Поиск по сайту: 
 

Архив
 ноябрь 
 2018 
пн вт ср чт пт сб вс
   1234
567891011
12131415161718
19202122232425
2627282930  

 
 

 

Как жили и живут мокшане

Кода эрясть и эряйхть

Арга велесь Атерь эзда ащи комозьда лама вайгяльбе вастса. Тоза пачкодемась—тевсь аф тёждя. Аргаса эряй лама шнама ломаньда, тылонь труженикта, трудонь ветеранда. Фкясь синь эздост    А.Т.Арекаева, кона ёфси аф кунара отмечазе 90 кизонь юбилеенц. Кайгсть лемозонза седиста моли лямбе валхт, мазы морот. Ламоль и питни казнеда. Идьтонза тя ару вайме ломанть 9, уноктонза 20, уноконь идьтонза 23. Пуромихть сембе, Анна Тимофеевнань кудозонзовок аф тяльгихть. А кда лятфтамс сембонь рьваснон, мирдьснон, сядода лама кочкави. И сембонь сире ломанць мяляфтсыне, учсыне.
Ванат Анна Тимофеевнань лангс и аф верондат, што теенза вейхксогемонь киза. Сон отькорь, корхтафкшу, весяла. Машты кулхцондома и азондома. Пяк оржа мялямоц. А вдь эряфоц стакадонга стакаль, няйсь вачаши и ашуши.
Шачсь странаньконь аф тёждя пингстонза. Мольсь коллективизациясь, колхозонь пуроптома пингсь. Ломаттнень ёткса ламоль аф шарьхкодемада, кяжда, аф верондамада. А меле ушедсь Великай Отечественнай войнась. Эста Анна Тимофеевнань кефкие кизоцоль. Кемонь кизонянзольхть, мзярда кулось тядяц Агафья Ивановна. А войнать ушетксста сась похоронка и алянц Тимофей Павловичень лангс. Уроскять сявозь эсь ширезост оцю сазоронза. Кода маштсть, ужялязь, ашезь обжсе. Но стирнясь сельмонь каязь ванондсь ялганзон лангс, конатнень ульсть тядясна-алясна, кельгисна и ужяльдисна.
Аф ваномок стака эряфть лангс, Анна Тимофеевна аделась колма класст Арга велеса. Оцюфнень мархта ряцок заняфоль велень тевса. А сяда оцюста якась торфонь таргама мянь Ярославскяй области. Кафта кизот заняфоль стака, аф стирнянь вийс коре тевса. Мяльсонза эста фкяль: кода-аф кода мрдамс куду, Арга вели, конань пяк кельгозе, конанди пяк лажаткшнесь. И сон мрдась. Лиссь рьвакс, пуроптсь семья. Покодсь хозяйстваса, шачфтсь кемонь итть. Фкясь кулось шачемста. Кизода лама ни аш шиса оцю цёрац. А ляды кафксотне шумбрат-тазат. Аф юкснесазь тядяснон, варжамонза сашендыхть сидеста. Анна Тимофеевнань иденза Москусот, Зубово-Полянскяй районцот, лия вастоват. Аш ётксост фкявок кальдяв ломань.
Ламоль поздравленияда А.Т.Арекаевать шачема шистонза. Ашезе юкста сонь и райононь руководствась. Фалу лезнихть райононь оцюнясь И.С. Гусаров, Арга велень поселениянь оцюнясь А.А.Козяйкин. Юбилейстовок Аким Андреевич азсь Анна Тимофеевнань лемс шнама валхт, казсь питни казне. Райононь ветераттнень лемста поздравляндазе И.А.Козяйкин. Сашендсь ломань и соцзащитань отделста.
А.Т.Арекаевать, кода сонць мярьгонди, эряфсонза инь оцю козяшиц—тя семьяц. А семьяц сонь афкукс пяк удалаф. Миньге арьсетяма мокшень тя цебярь ломанти шумбраши и сембе цебярть.
                                                                                                                                              И.ВЕШКИН.
                                                                                              Снимкаса:  А.Т.Арекаева идензон мархта.

10.05.2018 №
 
 
 

 
НОВОСТИ
 

УШЕДСЬ «Шумбрат, Мордовия!»—«Vivat, Чемпионат!» ФЕСТИВАЛЬСЬ

25.10.2018  № 42
 
 
 

Панчфт и казнет—республикань учительхненди

Торжественнай мероприятияс, кона лемтьфоль Международнай учителень шити, И.М.Яушевонь лемса музыкальнай театрав пуромкшнесть учительхне марнек республикаста. Профессиональнай праздник мархта синь поздравляндазень Мордовиянь Оцюнясь Владимир Волков.
—Учительсь—тя аф аньцек профессия, тя ваймонь венемома, аф тёждя, ответственнай и оцюдонга оцю труд,—мярьгсь Владимир Дмитриевич.—Афкуксонь учительсь максси иттненди сяда лама азф школьнай программать коряс. Сон лезды ученикти шарьхкодемс эсь прянц, няфтемс ломанень цебярь ширензон, мумс эсь кинц эряфса.
Республикань Оцюнясь азсь кафта важнай цельхть, конат ащихть отечественнай образованиянь системать инголе. Васенцесь—сувамс мирса инь цебярь кемоттнень лувксс. Омбоцесь—тиемс воспитаниянь система. Тянди водендаф «Образование» од национальнай проектсь.
11.10.2018  № 40
 
 
 

Республикань предприятиятнень продукциясна пачфневи миронь 80 странас

Пяденцяста, 28 сентябрьста, Мордовия Республикань Оцюнясь В.Д.Волков примась участия торжественнай пуромксса, кона лемтьфоль Машиностроителень шити. Мероприятиясь етась Рузонь Государственнай драматическяй театраса. Залу пуромкшнесть республиканскяй предприятиянь представительхне, отраслянь ветераттне.
Пуромфнень поздравляндамста В.Д.Волков лемдезе машиностроениять республикань экономикать  седикс и моторкс, вдь сонь эздонза ламода ащи лия сфератнень работасна.
Азфоль, што тяддень кафкса ковста промышленнай производствань индекссь арась 111 процент. Странаса тя фкя инь цебярь показательсь. 2018 кизоня республикаса нолдаф 119 миллиард цалковаень питнеса промышленнай продукция, мезсь 13 процентта сяда лама мелянь кизоть коряс. Республиканскяй кемготува предприятиятнень эса эряфс етафневихть производствать  келептеманц и одкстопнеманц коряс проектт. Касонды инновационнай продукциять лувксоц. Производствань марстонь объемть эса сонь талекац—29 процент. А тяфтама отраслятнень эса, кода электроннай и оптическяй изделиянь производствась, тя показательсь пачкодсь 77 процентс.
04.10.2018  № 39
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин