Поиск по сайту: 
 

Архив
 март 
 2024 
пн вт ср чт пт сб вс
    123
45678910
11121314151617
18192021222324
25262728293031

 
 

 

«Мокшень правдась» ламоса тейнек лезды

Тяниень пингть аш прябалат коста мумс информация тя или тона темас. Кулхцонтт хуш радио, сувак хуш интернету, ванонтт телевизор, лувонтт газетат, журналхт. Но сембода мала тейнек, сембода кельговикс—«Мокшень правда» газетась. Колмогемоньда лама киза эрян эсь шачема велесон и сембе пинкнень мон серматфнеса кельгома изданиязень. Мес васенце вастти путнеса «Мокшень правдать»? Васендакиге сяс, мес сон лисенди эсь родной кяльсонк. А минь нинге ашеськ юкста эсь кяленьконь и тянксонга оцю спасиба «Мокшень правдати». Тя изданияста мусак семботь: мезе однясь республикаса, кода мольфтевихть тефне промышленностьса и велень хозяйстваса, кодамот полафтксне образованияса, медицинаса, культураса. Семботь тянь колга газетать журналистонза азондыхть шарьхкодеви кяльса, эрь статьясь, корреспонденциясь, репортажсь токасы седицень, мяльце лувомс газетать педа-пес, а кой-кона заметкатнень—афи весть. Газетань лама номер кирдян эсь архивсон, коса улихть цебярь советт шумбрашить кемокстаманц, эсь хозяйстваса тефнень маштозь вятемаснон, од породань жуватань, нармонень касфтомать, сявф урожайть ванфтоманц квалма. Бта тяфтавок ламось содаф, но однясь ня кизефкснень эса най кондясти.
Велень администрациянь оцюнякс монь кочкамазь аф кунара. И тиса семботь, штоба «Мокшень правдась» Пою велеса улель эрь кудса, эрь семьяса. Пара и ся, мес газетась аф юкснесы веленьконь, эсь лопанянзон эса сидеста азонды содаф ломаненьконь, велесонк полафткснень колга, мезсь пичефтьсамазь и таколфтсамазь. А кельгома изданияти арьсян сяда лама серматфтыда и газетать 100 кизонь юбилеенц васьфтемс оцю сатфксса, лама интереснай материалса.
В.КЕЛИН,
Кадошкинскяй райононь Пою велень
администрациять оцюняц.
 
«И СЕДИ ПЕТИ, И
ВАЙМОЦЕНЬ ЭЖДЬСЫ»
—Эсь кяльсонк лисенди газетась арась тейне инь кельговикс и маластоннекс. Мархтонза ялган кунардонь пингста сявомок,—мярьгсь пенсияса педагогсь В.М.Феоктистова.
Пяк кельгса кяленьконь, культураньконь, коеньконь-обуцяньконь. И, шарьхкотьф, аф явондан «Мокшень правдать» мархта. Шнаса сонь, мялезон и содержанияс, и оформленияс коре, козя и иллюстрациянь ширде.
Национальнай кяльса лисенди изданияса оцю васта макссеви велень тематикати. Аньцек вов мезсь таколфтсамазь: ламоц велетне, тяконь лувксса и мокшеннетне, шамондыхть. А кда аш велеса эряйхть, аш и газетань серматфтыхть. Тя и пичефти, и арьсефти. Но, кода сотцеви, национальнай изданияти вешфкс ули. И эвондафни надияма, што мокшень ломаненьке ялгакс лядыхть мархтонза сяда товга.
Мезть лангс шарфнян мяль васендакиге? Тейне ульсь и ляткшни васенце вастса школать мархта сотф темась. Тя и шарьхкотьф, вдь монць идень тонафнемати максонь лама киза. Аф етнян и культурать мархта сотф материалхнень вакска. Пара, што газетаса азонкшневи фольклорнай коллектифнень колга. Вдь синь ванфтсазь инь оцю козяшиньконь—мороньконь, устно-поэтическяй творчестваньконь.
Республиканьконь недяляньберьфонь эряфонц колга информацият муят васенце страницатнень эзда. Кепсевихть экономикать, социальнай ширеть, политикать мархта сотф кизефксне.
Тяда башка, мзяроце кизось мельцек няфневихть мокшень мазы стиреньке. Или лятфтасаськ эрявикс советтнень. Синь афкукс пяк эрявихть. Мяльса кирдьса и «Докторсь тонць» полосать, и «Минь усадьбаньке» рубрика алу макссеви материалхнень. Велень ломанць, а газетать сяда оцю лувксоц моли вели, синь вешсыне и нолясыне тевс.
Ломаттнень мяльснон кепсесазь лемозост азф поздравлениятне. Тейне-арам, тя тевсь аф юкснема и вятема сяда тов.
 
«СЁРМАТФНЕСА, МОРАФНЕСА, УЧСА»
—Кодавок аф шарьхкодьсайне ся ломаттнень, конат сепондсазь национальностьснон и аф варжакснихть эсь кяльсонк лисенди изданиятненди. Тя, койсон, сякось, кода безярдемс мокшень ломаттнень эзда,—мярьгсь В.В.Каштанова.—Мон «Мокшень правдать» мархта ялгакс арань нинге школаса начальнай класса тонафнемста. Тячемс кельксезь ванондса-морафнеса эрь лопанять, коса кепсевихть эряфонь сембе ширетне. Кода шарьхкотькшнеса сёрматфть коряс, газетаса работай эрь ломанць лац содасы эсь тевонц и тиендьсы сонь маштозь, старандай сатомс сянь, штоба газетась сяда салалезень лувихнень мяльснон, мезенкса арьсекшневихть од рубрикат. Кепотьксонди сявсаськ «Кода эрясть и эряйхть мокшетне» рубрика ала материалхнень. Мон оцю мяльса морафнесайне синь, сотцеса эздост, кода эрсесть инголи атяньке-бабаньке. Тяни тя сембось тусь ни историяв. А содамс колгаст—ой! кода интересна. Васьфневихть и стама валхт, конат тяни юкстафт. Тя случайста кизефнесайне сяда эряфкшу мокшень ломаттнень мезе стамсь, мярьктяма, кодвасттне, тялямась и стак тов. Синь азфсна тейне афкуксонь урок.
Содаф, што мокшэрзянь ломаненьке нинге кунардонь  пинкнень аф фкя лацонь туфталонкса срадондсть странать келес. Тянивок тяконь ули кода азомс. Арьсян, што пяк лац тиенди газетась, што сяка-тев пачфни ширеса эряй мокшетнень колга. Сотцесаськ, кода синь эряйхть-ащихть. И кафксть уленди пара ваймосот, мзярда содасак, што синь ашезь юкста тядянь-алянь кяльснон, таколдыхть сянкса, штоба сон ванфтоволь, козякодоль.
Меколи азса, газетаса ули сембось, эрь мокшень ломанць муй мезе морафтомс, мезть лангс шарфтомс мяль. Сяс мон сонь сёрматфнине, сёрматфнеса и карман сёрматфнемонза сяда товга.
«Лувондса пара мяльса»
Атюрьевскяй районца ули тяфтама веле, конань лемоц Пичепулоня. Тяса мон шачень, касонь. Тянемс тяса и эрян. Веленьке ащи мазы вастса, вирь крайса. Кизонек-тялонек тя аймаксь шарфты ефксонь уженянди. Кизонда якатама пангонь, кстынь кочкама. Тястонь мазышить ванондома сидеста сашендыхть райцентраста, шабрань велетнень эзда.
«Мокшень правдать» мекольдень номерстонза лувине, што 1 апрельста ушедсь тядянь-алянь кяльса изданияти серматфтомась. Мон эсь кяльсонк газетать кунардонь ялгацан. Тяштьфнеса фалу. Тяштьфтьса и тяддеть омбоце пяленцты. Газетась пяк  мялезон. Сяда одста пингта аф сяшкава ламоль. Саят покодема вастста, сизефат. А тяни пенсиясан,  пингта пефтома, аньцек морафнек газетат.
Азса видеста, кельгса и политикать колга корхтамазень, и пеетькшнемазень-сингорямазень. Но морафтомазень фалу ушеткшнеса мекольдень лопанятнень эзда, коса пеетькст и пеетькс пакшкат. Морафтсайть синь и мяльце кеподи. Мярьгат, сембе синь кочкафт минь велестонк. Кона пеетьксть тяк лува, улихть стама ломатть-«геройхть» миньге велесонк.
Пяк кельгса велеть. Сяс оцю мяльса лувондсайне велень эряфть колга серматфнень. Интереснай судьба мархта ломаттне фалу повихть сельминголи. Цебярьхть газетаса и советтне.
А мялезе тяфтама: сяда сиденяста максседа сиде моронят велень эряфть колга, мокшень од морот, стихт. Арьсян, што синь аньцек петьсазь-мазоптсазь газетать.
Н.БРЫНДИН,
Атюрьевскяй райононь
Пичепулоня велеста трудонь ветеран.

«КУНАРДОНЬ ЯЛГАНЬКЕ»
Вишкста моли пингсь. Афи фатяме, кода ушедсь тяддеть омбоце пяленцты газетас и журналс сёрматфтомась. Монь семьязе стаки ляткшни пара ялгакс «Мокшень правдати». Газетать сёрматфнесаськ кунара и эрь мезне сон кеняртьфнесамазь од информацияса. Тяста луфтама и политикать, и экономикать, и культурать колга. Сотцетяма  мекольдень сембе событиятнень квалма, конат ётнихть республикасонк. Кой-коста сёрматфнетяма рузонь изданиятка, но «Мокшень правдась» ульсь и лядонды тейнек инь кельговиксокс и малакс. Вдь сон лисенди эсь тядянь-алянь родной кяльсонк. Лувови тёждяста, шарьхкодевиста. Тушенды мялезон, мзярда газетаса печатлакшневихть мокшень содаф ломаттнень колга зарисовкат. Улихть газетаса и пеетькс пакшкат. Мон эрян велеса, а тяса, шарьхкотьф, эрь шись ётни пефтома тевса-заботаса. Но, аф ваномок тянь лангс, фалу мушендан ётка пинге, штоба варжакстомс «Мокшень правдати». Яфият-тият лопанятнень эса, лувсайть мекольце страницаста пеетькснень и сизефце, мярьгат, ашель. Газетась эсь лацонь тонафтыеньке, кудонь доктороньке. Вдь тяса кодама повсь урмада можна мумс рецептт. А мзяра эрявикс советта кудазораватненди. Рьвязе, ванан, стаки кочкси эсост, керсесыне. Шять, мзярдовок кондястихть. Тяфта жа переса и садса уженясь тушенды мялезонк. Тяни, няк, лама аф фкя лацонь сукста-унжада эвондась. Афи шарьхкодьсак, мезьса эздост аралакшнемс касыкснень. Сяс улель пара, кда газетась, лездоль тейнек тянь ширдевок,  макссель тянь коряс сяда лама эрявикс рецептта.
Минь рьвязень мархта тяддеть омбоце пяленцты газетать ни сёрматфтоськ. А сятненди, кит тянь нинге ашезь тие, мярьголень сяда эряскодомс. Азса, лама юмафты ся, кие аф сёрматфты «Мокшень правда». Минь иденьковок сонь мархтонза аф явондыхть.
И.КОТОВ.
Темниковскяй районць.

 

 
НОВОСТИ
 

МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

09.06.2022  № 22
 

НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022  № 22
 

ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022  № 22
 
 

Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022  № 21
 

Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022  № 21
 

Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022  № 21
 
 

Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022