Поиск по сайту: 
 

Архив
 март 
 2024 
пн вт ср чт пт сб вс
    123
45678910
11121314151617
18192021222324
25262728293031

 
 

 

Ётасть XXV-це Малькинскяй лувоматне

А.С.Малькинонь лемоц лац содаф мокшэрзянь литератураса. Эрясь сон 53 киза, но кадсь эсь мельганза мзярдовок аф кулы поэмат, балладат, стихт. Лац содафт лувити поэтть-фронтовикть «Славань киге», «Мода», «Лямбе пильгокит», «Аф куломать колга» и лия поэманза. Сонь лемнесазь Кяшалонь цёфксокс, поэтокс-классикокс. А.С.Малькин СССР-нь Писателень союзонь член, Великай Отечественнай войнань ветеран, казьф Якстерь Тяштень орденца, боевой лама медальса.
2018 кизонь майть 26 шистонза Александр Степановиченди топодель 95 киза. 25 киза топодсь ся пингста, кода ушедсть етафневома Малькинскяй лувоматне. 70 киза етась ся пингста, кода лиссь «Стихт» васенце книгац. 50 киза тядде ульсь «Лямбе пильгокит» книганцты.
Кемонце июньцта Атерьса и Кяшалса етафтовсть XXV-це Малькинскяй лувоматне. Синь пуроптозь поэтть творчестванц кельгиензон Саранскяйста, Атерень районцта, странаньконь разнай уженянзон эзда. Эсост примасть участия Атюрьевскяй райононь оцюнясь И.С.Гусаров, Мордовия Республикань культурань, национальнай политикань, туризмань и архивнай тевонь министрть васенце заместителец А.И.Карьгин, Н.П.Огаревонь лемса Мордовскяй госуниверситетонь профессорсь, филологическяй факультетонь деканць, Мордовскяй (мокшень и эрзянь) народть Межрегиональнай общественнай организациянц председателец Ю.А.Мишанин и ламотне лиятне.
Оцю илась ушедсь Александр Степановичень калмонц ваксса. Велеряенза, творчестванц кельгиенза кандсть панчфт, венокт. Васенцекс корхтась поэтть землякоц А.И.Карьгин.
—Вов ни 25 киза сашенттама Атери, Кяшалу, штоба нинге весть лятфтамс А.С.Малькинонь лемонц, корхтамс сонь творчестванц, эряфонц квалма,—мярьгсь Александр Иванович.—Малькин—поэт-классик. Сонь творчестванцты кельгомась кизоста кизос касы. Ули кинди поладомс сонь тевонц. Райононь модать лангса крьвязькшнихть од тяштенят, конат гордостень марязь лемнесазь сонь учителькс.
Лямбоста, мялень салайста А.С.Малькинонь колга корхтась филологическяй наукань докторсь, Мордовскяй госуниверситетонь профессорсь Ю.А.Мишанин. Сон отмечазе, што Александр Степанович содаф аф аньцек мокшэрзянь масторса, но и лия вастова. Творчествац тонафневи школаса, вузса, училищаса. Сон ульсь и лядсь цебярь тонафтыкс од тяштихненди. Атюрьевскяй районть лангс ванозь тяни етафневихть Девинскяй, Пинясовскяй, Учватовскяй и лия лувомат. И тя пяк кеняртьфти.
Саранскяйста, Атерьста саф инжихнень кшиса-салса, Малькинонь стихонзон мархта васьфтезь Кяшалонь средняй общеобразовательнай школаса. Меле сембонь тердезь А.С. Малькинонь лемса историко-краеведческяй музеи. Тяса инжихнень васьфтезень музейть азороц П.М.Шабайкин. Лятфтафоль историясь. Райононь оцюнясь И.С.Гусаров азозе и няфтезе, кода тевс нолявсь тя или тона экспонатсь. Шназень музейса работайхнень, экспонатонь кочкайхнень. Афкукс, Кяшалонь модась козя талантливай ломаньца. Аньцек поэтта мзяра тяса шачф. Нят Фёдор Костяйкин, Иван Надёжкин, Иван Поршин, Марина Аникина, лиятне. И мзяра нинге ули од «тяштеняда».
Иван Семёновичень корхтаманц поладозь А.И.Карьгин, Ю.А.Мишанин, Мордовия Республикань Заслуженнай поэтсь Р.К.Орлова, «Якстерь тяштеня» журналть главнай редактороц В.И.Брындина, «Мокша» журналть публицистикань отделть редактороц М.В.Аникина.     Иттнень мархта Малькинскяй лувоматненди стихнень аноклазень мокшень кялень и мокшэрзянь литературань тонафтысь Н.Г.Панькина.
А меле сембе инжихне пуромсть районнай центрав. Тяса отмечавсь Атюрьевскяй районть Шачема шиц. Ашезь юкснев и Малькинонь лемоц. Кайгсть стихонза. Ламоксть лятфнезь корхтайхне сонь лемонц. Аноклафтольхть выставкат, национальнай ярхцамбяль мархта шрат. Цебярьста анокласть Атерь, Перевесье, Кяшал, Курташка, Мокшень Козловка, Оцяду и лия велень поселениятне. Райцентрань площадень сценать лангсот Атюрьевскяй райононь оцюнясь И.С.Гусаров и Мордовия Республикань Оцюнять Администрациянц руководителенц заместителец—Администрациянь государственнай службань управлениять начальникоц Д.М.Борисов. Пачфтьфоль-азонтфоль районть пара тевонзон колга, тиф, кле, мекольдень пингть пяк лама. Тянь эшксс кяшф аф фкя ломанень труд. Инь цебярьхне казьфтольхть оцю казнеса. Лац работаманкса Мордовия Республикань Оцюнясь азсь Благодарность Н.В.Степановонди, С.Ф.Мозгуновонди, П.Н.Равочкинати, А.А.Козяйкинонди, Н.М.Шибайкинати, лиятненди. Мордовия Республикань Государственнай Собраниянь Почетнай грамотаса казьфоль Торбеевань почтамтонь Атерень филиалть вятиец А.А.Ерёмкина. Ульсть казнет и республикань кой-кона министерстватнень эзда. Почетнай грамотаса казьфтольхть   М.Н.Алямкина, Т.В.Чумарова, С.Г.Горелова, Г.И.Равочкина, А.В.Сурайкина.
Саранскяйста саф инжихнень эзда оцю иласа корхтасть Мордовия Республикань культурань, национальнай политикань, туризмань и архивнай тевонь министрть васенце заместителец А.И.Карьгин, Мордовскяй (мокшень и эрзянь) народть Межрегиональнай общественнай организациянц председателец Ю.А.Мишанин, Мордовия Республикань Заслуженнай поэтсь Р.К.Орлова.
Сценать лангса кайгсть стихт, морот. Морась Теньгушевскяй Культурань кудонь ансамбльсь, Темниковскяй райононь Воиновонь лемса оркестрась, кона тядде отмечазе 100 кизонь юбилеенц. Морасть мокшень содаф артисткатне Нина Спиркина и Любовь Князькова. И пцтай кажнайсь эздост лятфнезе А.С.Малькинонь лемонц. Л.П.Князькова моразень А.С. Малькинонь стихонзон лангс тяштьф моротнень, а стане жа «Кяшал веленяй» мороть, конанди музыкать тяштезе Нина Кошелевась, валхнень Илья Вешкин. Куватьс кайгсть мокшень моротне Кяшал велень поселениянь палаткать ваксса. Тяса национальнай ярхцамбяльда башка ульсь тиф эсь лацонь музей. Трудонь ветеранць, кунардонь пингонь мокшень моронь морсись А.М.Балашова кштирдсь сюре, морась кунардонь пингонь мокшень морот. Лездсть теенза Валентина Поршина, Мария Алямкина, лиятне.
Аф сетьмоль Атерень «Ледовай аренаса», коса мольсть налхкомат райононь оцюнять И.С.Гусаровонь призонзон инкса.
Праздниконь шрать вакссовок лама корхтавсь А.С.Малькинонь мзярдовок аф кулы поэзиянц колга, сянь квалма, кода 25 кизода инголе ушедовсть Малькинскяй лувоматне. Тя цебярь койсь ванфтови тянемс.
 
Илья Вешкин,
«Мокшень правдать» эсь корреспондентоц.

 

 
НОВОСТИ
 

МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

09.06.2022  № 22
 

НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022  № 22
 

ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022  № 22
 
 

Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022  № 21
 

Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022  № 21
 

Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022  № 21
 
 

Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022