Поиск по сайту: 
 

Архив
 ноябрь 
 2018 
пн вт ср чт пт сб вс
   1234
567891011
12131415161718
19202122232425
2627282930  

 
 

 

Национальная тематика

ВЯРТЕЛЬМЕ

Азонттама мокшень велетнень эряфснон колга
Сире Шайгавонь районца Вяртельмось, кона Ирсеть ляйнять види ширдень трвасонза, республикасонк мокшень фкя инь сире велесь. Строямац ушетфоль сядот кизода инголе. Лемоц ащи топонимикань кафта пяльксста: «вяре» и «телим», мезсь шарьхкодема кода тялонда эрямс кондясти панда пряса ащи васта.
Мокшэрзянь крайть тонафниец М.И.Зевакин архивса кунардонь каготтнень ванондомста, сире ломаттнень азондомастост содазе, што велесь ушетфоль XIV-це векста, татаронь князть Бехинонь мокшень модать лангс самдонза инголе. Тяка мяльть кемокснесы и археологсь Л.Циркин, кона 1965 кизоня шувондсь Вяртельмонь калмотнень ёткса. Синць велеряйхне тя вастти мярьгихть Калма Кужа. Ащи сон кафта вайгяльбет лямбе ширеса велеть эзда. Инь кунардонь кулофне калмафтольхть тяза XIV-це векста. Шувондомста муфтольхть сюлгапт, кшнинь крганят, кукшетть, сяканят и лия паршихть. Улема, васенда велесь ульсь Калма Кужеть видеса или ряцок. Ломаттне ётасть эряма цють ширеняв коса-бди XVII-це векть кучкаста. Вяртельмонь васенце озксонь вятись Яков Хитровский 1869 кизоня Шкайти тястонь озондыхнень колга сёрматфсонза пачфнесь, што тяниень вастти велеряйхнень атянь атясна састь 210 кизода инголе, кирдсть соткст мокшень лия велень ломаттнень мархта. Кепотьксонди, лятфневи Сире Сендрусь, кона Сивинь ляйть види трваса и аф сяшкава маласа.
Л.Циркин «Трудовая правда» райгазетать 1965 кизонь 21 июнень номерсонза тяштсь, што Калма Кужеса ломаттне эрясть 500-шка киза. Шувондомста муф пакарьхнень коряс няевсь: кунардонь эряйхне серихтельхть, шяярьсна равжазатольхть. Ётксост ульсть и козят, и ашуфт, мезть колга корхтайхть калмоста муф предметтне.
Шарфни мяль нинге вов мезсь. Велеса поколенияста поколенияс азонкшневи сянь квалма, кода сядонголе Калма Кужа панду усксесть калмамс ловажат пяк ичкозде: мянь Ельникавть маласта Каньфкужеста, тяниень Кадошкинскяй райононь Адажста и лияста. Улема, мокшень народсь лувондозе тя пандть родонь-плямань иняру вастокс, коста тушендыхть юрсна ламоц лия велеряйхнень. Синь кемоста ванфнезь эсь койснон-обуцяснон и лувондозь эрявиксокс калмосемс кулофнень аньцек тяза.
Ётнесть кизотне, валом-валом полафнесь эряфсь, юксневсть кунардонь койхне-илатне, да и, кода содаф, мокшетне кстиндафтольхть, кармасть озондома Христости. Сяс лия лятфнемат Калма Кужеть колга аш. Но республикань Центральнай государственнай архивса улихть каготт, конатнень эса лятфневи, што вяртельмеряйхнень ламоль раднядост мокшень лия велева. XVII-це векть омбоце пялеста оцязоронь чиновникне оржаста ванцть вастста вастс ломаттнень ётнемаснон мельге. Сембе полафтксне сувафневсть тяфта лемневи «ревизиянь ёфксненди» (рузкс—«ревизские сказки»). Колмоце и нилеце ревизиятнень ёткса пингть (1763—1782 кизотнень) Вяртельмоста максфоль 34 рьвяня, а тяза сявфоль 43 Темяжста, Сире Теризморгаста, Сире Шайгавста, Лемдяйста, Кулдомста, Саргаста, Сире Сендруста и Колапаста. Улема, вяртельмеряйхнень мархта раднякс арамась лувондовсь цебярь тевкс эстонь мокшетнень ёткса. Мес тяфта? Пади, тянь вельде ванфневсть кунардонь койхне, родонь-плямань сотксне? Ня кизефксне куватьс нинге кармайхть таколфтомост учёнайхнень.
Тяка архивса ванфтови актонь каготтнень эса Вяртельмось лятфневи «1628 кизонкса Темникавонь мордватнень ярмаконь доходснон и кядьстост дацькянь сявомать колга сёрматфса». Тоса азф, што Вяртельмонь эряйть Армеевонь и ялганзон кядьста сявф 300 четверть (150 десятина.—А.Т.) соксеви модать инкса 10 алтытт и колма ярмакт.
Эряви азомс, ламоль полафткста тя велеть эряфса XVII-це векста. Эста сон сувафтфоль аньцек тиф Саранскяй уезду. Ашесть ёта ваксканза и Степан Разинонь крестьянскяй войнанц прябаланза. Арьсян, воляшинь кельги и сталмода аф пели велеряйневок кепсесть тюрема. Вдь эста сембе мокшетнень и эрзятнень эса люпштасть рузонь козятне, нельгондезь модаснон, вирьснон. Ламотненди тя арсесь аф кирдемшкакс, сяс нльне кадондозь шачема-касома велеснон и тушендсть лия вастс. Ворьготькшнесть кие ськамонза, кит семьянь келеса. Тяка векть песта шамсь и Вяртельмось, кадозь сонь сембе велеряйхне. «Мордовскяй АССР-ть историянц коряс документт и материалхт» книгать, кона нолдаф 1940 кизоня, омбоце томсонза лятфневи Макулькань и ялганзон Саранскяень приказной канцелярияв 1716 кизоня тяштьф сермаснон колга, коса эняльдихть, штоба ширеса улемда меле теест меки мярьгольхть эрямда шачема вастсост. Кле, кунардонь пинкнень синь атясна и алясна эрясть Саранскяень уездонь Вяртельме велеса вотчинань Борковскяй модаса. Комсь и сяда лама кизода инголе ломаттнень пульзяфтозь налокне, козятнень, приказчикнень наругамасна, сяс рьвянек и шабанек тусть велеста. Етасть лама васта, пря трясть лиянь ширеса покодезь. А переписнай книгатнень эса кодамовок уездса синь аф сёрматфт. А тяни синь, Макулька и ялганза, колмонест рьваснон и идьснон мархта мрдасть Саранскяень уезду, атянь-алянь мастору, састь меки тяза эряма. Сяда тов сёрмасост азф: мзярс тяса ашельхть, умаснон максозь князти Петр Алексеевич Голицинонди, конань ламоль модадонза и Арзамасонь, и Саранскяень уездса. Тя сёрмась лездсь мокшалятненди, умаснон мрдафтозь, синць лядсть государственнай крестьянинкс, ашесть ара урекс помещикненди Голицинонди, Барановонди и Габбенди, конат азорондасть тя аймакса.
XVIII-це векста тя велень ломаттне серматфтольхть Починкань поташень аноклай конторав. Валом, но кассь эряйхнень лувкссна. Кда 1725 кизоня аляда тяса ульсь 47, 1732 кизоня—52, то 1763—94 аля и 141 ава, 1782 кизоня—144 аля и 184 ава.
Тяка веконь 40-це кизотнень ушетфоль мокшетнень кстиндамасна, кона аделавсь 1749 кизоня. Но ламотне эздост стаки озонкшнесть эсь Шкайснонды, велень келеса ётафнесть Озим озкст, лятфнезь Пакся атять и авать, Юрхтавать, Юрхтатять, Калдаз авать и атять, лиятнень. Кода сёрмадсь озксвятись Хитровский, тяфта ульсь сяс, мес Вяртельмоса ашель церькав. Сон строяфоль аньцек 1854 кизоня, а тя пингс тястонь ломаттне озондома яксесть Шигонь и Сире Федоровка рузонь велень церькафненди.
Аш кода мярьгомс, што Хитровскяень видец. Мокшетне мзярдонга изь юксне эсь Шкайснон. Вяртельмонь нешкопереса Ильгянь шиста (1893 кизоня) эсь лацонь илань ётафтомать колга вов мезе сёрмадсь тя велень земскяй учительсь Владимир Савкин: «...20 июльста церькавса обедняда меле тунь Александронь (70 кизоса атя, нешкоперень азор.—А.Т.) пяли. Тяса анокласть озондомати. Сембе праздниконь щамсотольхть. Атясь пазяень акша понкссоль и карксаф панарсоль, пильгсонза кямотольхть. Бабась тяфта жа акша панарсоль, конань ожакинзонды сюреста серматфтольхть тумонь лопа лаца сёрмат, пряц сотфоль сёрматф акша руцяса. Панар мяштезонза пункстафоль кунардонь сюлгам. Ланга щась нинге акша шушпун.
...Нешкопереса васьфтемазь сонць азорсь. Атясь кандсь маласа касы пяшети акша маци, а сонць корхтась: «Оцязорава! Вов кандоме тейть эрек вайме. Катк касы пересонк нешкнень лувкссна тёжянти. Ванфтк нешкопереньконь салайхнень-колайхнень, кальдяв ломаттнень, сельмодихнень и колдуттнень эзда». Сяльде печкозе мацить. Часовнять каршес лихтсть шра, конань лангс азоравась путсь кши-сал, медь, ям, пуре, лия ярхцамбяльхть. Тяда меле азоравась мярьгсь сембонди: «Тяни эрьда озондода Шкабавазти!» Састь малазонза атясь, лядыксне. Ушедсь морафтомась, кона лоткафневсь, штоба варжалезь медть и пуреть оцюфне и ёмлатне, а сяльде стаки морафтсть: «Виреньконь оцязоравац! Ванфтыть мешеньконь зиянда. Атяньке, атяньконь атясна! Тя тинь кельгома нешкоперенте, тинць якаде мельганза. Эсь кядьсонт озафнесть ня шуфттнень. Шкабаваз! Ванфтк атяньконь казнеснон тейнек, иденьконди, уноконьконди, уноконь уноконьконди...» Морафтомать аделамда меле сембе озсесть шрать ваксс, ушедсть ярхцама и симома. Пуреда копорясть кафта кундама мархта кечеста, конань тиезе нинге нешкопереть ушедыец. Тя кядьготи сядошка киза. Симондсть эздонза аньцек инь оцю иласта. А тяса кайгозевсть кунардонь мокшень моротне. Мзярда стясть шрать ваксста, атясь сявсь кече пуре, кандозе и каязе эшиняв, кле, Вирятяти варжамс, и эняльдсь: «Сизьгемонь лотконь, сизьгемонь пандонь и шудерьксонь атясь, сембе вирсь и мезе ули вирьса! Сада пиравама нешкоперезон!» И ушедсь кайгиста морама. Башка кувакаста тарксезе И звукть. Бабась нешкопереса отвечсесь каршезонза сяда ляпоста. Вайгяльсна срадондсть ичкози шуфттнень ёткова. Эсьмяль арьсезеват: нят юватькшнихть вирень ваймопожфне. Тяда меле атясь кандсь кечеса эшиняста ведь, каязе пуреть ёткс и мярьгсь: «Вирятясь кучсь тейнек казненди ару ведь». И меки кайгозевсть моротне, сембе ярхцасть и симсть, кштисть и кеняртькшнесть мянь шоподемс».
Тя озксса-иласа, кода няйсаськ, шовордафт языческяй шкайхненди и Христости озондомань кунардонь койхне. В.Савкинонь тя азондомац марнек печатлафоль 1904 кизоня Казаньца Археологиянь, историянь и этнографиянь обществать известиянзон 29-це томсост.
Вяртельмонь мокшетнень койснон, кудъёткса прянь вятемаснон колга сёрматфсонза озксвятись Хитровский афсатыксокс лувондозе сянь, мес тястонь аватне пяк ашесть шарфне мяль идьснон тонафтомаснонды, тевс вожавамаснонды. Рузаватне, кле, шобдава ярхцама озамда инголе кошарясазь шабаснон озондома и озксвалонь азондома, а тяса тяфта аф тиендихть. Велеса 14 и сяда кржа кизоса иттненди алясна-тядясна, мзярда аш тефт, мярьгондихть налхксемда ульцяса мзярс мяльсна. Озксвятись сялдозень и мезень-мезень рамамста-мишендемста, лия туфталонкса велеряйхнень ёткса винада симондематнень, сялондоматнень, семьятнень сраткшнемаснон.
XIX-це векть омбоце пялестонза велеть эряфса оцю полафтксне сотфтольхть аф аньцек 1878 кизоня тяса од церькавонь строямать, а и Россияса государственнай крестьяттнень колга реформать мархта, мезсь лездсь касфтомс ломаттнень лувксснон, синь культураснон. 1896 кизоня ни велеса ульсь 319 куд, эрясь 2111 ломань, 1913 кизоти кудта лувондовсь 384, эряйда—2617. Ётай векть песта иттне тонафнесть земскяй школаса (церькавть видеса училищась панчфоль нинге 1871 кизоня). Перьфпяльдень велетнень эзда ломаттне эрь шавшиня сашендсть тястонь базару. Тяда башка, Тройцяста и 1 октябрьста улендсть ярмонкат. Мезе аньцек эсост ашезь мишенькшнев. Купецне товарснон пачфнезь мянь Нижняй Новгородста, Пензаста и лия вастста. Ульсть тяса кемонь меленцят, ваень кафта пихтема вастт, ямксонь колма пянгодемат, лавка, колма кузенцят, ширеста сафненди эрямс ниле кутт и стак тов. Оцюволь велесь и козяль.
Ужяль, но Россиять эряфса сяда мельдень войнатне, революциятне, лац-ряц апак арьсек етафневи реформатне машфтозь Вяртельмоть вийда. Тяни сонь пара пингонц колга лятфнихть аньцек эряфкшу ломаттне.
 
Алексей ТУВИН,
историческяй наукань кандидат.
 

21.06.2018 №24
 
 
 

 
НОВОСТИ
 

УШЕДСЬ «Шумбрат, Мордовия!»—«Vivat, Чемпионат!» ФЕСТИВАЛЬСЬ

25.10.2018  № 42
 
 
 

Панчфт и казнет—республикань учительхненди

Торжественнай мероприятияс, кона лемтьфоль Международнай учителень шити, И.М.Яушевонь лемса музыкальнай театрав пуромкшнесть учительхне марнек республикаста. Профессиональнай праздник мархта синь поздравляндазень Мордовиянь Оцюнясь Владимир Волков.
—Учительсь—тя аф аньцек профессия, тя ваймонь венемома, аф тёждя, ответственнай и оцюдонга оцю труд,—мярьгсь Владимир Дмитриевич.—Афкуксонь учительсь максси иттненди сяда лама азф школьнай программать коряс. Сон лезды ученикти шарьхкодемс эсь прянц, няфтемс ломанень цебярь ширензон, мумс эсь кинц эряфса.
Республикань Оцюнясь азсь кафта важнай цельхть, конат ащихть отечественнай образованиянь системать инголе. Васенцесь—сувамс мирса инь цебярь кемоттнень лувксс. Омбоцесь—тиемс воспитаниянь система. Тянди водендаф «Образование» од национальнай проектсь.
11.10.2018  № 40
 
 
 

Республикань предприятиятнень продукциясна пачфневи миронь 80 странас

Пяденцяста, 28 сентябрьста, Мордовия Республикань Оцюнясь В.Д.Волков примась участия торжественнай пуромксса, кона лемтьфоль Машиностроителень шити. Мероприятиясь етась Рузонь Государственнай драматическяй театраса. Залу пуромкшнесть республиканскяй предприятиянь представительхне, отраслянь ветераттне.
Пуромфнень поздравляндамста В.Д.Волков лемдезе машиностроениять республикань экономикать  седикс и моторкс, вдь сонь эздонза ламода ащи лия сфератнень работасна.
Азфоль, што тяддень кафкса ковста промышленнай производствань индекссь арась 111 процент. Странаса тя фкя инь цебярь показательсь. 2018 кизоня республикаса нолдаф 119 миллиард цалковаень питнеса промышленнай продукция, мезсь 13 процентта сяда лама мелянь кизоть коряс. Республиканскяй кемготува предприятиятнень эса эряфс етафневихть производствать  келептеманц и одкстопнеманц коряс проектт. Касонды инновационнай продукциять лувксоц. Производствань марстонь объемть эса сонь талекац—29 процент. А тяфтама отраслятнень эса, кода электроннай и оптическяй изделиянь производствась, тя показательсь пачкодсь 77 процентс.
04.10.2018  № 39
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин