Поиск по сайту: 
 

Архив
 март 
 2019 
пн вт ср чт пт сб вс
    123
45678910
11121314151617
18192021222324
25262728293031

 
 

 

Юмор и сатира

КОДА ПЕТУНЧИК

Аньцек сай Пужф На-
 стать бизнесмен-овоц
 ошста, авась ушеды пеняцякшнема.
—Ломаттне фкя-фканкса пря машфтыхть. Сяка жа Метёлкань Сандорть овонц ваксса покодихть и иденза, и лия раднянза. Сембе тяльгсть, сембонди мувсь тев. А монь фкя тяка цёранязе понкст кудса шовси, тевфтома ащекшни.
—Цёраняцень, маткай, мяльсонза аньцек фкя, коса ба мамамс, а тейне работникт эрявихть, аф симилат. Монь лавкане. А лавкав тувот аф эрявихть.
—А мезе ина велеса лия тии. Покодемс аш коса. Вов и мяльсонза аньцек «сяпинясь». Шачи тевоц, юкстасы тянь.
Анзясь, анзясь Пужф Настась, сявфтезе Петунчиконц оцю ошу овонц шири добувама. Овонц колма лавканза. И колмоцьконь эса мишендсь ярхцамбяль, ламбама, кяжи симомбяль. Фкяти эздост и путозе охранникокс, а сяда видеста азомс, шинь и вень сторожкс. Тяда инголе моразь морась: содак эсь вастцень, коза аф эряви, шалхкцень тяк эцекшне. Тя ош, вишкста сусксазь. Рамайхнень мархта прясь вятема вежлявста, культурнайста. Казямшити, кяжи шамати аш месендемс лавкаса.
Петунчик тянь сембонь шарьхкодезе. Но кирдсь кафтошка ши. А колмоце веня, мзярда лядсь лавкав ськамонза, мес-бди арьсесь:
—Аф алян што ли? Мзярда нинге няян тняра копордамбяль. Кодама аньцек мазы сюлекат аш. Мярьгат, шаракодсь ёткозост. И кода ёфксса, сюлекатне синць ушедсть корхтама:
—Варжамак монь, сипть волшебнай веднядон.
Мезе лядондсь велень цёрати, аньцек варжамс.
Шобдава састь лавкаса покодихне. Калт, калт кенкшти, панжихть аш.
—Афоли зиян кодамовок лиссь?—кфчядсь прясост.
Васенда гайфтсть лавкань азорти. Ся тердсь МЧС. Панжезь лавкань кенкшть. И мезе няихть. Петунчик валяндай кияксса ирецта. Лангсонза аш понкстка. Вакссонза кафта галош ават. Сятка ирецтот, валсновок аф азовихть. Аньцек «бэ» да «мэ»! Лиять кунара мулезь вастонц. Но эзнась-бизнесменць ашезь карма абонкшнема, дивандакшнема. Инголькиге содазе, што тувось фалу муй рдаз.
Колма шинь добувафоц ашезь сата карьхцень пандомска. И эста эзнац арьсесь, катк хуш садсонк покоди, пинезень прогулкас вятнесы. Эстеенза аш мзярда, рьвац шаба мархта больницяса ащи.
Петунчик юмафтозе покоенц.
—Тя, деряй, эряф?—мярьгсь эстеенза.—Коза тят вана, кшнинь сери перяфкст. Аф ломань няят, аф ялгат муят. Кода тюрьмаса. Да нинге тя пинесь кяшт сафни. Мялец ванома. Аф туят мялезонза, лангозт врьгяти.
Куватьс Петунчик арьсекшнесь, кода улемс, мезе тиемс. И мекпяли сась прязонза мяль. Пинесь сотнефоль. Цёрась ся пингть салава кодак теськафтсы каймоса копорь ланга, ся гавкстадемска ашезь кенере.
—Шавине,—арьсесь эсь пачканза.—Вов тиень тев.
Тердезе эзнанц. Арека, кле, Красавчикть ванцаськ, аф ли урмаськодсь. Няемок азоронц, пинесь эреклась, стясь. Но шамордсь фталудонь фкя пильгоц.
—Аф содаса, мезе мархтонза,—мярьгсь бизнесменць.—Аньцек ласькондсь пирьфова.
—Мезе тяса содамс,—шоворсь корхтамати Петунчик.—Ветстанцияв эряви вятемс, ветвраченди няфтемс. Кодама аньцек урмат аш.
—Катк ни пчкяй. А докторнятнень колга тон лац азыть. Эряви няфтемс. Тейне, конешна, аш мзярда. А тонь тевце сякось. Вятьсак ванды.
—Вятезь вятьса, но тов эрявихть титихть-митихть. Ошса киндивок ярмакфтома аф эряви тонь пинеце.
—Тяшкава тят лажна. Аф прважате ярмакфтома.
Петунчиконь тевоц тусь. Эряфоц сяда весялгодсь. Пинеть вятнесы ветстанцияв, ётамбачк сувай лавкав. То стопканя нили, то салава сюлеканя рамай, шиньберьф копорясы.
Но пинесь тя пине. Обжаенц кати коста мусы. Мзярда пчкясь, Петунчиконь малазонзонга аф нолдасы, врьгяти лангозонза.
—Мезе Красавчикть мархта?—кизефтезе эзнац.
—Аф содаса. Тон азороцат. Сявк и кизефтьк.
—Апак кизефтьке содаф, муворшице кодама-бди инголенза ули.
—Видеце, ули. Ярхцамбяленц сивондьса, теенза кржа кадондан.
—Хэ-хэ-хэ,—рахазевсь эзнац.—А што ли аф сатни, кальдявста анте?
—Сатни, сюконян. Тячи мекольцеда мольхтяма ветвраченди. Эрявихть ярмаконят. Тозк уколнят нолдайхть, куду лекарстват максыхть, а нят ярмакт. И аф ёмлат.
—Красавчикозти мезевок аф ужяль. Мзяра эряви, сняра максан.
—Красавчикти аф ужяльхть ярмакне, а шуринцень хуш ваймоц лисеза.
Каршек бизнесменць аньцек рахазевсь.
Петунчик сявозень ярмакнень, пинеть и тусь бта ветстанцияв. А ся пингть сувась лавкав, сявсь сюлеканя и срхкась вокзалу. Пинеть нолдазе.
Бизнесменць учсь илядьс. Аш шуриноц, аш пинец. Гайфтсь полицияв. Сят ушедсть вешендема. Пинесь омбоце шиня сась куду. А Петунчиконь кизефтиецка ашель.
Цёрась пачкодсь куду. Ушедсь азонкшнема, кода эзнац сявондезе Москуву добувама. Велеряенза верс шовазь пеккедьснон.
                                                                                                                                              И.ВЕШКИН.

20.04.2018 №
 
 
 

 
НОВОСТИ
 
 
 
 
 
 
 
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин