Поиск по сайту: 
 

Архив
 апрель 
 2021 
пн вт ср чт пт сб вс
   1234
567891011
12131415161718
19202122232425
2627282930  

 
 

 

Демография

Мордовиясь арась теест омбоце кудкс

Кизоста кизос коль касонды Мордовияв эряма сайхнень лувкссна. Кепотьксонди, 2014 кизоня ширезонк сась 220 ломань, а 2016 кизоня республиканьконь эряма вастонди кочказь 4545 ломанць. Приволжскяй федеральнай округса тя фкя инь цебярь показательсь. Ламонцне сашендыхть ширезонк «Оказание содействия добровольному переселению в Республику Мордовия соотечественников, проживающих за рубежом» программать коряс. Коста аньцек аф сашендыхть Мордовияв эряма: Арменияста, Украинаста, Таджикистанцта, Узбекистанцта, Сирияста и лия вастста. Тяса синь мушендыхть мяльс коре работа, идьсна—тонафнема васта. Мордовиясь арси теест омбоце кудкс.
«Украинаста—Теньгушевав панчфонь касфнема»
Ниле кизода инголе республиказонк эряма сась Ирина Михайловна Костюк стиренц Настять мархта. Украинаса ушетф гражданскяй войнать сюнеда теест савсь кадомс Иловайск шачема ошснон. Ростовскяй областьса беженецненди распределительнай лагерьса семьяти азсть мяль етамс эряма Мордовияв.
—Ся пингть республикать колга мезевок ашеме сода,—азозе И.М.Костюк.—Но мзярда минь саме Саранскяи, ошсь эстокиге тусь мялезонк. Сон мазы и ару. А пингта меле занятостень службась мусь тейне работа Теньгушевскяй районца.
Ирина Михайловна покоди Теньгушевскяй тепличнай комплексса цветоводкс. Образованияс коре химиксь пара мяльса якай тяса касфтови розатнень мельге. Кепсесы мяленц и зарплатась, сон, кле, районца фкя инь оцюсь.
2016 кизоня Ирина Михайловна получась российскяй гражданства. Велень Советсь макссь Костюкнень семьяснонды эряма васта, а велеряйхне эстокиге ушедсть лезнема сафненди, кие мезьса маштсь: щамса, ярхцамбяльса, кудъетконь паршиса. Ирина Михайловна спасибай сембонди, кие лездсь теенза стямс пильге лангс од вастса.
Настясь Теньгушеваса тусь васенце классу. Тяни сон тонафни нилеце класса. А урокта меле стирьшабась якай мини-футболть коряс секцияс и Искусствань школав.
—Сембода пяк Мордовияса тушендыхть мялезонк ломаттне: пара ваймот, фалу анокт лездомс,—мярьгсь Ирина Михайловна.—Оцю мяленьке лядомс тязк эряма. «Устойчивое развитие сельских территорий» программать коряс тейнек максф субсидия Теньгушеваса эряма вастонь строяманкса. Оцю мяленьке эрямс эсь кудсонк.
Семеновкань казакне
…Мзярда-бди Темниковскяй райононь Семеновка веленясь содафоль странать келес. Колганза снимандакшнесть передачат и фильмат федеральнай каналхне. Лама кизода инголе тяза пуромсть Россиянь ламоц казакне, штоба эрямс марстонь ладяй общинаса. А пуроптозе общинать и арась теенза атаманкс Саратовста О.С.Максимов, кона етась Семеновкав эряма рьванц Ирина Владимировнань   мархта.
Профессияс коре инженерсь-технологсь Ирина Викторовна содафтсь сай пингонь мирденц мархта духовнай семинарияса тонафнемста. Потомственнай казаксь Олег Сергеевич Максимов фалу усковсь природати, воляшити, а сяс ошень квартирать од семьясь курокста полафтозе васенда Дивееваса, а меле—Семеновка веленяса аф оцю кудня лангс. Васенце пингть переселенецненди аф теждяль: велеса ашель аф газ, аф свет, а веденкса сашенкшневсь якамс лихтибряв, кона ащесь аф мала вастса. Кизонь етазь Семеновкав пуромкшнесь коль сяда лама казак странань ламоц уженятнень эзда. Эряфсь велеса лаказь лакась…
Максимофнень семьяса шачсть кота церат и фкя стирня. Оцюти 28 киза, инь емлати аф кунара топодсь кафкса кизот. А нинге полатне касфтыхть кафта приемнай итть. Школав шабатне якайхть шабрань Сире Ош вели. Максимофнень оцю хозяйствасна. Жувататнень мельге якайхть сембе марса. «Шабаньке емластокиге тонафтфт трудти, синь нльне пидема-панема маштыхть,—азозе лама идень тядясь.—Сембе ярхцамбяльхне минценнет, магазинцта пцтай мезевок аф рамсетяма. Эсь переса касфтфта башка вирьста кочксетяма имошт. Эздост тяса пефтома…»
Коса тонафнесь, тоса и кондястсь
Пакистанецсь Рашид Сардар сась Мордовияв кота кизода инголе. Тядянзон-алянзон мяльснон коряс, цёрась поступась тонафнема Н.П.Огарёвонь лемса МГУ-нь Медицинскяй институту. Тядде Рашид шумордазе ординатурать, тяни сон дипломированнай специалист. Пчкафтыень тевти цёрать мялец кярьмодемс Мордовияса. Теенза поступасть ни работань коряс тердемат республикань медицинскяй учреждениятнень эзда. Маластонь пингть пакистанецсь сувафтсыне тевс университетса получаф содамошинзон. Саранскяйса тонафни Рашид Сардаронь кельгома стирец, кона стане жа саф Пакистанцта. Малала Юсуфзай касфнесыне содамошинзон МГУ-нь экономическяй факультетса, аделазе нилеце курсть. Сай кизоть Рашид и Малала арьсекшнихть рьвяямс, лядомс эряма Саранскяйса и шачфтомс лама идня.
«Тяса муме сетьмоши»
Мордовиясь арась омбоце родинакс Украинань Луганскяй областьста Соболефнень семьяснонды. Александр Михайлович, Марина Ивановна и синь Кирилл и Артем цёрасна састь республиказонк 2014 кизоня. Полатне тячемс лятфнесазь, кодама пелькс теест савсь няемс Алчевск шачема ошсост. Ветемба семьяти сидеста сашендовсь кяшендемс бомбоубежищав. Алчевскяйса шавовсть Соболефнень лама содаф ломаньцна. Весть, сргоземок шобдава ляцендематнень эзда, примафоль решения ворьгодемс ошста. «Кадомс шачема уженяньконь ульсь аф тёждя,—виденцясь Марина Ивановна.—Тяса минь шачеме, касоськ сереньконь, тяса ётась одкс пингоньке. Пяк стакаль явомс Алчевскяйть мархта. Но мяльсь араламс иденьконь ульсь сяда вии».
Тяни Соболефне эряйхть П.Г.Смидовичень лемса заповедникть территорияса. Марина Ивановна работай экологическяй просвещениять коряс специалистокс, Александр Михайлович—пожарно-химическяй станциянь начальник. Семьяти эрямс максфоль шуфтонь оцю куд, коса синь ни кенерсть тиемс ремонт. Полатнень цёрасна курокста тонадсть од вастти. Артемсь сась Мордовияв ёмла шабакс, а тяни ни сон школьник. Соболефнень Кирилл цёраснон школать шумордамда меле мялец поступамс МГУ-нь архитектурно-строительнай факультету. А нинге сон пяк кельгсы спортть, ули оцю мялец ваномс Саранскяйса футболть коряс Миронь чемпионатть матчензон.
—Тяни минь эрятама бта ёфксса,—мярьгсь украинкась М.И.Соболева.—Мордовияса муме сетьмоши. Тяни аф пельхтяма вандыень шиньконь инкса.
О.ЕВДОКИМОВА.

31.05.2018 №21
 
 
 

 
НОВОСТИ
 

КИЗОНЬ КОФНЕНЬ ИТТНЕНЬ ВАЙМАМАСНОН И ШУМБРАШИСНОН ПЕТЕМАСНОН ЛАНГС ШАРФТОМА БАШКА МЯЛЬ

7 апрельста МР-нь Оцюнять аф лама пингс тевонзон тиендиснон Артём Здуновонь видеса совещанияса ванондовсть кизонь кофнень иттнень ваймамаснонды лемтьф кизефксне. Региононь руководительсь ётафтф работать мзярс лувондсы аф педа-пес лац-ряц тифокс. Тя важнай направлениясь веши сяда цебярьста аноклама, инь пяк сянь эса, мезсь токсесы досугонь ладямать и иттнень ваймама пингть аралафшиснон обеспечендамаснон.

 

 

 
Кода азозе МР-нь Правительствать Председателенц заместителенц тевонзон тиендисна Галина Лотванова, тядде планц коре кармай работама 337 лагерь, эздост 22-сь стационарнай (санаториятнень базаса), и шитемба улемань 315 лагерь образовательнай организациятнень и социальнай учреждениятнень базаса. Тяконь мархта Галина Лотванова отмечазе, што инголи работай 23 лагерсь тяни республикаса сёлкфт ташта, калада инфраструктураснон инкса, хуш синь ащихть Мордовиять инь мазы вастонзон эса.

 

15.04.2021  № 14
 

МОРДОВИЯНЬ УЧЁНАЙХНЕ ТИСТЬ НАУЧНАЙ ПОДВИГ!

15.04.2021  № 14
 
 
 

ЛОМАТТНЕНЬ ЭРЯФСНОН ЦЕБЯРЬГОФТОМАНКСА

31 мартста Мордовиянь Оцюнять аф лама пингс тевонзон тиендисна Артём Здунов ВКС-нь режимса примась участия МР-нь Промышленностень, наукань и од технологиянь министерствать расширеннай коллегиясонза. Совещанияса примасть участия Россиянь Промышленностень и торговлянь министерствать региональнай промышленнай политикань и проектнай управлениянь Департаментонц директороц Виталий Хоценко, региональнай отраслевой министерствань представительхне, республикань инь оцю производствань вятихне тисть итокт кизоньберьфонь работаснонды.

 

Артём Здунов шарфтсь мяль, што регионца трудса заняфнень нилецекс пялькссна покодихть промышленностьса, тя республикань экономикать флагманонзон эзда фкясь. Мордовиянь Оцюнять аф лама пингс тевонзон тиендисна азозень тематнень, конатнень коряс эряви мольфтемс корхтама коллегиять пингста. Васендакиге тя собственностень и предприятиятнень вятемаснон коряс кизефксне. Эряви содамс, кие ащи выгодань получайкс, кие отвечай трудовой коллектифнень инкса. Прябалакс арси собственностень праватнень кядьста кядьс ламоксть ётнемасна, мезсь шоряй предприятиятненди лац-ряц вииякшнемс.

 

08.04.2021  № 13
 

ЗАСЕДАНИЯСЬ ЛЕМТЬФОЛЬ КОРРУПЦИЯТЬ КАРШЕС ТЕВОНЬ МОЛЬФТЕМАТИ

МР-нь Оцюнять аф лама пингс тевонзон тиендисна Артём Здунов 30 мартста ётафтозе Мордовия Республикаса коррупциять каршес тевонь вятемать коряс Комиссиять заседаниянц. Заседанияса ванондозь 2020 кизоня коррупционнай преступлениятнень мархта сотф ситуациять. МР-ть эзга МВД-ть информациянц коряс, ётай кизоня сембе провоохранительнай оргаттне мусть коррупциять мархта сотф 205 преступления, инь оцю талекасна тиф государственнай властень сфераса и сотф разнай уровенень должностной лицатнень оцю вастса улемста закононь колсемать мархта. Приоритетнай направлениятнень эзда фкясь—национальнай       проекттнень эряфс ётафтомста правонарушениятнень инголдамасна, 2020 кизонь работань итокнень коряс, внутренняй тевонь оргаттнень мархта лихтьф 14 тяфтама преступления, корязост карьхцне лувондовсть 1 миллион цалковайть малава, синь мрдафтфт меки. МР-нь Оцюнять аф лама пингс тевонзон тиендисна азозе, што карьхцнень мрдафтомаснон коряс работась пяк важнай—средстватне улест мрдафтфт экономикати и нолдафт республикать виияфтоманцты.

 

08.04.2021  № 13
 

АРТЁМ ЗДУНОВ АЗСЬ СТРАНАНЬ ПРЕЗИДЕНТТИ РЕГИОТТНЕНЬ ФИНАНСОВАЙ СИСТЕМАСНОН ШУМБРАЛГОФТОМАСНОН КОРЯС ПРЕДЛОЖЕНИЯТ

Россиянь Президентсь Владимир Путин мярьгсь кафта недяляньберьф арьсемс тядде региоттнень дополнительнай финансовай ширень кирдемаснон коряс параметрат, штоба сявомс мяльс тя кизефксть Федеральнай Собранияти сай пингонь посланиясонза. Тянь колга азфоль Правительствань члеттнень мархта совещанияса, кона ётафтовсь 31 мартста.

 

«Федерациянь субъекттнень  финансовай положенияснон минь сембе пингть кирдьсаськ контроль ала,—мярьгсь Владимир Путин.—Мекольдень пингть эряфс ётафтовсь лама мера, штоба кирдемс региоттнень ширеснон и максомс теест эрявикс лезкс—васендакиге, конешна, сявоньдсайне мяльс решениятнень, конат примафтольхть пандемиять пингста». Странань Президентсь лятфтазе, што меля нолдафоль 280 миллиард цалковай прямой дотация и нинге 223 миллиард цалковай специальнай бюджетнай кредитт. «Российскяй экономикать пильге лангс стяфтоманцты тенденциятне нинге аньцек кемокснихть, минь тянь лац содасаськ. Аф сембе субъекттнень эса минь няйсаськ деловой активнайшить касоманц, сяс региоттнень доходнай базасна ламода аф стабильнай. Тянкса мялезе кулемс коллеганень, губернаторхнень эзда регионцнон финансовай состоянияснонды анализ, а стане жа предложеният сянь колга, кодама од решеният эрявихть, штоба аф аньцек обеспечендамс региональнай финанснень стабильнайшиснон, но и касфтомс экономическяй вииямать, вов мезсь ащи тейнек целькс—тиемс РФ-нь эрь субъектть кемоста виияфтоманкса основа».

 

08.04.2021  № 13
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин