Поиск по сайту: 
 

Архив
 январь 
 2019 
пн вт ср чт пт сб вс
 123456
78910111213
14151617181920
21222324252627
28293031   

 
 

 

Тема дня

Спортонь оцю праздниксь тиезень сембонь ялгакс

25 июньцта Саранскяйса «Мордовия Арена» стадионца етась Португалиянь и Иранонь сборнайхнень еткса матчсь. Налхкомать ванома республиканьконь столицас сашендсь омба масторонь лама инжи. Пуромкшнесть футболонь кельгихне Португалияста, Иранцта, Индияста,       США-ста, Швецияста, Китайста, Японияста, Германияста, Австрияста, Колумбияста, Бразилияста, Аргентинаста и ламоц лия странатнень эзда.
Сембода ламоль сайда Иранцта. Иранскяй болельщикне ушедсть пуромкшнема Саранскяи нинге матчта ингольдень шиня и пара мяльса содафнесть ошть мархта, конань колга тяда инголе афи кулендсть. Аф кржась етксост сафтольхть семьянек. Кепотьксонди, иранецне Лалех и Хаджа састь сборнайснон ширенц кирдема колма кизоняса Араш церокшснон мархта. Васенда инжихне ульсть «Мордовское подворье» музейно-этнографическяй комплексса, коса тифнесть лятфнембяленди снимкат и варжазь мокшэрзянь национальнай ярхцамбяльхнень. Меле республикань творческяй коллектифнень морамасна «тердезень» Тысячелетиянь площади. Тяса семьясь рамась сувенирхт, а емла Арашсь нльне эшелясь фонтанца. Кода азозь сувенирнай продукциянь мишендихне, инь оцю вешфкссь Забивакать мархта магнитикненди и брелокненди. Псить самац касфтозе вешфксть и бейсболкатненди.
Эряви азомс, Тысячелетиянь площадсь тя шиня шарфтсь международнай сцена лангс. Мокшэрзянь, рузонь, татаронь моротнень коряс кштисть разнай национальностень ломаттне. Сембе весялат, футболонь илась тиезень сембонь ялгакс.
Ламоль ломаньда, тяконь лувксса омба масторонь инжида Болельщиконь фестивальса. Россия—Уругвай матчть ваномда меле етафтфтольхть налхкомат, викторинат. Сембонь мяльс тусь ялгаксшинь хороводсь, кона, аф ваномок кялень перяфксть лангс, маласькофтозень аф фкя лацонь народносттнень.
Обедта меле футболонь кельгихне, башка Португалиянь сборнайть болельщиконза, пуромкшнесть Mercure отельть малас, коса ся пингть лоткафоль мировой футболонь тяштсь, Португальскяй сборнаень футболистсь Криштиану Роналду. Фанаттне, конат кружазь отельть, кайгиста юватькшнезь лемонц. Виде, сявомс автограф или тифтемс фотографият содаф футболистть мархта киндивок ашезь удала. Лисемок отельста, Криштиану Роналду озась автобусти, кона пачфтезе Португалиянь сборнайть «Мордовия Арена» стадиону.
Кода содаф, Португалия—Иран налхкомась аделавсь 1:1 счетса.
Матчта меле Тысячелетиянь площадьса етафтфоль праздничнай дискотека.
 
О.КОЛЕДИНОВА.
 
НОЛДАФТ МУНДИАЛЬТИ ЛЕМТЬФ АЛЬБОМ И ФИЛЬМА
Шавшиста, 26 июньцта, Саранскяень ошень пресс-центраса етафтфоль альбомть и фильмать презентациясна, конат лемтьфт республикать столицаса футболть коряс Миронь чемпионатти анокламати и етафтоманцты. Пуромксса примасть участия    МР-нь печатень и информациянь министрсь В.А. Калугин, фотографсь О.С.Бахмустов, сценаристсь М.В.Мишунин.
Кода азозе альбомть автороц О.С.Бахмустов, изданиясь ащи колма пяльксста, конатнень эса няфтьфт мекольдень кота кизоста республикать сатфксонза, пачфневи Мордовиянь содаф ломаттнень и тяза сашенды инжихнень колга. Альбомть эса 400-да лама фотография, конатнень коряс сотцеви, кода полафтсть республикать столицац и райоттне. В.А. Калугин азозе, што августста ни лиси альбомть омбоце томоц.
Презентационнай фильмась стане жа пачфни сянь колга, кода полафтсь регионць футболть коряс Миронь чемпионатти анокламста. Фильмась етафтф несколька кяльс, тяконь лувксса английскяйс, японскяйс и испанскяйс.
 
О.СЕРГЕЕВА.
 
РЕСПУБЛИКАНЬКЕ СУВАСЬ МИРОНЬ ЧЕМПИОНАТТЬ ИСТОРИЯС!
28 июньцта Саранскяйса «Мордовия Арена» стадионца ульсь футболть коряс Миронь чемпионатть миньцонк етафтови матчензон эзда мекольцесь. Пингстонза васьфнесть Панамань и Тунисонь футбольнай командатне. Но сонць чемпионатсь стаки моли Россияса. Тяда башка, эрь шиня Саранскяйса Советскяй площадьса футболонь кельгихнень пуропнесыне FIFA-нь Болельщикнень фестивальсна. Чемпионатонь эрь шись—тя од страница футболть коряс Миронь чемпионатть историяса. Тяфтама историяц тяни кармай улема и мокшэрзянь масторть, и сонь столицанц Саранскяйть. Ётай аф фкя киза, но эрсь кармай лятфнема, што ширезонк сашендсть ФИФА-ть Президентоц Джанни Инфантино, японскяй принцессась Хисако Такамадо, марнек мирса-масторса содаф футболистсь Криштиану Роналду и ламотне лиятне. Газетаньконь тячиень номерсонза вал макстама сятненди, кит примасть участия Саранскяйса чемпионатть матчензонды анокламаса, синь етафтомасост, кит ня «пси» шитнень няезь, кода тяштевсь Миронь чемпионатть историянц нинге фкя пяльксоц.
Екатерина Дмитриевна Четыркина,
«Умарина» моронь и кштимань Мордовскяй государственнай ансамблень солистка:
—Саранскяйса ётасть футболть коряс Миронь чемпионатть ниле матченза. Ули кода азомс, што Мордовиясь сувась футболть коряс Миронь чемпионатть историяс. Няеськ тянь семботь, эрсь эздонк, кода маштсь, примась участия FIFA-нь Болельщикнень фестивальса, ширезонк сай инжихнень васьфтемаса. Саранскяйса васенце матчень шиня (налхксть Перусь и Даниясь), столицать ульцянзон эса ульсь «Welcome, Чемпионат 2018!» пяк оцю арт-парад. Аф фкя тежянь участник етась шествиякс Саранскяйть центральнай пяльксованза и пачкодсть «Мордовия Арена» стадионти. Мордовиять эзда ульсть ламоц творческяй коллектифне, тяконь лувксса и «Умарина» государственнай ансамбльсь. Минь араме арт-парадонь аф явфтови пялькскакс!
Меле васьфтеськ Колумбияста саф болельщикнень, эздост пяк ламоль. Удалась содафтомс синь и Японияста саф инжихнень культурнай программать мархта, кона лемтьфоль чемпионатти. Мокшэрзянь музыкальнай коллектифне тисть пяк лама. Работасть Саранск ошень концертнай сембе площадкатне. «Умарина» ансамбльсь васьфтезень инжихнень С.Д.Эрьзянь лемса Изобразительнай искусствань музейть маласа. Колумбия-Япония матчти сафне содафтсть мокшэрзятнень мороснон, щамснон-карямснон, койснон-обуцяснон мархта.
19 июньцта ширезонк сашендсь ФИФА-ть Президентоц Джанни Инфантино. Саранск ошень аэропортса сонь васьфтезе Мордовия Республикань Оцюнясь В.Д.Волков. Тоса улеме и минь—«Умаринать» участниконза. Джанни Инфантино ванозе Саранскяйть, шназень сонь и тяса эряйхнень, конат маштыхть инжиень васьфтема. Тяда башка, шарфтсь мяль ошса арушить лангс.
Мордовияса моли футболонь оцю праздник, кона ляды мялямс, сон кенерсь ни сувамс историяти! Тянкса марятама гордость!
* * *
Оксана Владимировна    Архипова,
Рузаевка ошень «Радуга» идень садонь воспитатель:
—«Ширезонк сась, ширезонк сась…» Аф ламода полафтолине содаф тя мороста валрисьмоть пенц и поладолине, што ширезонк сась футболть коряс Миронь чемпионатсь! Васенцеда историяса! Оцюдонга оцю тя событияти анокламась мольфтевсь кунара. Саранскяйса строяф «Мордовия Арена» стадионць, коза тяльги 45 тежянть малава ломань. Мзяра од ки эвондась! И вов ушедсь Россияса чемпионатсь. Инголенди содафоль: Саранскяи сайхть омба масторонь кафкса командат. Иран, Япония, Тунис, Португалия, Перу, Дания, Панама, Колумбия—сембе ня странатнень колга морафнеме книгатнень эса, географиянь урокнень пингста тонафнеськ косот синь, мзяра ломань эряй и стак тов. Тяни инь цебярь футболистсна састь ширезонк налхкома. Мордовиять колга ушедсть няфнема сюжетт омба масторонь телеканалхне!
Эрян и работан Рузаевкаса. Республикать машина кинь столицац аноклась чемпионатти аф сяда кальдявста Саранскяйть коряс. Кой-кона болельщикне, самок поездса вокзалу, эстокиге повондсть инжиень примамань-васьфтемань зонав. Мон улень тоса и няине, што сембось пяк тусь мялезост. Кочкань козя материал, конань, кода идень садонь воспитатель, нолдаса тевс работамстон. Чемпионатсь шумордави, но аф юкстави. Колганза карматама пачфнема иденьконди и уноконьконди!
* * *
Светлана Валерьевна   Надейкина,
М.Е.Евсевьевонь лемса Мордовскяй государственнай педагогическяй институтть шумордаец, тя вузть филологическяй факультетонц секретарец:
—Пяк кенярдень, мзярда содайне, што  футболть коряс Миронь чемпионатть ниле матченза кармайхть столицасонк. Тя оцю честь марнек Мордовияти и, арьсян, эряензонды. Пяк пара, што тя оцю праздникть ушедомста Саранскяйсолень и нльне примань участия эсонза. Улеме народнай арт-парадть эса, коса щафтолеме-каряфтолеме мокшэрзянь щамса. Мзярда ульсь и мзярда нинге ули, штоба ошть ульцянзон эзга ёталь тняра ломань!
Тяза сашендсь пяк лама ломаньда омба масторста. Кармаме содама синь культураснон, нльне араме ламотненди ялгакс и пичедеме мархтост командаснон инкса матчнень пингста.
Саранскяйсь салазе мяльснон эсь мазышинц мархта! И тя пяк кеняртьфтемазь сембонь.
Чемпионатть колга лядыхть пара мяльне-арьсемане и валда лятфнемане.
Т.АЛЬШИНА.

05.07.2018 №26
 
 
 

 
НОВОСТИ
 

Мордовиянь Оцюнясь Владимир Волков Ётафтсь национальнай проекттнень эряфс етафтомаснон коряс рабочай совещания

17.01.2019  № 2
 
 
 

Ули мезенкса кеняртькшнемс

Монь, кода од ломанень, пяк лад мялезон ся, кода кизоста кизос коль сяда и сяда мазыкс и арукс арси республиканьконь столицац—Саранскяйсь. Тяни ётат сонь ульцянзон, проспектонзон, парконзон, лия вастонзон эзга и седице пяшкоди кенярьдемада, гордостьта и ошть, и марнек Мордовиять инкса. Сембода лама полафткста, конешна, эвондась тяса футболть коряс Миронь чемпионатти анокламста. Ваносте, кодамот тяни ошень китне, вокзалхне! Мяльцень стане жа саласазь «Тавла» гостинично-жилой од комплекссь и Экопарксь. Марнек полафтсь, лиякс арась аэропортсь. Тяни тяста самолетса можна пачкодемс Москуву и Санкт-Петербургу. А мзяра строяф идень садта, школада, гипермаркетта, лама лия пяк эрявикс объектта. А кода аф лятфтамс уникальнай спортивнай объектть—«Мордовия Арена» стадионть. Сон сембоса отвечай тяниень пингонь инь оцю вешфксненди. Аф стак самай тяса меля налхксть миронь инь вии футбольнай командатне. Тя ли аф фантастика, тя ли аф честь сембонди тейнек. А ёфси аф кунара Саранскяйса ётафтфоль эйть лангса конькаса фигурнайста куркснемать коряс Россиянь чемпионатсь. И тяконь лаца спортонь оцю праздникт миньцонк ётафневихть аф шуроста.
Спортсь лихтезе столицаньконь пяк няевикс вастс, тиезе сонь содафокс аф аньцек Россияса, а марнек мирса-масторса. «Саранскяйсь—тя афкуксонь Европейскяй ош, тяса сембось тиф-ладяф оцю уровеньца»,—тяфта азондсазь эсь мяльснон-арьсемаснон столицаньконь колга тяза сашенды инжихне.
Мария Тарасова.
10.01.2019  № 1
 

10 январьста—Мордовиять шачема шиц

Панчфокс панчт, мокшэрзянь краеньке!
Тячи Мордовия Республиканьконь шачема шиц. Топодсь 89 киза, кода теенза максф государственность. 1930 кизонь 10 январьста ВЦИК-ть Президиумоц примась постановления Мордовскяй округть Мордовскяй автономнай областекс тиеманц колга. Тя шись и лувондови мокшэрзянь республикати шачема шикс. А ниле кизода меле тифоль Мордовскяй АССР-сь.
Тянь мархта путфоль цебярь ушеткс касоманди-виияманди. Ётаф пингста ламода кассь республикать экономическяй виец, кеподсь культурась, образованиясь, наукась. Ламоц земляконьке арасть гордостекс аф аньцек Мордовияса, но и сембе Россияса.
Сембода оцю сатфкст миньцонк сатфт мекольдень кизотнень. Мордовиясь путневи примеркс лиятненди, тяза сашендыхть опытонкса, тонафнема. И ули мезти тонафнемс. Республиканьке тячи—странать инь  вишкста вииякшни региононзон эзда фкясь.
10.01.2019  № 1
 

Мордовия Республикань культурань, национальнай политикань, туризмань и архивнай тевонь министрсь А.М.ЧУШКИН: «ЛАДЯМА СЕМЬЯСОНТ И САТФКСТ ТЕВСОНТ!»

28.12.2018
 

Н.П.Огарёвонь лемса Национальнай исследовательскяй Мордовскяй государственнай университетонь ректорсь С.М.ВДОВИН: «КАТК ЁТАФТОВИХТЬ ЭРЯФС СЕМБЕ ВАЛДА МЯЛЕНТЕ И ПЛАНОНТЕ!»

28.12.2018
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин