Поиск по сайту: 
 

Архив
 февраль 
 2019 
пн вт ср чт пт сб вс
    123
45678910
11121314151617
18192021222324
25262728   

 
 

 

Национальная тематика

МАЗЫХТЬ МОКШЕНЬ СТИРЕНЬКЕ

Мзяра сембе ширде мазы, еню стирь удалась няемс газетаньконь лопанянзон лангста кафта кизоста. Башка мяль эсь лангозост шарфнесть национальнай щамсна-карямсна: руцятне, мазоптомбяльхне, атямъенгонь тюсонь панархне. Сась пинге тиемс итокт. Шарьхкотьф, сяськихнень кочкамасна аф теждяль. Но, аф ваномок тянь лангс, эрь кизонкса эрявсь кочкамс аньцек колма стирьхть. И вов кит лиссть сяськикс.
2016 кизонь участницатнень еткста васенце вастть сатозе Саранскяень стирсь Ирина Сидоркина. Ирина студентка, тонафни Н.П.Огаревонь лемса МГУ-нь Национальнай культурань институтса. Стирть седиса ет шабакс эвондась оцю кельгома национальнайти. Кизонь ваймама пингть велеса бабанц ширеса улемстонза сон фалу дивандакшнесь сиренять мокшень щамонзонды. А нинге сонь пяк тушендсть мялезонза мокшень моротне, конат эста велеса сидеста кайгсть. Кой-конатнень сонцьке морсезень оцюфнень мархта ряцок. Улема, тя сембось и кошардозе стирть школать аделамда меле поступамс тонафнема Национальнай культурань институту. Тонафнемаса Ирина сатни оцю сатфкст. 2015-2016 тонафнема кизотнень мокшень стирсь арась РФ-нь Правительствань стипендиантокс. Сон примси участия и лац няфнесы прянц всероссийскяй и международнай лама конкурсса и фестивальса. Аф лядонды шири институтть общественнай эряфонц эздовок. Ирина весяла, корхтафкшу, панжада вайме и паронь арьси ломань, сяс сонь пяк лама ялгадонза.
Омбоцекс арась Зубово-Полянскяй райононь Велязем мокшень велень стирсь Оксана Белкина. Тяниень пингть сон тонафни Н.П.Огаревонь лемса МГУ-нь филологическяй факультетонь национальнай отделенияса 3-це курсса. Тяка пингть Оксана работай корреспондентокс «Вайгяль» национальнай радиостанцияса. О.Белкинати седишкава мала сембось, мезсь сотф национальнай ширеть мархта. Кудса, ялганзон мархта ошса сон фалу корхни мокшекс. Пара мялезонза, мес мувсь покодема васта национальнай программаса. Оксана Белкинась пяк кельгсы шачема веленц, а сяс фалу, мзярда эвондакшни пингоц, эряскоды Веляземи.
Колмоцекс лиссь стане жа Зубово-Полянскяй райононь стирсь Мария Ивакина. Сон кассь Пичпанда мокшень велеса. Стирсь тонафни Зубово-Полянскяй педагогическяй колледжса. Аф васенце кизось ни Маша варчсесыне виензон сермадомань тевса и тя сонь аф кальдявста лисенди. Стихотворениянза, азксонза аф весть лисендсть «Якстерь тяштеня» идень журналть лопанянзон лангса. Серматфоц, лятфтасаськ лувиеньконди, ульсь печатлаф и минь газетасонк. Сисемце класста сявомок М.Ивакина терневи Саранскяи Од писателень семинарс. Стирсь кельгсы книгань лувоманц. Мокшэрзянь писательхнень эзда сяда оцю мяль шарфни С.Кинякинонь, Р.Орловать, В.Брындинать, Н.Голенковонь, А.Тяпаевонь творчестваснон лангс.
Тяни пара мяльса содафттядязь конкурсонь участницатнень мархта, конат лиссть сяськикс 2017 кизоня.
Васенце вастть занязе Атюрьевскяй райононь Курташка велень мокшень стирсь Марина Кабанова. Тядде Марина аделасы 11 классть. Башка мяль стирсь шарфни краеведческяй работати, оцю мяльса тонафнесы шачема масторть историянц, сонь ломанензон. Тянь коряс содамошинзон няфнесыне аф фкя лацонь конкурснень эса, коса фалу сувси сяськихнень еткс. Кельгсы Кабановась и мокшень нарядть, кона теенза пяк ладяй. Кабанофнень семьяса кородозь ванфневи мокшень панарсь, конань нинге одста стазе Маринать бабац. Сяськиеньке ялга спортть мархта. Оцю мяльса налхконды баскетболса и волейболса. А етка пингста лувонды книгат и тиенди фотографият.
Омбоцекс арась Наталья Зудилина. Шачемас-касомас коре стирсь Саранскяень Куликовка веленне.  Шабакскиге Наташа кельгозе кштиманц-мораманц, примсесь участия велень самодеятельностьса, лисендсь сценать лангс школаса етафневи конкурснень, илатнень пингста. Сембода кельговихть стирти народнай моротне. Н.Зудилина тонафни Н.П.Огаревонь лемса МГУ-са колмоце курсса. «Сольное, хоровое, народное пение» отделенияса, тядде аделасы колмоце курсть. Тонафнемать шумордамда меле мялец арамс народнай хоронь или ансамблень вятикс. Наташа арьси, што мокшетнень мазыдонга мазы мороснон аш кода кадомс етай пинкненди, синь эрявихть ванфнемс, пачфнемс од ломаттненди, а сон старандай лездомс тя тевса.
Колмоце вастонь заняйсь Саранскяень мокшень стирсь Мария Оськина. Аф ваномок сянь лангс, што Оськиттне эрясть руз еткса, кудсост фалу корхнекшнесть родной кяльса, а сяс Машась тячивок мокшекс лочазь-лочай. Эсь юронзон инкса стирсь маряй гордость, а мокшень кяльть лувондсы фкя инь мазыкс, конань вельде инь лац лисенди азондомс эсь мялензон-арьсеманзон. А нинге стирти пяк кельгови мокшень щамсь, конань сон оцю мяльса щашендсы лангозонза.
Конкурсти итогонь тиемда меле сяськихне тертьфтольхть редакциязонк. Тяса теест казьфтольхть лятфнембяленди казнет и диплопт. Ужяль, аф сембе стирьхненди удалась самс ширезонк. Но казнефтома синь сякокс аф лядыхть.
Редакцияса мокшень стирьхнень поздравляндазь «Мокшень правда» газетать главнай редактороц Иван Степанович Лушкин и коллективонь сотрудникне.
Тага весть поздравляндасаськ сяськихнень и арьсетяма, штоба удалаль эряфонь кисна!
                                                                                                                                    О.ЕВДОКИМОВА.

20.04.2018 №
 
 
 

 
НОВОСТИ
 
 

ВАЛЕНТИН ВАСИЛЬЕВИЧ КОНАКОВ

2019 кизонь 27 январьста 80 кизонц лангса стакаста сярядемда меле тусь эряфста Валентин Васильевич Конаков—содаф государственнай и общественнай деятельсь, образованиянь и наукань пуроптысь, ученайсь.
Валентин Васильевич Конаков шачсь 1939 кизонь      9 июньцта Мордовскяй АССР-нь Атяшевскяй райононь Кулясово велеса крестьянонь семьяса.
Армияса служамда меле 1961 кизоня В.В.Конаков работась автомеханикокс Атяшевскяй «Сельхозтехникаса», а сяльде поступась Мордовскяй государственнай университету. Аделамок 1966 кизоня тонафнеманц, Валентин Васильевич кармась покодема образованиянь сфераса, 1966 кизоста сявомок 1979 кизоти молемс работась Мордовскяй государственнай университетса ассистентокс, старшай преподавателькс, металлонь технологиянь и машинань петемань кафедрань доцентокс, велень хозяйствань механизациянь факультетонь деканонь заместителькс. 1978 кизоня В.В.Конаков аделазе Московскяй лесотехническяй институтонь аспирантурать, теенза максфоль техническяй наукань кандидатонь лем.

31.01.2019  № 4
 

ДИПЛОПТ И ПРЕМИЯТ—АСУ ЛОМАТТНЕНДИ

Ётай недялять, 25 январьста, Российскяй студенчествань шиня Мокшэрзянь государственнай национальнай драматическяй театраса етась торжественнай пуромкс, конань пингста МР-нь Оцюнясь В.Д.Волков макссь казнет асу од ломаттненди. Мероприятияс пуромкшнесть аф фкя лацонь конкурсонь и олимпиадань сяськихне и призерхне, а стане жа  синь тонафтысна и тядясна-алясна.
Республикань Оцюнясь азозе, што асу од ломаттнень ширеснон кирдеманкса меля примафоль решения ладямс од премият школьниконь международнай и всероссийскяй олимпиадань сяськихненди и призерхненди.
«Международнай уровеньца сатфксонь сатоманкса премиять лувксоц 100 тежянь цалковайста сявомок 300 тежянь цалковайти молемс. Всероссийскяй олимпиадань мекольце этапонь сяськихне и призерхне получайхть 60 и 30 тежянень цалковай,—азозе Мордовиянь Оцюнясь.—Тядде лауреатокс арасть 43 школьниконьке. Тяда башка, казнет получайхть нинге 40 стирсь и церась, конат лац няфтезь пряснон  исследовательскяй тевса, социальнай и общественнай работаса, научно-техническяй творчествань и  профессиональнай мастерствань конкурснень эса».
31.01.2019  № 4
 

МОРДОВИЯНЬ ОЦЮНЯСЬ ВАНОНДОЗЕНЬ САРАНСКЯЙСА ОПТОВОЛОКОННАЙ ПРОИЗВОДСТВАТЬ ВИИЯФТОМАНЦ КОРЯС КИЗЕФКСНЕНЬ

Мордовиянь Оцюнясь Владимир Волков 22 январьста ётафтсь рабочай васедема «Оптиковолоконные системы» АО-ть генеральнай директоронц Андрей Николаевонь мархта. Ванондовсть предприятиять 2018 кизонь работань итогонза, а стане жа 2019 кизонди платтне. Ня кизефкснень ваномаса примась участия Правительствать Председателенц заместителец—промышленностень, наукань и од технологиянь министрсь Александр Седов.
Лятфтасаськ, оптическяй волокнань Саранскяй заводсь—фкясь и сякось странаса. Сон нолдафоль колма кизода инголе. Тя эсь лацонь производствать виияфтомань сембе этапонза етасть Россиянь промышленностень и торговлянь министрть  участиянц мархта. Владимир Волков аф весть васетькшнесь Денис Мантуровонь мархта, получсемок тя проектть, конанди вийс коре ладямс оптическяй волокнань производствать замкнутай цикланц марнек странать вешфксонзон мяльс сявозь, эряфс етафтоманц коряс республикать инициативанзонды ширень кирдема.
31.01.2019  № 4
 

МОКШЭРЗЯНЬ МАСТОРСЬ ТАГА ПУРОПТСЫНЕ ЭСЬ СТИРЕНЗОН И ЦЁРАНЗОН

Мордовскяй (мокшень и эрзянь) народть vii съездоц ётай тяддень
23-25 октябрьста республиканьконь столицаса
Мордовиянь Оцюнясь Владимир Волков 22 январьста Саранскяйса етафтсь мордовскяй (мокшень и эрзянь) народть VII съездонц, кона кармай тядде 23-25 октябрьста, етафтоманцты анокламать коряс совещания.
Совещанияса примасть участия Россиянь финно-угорскяй народонь Ассоциациять председателец Петр Тултаев, а тяфта жа мордовскяй народонь общественнай организациять Межрегиональнай представителенза, тяконь лувксса РФ-нь лия     субъекттнень эзда.
Владимир Волков мярьгсь, што мордовскяй народть съездоц работать важнай пяльксоц, кона мольфтеви властень оргаттнень и общественнай институттнень мархта традициятнень и межэтническяй ладямать ванфтоманц и ламолгофтоманц коряс—тя задачать путнесы странань Президентсь. Сай пингонь съездть инь главнай темац—«Мордовскяй (мокшень и эрзянь) народсь лама нациянь Россиять единай культурнай кодса».
31.01.2019  № 4
 
 

Мордовиянь Оцюнясь Владимир Волков Ётафтсь национальнай проекттнень эряфс етафтомаснон коряс рабочай совещания

17.01.2019  № 2
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин