Поиск по сайту: 
 

Архив
 июнь 
 2019 
пн вт ср чт пт сб вс
     12
3456789
10111213141516
17181920212223
24252627282930

 
 

 

Национальная тематика

Российскяй культурать и национальнай политикать кемокстаманкса

Мордовия Республикань культурань, национальнай политикань, туризмань и архивнай тевонь министрть васенце заместителец С.Н.Баулина:
«Международнай экспедициять эрь шиц кармай пяшкотьф тевса!»
29 июльста ушедсы эсь работанц «Волгась—ялгаксшинь ляй» Международнай XVII этнокультурнай экспедициясь-фестивальсь. «Культурась—тя инь оцю эрявиксшись и инь оцю козяшись кода башка нароттнень и емла этноснень, стане и государстватнень эряфса!» эсь девизонц вешфксонзон коряс сон кармай работама 3 августти молемс.
Мезть арьсеви тиемс-сатомс Международнай XVII этнокультурнай экспедицияса-фестивальса, «Мокшень правдати» азондсь Международнай экспедициянь делегациять руководителец, Мордовия Республикань культурань, национальнай политикань, туризмань и архивнай тевонь министрть васенце заместителец С.Н.Баулина.
—Светлана Никитовна, кодама девизонь коряс тядде етафтови «Волгась—ялгаксшинь ляй» Международнай XVII этнокультурнай экспедициясь-фестивальсь?
—Девизкс тяддень Международнай XVII этнокультурнай экспедицияти-фестивальти арасть академикть Дмитрий Лихачевонь валонза: «Культурась—тя инь оцю эрявиксшись и инь оцю козяшись кода башка нароттнень и емла этноснень, стане и государстватнень эряфса!»
Сяс сембе корхтаматне Международнай экспедицияса кармайхть мольфтевома Культурать колга, конань эса няевикс вастса ащи Мордовия Республикань культурась мокшэрзянь национальнай эсь компонентонц мархта. Койсон, тя темась туй сембе ломаттнень мяльс, конат кармайхть работама экспедицияса, аф ваномок сянь лангс, коса и мезькс синь покодихть.
Сонцьке Международнай этнокультурнай экспедициясь ушедсы эсь работанц «Культурась, кода государственнай национальнай политикань инь эрявикс-оцю тев» лем ала форумса, кона етай Самара ошса. Пингстонза теманц коряс азсазь эсь мяльснон аф аньцек экспедициянь члеттне, но и Самарскяй областень государственнай властень, культурань и общественнай организациянь деятельхне.
И тя темась фалу кармай ащема васенце вастса Международнай этнокультурнай экспедициять лия эрь мероприятиясонза.
—Кинь тядде, Светлана Никитовна, тердесть-сувафтость Международнай экспедициять делегацияс?
—Международнай экспедициять тяддень делегацияс ломанень кочкамста минь фалу кирдеськ пряса тя мяльть—экспедицияса сави тиемс лама тев. Мярьктяма, арьсемс-ладямс Россиянь лия региоттнень мархта од проектт культураса и искусстваса, национальнай политикаса, туризмаса, архивнай тевса и тейнек лия эрявикс сфераса.
Сяс этнокультурнай экспедициять делегацияс тертьфт-сувафтфт Мордовия Республикань и Россиянь лия региононь, коса кармай работама экспедициясь, мокшэрзянь и лия народонь общественнай организациянь руководительхне. Синдедост башка, делегацияс сувасть Мордовиянь, лия региононь культурань, образованиянь руководительхне и деятельхне, национальнай библиотекань библиотекарьхне, туристическяй организациянь сотрудникне, музеень и архивонь работникне, мокшэрзянь и лия народонь национально-культурнай центрань представительхне, культурань районнай управлениятнень руководительсна и лия афкуксонь профессионалхне.
Делегацияс тяфта жа сувафтф творческяй оцю группа. Эсонза—Мордовия Рсепубликань Народнай артисткась Нина Маркова, Мордовиянь Заслуженнай артисткась, республикань госфилармониянь солисткась Евгения, мокшэрзянь од певецсь Артем Мамаев, Темниковскяй райононь «Лаймоня» национальнай ансамбльсь, республикань лия коллектифне и исполнительхне.
Мархтонк экспедицияса тяфта жа улихть Мордовиянь и Россиянь лия региононь журналистт, конат кармайхть тяштема Международнай этнокультурнай экспедициять работанц и сонь итогонзон квалма.
—Светлана Никитовна, кармайхть ли васедемат государственнай властень оргаттнень представительснон мархта ся регионца, коса тядде кармай работама Международнай этнокультурнай экспедициясь?
—Конешна, Международнай этнокультурнай экспедициять рамкаса кармайхть васедемат Приволжскяй федеральнай  округонь регионца, коса кармай работама экспедициясь, государственнай властень эрявикс представительхнень мархта. Васедемаса нинге весть улихть кепотьфт и кемокстафт  культураса, национальнай политикаса, туризмаса, музейнай, архивнай и библиотечнай тевса марстонь проекттнень коряс кизефксне, конат тяда меле марстонь вийса етафтовихть эряфс кода Мордовия Республикаса, стане и ся региоттнень эса, конань мархта арьсеф-кемокстаф тя или тона проектсь.
кепотьксонди, Чувашия Республикать мархта тяда инголе арьсеф марстонь проекттнень. Надиян: экспедициять рамкаса етафтови васедемаса тостонь государственнай властень оргаттнень представительснон мархта минь ня проекттнень кемокстасаськ. Синь вешфксснон коряс, Мордовия Республикань театратне, концертнай организациятне, ансамбльхне тяддень сексеня етафтыхть Чувашия Республикаса оцю гастрольхть, а синнетне тяка пингть кармайхть работама республикасонк.
Тяда башка, кафцьке республикаса арьсевихть етафтомс Межрегиональнай форупт, конат кармайхть лемтьфт национальнай культуратнень ванфтомаснонды, касфтомаснонды и виияфтомаснонды. Тя кизефкста башка, пингстост вановихть государственнай национальнай политикань инь оцю и эрявикс кизефксне.
Нижегородскяй областень властень оргаттнень представительснон и культурань работникнень мархта минь срхкатама кемокстамс велень культурать виияфтоманц коряс соглашеният. Тя сфераса синь ули оцю рабочай опытсна. И сон, тя опытсь, тейнек пяк лезды кеподемс од серьс и виияфтомс мокшэрзянь национальнай культурать, конань юронза миньцонк, кода минь содасаськ, велесот и райцентрасот.
Казаньца и Марий Элса минь марстонь проекттнень коряс тяфта жа кемокстатама эрявикс Соглашеният.
—Кода шарьхкодень, Светлана Никитовна, «Волгась—ялгаксшинь ляй» Международнай XVII этнокультурнай экспедициять-фестивальть программац пяшкодезь пяшкотьф эрь шинь тевса.
—Тя афкукс тяфта. 29 июльста сявомок, мзярда Самараса торжественнайста панжеви Международнай XVII этнокультурнай экспедициясь-фестивальсь, и 3 августти самс сонь эрь рабочай шиц кармай педа-пес пяшкотьф тевса. Конешна, ломаттненди, кит кармайхть покодема экспедицияса, ули аф теждя. Но эряви шарьхкодемс: эсь тевоньконь вельде минь тихтяма-канттама лама цебярьда Российскяй культурати и государственнай национальнай политикати!
—Удалаза арьсефонте, Светлана Никитовна.
—Сюкпря пара валонкса-мяленкса. Карматама покодема виень апак ужяльтть!
В.НЕСТЕРОВ.

26.07.2018 №29
 
 
 

 
НОВОСТИ

Минь поздравленияньке

13.06.2019  № 23
 
 
 
 
 

«Рузаевкаса мольфтевихть анокламатне стекольнай заводть панжеманцты»

Мордовиянь Оцюнясь Владимир Волков:
Мордовиянь Оцюнясь Владимир Волков 29 майста ётафтсь рабочай васедема Рузаевскяй райононь руководительть Вячеслав Кормилицынонь мархта. Ванондовсть территориять социально-экономическяй виияфтоманц коряс кизефксне. Тяконь лувксса корхтамась мольфтевсь социальнай объекттнень строямаснонды анокламать колга: Рузаевкаса Паровознай ульцяса 160 вастонди идень садть, Татаронь Пишляса 250 вастонди школать, фельдшерско-акушерскяй пункттнень.
Ванондовсть районца водоснабжениянь и водоотведениянь систематнень одкстоптомаснон, а стане жа «Безопасные и качественные автомобильные дороги» национальнай проектть эряфс ётафтоманц рамкаса китнень строямаснон и петемаснон коряс кизефксне. Тядде, кода отмечазе Вячеслав Кормилицын, петевихть-одкстоптовихть 13 вайгяльбень кувалмоса кит.
06.06.2019  № 22
 

Аделсеви «Мокшень правдати» сёрматфтомась

Эряскодода!
Кельгома ялгат!
2019 кизоть омбоце пяленцты «Мокшень правдати» сёрматфтомать шумордамс ляткшни аньцек кафта недялят.  И ули тячи мяленьке нинге весть азомс нюрьхкяняста: мес именна «Мокшень правда» эряви тинь семьянтенди.
Кода аф ужяль, мокшэрзятнень лувкссна стаки кири. А «Мокшень правдась» семботь тиендьсы сянкса, штоба аф нолдамс тянь. Кода ванфтомс и виияфтомс кяленьконь, культураньконь, аф юкстамс эсь коеньконь-обуцяньконь—вов мезть колга мольфтеви корхтамась сонь лопанянзон эса. Пцтай эрь номерса макссевихть материалхт мокшэрзятнень историяснон, содаф ломаньцнон колга, азонкшневи народоньконь арьсеманзон и пичефксонзон колга.
«Мокшень правдаса» макссевихть медицинскяй темас советт и рекомендацият, советт перень сёронь касфнихненди и жувата мельге якайхненди. Эрь номерса ули юморонь и сатирань уженя, рузонь кяльса печатлакшневихть недялянди ламоц телевизионнай программатне.
«Мокшень правдась» республиканскяй газетатнень эзда фкя инь интереснай и уцез газетась. Сон нльне сяда уцез ламоц «районкатнень» коряс.
Теенза тяшфтемать питнец:
6 ковонди—336 цалковай,
3 ковонди—168 цалковай.
Газетать индексоц П4719.
 Эряскодода почтав. Тоса учихть эсонт. Пингсь содай ётаманц.
06.06.2019  № 22
 
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин