Поиск по сайту: 
 

Архив
 август 
 2020 
пн вт ср чт пт сб вс
     12
3456789
10111213141516
17181920212223
24252627282930
31      

 
 

 

Спорт

Азонттама странань инь содаф футболисттнень колга

Лев Яшин
Фкя ковда кржа ляткшни футболса Миронь чемпионатть ушедоманцты. Кода содаф, минь мокшэрзянь краеньконди максф оцю честь и доверия ётафтомс сонь ниле матчензон эсь столицасонза—Саранскяйса. «Мордовия Арена» од стадионць тячи ни анок примамс масторлангонь инь вии футбольнай командатнень. И ули кода надиямс, што, кода фалу, спортонь тя оцю праздникть ётафтсаськ пяк лац, мировой инь оцю уровеньца.
Интерессь Миронь чемпионатти пяк оцю. Кирдемок тянь мяльса, эсь газетаньконь страницанзон эса пачфттяма-азонттама инь содаф кой-кона       футболисттнень колга, конат путсть сембода оцю путкс отечественнай футболть виияфтоманцты, странаньконь спортивнай славанц кеподеманцты. А ушедсаськ тянь легендарнай вратарть     Л.И.Яшинонь эзда.
Вратарсь занци башка васта футболса. Сон командаса ащи инь важнай вастса, аф стак футболказонза тяштьф «1» цифрась. Кда вратарсь кальдяв, нльне цебярь командаське ули сяськф. Кда сон налхки пяк лац, командаське эреклакшни и может сяськомс сяда виитьке.
Лев Яшин ульсь мекольцетнень эзда. Вов, кепотьксонди, мезе азсь колганза футболонь корольсь, знаменитай бразилецсь Пеле:
«Мон макссян пяк оцю питне тя пяк оцю мастерть искусстванцты. Сонь лувондса минь пингонь фкя инь цебярь голкиперкс. Яшин сувась мировой футболть историяс аф аньцек кода пяк цебярь исполнитель, но и кода сиземань аф содай творец, кода ломань, кона сувафтсь лама одня стака вратарскяй искусствати».
Лев Яшин фалу налхксь «Динамо» московскяй командаса. Сон кемоньксть ульсь странань инь цебярь вратарькс. Яшин примась участия футболть коряс Миронь ниле чемпионатса. Сонь мархтонза СССР-нь сборнай футбольнай командась ульсь Олимпийскяй чемпионкс, сатнезе Европань Кубокть. Легендарнай вратареньке налхксь миронь сборнайса, ётазе пяле мирть.
Сембоц Лев Иванович Яшин примась участия 326 матчса. 1971 кизонь 27 майста сон ётафтозе пращамань матчть. Тя шиня «Динамось» налхксь миронь сборнайть каршес. Матчсь шумордавсь 2:2 счетса.
Международнай олимпийскяй комитетонь президентсь Х.А.Самаранч 1985 кизонь 27 июльста максозе Лев Яшинонди МОК-ть казненц—Олимпийскяй орденонь сиянь знакть. Корхтамок тя церемонияса,      МОК-нь президентсь азозе:
—Мзярда корхтамась моли советскяй спортть колга, то васендакиге мяльса кирдевихть тяфтама сонь представителенза, кода Лев Яшин, кона ульсь аф аньцек выдающай футболистокс, но и фалу ульсь примеркс спортсметтненди, и спортонь сембе кельгихненди. Минь фалу дивандазь ванондоме Лев Яшинонь лангс—миронь фкя инь цебярь вратарть, Европань 1983 кизонь инь цебярь вратарть лангс. И тячивок минь дивандазь ваттама Яшинонь лангс и кельгсаськ сонь.

24.05.2018 №20
 
 
 

 
НОВОСТИ

Ушедсь сёронь урядама пингсь

Эрь гектарста ули кочкаф 50 центнер сёра

 

Тяфтама ни велень эряфсь, фкя тевсь полафнесы омбоцеть. Нинге исяк республикань велень хозяйстватнень эса инь оцю мяль шарфневсь и водендафоль лама вий кормань анокламати,  тячи лама вастова кярьмодсть ни сёронь урядамати. Лихтезь паксятнень лангс эсь комбайнаснон и Рузаевскяй райононь «Агросоюз—Левженский» ООО-нь механизаторхне.

 

 

—Сёронь урядама пингти маладоме сембе ширде аноклафста,—азонды хозяйствань вятись, Мордовия Республикань велень хозяйствань Заслуженнай работниксь В.И.Сетин.—Комбайнатне пцтай сембе отт, мяльце касы мархтост работамс. Сёронь урядама пингть синь фалу паксясот, кой-кона участкатне ащихть кемоньшка вайгяльбень вастса и техникась мековасу аш месть панцемс. Марнек сёротне видефтольхть фкя тёжянь гектар лангса. Урожайсь пяк цебярь, эрь гектарста сяфтяма аф ведьгемоньда кржа центнер сёра. Кда кармай цебярь погодась, сембе  ня площаттнень  урядасаськ кафта-колма недяляста.

 

30.07.2020  № 29
 

МОРДОВИЯ РЕСПУБЛИКАНЬ ОЦЮНЯСЬ ВЛАДИМИР ВОЛКОВ ВАНОЗЕНЬ РЕСПУБЛИКАНЬ РАЙОТТНЕНЬ ЭСА СОЦИАЛЬНАЙ ОБЪЕКТТНЕНЬ СТРОЯМАСНОН КОРЯС РАБОТАТНЕНЬ МОЛЬФТЕМАСНОН

Краснослободскяй районца

 

 

24 июльста МР-нь Оцюнясь Владимир Волков ульсь Краснослободскяй районца, коса ванозе, кода мольфтевихть Бобылевские Выселки велеса «Комплексное развитие сельских территорий» программать коряс комплекснай компактнай строямать коряс проектть эряфс ётафтомац.

 

Проектть коряс арьсекшневи строямс спортивнай комплекс и  модань 132 участкаса эряма кутт. Бобылевские Выселки велесь ащи маласа Краснослободск ошти, сяс тя пцтай фкя агломерация.

 

Кода няезе Мордовиянь Оцюнясь, спортивнай сооружениять строямац мольфтеви сембе вийса и нльне графикта инголе. Республикаса тя фкя и сяка спортивнай объектсь, коса фкя вельхкс ала кармай ледовай арена, оцюфненди и иттненди бассейнат, тренажернай и фитнес-залхт. Лама функцияса спортивнай сооружениясь арай межрайоннайкс.

 

Кда сявомс проектть омбоце пяльксонц—комплекснай компактнай застройкать, тячиень шити площадкаса аделсеви газопроводонь и водопроводонь ётафтомась, тиф 1,4 вайгяльбень кувалмоса ки, лядыкс 1,7 вайгяльбесь—сай кизонь планца.

 

Владимир Волков путсь Краснослободскяй районть оцюнянц Алексей Буйновонь инголе задача—сяда виияфтомс аноклаф  территорияса куттнень строямаснон, тяконь лувксса льготнай велень ипотекать вельде.
 

 

 
30.07.2020  № 29
 
 
 
 
 
 
 

ВЛАДИМИР СУШКОВ ВЕШСЬ СЯДА ЭРЕКЛАФТОМС ТЕФНЕНЬ И КЕМОСТА ВАНОМС КАЧЕСТВАТЬ МЕЛЬГЕ

6 июльста Мордовиянь Правительствань члеттнень мархта совещанияса ванондовсть национальнай проекттнень эряфс ётафтомаснон коряс кизефксне. Республикань Правительствать Председателец Владимир Сушков отмечазе, што социальнай ширде важнай кой-кона объекттнень эса заняф аф сатомшка ломаньда и аф марнек нолявихть тевс графикнень ванфтозь работатнень пяшкотькшнеманкса строительнай механизматне.

 

 
Ётай ваймама шитнень региональнай кабминонь премьер-министрсь ванозень Идень республиканскяй клиническяй больницять хирургическяй корпусонц и Республиканскяй онкологическяй диспансерть поликлиническяй отделениянц, конат строявихть «Здравоохранение» нацпроектть рамкаса, строямаснон. Владимир Сушков мярьгсь работамс        объекттнень эса сутканьберьф и кемоста ваномс тиеви работатнень качестваснон мельге. Тяфта жа Правительствать Председателец мярьгсь анокламс уликс онкодиспансерть зданиянц петеманкса сембе документациять. Тядде нацпроектть рамкаса кармайхть одкстоптфт 70 фельдшерско-акушерскяй пункт и фкя врачебнай амбулатория.

 

09.07.2020
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин