Поиск по сайту: 
 

Архив
 ноябрь 
 2018 
пн вт ср чт пт сб вс
   1234
567891011
12131415161718
19202122232425
2627282930  

 
 

 

Национальная тематика

Шачема ши мархта!СЮРЕСА СЁРМАДЫ МАСТЕРИЦАТЬ ЛЕМОЦ СОДАФ АФ

«Эста эрь семьяса ульсь тяфта: стирнясь нинге шабакс тонафтоволь сюреса сермадомати, кодамати. Лиякс ашель кода: мезе щай лангозонза? Мезьса лиси ялганзон еткс? Нола ломанькс лувовсть сят, кит салмоксонь кирдема ашесть машта»,—лятфни Мария Ивановна.
Мокшень стирсь Лемдяйса васьфтезе поланц, лисемок рьвакс церати Николай Бике- евонди. Мария Ивановна работась нормировщицакс, мирдец сварщиколь. Ламос эрясть шарьхкодезь, фкя-фкянди и лиятненди лездозь. Бикеефнень шачсть сисем идьсна—вете церат и кафта стирьхть. Сембе кассть цебярь ломанькс, кочказь эряфса эрявикс кить.
Ужяль, пингта инголе тусь эряфста Николай Гаврилович. Мария Ивановна лядсь ськамонза. Ашезь кадонда шабанза и уноконза, тернезь ширезост эряма, но сон Лемдяйть ашезе када. Штоба панемс прястонза пичефти мяльхнень-арьсематнень, нинге сядовок кярьмодсь сюреса сермадомати.
Пяк лама киза етась ся пингста, мзярда Мария Ивановна сявозе кядезонза салмоксть. Кода азфоль сяда вяре, нинге кодай виндерняса, кячкаскаса, машты котфонь кодама, сермадомста тевс нолясыне ёмла ожнанятнень. Фалу кельгозь малаткшни эрь узорти. Эрть эздост арьсесы сонць. Кой-коста веньберьф аф уды, а коль смекай. Ули кода мярьгомс, што сюреса сёрмадомась—тя эряфоц.
«Эрь панарсь, каркссь, пряруцясь, нардамась—тя бта идь, конань ламос каннесак седицень ала, а сяльде максат теенза эряф»,—вов кода корхни сон маштыень кядензон мархта ноляви сембе тя мазышить колга.
Мария Ивановна сёрмадсь авань костюпт, алянь панархт, пряруцят, нардамат, тодлангакст, каркст...  Тняра кизоста пуромсь афкуксонь коллекцияц, но ламоть сон казендезе ломаттненди. Ламотнень мяльс тушендыхть мокшавань эрь шинь платьятне, лиятнень—праздниконь щапне, конатненди етафтфоль аф фкя килограмма ёмла ожнаня. Узорхнень тиемста тевс нолясыне кода мокшень кунардонь узорхнень, стане и эсь рисунканзон.
Мокшавать асушинц колга корхтай и ся, што мокшень панаронзон ули кода няемс аф аньцек ламоц выставкатнень, фестивальхнень, форупнень пингста, но и Мордовия Республикать эзда Россияса и омба масторса содаф ломаттненди каземста. Несколька кизода инголе мокшень панар казьфоль СССР-нь Народнай артистти, СССР-нь и Российскяй Федерациянь Государственнай премиянь лауреатти О.Табаковонди. Ужяль, Олег Павлович аф кунара тусь эряфста. Мордовияса улемаснон колга цебярь лятфнембялькс мокшень панархне лядсть П.И.Чайковскяень лемса Оцю симфоническяй оркестрать главнай дирижеронцты и руководителенцты В.И.Федосеевонди, лиятненди.
Сюреса серматф панаронзон, костюмонзон ламошкаснон Мария Ивановна казендьсыне и явондсыне. Тяфта тевсь ащи маластонь ломанензон мархта. Стирензонды, рьвянянзонды и стирня-уноконзонды аноклась платьят, церанзонды, овонзонды и цераня-уноконзонды—мокшень панархт.
М.И.Бикеевать ширес Лемдяи сидеста сашендыхть инжихть, тяконь лувксса и омба масторста, сяс мес ломаттнень оцю мяльсна содафтомс асушинц мархта и сявомс мархтост лятфнембяленди  зрнянь кядензон мархта тиф мазыши.
Пенсиянц  ламошканц Мария Ивановна етафнесы котфонди, сюренди, ожнанди, салмоксонди. Но аф каендай, вдь эрь од панарсь, пряруцясь тиендьсы сонь сядонга павазукс.
Мокшавась латци мокшень морот, сермады стихт. Нинге школаса тонафнемстонза ушедсь морсема велень ансамбльса. Морамста, кле, юксневихть ризфне-пичефксне. Сяват кядезт салмокс, тонгат пиленязонза сюре, ушедат сёрма­дома, а тонць морат. Пингське аф маряви, тевське сяда лац моли.
Шачемок Великай Отечественнай войнань пелькс, стакадонга стака кизотнень, Мария Ивановна мзярдовок ашезь пеняця эряфонц лангс. Ули, кле, кельгома тевозе, мзярдовок аф юкснесамазь идне, мала  ломанне. А тя инь васенцесь эряфса.
Тячи, 19 апрельста, «Мокшень правдать» кунардонь ялганц М.И.Бикеевать Шачема шиц.
Кельгома Мария Ивановна! Примайть седи ваксста моли лямбе валоньконь. Поздравляндатядязь Шачема шицень мархта! Кеме шумбраши Тейть, сембе цебярть, сатфкст! Катк эрь шись канни аньцек кенярдема!
                                                                                                                                           Т.АЛЬШИНА.
 

20.04.2018 №
 
 
 

 
НОВОСТИ
 

УШЕДСЬ «Шумбрат, Мордовия!»—«Vivat, Чемпионат!» ФЕСТИВАЛЬСЬ

25.10.2018  № 42
 
 
 

Панчфт и казнет—республикань учительхненди

Торжественнай мероприятияс, кона лемтьфоль Международнай учителень шити, И.М.Яушевонь лемса музыкальнай театрав пуромкшнесть учительхне марнек республикаста. Профессиональнай праздник мархта синь поздравляндазень Мордовиянь Оцюнясь Владимир Волков.
—Учительсь—тя аф аньцек профессия, тя ваймонь венемома, аф тёждя, ответственнай и оцюдонга оцю труд,—мярьгсь Владимир Дмитриевич.—Афкуксонь учительсь максси иттненди сяда лама азф школьнай программать коряс. Сон лезды ученикти шарьхкодемс эсь прянц, няфтемс ломанень цебярь ширензон, мумс эсь кинц эряфса.
Республикань Оцюнясь азсь кафта важнай цельхть, конат ащихть отечественнай образованиянь системать инголе. Васенцесь—сувамс мирса инь цебярь кемоттнень лувксс. Омбоцесь—тиемс воспитаниянь система. Тянди водендаф «Образование» од национальнай проектсь.
11.10.2018  № 40
 
 
 

Республикань предприятиятнень продукциясна пачфневи миронь 80 странас

Пяденцяста, 28 сентябрьста, Мордовия Республикань Оцюнясь В.Д.Волков примась участия торжественнай пуромксса, кона лемтьфоль Машиностроителень шити. Мероприятиясь етась Рузонь Государственнай драматическяй театраса. Залу пуромкшнесть республиканскяй предприятиянь представительхне, отраслянь ветераттне.
Пуромфнень поздравляндамста В.Д.Волков лемдезе машиностроениять республикань экономикать  седикс и моторкс, вдь сонь эздонза ламода ащи лия сфератнень работасна.
Азфоль, што тяддень кафкса ковста промышленнай производствань индекссь арась 111 процент. Странаса тя фкя инь цебярь показательсь. 2018 кизоня республикаса нолдаф 119 миллиард цалковаень питнеса промышленнай продукция, мезсь 13 процентта сяда лама мелянь кизоть коряс. Республиканскяй кемготува предприятиятнень эса эряфс етафневихть производствать  келептеманц и одкстопнеманц коряс проектт. Касонды инновационнай продукциять лувксоц. Производствань марстонь объемть эса сонь талекац—29 процент. А тяфтама отраслятнень эса, кода электроннай и оптическяй изделиянь производствась, тя показательсь пачкодсь 77 процентс.
04.10.2018  № 39
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин