Поиск по сайту: 
 

Архив
 май 
 2019 
пн вт ср чт пт сб вс
  12345
6789101112
13141516171819
20212223242526
2728293031  

 
 

 

Наши мокшанские сыновья и дочери

Мокшень содаф поэтть А.С.Малькинонь шачема шиста 95 кизонь топодемати

 Ниле юбилейхть
Ашеме кенере фатямс, тага сась майсь, а мархтонза и Малькинскяй лувоматне. 1923 кизонь 26 майста Атюрьевскяй райононь Кяшал велеса шачсь содаф поэтсь А.С.Малькин, а 1976 кизонь 28 майста сон кулось. Тяддесь Александр Степановиченди нилексть юбилейнай. Карматама отмечама шачема шистонза 95 кизонь топодеманц. Топоди 25 киза, кода ушедсть етафневома Малькинскяй лувоматне. 70 киза кармай, кода лиссь стихонь васенце сборникоц «Стихт» лем ала. 50 киза ули, кода Мордовскяй книжнай издательстваса башка сборникокс нолдафоль «Лямбе пильгокит» поэмац. Тя ульсь 1968 кизоня. Сборникть эсоль 80 лопаня.
Тянемс макссеви кизефкс: «А мезенди эрь кизоня етафнемс Малькинскяй лувоматнень?» Шарьхкотьф, А.С. Малькинонди синь тяни аф эрявихть. Эрявихть тейнек, творчестванц тонафниензонды, кельгиензонды. Малькинскяй лувоматнень вельде кассь тяшти лама ломань, мокшень кялень тонафты. И нинге, надиян, касы. Аф карман лятфнема лепт, фамилият. И, кда ни Малькинскяй лувоматненди 25, тя корхтай сянь колга, што синь эрявихть.
Мокшэрзянь писательхть Кяшалу сашендсть и 1993 кизода инголивок. Якасть Александр Степановичень калмонц лангс. Сувсесть велень школав. Эста директоркс ульсь РСФСР-нь и Мордовскяй АССР-нь Заслуженнай учительсь В.С.Богданов. Примсезень кода мала раднянь. Сувсесть велень Совету, васетькшнесть «Партизанский» эстонь совхозонь директорть В.И.Путяйкинонь мархта.
—Ня делегациятненди оцюнякс фалу ульсь Мордовиянь Народнай поэтсь И.М.Девин,—лятфни Василий Иванович.—Хозяйстваньке оцюволь, козяль. Аф визькс ульсь писательхнень ингольде. Синь аф аньцек васьфнесть А.Малькинонь земляконзон мархта, но и лац ваймосесть.
Малаткшнесь 1993 кизось, поэтть 70 кизонь юбилеец. И.М.Девин ушедсь гайфнема райононь оцюнятненди, школань директорти. Кизефкссь фкяль—илань етафтомась. Атказама ашель. Тя васьфтемась эрявсь. И вов 1993 кизоня майть песта Кяшалса пуроптовсь оцю ила. Сась лама содаф писательда, мокшень кялень и литературань кельгида. Етксост И.А.Калинкин, Писателень союзть эстонь вятиец. Састь Мордовиянь Народнай поэтсь, Малькинонь цебярь ялгац И.М.Девин, поэттне С.В.Кинякин, И.Н.Кудашкин, писательсь Г.И.Пинясов, ученайсь А.В.Алёшкин, ламотне лиятне. Васьфтемась етась лямбоста, мялень салайста. Тя иласа азфоль мяль етафнемс синь эрь кизоня. И.А.Калинкин мярьгсь, што арьсетяма тянь лангса. И.М.Девин стясь и мярьгсь: «Катк тячиень иланьке ули ушетксокс тя оцю тевти». Тя мяльть шназе Мордовскяй АССР-нь Заслуженнай учительсь, Великай Отечественнай войнань ветеранць, поэтть ялгац М.В.Кондрашкин. Эста ульсь тиф районца мокшэрзянь народонь вельмофтемань комитет, конань вятезе Од Кярьгань школань тонафтысь В.Н.Равочкин. Комитетсь стане жа ульсь Малькинскяй лувоматнень инкса.
И вов ся пингста етась 25 киза. Лама содаф ломаньда ульсь Атерень модать лангса. Нят писательхть, ученайхть, морайхть, композиторхт, скульпторхт, политикт, мокшень кялень и мокшэрзянь литературань тонафтыхть. Разнай кизотнень Атерьса, Кяшалса ульсть И.М.Девин, В.Н.Корчеганов, В.И.Мишанина, В.И.Нестеров, Р.К.Орлова, Н.Б.Голенков, од тяштихне Вера Брындина, Марина   Агеева, Марина Аникина. Аш кода аф лятфтамс содаф ученайхнень Ю.А.Мишанинонь, М.И. Малькинать, М.Г.Имярековонь, Н.С.Савкинонь, Е.И.Азыркинать и лиятнень, конат аф весть ульсть Малькинскяй лувоматнень эса, тиендсть цебярь доклатт Кяшалонь цёфксть творчестванц колга. Ламоксть сашендсь содаф композиторсь Н.В.Кошелевась, кона сермадсь музыка поэтть кой-кона стихонзон лангс, тись эздост морот.
Лама пара тевда тиф 25 кизоста. Панчф Кяшал велень средняй общеобразовательнай школать видеса А.С.Малькинонь лемса историко-краеведческяй музей. Сонь эсонза ванфтовихть  А.Малькинонь колга экспонаттне, лятфнематне. Кафксть нолявсть Александр Степановичень кочкаф произведениянза. Тя кафксогемонь и вейхксогемонь кизонь иластонза. 2013 кизоня Кяшалонь школать каршес путфоль бюстоц. Сонь тиезе Мордовиянь содаф скульпторсь Н.М.Филатов. Школать стенаса лятфнемань плита. Сонь аноклазе Петр Добаев (Офта). Сембось корхтай сянь квалма, што А.С.Малькинонь Атюрьевскяй районца мяляфтсазь и кельгсазь. Тянкса аф кржа вий макссихть Малькинонь земляконза Ф.П.Девятаев, А.И.Карьгин, Атюрьевскяй райононь оцюнясь И.С.Гусаров, Кяшал велень поселениянь вятись В.Ф.Четыркин.
Мекольдень кизотнень лама серматф сонцень А.С.Малькинонь и сонь творчестванц колга. Лац содафт Н.И.Черапкинонь, А.В.Алёшкинонь, В.М.Макушкинонь, А.Д.Шуляевонь, М.Г.Имярековонь и лия ученайхнень работасна. Лувсайть синь и саят мяльс: сембось азф колганза. Аф, аф сембось. Шачихть од ученайхть, а синь ефси лия сельмоса ваныхть поэтть произведениянзон лангс, макссихть лия питне, оценкат. И тя пяк пара. Тя корхтай сянь квалма, што поэзиянцты кельгомась ашезь ета, меколанкт, кизоста кизос аньцек касы. Иттне сермадыхть стихт, сочиненият. Пара мяльса лувондсазь Малькинскяй лувоматнень эса, лия мероприятияса. Етафневихть эсь лацонь пялькстомат сермадыхнень еткса.
Кизоста кизос мушендовихть од ломатть, конат васьфнесть, седикс-ваймокс корхнесть поэтть мархта. Синь лятфнемасна пяк питнихть, эрявихть.
Тядде 25-да етафтовихть Малькинскяй лувоматне. Мекольдень кизотнень синь етафневихть Атерень Культурань кудса, коза пуромкшни   лама ломаньда. Аф юксневи Кяшалське. Калмонцты каннихть панчфт, венокт. Тяса етнихть митинкт. Школаса кайгихть поэтть стихонза, моронза, од сермадыхнень произведениясна. Мезсь пяк кепси мяль, лангозонк ванозь кармасть етафневома Девинскяй, Пинясовскяй, Учватовскяй лувомат. Кальдявсна синь аш. Тейне сидеста сашендови улендемс мокшень велетнень эса. Ламоц школава иттне писательхть няендсть аньцек телевизорса, а коса улендихть ня лувоматне, писательда сашенды лама.
И.ВЕШКИН.

24.05.2018 №20
 
 
 

 
НОВОСТИ
 
 
 
 
 
 
 
 

Полафтови пенсиятненди социальнай доплатань максомась

Ня шитнень Мордовия Республикать эзга Россиянь Пенсионнай фондть Отделениясонза ётась пресс-конференция, конань вятезе Управляющайсь В.И.Василькин.
Пуромксть панжемста Владимир Ильич азозе, што аф кунара Россиянь Пенсионнай фондсь тись итокт 2018 кизонь работать коряс ПФР-нь инь цебярь территориальнай органть кочкаманкса конкурсти. Мордовиянь Отделениясь азф инь цебярькс Приволжскяй федеральнай округса и сувафтф ПФР-нь фкя инь цебярь отделениятнень лувксс Российскяй Федерацияса.
Сяда тов пачфтьфоль аф работай пенсионерхненди, конатнень пенсиясна регионца ладяф прожиточнай минимумда кржа, социальнай доплататнень максомаснон полафтоманц и пенсияснонды индексациянь тиемать колга. «Государственнай социальнай лезксть колга» и «Российскяй Федерацияса прожиточнай минимумть колга» федеральнай закоттненди сувафтф полафткснень мяльс сявозь прожиточнай минимумда кржа пенсияти индексациясь тяни тиеви тяфта. Васенда аф работай пенсионерть доходоц пачфтеви прожиточнай минимумть лувксс пенсияти социальнай доплатать вельде (кда сявомс Мордовиять, пенсиясь касфтови 8522 цалковайс) и аньцек тяда меле тиеви индексация пенсияти и эрь ковонь ярмаконь выплататненди (кда тяфтамот пандовихть пенсионерти). Тяфта, индексациять вельде сатф суммась кармай сяда оцю регионца ладяф прожиточнай минимумть коряс. Мордовияса пенсиятнень перерасчетсна тиеви майста ни. Республикаса прибавка получайхть 24 тёжянь пенсионерсь.
30.04.2019  № 17
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин