Поиск по сайту: 
 

Архив
 февраль 
 2019 
пн вт ср чт пт сб вс
    123
45678910
11121314151617
18192021222324
25262728   

 
 

 

Юмор и сатира

КУФТОЛ АННАТЬ ИЛАЦ

Куцю Марять кизефне-сазь:
     —Бабай, мзяра кизодот?
—Афи содаса, идняй, кати кафксогемонь ветие, кати вейхксогемонь ветие.
—Лиякс азомс, сядоть малава.
—Сяда нинге аш. Снярс аф эрян. Сельмоне кальдявста няихть, пильгоне ушедсть сярядема.
—Кузьмацти мярьголеть, больницяв сяволензе.
—Мярьгондень, а сон куликска аф тии. Аш, кле, бабань пчкафты докторнят, аделавсть.
Корхтамати шоворсь Куцю Марять рьвяняц.
—Кодама больниця?! Бабати сяда колма киза. А прянц од стирькс марясы. Кальдявста няись шити  колмоксть етасы велеть. Сяряди пильгса кудстовок афолеть лисе. А сон бралги да бралги.
—А тон, рьвяня, мярьган, сельмодят лангозон?
—И сельмодян. Нильгемонь кизода одан корязот, пильгонень мельган усксесайне. Лацот велеса аф бралган. А тон…
—Моньге ни керовсть пацяне. Палканя вельде шашнян.
—Палканять сявондьсак пинень эвфнемс. Эряк шумбраняста, аньцек  тят пеняця, кяшт тят сафне.
Мезе Куцю Марясь. Куфтол Аннати тячи-ванды сяда топоди. Сяка кизефтемац:
—Арю, тейне кафксогемонь топоди или кафксогемонь ветие.
—Мзяра ули, сембе тоннет,—отвечай стирец.
—Азк ни, тяйть сёпа кизонень.
—Тядяй, тейне ни курок кафксогемонь. А тейть мзяра?
—Тейне 85 киза кармай.
—Катк лацот ули. Мес тя тяшкава пичефттянза?
—Аш мялезе эрь кургса пакарькс улемс. Ату эрят Унажень Колярять лаца сядоняс. Кинь аердамац, лятфтасы лемонц.
—Мезень кальдявоц. Эряк сяда ламоняс.
—Тяфтавок ни кафксогемонь ветие. А кода шта эряйхть сяда кизоннетне?
—Тяфта и эряйхть. Тонь лацот моцорфтыхть куярда, корштайхть лямда, пеняцяйхть шумбрашиснон лангс.
—Сяда кизоса моцорфтыхть куярда?..
—А мес аф? Тон вдь моцорфтат?
—Тейне вдь кизодовок кафксогемонь ветие.
—Аха… А тейне курок кафксогемонь. Лисенди вете кизоса шачфтомайть.
—Аф ефси ветеса. Сяльде,  мзяра ина тейне?
—Оду лувсаськ, тячи аш мзярда.
—Оду тк оду.
Куфтол Арю аф содасы месендемс. Машни эсь лангозонза. Раднянза анзяйхть и анзяйхть. Бабать оцю илац, гульба вешихть.
—Кодама ни ила, тядязе прянцка мархта аф ладяй. Шити комсь ветиексть мяленц полафтсы,—корхтай Арю.—Шобдава азы кафксогемонь, обедста кафксогемонь ветие киза.
—Аф кажнайти Шкайсь максы сядоти эрямс. Кизос коре Аннаканьке нинге отькорь. Эсь пильгонзон лангса якай, эсь кядьсонза прянц андсы. Илань тииське аф ськамотат. Конашка бабать родоц-плямац. Тняра радняц киньге аш.
И виде, киньге аш. Арю ушедсь бабать гульбанцты аноклама.
—Тядяй, курок шачема шице. Раднятне анайхть ила.
—А мзяра топоди, Арю, кафксогемонь или кафксогемонь ветие?
—Тянь колга ни, тядяй, корхтаме колмочесь, исяк, тячи. Сяда тейть кармай, сяда…
—Сяда нинге аш. Кда кафксогемонь ветие, эста гульбавок можна водендамс.
—Катк лацот ули, кафксогемонь ветие, а тейне афоль шоря кодгемонь ветенясь.
Куфтол Аннать раднянза анокласть цебярь шра, казнет. Водендасть гармониявок. Састь сембе, кинь ульсь самшкасна.
—Сядонять мархта, Аннакай!—мярьгсть раднянза.
—Кодама сядоня?! Сядоня нинге тейне аш.
—А мзяра ина? Кафксогемонь ветие.
—Ну кафксогемонь ветиеть мархта!
Сембе рахазевсть. Кеподезе стопканянц Анна бабавок.
—Начфтыть трватнень, Аннакай. Илаце вдь.
—А мес аф начфтомс. Вдь ярмак «кяжинять» инкса пантф.
—Хэ-хэ-хэ,—рахасть раднянза.—Видеце, Аннакай. Ярмакфтома тяни мезевок аф максыхть. Сяс и симомс, и ярхцамс эряви.
—И нинге морамс,—поладозе Анна баба.
—Эке, эке, Аннакай, лятфтайте одонь кизотнень. Гармония, морака!
Гармониясь ушедсь морама. Анна баба вайгяль нолдась.
Симонь,
симонь, иредень,
Ваймонязень
панчса.
Хуш и тяни
сиредень,
Аф сатован кранчса.
—Аньцек ни кизотнень аф мяляфтьсайть, а тяфтак нинге «ого-го-го»,—пшкядсь Арю.
—Ожу, Арю, тят шоря, ату сиде мороняне аф кочкавихть.
—Кочкасайть. Тейне лацот аф сафтови. Эряк шумбрашиняста, улеза морамшкаце.
—И моран.
Тевозень лац
вятьса,
И кштиян, и моран.
Тячи
кафксогемонь
ветие,
Вейхксогемонти
 эрямс еран.
—Аха, вейхксогемонти… Тон месть, Аннакай, тячи тейть сяда топодсь,—ушедсть ктордама раднянза.
—Арю, Арю, косат? Мес аф каштордат? Мярьготь тейне 85. Илавок водендаме.
—Киньге, тядяй, тят кулхцонда. Кафксогемонь ветие катк кафксогемонь ветие. А тинь тясть рахсе бабать. Симода-ярхцада, кштида-морада. Анаде ила, вов теенть ила.
—Лангозот ванозь, Аню акай, тейть сизьгемоньге аф максат. Арюда одста няеват,—мярьгсь Андю племянникоц.
—Арю моньдедон од,—отвечась сиренясь.—Сяда отькорь корязон. Сон и шары-тары, сембе кудонь тефнень вятьсыне. А мон кода наксада панга. Озафан конек лангс и аньцек машнефнян.
—Ожудова, муде мезень квалма тячи корхтамс,—кардазень Арю.—Эрька, тядяй, тага сиде мороня таргака, пяк ни маштат морама.
—Кода мярьгат, Арю. Мороня так мороня.
Поланязе цебярель,
Калацяда аннемань.
Кельгомань, ужяльдемань,
Кядькучкаса каннемань.
Куватьс мольсь Куфтол Аннать илац. Конаконза кштисть-морасть, симсть-ярхцасть. Весяласта сембось етась. Прважамстост бабась азозе:
—Тяни вейхксогемонь кизонь илас кочкатядязь.
—Хэ-хэ-хэ,—рахазевсть раднянза.—Вейхксогемонь кизоть илас так вейхксогемонь.
—Иланкса тевсь аф ляды,—мярьгсь Арювоц,—тихтяма. Аньцек эряк снярс.
—А мес аф эрян. Нинге кштиян и моран.
Илья Вешкин.

24.05.2018 №20
 
 
 

 
НОВОСТИ
 
 

ВАЛЕНТИН ВАСИЛЬЕВИЧ КОНАКОВ

2019 кизонь 27 январьста 80 кизонц лангса стакаста сярядемда меле тусь эряфста Валентин Васильевич Конаков—содаф государственнай и общественнай деятельсь, образованиянь и наукань пуроптысь, ученайсь.
Валентин Васильевич Конаков шачсь 1939 кизонь      9 июньцта Мордовскяй АССР-нь Атяшевскяй райононь Кулясово велеса крестьянонь семьяса.
Армияса служамда меле 1961 кизоня В.В.Конаков работась автомеханикокс Атяшевскяй «Сельхозтехникаса», а сяльде поступась Мордовскяй государственнай университету. Аделамок 1966 кизоня тонафнеманц, Валентин Васильевич кармась покодема образованиянь сфераса, 1966 кизоста сявомок 1979 кизоти молемс работась Мордовскяй государственнай университетса ассистентокс, старшай преподавателькс, металлонь технологиянь и машинань петемань кафедрань доцентокс, велень хозяйствань механизациянь факультетонь деканонь заместителькс. 1978 кизоня В.В.Конаков аделазе Московскяй лесотехническяй институтонь аспирантурать, теенза максфоль техническяй наукань кандидатонь лем.

31.01.2019  № 4
 

ДИПЛОПТ И ПРЕМИЯТ—АСУ ЛОМАТТНЕНДИ

Ётай недялять, 25 январьста, Российскяй студенчествань шиня Мокшэрзянь государственнай национальнай драматическяй театраса етась торжественнай пуромкс, конань пингста МР-нь Оцюнясь В.Д.Волков макссь казнет асу од ломаттненди. Мероприятияс пуромкшнесть аф фкя лацонь конкурсонь и олимпиадань сяськихне и призерхне, а стане жа  синь тонафтысна и тядясна-алясна.
Республикань Оцюнясь азозе, што асу од ломаттнень ширеснон кирдеманкса меля примафоль решения ладямс од премият школьниконь международнай и всероссийскяй олимпиадань сяськихненди и призерхненди.
«Международнай уровеньца сатфксонь сатоманкса премиять лувксоц 100 тежянь цалковайста сявомок 300 тежянь цалковайти молемс. Всероссийскяй олимпиадань мекольце этапонь сяськихне и призерхне получайхть 60 и 30 тежянень цалковай,—азозе Мордовиянь Оцюнясь.—Тядде лауреатокс арасть 43 школьниконьке. Тяда башка, казнет получайхть нинге 40 стирсь и церась, конат лац няфтезь пряснон  исследовательскяй тевса, социальнай и общественнай работаса, научно-техническяй творчествань и  профессиональнай мастерствань конкурснень эса».
31.01.2019  № 4
 

МОРДОВИЯНЬ ОЦЮНЯСЬ ВАНОНДОЗЕНЬ САРАНСКЯЙСА ОПТОВОЛОКОННАЙ ПРОИЗВОДСТВАТЬ ВИИЯФТОМАНЦ КОРЯС КИЗЕФКСНЕНЬ

Мордовиянь Оцюнясь Владимир Волков 22 январьста ётафтсь рабочай васедема «Оптиковолоконные системы» АО-ть генеральнай директоронц Андрей Николаевонь мархта. Ванондовсть предприятиять 2018 кизонь работань итогонза, а стане жа 2019 кизонди платтне. Ня кизефкснень ваномаса примась участия Правительствать Председателенц заместителец—промышленностень, наукань и од технологиянь министрсь Александр Седов.
Лятфтасаськ, оптическяй волокнань Саранскяй заводсь—фкясь и сякось странаса. Сон нолдафоль колма кизода инголе. Тя эсь лацонь производствать виияфтомань сембе этапонза етасть Россиянь промышленностень и торговлянь министрть  участиянц мархта. Владимир Волков аф весть васетькшнесь Денис Мантуровонь мархта, получсемок тя проектть, конанди вийс коре ладямс оптическяй волокнань производствать замкнутай цикланц марнек странать вешфксонзон мяльс сявозь, эряфс етафтоманц коряс республикать инициативанзонды ширень кирдема.
31.01.2019  № 4
 

МОКШЭРЗЯНЬ МАСТОРСЬ ТАГА ПУРОПТСЫНЕ ЭСЬ СТИРЕНЗОН И ЦЁРАНЗОН

Мордовскяй (мокшень и эрзянь) народть vii съездоц ётай тяддень
23-25 октябрьста республиканьконь столицаса
Мордовиянь Оцюнясь Владимир Волков 22 январьста Саранскяйса етафтсь мордовскяй (мокшень и эрзянь) народть VII съездонц, кона кармай тядде 23-25 октябрьста, етафтоманцты анокламать коряс совещания.
Совещанияса примасть участия Россиянь финно-угорскяй народонь Ассоциациять председателец Петр Тултаев, а тяфта жа мордовскяй народонь общественнай организациять Межрегиональнай представителенза, тяконь лувксса РФ-нь лия     субъекттнень эзда.
Владимир Волков мярьгсь, што мордовскяй народть съездоц работать важнай пяльксоц, кона мольфтеви властень оргаттнень и общественнай институттнень мархта традициятнень и межэтническяй ладямать ванфтоманц и ламолгофтоманц коряс—тя задачать путнесы странань Президентсь. Сай пингонь съездть инь главнай темац—«Мордовскяй (мокшень и эрзянь) народсь лама нациянь Россиять единай культурнай кодса».
31.01.2019  № 4
 
 

Мордовиянь Оцюнясь Владимир Волков Ётафтсь национальнай проекттнень эряфс етафтомаснон коряс рабочай совещания

17.01.2019  № 2
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин