Поиск по сайту: 
 

Архив
 апрель 
 2021 
пн вт ср чт пт сб вс
   1234
567891011
12131415161718
19202122232425
2627282930  

 
 

 

Молодежный клуб

Од ломанень клуб

Н.П.Огаревонь лемса Мордовскяй госуниверситетса тонафни лама омба масторонь студент. Коста аньцек аф сашендыхть ширезонк содамошинкса: Абхазияста, Азербайджанцта, Алжирста, Арменияста, Афганистанцта, Белоруссияста, Болгарияста, Венгрияста, Грецияста, Египетста, Африкаста, Индияста, Иракста, Китайста, Киргизияста, Латвияста, Пакистанцта, Саудовскяй Аравияста, Сирияста и ламоц лия государстватнень эзда. Тяниень пингть вузса тонафни  1200-та лама омба масторонь студент. Кда несколька кизода инголе студенттне-иностранецне сяда сидеста кочкселезь медицинскяй институтть, тяни синь тонафнихть МГУ-нь сембе факультеттнень эса. Аф кржа омба масторонь стирь-цера поступакшнихть географическяй факультету. Фкясь синь ёткстост африканкась Вахатра Ракотондрабе. Стирсь тонафни васенце курсса. Кода ладявсь эряфоц минь республикасонк, студенткась азондсь корреспондентоньконь мархта корхнемста.

—Вахатра, азонтк, коса шачеть-касоть, мес тонафнема вастонди кочкайть Мордовиять?
—Сань мон Мадагаскарста. Серезень касыне тостоконь Антананариву ошса. Тя Мадагаскарть столицац. Касонь аф оцю семьяса. Монь ули брадозе. Тядязе работай медицинскяй сестракс, алязе—инженер.
Мордовиять колга васенцеда кулень содафонень эзда, конат стане жа тонафнесть тяса. Родительнень васенда ашель мяльсна нолдамс монь тяфтама ичкози, но тейне удалась полафтомс мяльснон.
—Тон аф кальдявста корхтат рузкс…
—Лездсть курсне, конатнень ётайне Саранскяйса вузу поступамда инголе. Сисем ковста тевонь содай преподавательхне тонафтсть тейнек, омба масторонь студенттненди, рузонь кяль, азонкшнесть Россиять историянц колга. Сембе занятияньке университетса ётнихть рузонь кяльса и мон семботь шарьхкотькшнеса.
—Мес кочкайть географическяй факультетть?
—Пяк кельгса перьфпяльть. Шабакскиге мялезель содамс сяда лама природать колга. Сяс школать аделамда меле ламос ашень арьсекшне, коза тумс тонафнема.
—Мезьса тушенды мялезот Саранскяйсь?
—Тяса сетьме, ломаттне эряйхть фкя-фкянь мархта ладязь. Мялезон, мес ошса фалу кирдеви аруши. Тяса ули коса ваймосемс, ётафтомс ётка пингть. Ялганень мархта сидеста уленттяма А.С. Пушкинонь лемса культурань и ваймамань паркса.
—Тястонь кельмотне ашедязь эвфте?
—Виденцян, тялонда аф тёждяль. Вдь монь шачема-касома уженясон фалу пси. Тяза самозон мон ловга вестевок ашень няенде. Васенце кельмотнень самаснон мархта урмаянь, недяляшка кирдсь оцю температура. А меле, улема, организмась тонадсь тястонь климатти.
—Мокшэрзянь кухнять мархта удалась содафтомс?
—Мархтон фкя группаса тонафни Ковылкинскяй районцта стирь. Сон фалу ускси кудста мокшень пачат. Пяк танцти ярхцамбяльсь! Тяда башка, варчсине «офтонь мадять».
—Вахатра, азонтт аф лама шачема-касома уженяцень колга, мезьса заняфт Мадагаскаронь эряйхне?
—Островса лувондови 20 миллионть малава ломань. 30 процентсь эздост эряйхть ошса, лядыксне—велеса. Корхтайхть ломаненьке малагасийскяй кяльса, но стане жа ламотне лац содасазь французскяй кяльть. Мазы Антананариву ошсь, коса мон касонь. Тяса лама сире пингонь постройкада: дворецт, резиденцият, мавзолейхть, монархнень усыпальницасна. Ошеряйхнень инь кельгома вастсна—Цимбазаза ошень парксь, коса ули ботаническяй сад, зоопарк, археологиянь и палеонтологиянь музей. Ошса ули университет, тяниень пингонь больницят.
Мадагаскарса экономикань лия отраслятнень ёткста     вииякшникс лувондови велень хозяйствась. Башка вастса ащихть ристь и какаоть касфнемасна. Получаф продукциять ламошкац мишендеви ширеса.
—Куду, улема, аф сидеста якат?
—Тя пингста аньцек весть улень. Пяк лажаткшнян тядязень мархта алязти. Тяни васьфтян мархтост кизонь каникулатнень пингста.
—Тонафнемать аделамда меле арьсекшнят мрдамс родиназот или лядат тязк?
—Мзярс стака тянь азомс. Кода корхнихть, пингсь няфтьсы. Фкять содаса кемоста—Мордовскяй госуниверситетса получаф образованиязень мархта косовок аф юман.
                                                                                                                                    О.ЕВДОКИМОВА.


10.05.2018 №
 
 
 

 
НОВОСТИ
 

КИЗОНЬ КОФНЕНЬ ИТТНЕНЬ ВАЙМАМАСНОН И ШУМБРАШИСНОН ПЕТЕМАСНОН ЛАНГС ШАРФТОМА БАШКА МЯЛЬ

7 апрельста МР-нь Оцюнять аф лама пингс тевонзон тиендиснон Артём Здуновонь видеса совещанияса ванондовсть кизонь кофнень иттнень ваймамаснонды лемтьф кизефксне. Региононь руководительсь ётафтф работать мзярс лувондсы аф педа-пес лац-ряц тифокс. Тя важнай направлениясь веши сяда цебярьста аноклама, инь пяк сянь эса, мезсь токсесы досугонь ладямать и иттнень ваймама пингть аралафшиснон обеспечендамаснон.

 

 

 
Кода азозе МР-нь Правительствать Председателенц заместителенц тевонзон тиендисна Галина Лотванова, тядде планц коре кармай работама 337 лагерь, эздост 22-сь стационарнай (санаториятнень базаса), и шитемба улемань 315 лагерь образовательнай организациятнень и социальнай учреждениятнень базаса. Тяконь мархта Галина Лотванова отмечазе, што инголи работай 23 лагерсь тяни республикаса сёлкфт ташта, калада инфраструктураснон инкса, хуш синь ащихть Мордовиять инь мазы вастонзон эса.

 

15.04.2021  № 14
 

МОРДОВИЯНЬ УЧЁНАЙХНЕ ТИСТЬ НАУЧНАЙ ПОДВИГ!

15.04.2021  № 14
 
 
 

ЛОМАТТНЕНЬ ЭРЯФСНОН ЦЕБЯРЬГОФТОМАНКСА

31 мартста Мордовиянь Оцюнять аф лама пингс тевонзон тиендисна Артём Здунов ВКС-нь режимса примась участия МР-нь Промышленностень, наукань и од технологиянь министерствать расширеннай коллегиясонза. Совещанияса примасть участия Россиянь Промышленностень и торговлянь министерствать региональнай промышленнай политикань и проектнай управлениянь Департаментонц директороц Виталий Хоценко, региональнай отраслевой министерствань представительхне, республикань инь оцю производствань вятихне тисть итокт кизоньберьфонь работаснонды.

 

Артём Здунов шарфтсь мяль, што регионца трудса заняфнень нилецекс пялькссна покодихть промышленностьса, тя республикань экономикать флагманонзон эзда фкясь. Мордовиянь Оцюнять аф лама пингс тевонзон тиендисна азозень тематнень, конатнень коряс эряви мольфтемс корхтама коллегиять пингста. Васендакиге тя собственностень и предприятиятнень вятемаснон коряс кизефксне. Эряви содамс, кие ащи выгодань получайкс, кие отвечай трудовой коллектифнень инкса. Прябалакс арси собственностень праватнень кядьста кядьс ламоксть ётнемасна, мезсь шоряй предприятиятненди лац-ряц вииякшнемс.

 

08.04.2021  № 13
 

ЗАСЕДАНИЯСЬ ЛЕМТЬФОЛЬ КОРРУПЦИЯТЬ КАРШЕС ТЕВОНЬ МОЛЬФТЕМАТИ

МР-нь Оцюнять аф лама пингс тевонзон тиендисна Артём Здунов 30 мартста ётафтозе Мордовия Республикаса коррупциять каршес тевонь вятемать коряс Комиссиять заседаниянц. Заседанияса ванондозь 2020 кизоня коррупционнай преступлениятнень мархта сотф ситуациять. МР-ть эзга МВД-ть информациянц коряс, ётай кизоня сембе провоохранительнай оргаттне мусть коррупциять мархта сотф 205 преступления, инь оцю талекасна тиф государственнай властень сфераса и сотф разнай уровенень должностной лицатнень оцю вастса улемста закононь колсемать мархта. Приоритетнай направлениятнень эзда фкясь—национальнай       проекттнень эряфс ётафтомста правонарушениятнень инголдамасна, 2020 кизонь работань итокнень коряс, внутренняй тевонь оргаттнень мархта лихтьф 14 тяфтама преступления, корязост карьхцне лувондовсть 1 миллион цалковайть малава, синь мрдафтфт меки. МР-нь Оцюнять аф лама пингс тевонзон тиендисна азозе, што карьхцнень мрдафтомаснон коряс работась пяк важнай—средстватне улест мрдафтфт экономикати и нолдафт республикать виияфтоманцты.

 

08.04.2021  № 13
 

АРТЁМ ЗДУНОВ АЗСЬ СТРАНАНЬ ПРЕЗИДЕНТТИ РЕГИОТТНЕНЬ ФИНАНСОВАЙ СИСТЕМАСНОН ШУМБРАЛГОФТОМАСНОН КОРЯС ПРЕДЛОЖЕНИЯТ

Россиянь Президентсь Владимир Путин мярьгсь кафта недяляньберьф арьсемс тядде региоттнень дополнительнай финансовай ширень кирдемаснон коряс параметрат, штоба сявомс мяльс тя кизефксть Федеральнай Собранияти сай пингонь посланиясонза. Тянь колга азфоль Правительствань члеттнень мархта совещанияса, кона ётафтовсь 31 мартста.

 

«Федерациянь субъекттнень  финансовай положенияснон минь сембе пингть кирдьсаськ контроль ала,—мярьгсь Владимир Путин.—Мекольдень пингть эряфс ётафтовсь лама мера, штоба кирдемс региоттнень ширеснон и максомс теест эрявикс лезкс—васендакиге, конешна, сявоньдсайне мяльс решениятнень, конат примафтольхть пандемиять пингста». Странань Президентсь лятфтазе, што меля нолдафоль 280 миллиард цалковай прямой дотация и нинге 223 миллиард цалковай специальнай бюджетнай кредитт. «Российскяй экономикать пильге лангс стяфтоманцты тенденциятне нинге аньцек кемокснихть, минь тянь лац содасаськ. Аф сембе субъекттнень эса минь няйсаськ деловой активнайшить касоманц, сяс региоттнень доходнай базасна ламода аф стабильнай. Тянкса мялезе кулемс коллеганень, губернаторхнень эзда регионцнон финансовай состоянияснонды анализ, а стане жа предложеният сянь колга, кодама од решеният эрявихть, штоба аф аньцек обеспечендамс региональнай финанснень стабильнайшиснон, но и касфтомс экономическяй вииямать, вов мезсь ащи тейнек целькс—тиемс РФ-нь эрь субъектть кемоста виияфтоманкса основа».

 

08.04.2021  № 13
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин