Качествась—васенце вастса

Васенцесь, кинь мархта минь васьфтеме «Старосиндровский» ПСХ-са, ульсь КУН-ца работай трактористсь Виктор Николаевич Невкин. Сон—хозяйствать фкя инь шнама, совестьс коре покоди ломанец. Вов и тянивок мокшалясь пяшкотькшнезень фкя-фкянь мельге  тишеса, шужярьса  тракторнай тележкатнень, конат курокста пачфневсть ферматнень ваксс.
—Сире Синдрусь—тя монь шачема велезе и трудовой биографиязевок ушедсь тязк,—азонды мяль вельде В. Н.Невкин.—Кафкса кизот покодян тя хозяйстваса, тракторозе од, зарплатазе цебярь, сяс аш мялезе тумс шири работань вешендема. Тяса сембось тейне родной, тяса покодсть монь алязе, тядязе.
Виктор Невкинонь аляц, Николай Семенович, ульсь инь цебярь механизаторкс аф аньцек Сире Синдруса, но и марнек районца. Сон лац содазень тракторонь сембе маркатнень, соксесь-витцесь ДТ-75 гусеничнай тракторса, Т-150 и МТЗ-80 тракторса и лия техникаса. Аф весть казендевсь Мордовия Республикань Правительствань Почетнай грамотаса, питни казнеса. Колганза лисендсть очеркт районнай газетаса, тяшневсь передовикть трудонь сатфксонзон колга и минь газетасонк. Тяни алянц тевонц мольфтьсы сонь церац, конань колга минь кулеме тяфта жа аньцек шнама валхт.
Мзярс корхнеме Виктор Невкинонь мархта, фермав сась «Старосиндровский» ПСХ-нь директорть тевонзон тиендисна, главнай инженерсь В.И. Полянский. Сон нинге ёфсикс од, киза етась, кода аделазе Н.П.Огаревонь лемса механизациянь факультетть и тяни тиенди васенце аськолкст велень хозяйствань тефнень эса. Церась тяза сась аф фкя кизос, сяс семботь старандай содамс и пяшкодемс лац, педа-пес. Корхтазевоме мархтонза фермаса покодихнень сатфксснон колга, кода тяса етась тялось, сатнихть ли корматне.
—Целайнек тефне фермаса мольфтевихть аф кальдявста,—азонды Владислав Игоревич.—Эрь шиня мишенттяма ниле пяле мархта тонна лофца. Эрь траксста средняйста потьневи 12 килограмма, а кой-кона дояркатне потьнихть 16 килограммонь и сяда ламонь лофца. Корматне сатнихть, нльне лезттама шабрань хозяйстватненди—мишенттяма тише, шужярь, силос. Аф лама пингта меле траксне паневихть лугатнень лангс, сяс надиятама лофцонь потямаса результаттне нинге сяда касыхть.
«Старосиндровский» ПСХ-са лувондови тежянь оцю сюра мархта жувата, эздост 350—тракст. Сембонь мельге кемокстафт тевонь содай работникт, конат получайхть зарплата сатфксс коре. Вов мес тяса покодихть, кода корхтави валмуворксса: тевти—пинге, ваймамати—част. Тянь минь шарьхкодьсаськ и дежурнай дояркать  А.Г. Криворотовать азфонц эзда, мзярда срхкаме вачкотьфтемс сонь фотоаппаратса.—Ожуда аф ламос, потясайне мекольце колма тракснень, эста улян анок снимандафтомс,—пеедезь мярьгсь Анна Григорьевна.—Вдь траксне потьневихть фкя пингть, ашеть кенере, кирдевоть—лофцсь кири.
Тяфта арьсезь покодихть и лия дояркатне, жуватань мельге якайхне. Шнама валхт тяса азондыхть Н.М.Голиковать, А.И.Шалинонь, М.Н.Козочкинонь, В.Н.Тюжинонь и лиятнень колга. Синь результатсна ковста-ковс касыхть, лемснон содасазь марнек районца.
—Оцю мяль шарфнетяма продукциять качестванц лангс,—сяда тов поладозе азондоманц хозяйствань вятись Владислав Полянский.—Ули минцень лабораторияньке, лофцсь васендакиге кельмофневи и аньцек тяда меле прважсеви приемнай пункту. Контрольса кирдеви сембе циклась, эрь килограмма продукциясь сявондеви учетс.
«Старосиндровский» ПСХ-са сембось водендаф сянди, штоба тядде животноводческяй продукциянь получамаса показательхнень ламода кеподемс, получамс эрь траксста аф вете тежятть килограммада кржа лофца. Тячиень тефне фермаса корхтайхть сянь колга, што путф задачась пяшкодеви.
Н.ЛОБАНОВ.