Поиск по сайту: 
 

Архив
 февраль 
 2019 
пн вт ср чт пт сб вс
    123
45678910
11121314151617
18192021222324
25262728   

 
 

 

Тема дня

ЯЛГАКСШИНЬ ХОРОВОДСЬ МАРС ПУРОПТОЗЕНЬ МОКШЭРЗЯНЬ КРАЕНЬ ЭРЯЙХНЕНЬ И ИНЖИХНЕНЬ

28 июньцта, шуваланяста, Саранскяйса етась 2018 кизонь футболть коряс Миронь чемпионатонь мекольце матчсь. «Мордовия Арена» стадионца налхксть Панамань и Тунисонь сборнайхне. А тяда инголе ошса ульсь марстоньшинь и ялгаксшинь оцю ила, кона пуроптозень марс республикань, лия региононь и омба масторонь ломаттнень.
Обедта меле Тысячелетиянь площадьса етафтфоль «Танцти Мордовия» лем ала гастрономическяй фестиваль. Площадсь мзярошка пингс арась ярхцамбялень кужекс. Республикань сембе райоттне няфтезь пидемаса-панемаса маштомошиснон. Тяса ульсь кода варжамс мокшень пачатнень, «кургонятнень», офтонь мадятнень, цюгунняста капстань лямть, пянакудса пидеф алхнень и ламоц лия национальнай ярхцамбяльхнень. Омба масторонь инжихнень мяльс тусь мокшень позась.
Тысячелетиянь площадьса ульсь аф аньцек танцти, но и пяк весяла. Гармониять корява мокшаватнень мархта ряцок кштисть Панамань и Тунисонь болельщикне. А Мордовиянь эряйхне пара мяльса кштисть и морасть омба масторонь национальнай инструменттнень коряс. Разнай странань ломаттне лямбоста и паронь арьсезь приветствондасть фкя-фкянь.
Ялгаксшинь иласа примась участия Мордовиянь Оцюнясь В.Д.Волков. Владимир Дмитриевич корхнесь фестивалень инжихнень мархта. Сембе синь азонкшнесть лама шнама валда Саранскяйть лемс и сянди, кода ошсь аноклась футболть коряс Миронь чемпионатти. Лия региононь и омба масторонь болельщикне фкя мяльса отмечазь, што Мордовияса маштыхть инжиень примама.
—Саранскяйсь кадсь седисонк аньцек пара мяльхть-арьсемат,—мярьгсть В.Д.Волковонди Санкт-Петербургонь инжихне.—Ашеме арьсекшне, што Мордовиять столицац тяфтама ару, мазы ош, афкуксонь европейскяй столица!
Тяда меле республикань эряйхне и инжихне шоворсть Ялгаксшинь хороводс—эсь лацонь акцияс, кона водендаф нароттнень еткса ялгаксшить, фкя-фкянь шарьхкодемать няфтеманкса. Кяденьбецек ащесть русне и татархне, мокшэрзятне и украинецне, китаецне и австриецне, панамецне и тунисецне… Российскяй и омба масторонь болельщикне фкя оцю семьяса етасть Саранскяень ульцятнень эзга Тысячелетиянь площадьста сявомок «Мордовия Арена» стадионти молемс.
Азсаськ, што Панама-Тунис налхкомась шумордавсь 1:2 счетса. Тянь мархта футболть коряс Миронь чемпионатсь Саранскяйса аделавсь. Но лятфнематне колганза нинге ламос кармайхть эряма республикань эряйхнень мялямса.
О.КОЛЕДИНОВА.

05.07.2018 №26
 
 
 

 
НОВОСТИ
 
 

ВАЛЕНТИН ВАСИЛЬЕВИЧ КОНАКОВ

2019 кизонь 27 январьста 80 кизонц лангса стакаста сярядемда меле тусь эряфста Валентин Васильевич Конаков—содаф государственнай и общественнай деятельсь, образованиянь и наукань пуроптысь, ученайсь.
Валентин Васильевич Конаков шачсь 1939 кизонь      9 июньцта Мордовскяй АССР-нь Атяшевскяй райононь Кулясово велеса крестьянонь семьяса.
Армияса служамда меле 1961 кизоня В.В.Конаков работась автомеханикокс Атяшевскяй «Сельхозтехникаса», а сяльде поступась Мордовскяй государственнай университету. Аделамок 1966 кизоня тонафнеманц, Валентин Васильевич кармась покодема образованиянь сфераса, 1966 кизоста сявомок 1979 кизоти молемс работась Мордовскяй государственнай университетса ассистентокс, старшай преподавателькс, металлонь технологиянь и машинань петемань кафедрань доцентокс, велень хозяйствань механизациянь факультетонь деканонь заместителькс. 1978 кизоня В.В.Конаков аделазе Московскяй лесотехническяй институтонь аспирантурать, теенза максфоль техническяй наукань кандидатонь лем.

31.01.2019  № 4
 

ДИПЛОПТ И ПРЕМИЯТ—АСУ ЛОМАТТНЕНДИ

Ётай недялять, 25 январьста, Российскяй студенчествань шиня Мокшэрзянь государственнай национальнай драматическяй театраса етась торжественнай пуромкс, конань пингста МР-нь Оцюнясь В.Д.Волков макссь казнет асу од ломаттненди. Мероприятияс пуромкшнесть аф фкя лацонь конкурсонь и олимпиадань сяськихне и призерхне, а стане жа  синь тонафтысна и тядясна-алясна.
Республикань Оцюнясь азозе, што асу од ломаттнень ширеснон кирдеманкса меля примафоль решения ладямс од премият школьниконь международнай и всероссийскяй олимпиадань сяськихненди и призерхненди.
«Международнай уровеньца сатфксонь сатоманкса премиять лувксоц 100 тежянь цалковайста сявомок 300 тежянь цалковайти молемс. Всероссийскяй олимпиадань мекольце этапонь сяськихне и призерхне получайхть 60 и 30 тежянень цалковай,—азозе Мордовиянь Оцюнясь.—Тядде лауреатокс арасть 43 школьниконьке. Тяда башка, казнет получайхть нинге 40 стирсь и церась, конат лац няфтезь пряснон  исследовательскяй тевса, социальнай и общественнай работаса, научно-техническяй творчествань и  профессиональнай мастерствань конкурснень эса».
31.01.2019  № 4
 

МОРДОВИЯНЬ ОЦЮНЯСЬ ВАНОНДОЗЕНЬ САРАНСКЯЙСА ОПТОВОЛОКОННАЙ ПРОИЗВОДСТВАТЬ ВИИЯФТОМАНЦ КОРЯС КИЗЕФКСНЕНЬ

Мордовиянь Оцюнясь Владимир Волков 22 январьста ётафтсь рабочай васедема «Оптиковолоконные системы» АО-ть генеральнай директоронц Андрей Николаевонь мархта. Ванондовсть предприятиять 2018 кизонь работань итогонза, а стане жа 2019 кизонди платтне. Ня кизефкснень ваномаса примась участия Правительствать Председателенц заместителец—промышленностень, наукань и од технологиянь министрсь Александр Седов.
Лятфтасаськ, оптическяй волокнань Саранскяй заводсь—фкясь и сякось странаса. Сон нолдафоль колма кизода инголе. Тя эсь лацонь производствать виияфтомань сембе этапонза етасть Россиянь промышленностень и торговлянь министрть  участиянц мархта. Владимир Волков аф весть васетькшнесь Денис Мантуровонь мархта, получсемок тя проектть, конанди вийс коре ладямс оптическяй волокнань производствать замкнутай цикланц марнек странать вешфксонзон мяльс сявозь, эряфс етафтоманц коряс республикать инициативанзонды ширень кирдема.
31.01.2019  № 4
 

МОКШЭРЗЯНЬ МАСТОРСЬ ТАГА ПУРОПТСЫНЕ ЭСЬ СТИРЕНЗОН И ЦЁРАНЗОН

Мордовскяй (мокшень и эрзянь) народть vii съездоц ётай тяддень
23-25 октябрьста республиканьконь столицаса
Мордовиянь Оцюнясь Владимир Волков 22 январьста Саранскяйса етафтсь мордовскяй (мокшень и эрзянь) народть VII съездонц, кона кармай тядде 23-25 октябрьста, етафтоманцты анокламать коряс совещания.
Совещанияса примасть участия Россиянь финно-угорскяй народонь Ассоциациять председателец Петр Тултаев, а тяфта жа мордовскяй народонь общественнай организациять Межрегиональнай представителенза, тяконь лувксса РФ-нь лия     субъекттнень эзда.
Владимир Волков мярьгсь, што мордовскяй народть съездоц работать важнай пяльксоц, кона мольфтеви властень оргаттнень и общественнай институттнень мархта традициятнень и межэтническяй ладямать ванфтоманц и ламолгофтоманц коряс—тя задачать путнесы странань Президентсь. Сай пингонь съездть инь главнай темац—«Мордовскяй (мокшень и эрзянь) народсь лама нациянь Россиять единай культурнай кодса».
31.01.2019  № 4
 
 

Мордовиянь Оцюнясь Владимир Волков Ётафтсь национальнай проекттнень эряфс етафтомаснон коряс рабочай совещания

17.01.2019  № 2
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин