду позада симома пачкотькшнень, а марнек раднянень етайне.
—Архт нинге. А монь тямасть рахсе, ащемшказе аш. Прязе тоду лангса аф кирдеви.
Докторть ваймонцка лихтезе, шити сяда кеветиексть давлениянц ункстафтсы.
—Афи содаса, кода тонь пчкафтомс,—виденцясь акша халатсось.—Уколхт нолятама, таблеткат симондят. Больницяса кефт аф веляфнят, аньцек ваймат и ярхцат. А мес касы давленияце, аф содаса.
—А тинь аф шапарякс ведь саннень эзга ноляда, а сяда питни надобиянят. И сембось арай эсь вастозонза. А тяфтама ошкс ведсь аф прафтсы давлениязень.
—А мес шапарякс ведь, Мария Михайловна?
—Ну якстеряпс ведь. Аф сяка, штоли? Няендьса вдь, якстерь пяндра ведня шприцса.
—Ну, Мария Михайловна, тейть аньцек докторнякс улемс. Сембонь содасак. Местема ина сать? Тонць пчкафтолить эсь пряцень. Кодама мяльце, стама лекарствада симолеть.
—Пине сускомань, «скорай помощсь» ускомань.
Омбоце шиня докторнясь ункстазе Вантей авань давлениянц, кафта сядонять малава.
—Мезьса пряце заняф? Мезенкса тяшкава пичедят?
—Кудонц инкса,—отвечасть инксонза фкя палатаса ащи аватне.
—Кивок кудцень копорезонза аф лаподьсы, вастсонза ащи.
—Сяка ризфозе улеза,—мярьгсь Вантей ава.—Мяльсон шабразе, кода-бди тя инекуйсь наказамаль. Нарафтомань пиненц кядьста и кторды лангсон. Тонць, кле, кафта пинет тият.
—Тянкса улихть правоохранительнай оргатт. Сермадоть кагод полицияв?
—Сермадонь. Мес-бди аш сама.
—Миньге пачфтеме латта. Тят ризна, сайхть.
Сяка шиня обедта меле сась Мария Михайловнанди участковайсь. Шабранза синць кивок ашет, а вов церасна канни офицеронь поготт, полициянь отделса аф оцю баярня. Тянь сюнеда участковайське корхтай акшет-равчт, Вантей авань лангс ваны низелдозь. Бта фкя-фкянь аф маряйхть-кулихть.
—Мария Михайловна, а виде, што шабрацень пинец сусконзе, а аф кодамовок лия пине?
—Виде. Сась шабразе, урядазе куцема лангстон врьгазонц.
—Прощениявок ашезь ана?
—Анай тя инекуйсь. Сонць пчкясь сусколемань, пинедонза кяжи.
—А хуш мяляфтсак, кодама шабрацень пинец?
—Тон арьсят, што больницяса ащезь мон ефси «ку-ку». Калгашказе сяряди, но еньда нинге ашень лисе.
—Тят кяжия, Мария Михайловна, тя кагодти сермадома тейне. Так кодама?
—Вазняшка. Оцю пиле, офтонь сельме, врьгазонь пей.
—Тяфтапт сембе пинетне. А кодапт пильгонза?
—Офтоннет. Низелгофтсыне пеензон, алот чурат.
—Тяфта мархтот кагод аф серматтама. Арьсек, ванды тага саян.
Омбоце шиня участковайсь тага сась. Сяка жа корхтамать ушедозе кляста-мляста.
—Мария Михайловна, исяк мярьготь, што сусконзе шабрацень пинец. Мон васьфнень исяк шабрацень мархта. Сонь пинецка аш.
—Михолнять видекс аш, а Пичкасовонь вазняшка пинец. Аш кода ломаненди етамс. Сембонь мельге увай.
—Мон Пичкасовонь мархта и корхнень. Аш, кле, кодамовок пинезе.
—Кода аш?! Сембе велесь содасы, што ули.
—Аш пинец Пичкасовонь, а вов церанц ули. Аньцек коса тон эрят и коса церац.
—А… а... шарьхкодень. Церанц фталу кяшенди. Тота, ванца корхтаманьке аф ладяви. Мон фкя шири ускан, тон омба шири.
—Мон ковга аф ускан. Тейне видешись эряви мумс.
—Ну, мук. Тон участковаят. Поготт каннят. А мон…
Тянь лангс и аделавсь корхтамасна. Участковайсь кучсь Вантей аванди кагод, конань эзда содазе, што сон      шарыбря, кальдявста няи баба. Пине, конешна, сускозе, но кинь пинесь, мумс ашезь удала.
Вантей ава лиссь больницяста. Кочкась каготт суду. Арьсесь, што тоса арайхть ширезонза, лездыхть, наказасазь обжаенц. А лиссь кода фалу. Мария Михайловнань обжаец лиссь судста коськста, а сонцень наказазь цалковайса.
—Содасак, кодама пине сусконзе?
—Шабразень пинец.
—А шабраце корхтай, што сонь пинец аш. Виде, Пичкасов?
—Виде, судья ялгась, а Марянь монць максса судс кувака кяленц инкса.
—Мезенкса?
—Кяльготнеманкса. Оду кармай содамонза, кинь каршес няренц кепсесы.
—Ся мон кяльготнян? А мяляфтсак, кода ульсь?
—Мезевок аф мяляфтан.
—Ожу, Пичкасов, тят эряскода. Ломанць аф одня, няи кальдявста. Васькафтовсь, пади.
—Ашень васькафтов. Пичкасовонь пинец и илештезе фталозень.
—А кие няезе, што Пичкасовонь пинец сусконзе? Судти доказательстват эрявихть.
—Пинесь, штоли, суду вятема? Но сон аф корхтай.
—Ванца, тон авась кялюват. Аф стак шабраце корхтась, што тон кодама мяльце ефкс арьсят, аф муворутьке муворонди тисак.
—Шабразе корхтась?! Аф визькс шабразти? Пиненц сускоманц ниле ужеса тиендьсы. Аф, шта, виденцяль, прощения аналь. Тонга цебярят, судья аваняй. Ломаненди путнихтень, арьсень, што лездат. А тонь тя пинень седить, Пичкасовонь, ширенц кирдьсак.
—Тежянь цалковай штраф!
—Мезенкса, судья аваняй?
—Судса кальдявста прянь вятеманкса. Тон вдь аф велень бабатнень мархта корхнят, а судсат.
—Кали кальдявста прязень вятьса? Ащан шеерня лаца. Тяшка пост моли, грехтовок аф пелят, судья аваняй!
—Нинге фкя тежянь цалковай штраф. Кармат кяльцень шовсема, суткат максан.
—Сань видешинь вешема, а молян полицияв кияксонь штакшнема, ульцянь тяендема. Тя аф ломанькс.
Судьясь валга ашезь аза. Лядсь Вантей ава лезксфтома, штраф мархта. Пичкасов тя кулять вишкста пачфтезе вели. Ава ялганза «ой да вай», ужяль Маря. А оттне низелдыхть лангсонза. Но Вантей ава прянц аф нолясы.
—Кода тефне, Марякай?—кизефтьсазь каршезонза сайхне.
Авась кеподьсы виде кядень пяльхканц.
—Пяльхкя пряса палыхть.
—Кода шумбрашице?
—Нинге колмогемоньшка киза эрян. Куень седихненди аф учеви куломазе.
—Хэ-хэ-хэ,—рахайхть ломаттне.—Тяфта и арфтк лишмоцень.
—Карман старандама.
                                                                                                                                                И.ВЕШКИН.

 

 
НОВОСТИ
 

МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

09.06.2022  № 22
 

НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022  № 22
 

ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022  № 22
 
 

Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022  № 21
 

Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022  № 21
 

Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022  № 21
 
 

Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022