Поиск по сайту: 
 

Архив
 январь 
 2019 
пн вт ср чт пт сб вс
 123456
78910111213
14151617181920
21222324252627
28293031   

 
 

 

Тема дня

ФУТБОЛСЬ КАНДЫ НАРОТТНЕНДИ МИР!

16 июньцта Мордовиять столицаса етась афкуксонь спортивнай праздник. Кода содаф, тя шиня «Мордовия Арена»  стадионца налхксть Даниянь и Перунь сборнайхне. Тя  матчсь, кона футболть коряс Миронь чемпионатть рамкаса арась васенце налхкомакс Саранскяйса, кандсь лама кенярдемада болельщикненди.
Футболонь кельгихне, конат састь Мордовиять столицас Перуста, Данияста и миронь лия странатнень эзда, конатнень сборнайсна кармайхть налхкома «Мордовия Аренаса», минь болельщиконьконь мархта ушедсть няфнема эсь кенярдемаснон нинге матчта инголе. 15 частста Саранскяйть кучкаса синь пуромсть «Welcome, Чемпионат 2018!» лем ала болельщиконь парадс. Синь еткозост тяфта жа сувасть Мордовиянь профессиональнай и народнай коллектифне, республикань национально-культурнай автономиятнень представительсна.
Болельщикнень колоннасна, етамок Саранск ошень центральнай ульцятнень эзга, аф ламос лотксесь Тысячелетиянь площадьса. Тяса синь мархтост васетькшнесть Мордовия Республикань Оцюнясь В.Д.Волков и республикань лия руководительхне.
Тяда меле болельщиконь парадсь Коммунистическяй и Волгоградскяй ульцятнень эзга тусь «Мордовия Арена» стадионть шири. Болельщикне кандозь сембе странатнень, конатнень сборнайсна налхкихть чемпионатса, флагснон, морасть и кштисть, шнамок футболть, кона канды  масторонь сембе нароттненди мир!
* * *
16 июньцта Саранскяйса етась 2018 кизонь футболть коряс Миронь чемпионатонь васенце матчсь. «Мордовия Арена» стадионца налхксть Перунь и Даниянь сборнайхне.
Командаснон ширеснон кирдема республиканьконь столицазонза сашендсь 15 тежяньда лама латиноамериканец. Налхкомада инголе омба масторонь инжихне пара мяльса содафнесть ошть мархта. Тысячелетиянь площадьса перуанецне ванозь республикань артисттнень выступленияснон. Мордовиянь Народнай артисткать Н.Марковать «Тундась сась» моронц коряс иностранецне кштисть виень аф ужяльдезь. Башка мяль Перунь инжихне шарфтсть мокшэрзянь щапнень лангс. Синь оцю мяльса тиендсть снимкат мокшаватнень и эрзяватнень мархта. Ашесть етне инжихне и сувенирнай продукция мархта киоскнень вакскавок. Ичкоздень странав рамсесть мархтост някат-мокшават, магниткат и кружкат, конатнень лангса няфтьфт Саранскяйть мазы вастонза.
Удалась содафтомс омба масторонь инжихненди и мокшэрзянь кухнять мархта. Варжазь «офтонь мадятнень», пачатнень. Кой-кит нльне сермадозь ня танцтинятнень рецептснон.
Тысячелетиянь площадьса перуанецне васьфтсть и тисть фотографият Мордовиянь Оцюнять В.Д.Волковонь мархта. Фкясь эздост, содамок, што теенза удалась васьфтемс республикань Оцюнять мархта, казсь Владимир Дмитриевиченди эсь странанц национальнай символиканц мархта футболка. В.Д.Волков казсь перуанецти кядьса каннемань частт.
 
В.НЕСТЕРОВ.
О.ЕВДОКИМОВА.

21.06.2018 №24
 
 
 

 
НОВОСТИ
 

Мордовиянь Оцюнясь Владимир Волков Ётафтсь национальнай проекттнень эряфс етафтомаснон коряс рабочай совещания

17.01.2019  № 2
 
 
 

Ули мезенкса кеняртькшнемс

Монь, кода од ломанень, пяк лад мялезон ся, кода кизоста кизос коль сяда и сяда мазыкс и арукс арси республиканьконь столицац—Саранскяйсь. Тяни ётат сонь ульцянзон, проспектонзон, парконзон, лия вастонзон эзга и седице пяшкоди кенярьдемада, гордостьта и ошть, и марнек Мордовиять инкса. Сембода лама полафткста, конешна, эвондась тяса футболть коряс Миронь чемпионатти анокламста. Ваносте, кодамот тяни ошень китне, вокзалхне! Мяльцень стане жа саласазь «Тавла» гостинично-жилой од комплекссь и Экопарксь. Марнек полафтсь, лиякс арась аэропортсь. Тяни тяста самолетса можна пачкодемс Москуву и Санкт-Петербургу. А мзяра строяф идень садта, школада, гипермаркетта, лама лия пяк эрявикс объектта. А кода аф лятфтамс уникальнай спортивнай объектть—«Мордовия Арена» стадионть. Сон сембоса отвечай тяниень пингонь инь оцю вешфксненди. Аф стак самай тяса меля налхксть миронь инь вии футбольнай командатне. Тя ли аф фантастика, тя ли аф честь сембонди тейнек. А ёфси аф кунара Саранскяйса ётафтфоль эйть лангса конькаса фигурнайста куркснемать коряс Россиянь чемпионатсь. И тяконь лаца спортонь оцю праздникт миньцонк ётафневихть аф шуроста.
Спортсь лихтезе столицаньконь пяк няевикс вастс, тиезе сонь содафокс аф аньцек Россияса, а марнек мирса-масторса. «Саранскяйсь—тя афкуксонь Европейскяй ош, тяса сембось тиф-ладяф оцю уровеньца»,—тяфта азондсазь эсь мяльснон-арьсемаснон столицаньконь колга тяза сашенды инжихне.
Мария Тарасова.
10.01.2019  № 1
 

10 январьста—Мордовиять шачема шиц

Панчфокс панчт, мокшэрзянь краеньке!
Тячи Мордовия Республиканьконь шачема шиц. Топодсь 89 киза, кода теенза максф государственность. 1930 кизонь 10 январьста ВЦИК-ть Президиумоц примась постановления Мордовскяй округть Мордовскяй автономнай областекс тиеманц колга. Тя шись и лувондови мокшэрзянь республикати шачема шикс. А ниле кизода меле тифоль Мордовскяй АССР-сь.
Тянь мархта путфоль цебярь ушеткс касоманди-виияманди. Ётаф пингста ламода кассь республикать экономическяй виец, кеподсь культурась, образованиясь, наукась. Ламоц земляконьке арасть гордостекс аф аньцек Мордовияса, но и сембе Россияса.
Сембода оцю сатфкст миньцонк сатфт мекольдень кизотнень. Мордовиясь путневи примеркс лиятненди, тяза сашендыхть опытонкса, тонафнема. И ули мезти тонафнемс. Республиканьке тячи—странать инь  вишкста вииякшни региононзон эзда фкясь.
10.01.2019  № 1
 

Мордовия Республикань культурань, национальнай политикань, туризмань и архивнай тевонь министрсь А.М.ЧУШКИН: «ЛАДЯМА СЕМЬЯСОНТ И САТФКСТ ТЕВСОНТ!»

28.12.2018
 

Н.П.Огарёвонь лемса Национальнай исследовательскяй Мордовскяй государственнай университетонь ректорсь С.М.ВДОВИН: «КАТК ЁТАФТОВИХТЬ ЭРЯФС СЕМБЕ ВАЛДА МЯЛЕНТЕ И ПЛАНОНТЕ!»

28.12.2018
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин