Поиск по сайту: 
 

Архив
 ноябрь 
 2018 
пн вт ср чт пт сб вс
   1234
567891011
12131415161718
19202122232425
2627282930  

 
 

 

Юмор и сатира

БАБНИК

Эрь ломанть сонцень промозоц. Фкясь кельгсы мораманц, омбоцесь кштиманц. Филькань Микита—саламанц, а Ягоронь Васька—лия авань кельгоманц.
Угадяй Филькань Микита пялот—сяконь ватт, мезевок вяшфти. Кода афолить корода паршицень, кода афолеть вана мельганза, аф зепозонза, пиле варязонза мезевок путы, но салай. Лияста аш мезе саламс, фатясы прястонза картузонц и яфодьсы перяфксть вельфке киньге перес. А сяльде пеккедь лангса етай перяфть алга эсь картузонц инкса. Теенза-арам, салай. Тяфтома ни сон аф эряви. Аф весть пялес куломс пикссезь, ниле ирдезонзон синдезь, пичемарензон томбазь, а сон сембе сяка промозонц ашезе када.
Ягоронь Васькань лия урмац. Кодама компанияс тяза пова, сельмонзон ушеды налхкфтома... лиянь аватнень лангс. Кона сяда туй мялезонза или ся авась, кона стане жа гзняфтсыне сельмонзон чужой алятнень лангс, Васькань эзда аф мяни. Авать мирденц, ямбарть, и тяфта, и стане ушеды каванямонза, аньцек тона сяда куроконе праль. Кода и вор Микитанди, Васькандивок ламоксть повондсь авать мирденц, раднянзон, брадонзон-дуганонзон эзда. Перьф велетнень эса тяса Бабникокс лемнезь. Кода афкуксонь лемоц, ламотне афи сотцезь. Вона, кле, тоса Бабниксь эряй.
Мака панчфокс мазы Марю, Бабникть рьвац. Аф явфтови эздонза сельмованфце, мзярда етай ульцява или праздникста шовори мазыста наряжаф ялганзон ёткс. Лиятне ваныхть, а мирдец афи варжаксты ширезонза.
Тундань видемать аделамда меле колхозса тисть праздник. Инжихть састь районцта, тясоль и тостонь агитбригадась. Шратнень ваксс озсемста Васька угадясь, конешна, инжихнень еткс. Марю—каршезонза. Ушеса ни шопотькшнесь, велеряйхне и инжихне стаки кштишендсть-морсесть. Бабниксь и тяфта, и стане шаронды фкя инжить перьфке. Тонавок аф аерфнесы. Мекпяли Бабниксь тошкай пилезонза: «Аде, листяма ульцяв, мялезе мольсь тяса ащемда».
Авась, няйф, отькорнятнень эздоль. Мзярда шра ваксса цють сетьмось, кайгиста пшкядсь: «Марю, лихтьк мирдцень, ушу молемац сась, а ськамонза лисеманц пели!» Сембе, кит ульсть сяда маласа, кулезь тянь, кайгиста рахазевсть.
Курокста и салава, и лангова кармасть paxсема лангсонза. Марнек велесь. И сиретне, и оттне. Тяда меле Васька кода-бди мяндевсь, осалгодсь. Мзяра пингс промозонцка кадозе.
Колай катось шавомозонза ляды колайкс, кода сонь тяк пикса. Тяфта лиссь прянь шнафты Васькань мархтовок. Виденц азомс, сон удалась и ронгс, и пондс коре. Тя мазышись и тиезе прянь няикс. Нинге одста аф сон ласькондсь стирьхнень мельге, а тонат синць арсесть кинц лангс, вальмалост кумбарафнень-палакснень тапсезь. Ягороря баба аф весть коцькаргаса кой-конатнень ласькфнезень.
Васька арьсесь, што тяфта векозонза кармай улема. Ефси абондсь, мзярда повсь авань компанияс ошса. Фкясь мазыдонга мазы, омбоцесь сядонга мазы. Копордафт, весялат. Сяка тев фкя мазы аванясь  озай элезонза, омбоцесь.
Сембода пяк тусь мялезонза кудазоравась. Мзярс ащесь еньцонза, авати ашезь эцекшне. Кода ина, тязк мирдец, оцю церасна. Эцек, ирдеснень лувсазь. Сяда копордась, сяда смелайгодсь.
Мекпяли тись пря ежефтома ирецтокс, матозь лия комнатас. Азоравась сей етай, Васька мельганза ваны, тов етай—тяряфни фатямс эзонза.
Тянь мархта матодовсь. А сргозсь, инжихне кармасть срадома. Кудазорсь церанц мархта тусть прважамост. Ашесть кенере шаромс вальмалу, Бабниксь прафтсь кудазоравати, ушедсь лангстонза платьянзон-мезензон сязендема. Авась аф азовомшка эводсь, пешкодсь шапама вайгяльса. Тянь марязе церац, азозе алянцты и курокста мрдасть куду.
Ашезь фатя, кода азорхне сувасть, стаки муцясь авать эса. Дуборфти сувасть шабратне. Алятне фатязь Бабникть пильгта-кядьта, нюряфтозь-тиезь и врнофтозь балконцта.
Пара, тевсь ульсь омбоце этажса и реськафтсь Васька панчфонь клумбатнень лангс. Потмонц томбазе, вете ирдезонза синдевсть, но лядсь живста.
Лядомс лядсь, но аватнень мельге панцема ни оду ашезь карма. Нильгемоньге ашезь топоде теенза, тиевсь атякс. Сяда лама чахнандась, ашезь стяшендов васта лангста.
Лядсь аньцек прозвищац. Лядсь аньцек рахсема, апрякама вастокс.
А.ТЕРЕНТЬЕВ.

21.06.2018 №24
 
 
 

 
НОВОСТИ
 

УШЕДСЬ «Шумбрат, Мордовия!»—«Vivat, Чемпионат!» ФЕСТИВАЛЬСЬ

25.10.2018  № 42
 
 
 

Панчфт и казнет—республикань учительхненди

Торжественнай мероприятияс, кона лемтьфоль Международнай учителень шити, И.М.Яушевонь лемса музыкальнай театрав пуромкшнесть учительхне марнек республикаста. Профессиональнай праздник мархта синь поздравляндазень Мордовиянь Оцюнясь Владимир Волков.
—Учительсь—тя аф аньцек профессия, тя ваймонь венемома, аф тёждя, ответственнай и оцюдонга оцю труд,—мярьгсь Владимир Дмитриевич.—Афкуксонь учительсь максси иттненди сяда лама азф школьнай программать коряс. Сон лезды ученикти шарьхкодемс эсь прянц, няфтемс ломанень цебярь ширензон, мумс эсь кинц эряфса.
Республикань Оцюнясь азсь кафта важнай цельхть, конат ащихть отечественнай образованиянь системать инголе. Васенцесь—сувамс мирса инь цебярь кемоттнень лувксс. Омбоцесь—тиемс воспитаниянь система. Тянди водендаф «Образование» од национальнай проектсь.
11.10.2018  № 40
 
 
 

Республикань предприятиятнень продукциясна пачфневи миронь 80 странас

Пяденцяста, 28 сентябрьста, Мордовия Республикань Оцюнясь В.Д.Волков примась участия торжественнай пуромксса, кона лемтьфоль Машиностроителень шити. Мероприятиясь етась Рузонь Государственнай драматическяй театраса. Залу пуромкшнесть республиканскяй предприятиянь представительхне, отраслянь ветераттне.
Пуромфнень поздравляндамста В.Д.Волков лемдезе машиностроениять республикань экономикать  седикс и моторкс, вдь сонь эздонза ламода ащи лия сфератнень работасна.
Азфоль, што тяддень кафкса ковста промышленнай производствань индекссь арась 111 процент. Странаса тя фкя инь цебярь показательсь. 2018 кизоня республикаса нолдаф 119 миллиард цалковаень питнеса промышленнай продукция, мезсь 13 процентта сяда лама мелянь кизоть коряс. Республиканскяй кемготува предприятиятнень эса эряфс етафневихть производствать  келептеманц и одкстопнеманц коряс проектт. Касонды инновационнай продукциять лувксоц. Производствань марстонь объемть эса сонь талекац—29 процент. А тяфтама отраслятнень эса, кода электроннай и оптическяй изделиянь производствась, тя показательсь пачкодсь 77 процентс.
04.10.2018  № 39
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин