Поиск по сайту: 
 

Архив
 август 
 2020 
пн вт ср чт пт сб вс
     12
3456789
10111213141516
17181920212223
24252627282930
31      

 
 

 

Как жили и живут мокшане

КАТК ФАЛУ КАЙГИ РОДНОЙ ВАЛСЬ

Башкортостанонь Фёдоровскяй райононь Кузьминовка мокшень велеса 1970 кизоня эвондась «Пизелкс чувто» мокшэрзянь фольклорнай ансамбльсь, конанди пуроптыкс ульсь Татьяна Григорьевна Никитина. Ансамбльсь ушедозе тевонц кода художественнай самодеятельностень коллектив. И пцтай эстокиге сценать лангс кармасть лисендема мокшень и эрзянь моротнень мархта, конат пяк тусть ваныхнень мяльс. Ся пингста сявомок ансамбльть эрь концертоц—афкуксонь праздник мокшэрзянь моронь, сиде моронянь кельгихненди.
«Пизелкс чувто» ансамбльсь примси участия аф аньцек велень, муниципальнай, но и районнай пуромкснень эса. Эрь кизоня ётафневихть «Мазый тейтерь» инь мазы стирень и «Гайгиця вайгельть» мокшэрзянь моронь мораень пялькстомат. Пингстост коллективсь няфни мокшэрзянь кунардонь обрятт, морси морот.
Кизоста кизос касы участниконзон лувкссна. Эряфкшу морсихнень вастс сашендыхть отт. Кда васенце составса сценати лисендсть Л.Н.Курмаева, М.И.Васильева, А.В.Евдокимова, З.А.Антошкина, А.А.Петаева, М.А.Мишина, Л.А.Палаева и лиятне, то тяни мархтост морсихть Т.И.Митрофанова, Т.П.Евдокимова, В.Н.Сайкина.
Коллективти сашендыхть и итть. Ёмлатне тонафнихть морот, сиде моронят, няфнихть ёмла спектакльнят. Нльне арьсекшневихть сценарийхть тя или тона праздникненди. Тяфта кочксеви мокшэрзянь народть историяц, лятфневихть коенза-обуцянза, а шабатне венемихть народнай культурати.
«Пизелкс чувто» ансамбльть лемнесазь мокшень народть культурнай козяшинц ванфтыкс. И тя афкукс тяфта.
* * *
Мокшетне и эрзятне Башкортостанонь Фёдоровскяй району етасть эряма 300 кизода инголе. Мордовскяйкс тяса лувовихть Фёдоровка, Кузьминовка, Алёшкино, Булякай велетне. 2012 кизоня районнай центраса панчфоль Фёдоровка велень Мокшэрзянь историко-культурнай центра.
Арась цебярь койкс эрь кизоня етафнемс мокшэрзянь культурань и родословнаень праздникт.
Т.АЛЬШИНА.

26.07.2018 №29
 
 
 

 
НОВОСТИ

Ушедсь сёронь урядама пингсь

Эрь гектарста ули кочкаф 50 центнер сёра

 

Тяфтама ни велень эряфсь, фкя тевсь полафнесы омбоцеть. Нинге исяк республикань велень хозяйстватнень эса инь оцю мяль шарфневсь и водендафоль лама вий кормань анокламати,  тячи лама вастова кярьмодсть ни сёронь урядамати. Лихтезь паксятнень лангс эсь комбайнаснон и Рузаевскяй райононь «Агросоюз—Левженский» ООО-нь механизаторхне.

 

 

—Сёронь урядама пингти маладоме сембе ширде аноклафста,—азонды хозяйствань вятись, Мордовия Республикань велень хозяйствань Заслуженнай работниксь В.И.Сетин.—Комбайнатне пцтай сембе отт, мяльце касы мархтост работамс. Сёронь урядама пингть синь фалу паксясот, кой-кона участкатне ащихть кемоньшка вайгяльбень вастса и техникась мековасу аш месть панцемс. Марнек сёротне видефтольхть фкя тёжянь гектар лангса. Урожайсь пяк цебярь, эрь гектарста сяфтяма аф ведьгемоньда кржа центнер сёра. Кда кармай цебярь погодась, сембе  ня площаттнень  урядасаськ кафта-колма недяляста.

 

30.07.2020  № 29
 

МОРДОВИЯ РЕСПУБЛИКАНЬ ОЦЮНЯСЬ ВЛАДИМИР ВОЛКОВ ВАНОЗЕНЬ РЕСПУБЛИКАНЬ РАЙОТТНЕНЬ ЭСА СОЦИАЛЬНАЙ ОБЪЕКТТНЕНЬ СТРОЯМАСНОН КОРЯС РАБОТАТНЕНЬ МОЛЬФТЕМАСНОН

Краснослободскяй районца

 

 

24 июльста МР-нь Оцюнясь Владимир Волков ульсь Краснослободскяй районца, коса ванозе, кода мольфтевихть Бобылевские Выселки велеса «Комплексное развитие сельских территорий» программать коряс комплекснай компактнай строямать коряс проектть эряфс ётафтомац.

 

Проектть коряс арьсекшневи строямс спортивнай комплекс и  модань 132 участкаса эряма кутт. Бобылевские Выселки велесь ащи маласа Краснослободск ошти, сяс тя пцтай фкя агломерация.

 

Кода няезе Мордовиянь Оцюнясь, спортивнай сооружениять строямац мольфтеви сембе вийса и нльне графикта инголе. Республикаса тя фкя и сяка спортивнай объектсь, коса фкя вельхкс ала кармай ледовай арена, оцюфненди и иттненди бассейнат, тренажернай и фитнес-залхт. Лама функцияса спортивнай сооружениясь арай межрайоннайкс.

 

Кда сявомс проектть омбоце пяльксонц—комплекснай компактнай застройкать, тячиень шити площадкаса аделсеви газопроводонь и водопроводонь ётафтомась, тиф 1,4 вайгяльбень кувалмоса ки, лядыкс 1,7 вайгяльбесь—сай кизонь планца.

 

Владимир Волков путсь Краснослободскяй районть оцюнянц Алексей Буйновонь инголе задача—сяда виияфтомс аноклаф  территорияса куттнень строямаснон, тяконь лувксса льготнай велень ипотекать вельде.
 

 

 
30.07.2020  № 29
 
 
 
 
 
 
 

ВЛАДИМИР СУШКОВ ВЕШСЬ СЯДА ЭРЕКЛАФТОМС ТЕФНЕНЬ И КЕМОСТА ВАНОМС КАЧЕСТВАТЬ МЕЛЬГЕ

6 июльста Мордовиянь Правительствань члеттнень мархта совещанияса ванондовсть национальнай проекттнень эряфс ётафтомаснон коряс кизефксне. Республикань Правительствать Председателец Владимир Сушков отмечазе, што социальнай ширде важнай кой-кона объекттнень эса заняф аф сатомшка ломаньда и аф марнек нолявихть тевс графикнень ванфтозь работатнень пяшкотькшнеманкса строительнай механизматне.

 

 
Ётай ваймама шитнень региональнай кабминонь премьер-министрсь ванозень Идень республиканскяй клиническяй больницять хирургическяй корпусонц и Республиканскяй онкологическяй диспансерть поликлиническяй отделениянц, конат строявихть «Здравоохранение» нацпроектть рамкаса, строямаснон. Владимир Сушков мярьгсь работамс        объекттнень эса сутканьберьф и кемоста ваномс тиеви работатнень качестваснон мельге. Тяфта жа Правительствать Председателец мярьгсь анокламс уликс онкодиспансерть зданиянц петеманкса сембе документациять. Тядде нацпроектть рамкаса кармайхть одкстоптфт 70 фельдшерско-акушерскяй пункт и фкя врачебнай амбулатория.

 

09.07.2020
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин