Поиск по сайту: 
 

Архив
 февраль 
 2019 
пн вт ср чт пт сб вс
    123
45678910
11121314151617
18192021222324
25262728   

 
 

 

Тема дня

9 майсь Мордовиять столицаса

ПОБЕДАНЬ 73-це ТУНДАСЬ
9 майста Саранскяйса, кода и марнек странаса, келиста отмечафоль Победань Шись. Тядде топодсь 73 киза, кода народоньке сяськсь Великай Отечественнай войнаса.
Победань площадьса митингс-реквиемс пуромкшнесь 15 тежяньда лама ломань. Вечнай толть ваксса, койс коре, почетнай вастснон занязь войнань и трудонь ветераттне. Лемозост лямбе валхт азсь Мордовия Республикань Оцюнясь В.Д.Волков. Оцю инжихнень еткса стане жа ульсть МР-нь Госсобраниять Председателец В.В.Чибиркин, республиканскяй Правительствать Председателец В.Ф.Сушков, МР-ть эзга главнай федеральнай инспекторсь М.С.Сезганов, Саранск ошень округонь оцюнясь П.Н.Тултаев, Саранскяй и Мордовскяй митрополитсь Зиновий и лият.
—Победань Шись—тя инь васенце праздниксь марнек странаньконди!—ушедозе эсь корхтаманц В.Д.Волков.—Тя минь историяньке, марстонь гордостеньке! Тячи минь тага весть сюконятама ветераттненди, кит эсь прянь аф ужяльдезь ащесть Родинать инкса тюремань паксяса, кит маласькофнезь Сяськомать тылса.
Республикань Оцюнясь лятфтазе, што Мордовияста фашисттнень каршес тюрема сявфоль 246 тежянь ломань, эрь омбоцесь эздост ашезь мрда куду… Кода отмечазе В.Д.Волков, республикань солдаттне афкуксонь геройкс ащесть шачема масторть инкса сембе фронттнень эса. Етксост полководецт и рядовойхть, аф фкя национальностень ломатть. Синь максозь Сяськомать инкса семботь, мезе маштсть, кулсесть и сяськондсть, штоба эряль Родинась, эрялеме минь, штоба минь мяляфтолеськ…
Ветераттнень лемста пуромфнень инголе корхтась Великай Отечественнай войнань ветеранць А.И.Маркин. Сон лятфтась ся оцю питнеть колга, конань савсь максомс Сяськомать инкса. Стане жа ветеранць азсь благодарностень валхт республикань руководствати ветераттнень и сембе эряфкшу ломаттнень ширеснон кирнеманкса.
Мордовиянь од ломаттнень эзда ветераттнень инголе корхтась 24№ школань тонафнись Кирилл Хоркин. Сон лятфтась эсь атянц колга, кона ашезь мрда фронтста, и спасибась сембе ветераттненди сетьме эряфонкса.
Воиттнень-землякнень памятникснонды путфтольхть венокт Мордовиянь Оцюнять, республикань Госсобраниять и Правительствать, ПФО-са РФ-нь Президентть полномочнай представителенц Аппаратонц, Саранск ошень округонь оцюнять и депутатонь Советть эзда. Стане жа путфтольхть панчфт Мордовиянь почетнай граждаттнень, трудовой коллектифнень, образованиянь, здравоохранениянь, спортонь, общественнай организациянь представительхнень эзда.
Великай Отечественнай войнаса шавфне лятфтафтольхть минута кашт аф молезь ащезь, мезьда меле менельти нолдафтольхть акша гуленятне и воздушнай шархне.
Митингта меле Саранскяйса етась Победать лемс парадсь, а сяльде—торжественнай шествиясь, коса примасть участия 25 тежянь ломань, срхкась мемориальнай калма лангс. Шествиять вятезь «УАЗ-не», коса озсефтольхть ветераттне.
9 майста Саранскяйса ётась «Бессмертный полк» шествиясь. Эсонза примасть участия 30 тёжяньда лама ошень эряй.
Мярьгат, пефтома ляй шудесь Ленинонь проспектонц эзга. Колоннаса аськолясть аф фкя кизонь, профессиянь и национальностень ломатть. Ламотне сафтольхть акцияс семьянек, шабаснон, унокснон мархта. Кядьсост кандозь фалу одкс лятф солдаттнень фотографияснон. Кие-бди лиссь фкя стройс атянц, кие щятянц, кие алянц мархта. Сят, кинди тя или тона туфталонкса ашель кода аськолямс колоннаса, ащесть кить крайса и стане жа кирдезь кядьсост мала ломаньцнон—Победань геройхнень портретснон. Ламоц участникнень шамаваст кеворсть сельмоветтне. Пси сельмоветть толу-качаму паксяса шавфнень инкса… Стройса эрь молить сельмованфста шарьхкотькшневсь—«Минь мяляфтсаськ».
«Бессмертный полк» шествияса примась участия и Мордовия Республикань Оцюнясь В.Д.Волков. Кядьсонза сон кирдезе алянц—Дмитрий Алексеевич Волковонь фотографиянц. Стане жа марстонь стройса аськолясть МР-нь Госсобраниять Председателец В.В.Чибиркин, республикань Правительствать Председателец В.Ф.Сушков,  МР-ть эзга главнай федеральнай инспекторсь М.С.Сезганов, официальнай лия ломатть.
Эряви азомс, «Бессмертный полк» патриотическяй акциясь Победань шиня ётафтфоль сембе республикать келес—ошнень, районнай центратнень, велетнень эса. Сембоц Мордовияса «Бессмертный полк» шествияса примасть участия республикань 55 тёжянь эряй.
 
О.ЕВДОКИМОВА.

17.05.2018 №19
 
 
 

 
НОВОСТИ
 
 

ВАЛЕНТИН ВАСИЛЬЕВИЧ КОНАКОВ

2019 кизонь 27 январьста 80 кизонц лангса стакаста сярядемда меле тусь эряфста Валентин Васильевич Конаков—содаф государственнай и общественнай деятельсь, образованиянь и наукань пуроптысь, ученайсь.
Валентин Васильевич Конаков шачсь 1939 кизонь      9 июньцта Мордовскяй АССР-нь Атяшевскяй райононь Кулясово велеса крестьянонь семьяса.
Армияса служамда меле 1961 кизоня В.В.Конаков работась автомеханикокс Атяшевскяй «Сельхозтехникаса», а сяльде поступась Мордовскяй государственнай университету. Аделамок 1966 кизоня тонафнеманц, Валентин Васильевич кармась покодема образованиянь сфераса, 1966 кизоста сявомок 1979 кизоти молемс работась Мордовскяй государственнай университетса ассистентокс, старшай преподавателькс, металлонь технологиянь и машинань петемань кафедрань доцентокс, велень хозяйствань механизациянь факультетонь деканонь заместителькс. 1978 кизоня В.В.Конаков аделазе Московскяй лесотехническяй институтонь аспирантурать, теенза максфоль техническяй наукань кандидатонь лем.

31.01.2019  № 4
 

ДИПЛОПТ И ПРЕМИЯТ—АСУ ЛОМАТТНЕНДИ

Ётай недялять, 25 январьста, Российскяй студенчествань шиня Мокшэрзянь государственнай национальнай драматическяй театраса етась торжественнай пуромкс, конань пингста МР-нь Оцюнясь В.Д.Волков макссь казнет асу од ломаттненди. Мероприятияс пуромкшнесть аф фкя лацонь конкурсонь и олимпиадань сяськихне и призерхне, а стане жа  синь тонафтысна и тядясна-алясна.
Республикань Оцюнясь азозе, што асу од ломаттнень ширеснон кирдеманкса меля примафоль решения ладямс од премият школьниконь международнай и всероссийскяй олимпиадань сяськихненди и призерхненди.
«Международнай уровеньца сатфксонь сатоманкса премиять лувксоц 100 тежянь цалковайста сявомок 300 тежянь цалковайти молемс. Всероссийскяй олимпиадань мекольце этапонь сяськихне и призерхне получайхть 60 и 30 тежянень цалковай,—азозе Мордовиянь Оцюнясь.—Тядде лауреатокс арасть 43 школьниконьке. Тяда башка, казнет получайхть нинге 40 стирсь и церась, конат лац няфтезь пряснон  исследовательскяй тевса, социальнай и общественнай работаса, научно-техническяй творчествань и  профессиональнай мастерствань конкурснень эса».
31.01.2019  № 4
 

МОРДОВИЯНЬ ОЦЮНЯСЬ ВАНОНДОЗЕНЬ САРАНСКЯЙСА ОПТОВОЛОКОННАЙ ПРОИЗВОДСТВАТЬ ВИИЯФТОМАНЦ КОРЯС КИЗЕФКСНЕНЬ

Мордовиянь Оцюнясь Владимир Волков 22 январьста ётафтсь рабочай васедема «Оптиковолоконные системы» АО-ть генеральнай директоронц Андрей Николаевонь мархта. Ванондовсть предприятиять 2018 кизонь работань итогонза, а стане жа 2019 кизонди платтне. Ня кизефкснень ваномаса примась участия Правительствать Председателенц заместителец—промышленностень, наукань и од технологиянь министрсь Александр Седов.
Лятфтасаськ, оптическяй волокнань Саранскяй заводсь—фкясь и сякось странаса. Сон нолдафоль колма кизода инголе. Тя эсь лацонь производствать виияфтомань сембе этапонза етасть Россиянь промышленностень и торговлянь министрть  участиянц мархта. Владимир Волков аф весть васетькшнесь Денис Мантуровонь мархта, получсемок тя проектть, конанди вийс коре ладямс оптическяй волокнань производствать замкнутай цикланц марнек странать вешфксонзон мяльс сявозь, эряфс етафтоманц коряс республикать инициативанзонды ширень кирдема.
31.01.2019  № 4
 

МОКШЭРЗЯНЬ МАСТОРСЬ ТАГА ПУРОПТСЫНЕ ЭСЬ СТИРЕНЗОН И ЦЁРАНЗОН

Мордовскяй (мокшень и эрзянь) народть vii съездоц ётай тяддень
23-25 октябрьста республиканьконь столицаса
Мордовиянь Оцюнясь Владимир Волков 22 январьста Саранскяйса етафтсь мордовскяй (мокшень и эрзянь) народть VII съездонц, кона кармай тядде 23-25 октябрьста, етафтоманцты анокламать коряс совещания.
Совещанияса примасть участия Россиянь финно-угорскяй народонь Ассоциациять председателец Петр Тултаев, а тяфта жа мордовскяй народонь общественнай организациять Межрегиональнай представителенза, тяконь лувксса РФ-нь лия     субъекттнень эзда.
Владимир Волков мярьгсь, што мордовскяй народть съездоц работать важнай пяльксоц, кона мольфтеви властень оргаттнень и общественнай институттнень мархта традициятнень и межэтническяй ладямать ванфтоманц и ламолгофтоманц коряс—тя задачать путнесы странань Президентсь. Сай пингонь съездть инь главнай темац—«Мордовскяй (мокшень и эрзянь) народсь лама нациянь Россиять единай культурнай кодса».
31.01.2019  № 4
 
 

Мордовиянь Оцюнясь Владимир Волков Ётафтсь национальнай проекттнень эряфс етафтомаснон коряс рабочай совещания

17.01.2019  № 2
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин