Поиск по сайту: 
 

Архив
 март 
 2024 
пн вт ср чт пт сб вс
    123
45678910
11121314151617
18192021222324
25262728293031

 
 

 

«Мокшэрзянь кяльхне культуратнень диалогса» Всероссийскяй конференцияста

Мордовия Республикань культурань, национальнай политикань, туризмань и архивнай тевонь министрсь А.М.Чушкин:
—Тячиень шись, арьсян, мокшэрзянь кялень и национальнай культураса арай няевикс шикс. Арай сяс, мес минь тячи Всероссийскяй научно-практическяй конференциянь форматса ванцаськ, кода мокшень и эрзянь кяльхне нолявихть тевс, тонафневихть и виияфневихть аф аньцек Мордовия Республикаса, но и Россиянь лия региоттнень эса, коса компактнайста эряйхть мокшэрзятне.
Кода содаф, мокшень, эрзянь и рузонь кяльхне миньцонк, Мордовия Республикаса, государственнайхть. Кода родной и государственнай кяльхть синь тонафневихть республикань школатнень эса. И тянь вельде аф аньцек кемоксневи ня кяльхнень тонафниснон национальнай эсь прянь марямасна, но синь ламода сяда цебярьста ушеткшнихть фкя-фкянь шарьхкодема, а тяда меле аф фкя национальностень ломаттне арсихть фкя-фкянди ламода сяда малакс и эсеннекс.
Кода содаф, Российскяй Федерацияса тячи эряй 193 народ, конат сувсихть российскяй фкя нацияс. Мордовия Республикаса эряй российскяй нациянь 119 народонь представитель. И сембе минь эсь национальнай кяленьконь и культураньконь мархта марса тисаськ-пуроптсаськ российскяй великай культурать, коса, койсон, васенце вастса ащи рузонь великай культурась.
Сяс, ялгат, тячиень Всероссийскяй научно-практическяй конференцияса тейнек нинге весть эряви ваномс, кода тячи марясазь эсь пряснон мокшень и эрзянь кяльхне вузса, школаса, театраса, эстрадаса, газетаса, журналса, телевиденияса, радиоса, интернетса и тя пингонь эряфть лия ширеса. И мзярда минь шарьхкодьсаськ, кода тячи ащихть тефне мокшень и эрзянь кяльхнень, минь национальнай культураньконь мархта, тейнек тя Всероссийскяй научно-практическяй конференцияса, надиян, азовихть-ладявихть теест касомань-вииямань од кит. Мон тяфта жа надиян: касомань и вииямань од китне лихтьсазь мокшень и эрзянь кяльхнень, минь национальнай культураньконь сяда няевикс вастс российскяй великай культураса!
Кельгома ялгат, Мордовия Республикань Оцюнять В.Д.Волковонь лемста и эсь эздон арьсян теенть сатомс Всероссийскяй научно-практическяй конференцияса сембе эрявикс сатфкснень.
Мордовия Республикань Государственнай Собраниять Председателенц заместителец И.М.Москаев:
—Кельгома ялгат, мокшет, эрзят и лия национальностень ломатть, сембонь седи ваксста поздравляндатядязь Всероссийскяй научно-практическяй конференциять панжевоманц мархта. Койсон, тяфтама форупне лездыхть минь мокшень и эрзянь кяленьконди аф аньцек ванфтовомс, но и касонкшнемс-вииякшнемс.
Сяс, койсон, тячиень форумса тейнек нинге весть эряви лятфтамс, што «тядяй» валть минь сембе азондсаськ тядянь-алянь кяльса. И кирдемок тянь эсь мялямсонк, тейнек тячиень Всероссийскяй научно-практическяй конференцияса путомат сембе виеньке сонь инь няевикс сатфксонц сатоманкса. Лиякс мярьгомс, нинге весть оржа ванфса варжакстомс мокшень и эрзянь кяльхнень тя пингонь эряфснон лангс и панжемс теест кели ки вандыти. Тяда башка, койсон, тейнек эряви тиемс семботь, штоба минь уноконьке и синь уноксна цебярьста содалезь минь мороньконь, кштиманьконь и национальнай сембе коеньконь.
Сяс, кельгома ялгат, Мордовия Республикань Государственнай Собраниять Председателенц В.В.Чибиркинонь лемста и эсь эздон арьсян теенть цебярь сатфкст Всероссийскяй научно-практическяй конференцияса. Надиян: ня сатфксне панжихть од кит вандыень шити, мокшень и эрзянь кяльхненди и мокшэрзянь национальнай культурати.
Мокшэрзянь народть Межрегиональнай общественнай организациянц председателец, филологическяй наукань докторсь, профессорсь Ю.А.Мишанин:
—Кельгома ялгат, Россиянь мокшетнень и эрзятнень лемста сембонди теенть арьсян пара мяльхть и сатфкст Всероссийскяй научно-практическяй конференцияса работамста. Тяфта жа Н.П.Огаревонь лемса Мордовскяй государственнай университетть ректоронц С.М.Вдовинонь лемста поздравляндатядязь Всероссийскяй научно-практическяй конференциять панжевоманц мархта. Тинь сембе цебярьста содасасть, мзяра цебярь тевда тии университетсь мокшень и эрзянь кяльхнень, национальнай культураньконь ванфтоманкса и виияфтоманкса!
Монць тячи карман корхтама финно-угорскяй койхнень, кяльхнень и рузонь койхнень, кяльхнень марстонь эряфснон и фкя-фкас сувамаснон квалма. Кода содаф, мокшень и эрзянь кяльса кунардонь пингонь марстонь мокшэрзянь и финно-угорскяй лия народонь валда башка, улихть валхт, конат сувасть иранскяй, тюркскяй, балтийскяй и восточно-славянскяй кяльста. Но васенце вастса ня валхнень еткса ащихть кунардонь и тяниень  пингонь рузонь валхне. И тя шарьхкотьф: сяс мес кунардонь пингста сявомок мокшэрзятне эрясть рузонь и лия славянскяй нароттнень еткса. И сидеста эрясть марстонь эряфса, сувафнемок тоза рузонь и славянскяй лия нароттнень койснон-обуцяснон. Тяфта жа сувафнезь эсь кялезост мокшэрзятне рузонь валхненге.
Тяка пингть, кода сермадсть мокшэрзянь ученайхне М.Е.Евсевьев, Н.Ф.Мокшин и лиятне, мокшэрзянь койхне, мокшень и эрзянь валхне сувсесть рузонь народть эряфс и кяльс. Мярьктяма, рьвяямань-рьвакс лисемань койхне и мокшэрзянь лия обуцятне. Тяфтама валхне, конат тячи лувондовихть эсеннекс рузонь кяльса, кода «макса», «шира» («шеер»), «кута» («изба»), «лтамс» («лытать») и ламотне лиятне сувасть мокшэрзянь и лия финно-угорскяй народонь кяльста.
Сяс, койсон, тейнек тячи ули кода азомс: мокшэрзянь и рузонь культуратне и кяльхне лама веконь марстонь эряфснон пингста козякофнесть фкя-фкянь. И тя козякофтомась моли тячиень пингтьке.
Москувонь педагогическяй  государственнай университетонь профессорсь, «Музыкальное искусство и образование на протяжении жизни» ЮНЕСКО-ть кафедранц заведующаец, педагогическяй наукань докторсь Э.Б.Абдуллин:
—Кельгома ялгат, монь пяк тусь мялезон, кода моли Всероссийскяй научно-практическяй конференциясь. Тяфта жа пяк тусть мялезон сембе доклаттне и выступлениятне, конатнень тя пингс кулине. Васенце вастс етксост, конешна, мон путолине профессорть Ю.А.Мишанинонь докладонц, кона эсь научнай серенц коряс салазе монь мялезень.
Корхтамок мокшэрзянь музыкальнай культурать колга, мон азса, што сон уникальнай. Тейне работазень вешфксонзон коряс сидеста сашендови улендемс музыкальнай иласа Францияса, Германияса и лия странаса. И мон пцтай эрь форумса азондса мокшэрзянь национальнай культурать кепотьксокс лия народонь культуратненди.
Мон тяфта жа кельгса мокшэрзянь национальнай композиторхнень творчестваснон. И синь етксост башка вастс путнеса тя пингонь инь содаф композиторть Н.В.Кошелевать музыканц, конань эса мон няйса мокшэрзянь народть ваймонц.
Кельгома ялгат, мон надиян: Всероссийскяй научно-практическяй конференцияса тинь мутада ответт сембе кизефксонтень лангс. Катк етксост кармай ответське мокшэрзянь национальнай музыкальнай культурать кизефксонц лангс!
Финно-угорскяй народонь культурань Поволжскяй центрать директороц, филологическяй наукань кандидатсь Р.И.Акашкина:
—Кода мярьгсь рузонь великай педагогсь К.Д.Ушинский: «В языке одухотворяется весь народ и его родина. В нем отражается вся история духовной жизни народа». Койсон, сон ня валхнень вельде мярьгсь: кле, эрь народсь эряй снярс, мзярс шисот сонь кялец и культурац. Сяс, койсон, эрь народть эсь кяленц и культурадонза башка, сяда оцю козяшиц аш!
Сяс тейнек эряви тиемс семботь эсь кяленьконь и культураньконь ванфтоманкса.
Кельгома ялгат, койсон, сембода пяк тячи тейнек эряви работамс од мокшэрзятнень мархта. Эряви тиемс семботь, штоба синь ваймосост фалу палоль кельгомась эсь тядянь-алянь кяльснонды и национальнай культураснонды.
Ялгат, сембось ащи эсь эздонк!
                                                                                                                                            В.НЕСТЕРОВ.

 

 
НОВОСТИ
 

МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

09.06.2022  № 22
 

НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022  № 22
 

ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022  № 22
 
 

Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022  № 21
 

Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022  № 21
 

Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022  № 21
 
 

Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022