Поиск по сайту: 
 

Архив
 февраль 
 2019 
пн вт ср чт пт сб вс
    123
45678910
11121314151617
18192021222324
25262728   

 
 

 

Национальная тематика

Н.Г.Гудкова: «Морось маласькофты, Тиендьсыне ломаттнень ялгакс»

«Мезське тяфта аф тии ялгакс, аф маласькофты, кода морось»,—ня валхнень сидеста азонкшнесыне Ковылкинскяй райононь Ежовка велеса шачф-касф мокшавась Надежда Григорьевна Гудкова. Синь кунара ни арасть теенза девизкс, сяс мес тячиень героиняньконь эряфоц фалу сотф мороть мархта.
Н.Г.Гудкова морсесь Ежовка велеса, Саранскяйса эрямстонза, ашезь ява кельгома тевонц мархта Москусовок.
«Мороти кельгомась фалу эрясь семьясонк»
Надежда Григорьевна шачсь-кассь семьяса, коса сембе кельгозь мокшэрзянь моротнень, сиде моронятнень. Аляц, Григорий Николаевич Любимкин, асу гармонистоль. Сяс, мзярда цёранза и стирняц-тяконяц аноклакшнесть эсь лацонь концертт, тя арсесь праздникокс марнек Ежовкати. Кой-коста, работада меле, тарксезе мокшалясь гармониять и Надя морсесь шабратненди, инжихненди. Сиземась етнесь, мяльсь кепсесь. Надежда Григорьевнань тядяц, Агафья Николевна, содась пяк лама сиде мороняда. Тядяц и аляц васьфтсть фкя-фкянь пуромксса, коса Григорий Николаевич морась гармонияса, а тядяц Агафья Николаевна кштись и морась кургса. Вов и лиссь творческяй дуэт. Н.Г.Гудкова тянемс лятфнесы, кода Очижиста шачфтыенза-касфтыенза ётнельхть велеть келес и кштизь-моразь тернелезь ломаттнень шрать ваксс. Надежда кельгозе морсеманц тядянц мархта—кафта вайгяльса.
Шабакс лемнезь
артисткакс
Виде, ломаттнень инголе морсесь виздезь. Оцюфне макссть совет: «Васенда конить сельмотнень. Сяльде тонадат». Тяфта и лиссь. Меле школаса фкявок концерт соньфтемонза ашезь етне. Аф весть якась колхознай паксятненди агитбригадатнень мархта. Артистка—тяфта мярьгольхть Надежданди Ежовкаса.
Любимкиттнень семьяса мороть кельгозь сембе. Володя аккомпаниатороль сазоронцты Надянди. Мороть мархта ялгатольхть лия браттневок. Кда шачфтыхне-касфтыхне и идьсна ушедольхть марса мора—марнек велесь кулелезень.
Саранскяйсь, «Литова» ансамбльсь, Москусь
Мзярда Надежда Григорьевна ётась эряма Саранскяи и ушедсь работама заводса штамповщицакс, морамань асувоц ашезь ляда апак смекак. Мокшень стирть тердезь «Литова» ансамбльти, конань мархта теенза удалась улемс нльне омба масторса.
Лиссь тяфта, што Надежда Саранскяйста тусь Москуву, тоса содафтсь удалаф церать Николай Гудковонь мархта и лиссь теенза рьвакс. И сай пингонь мирденц мархта васедсть Сокольники паркса, коза пуромкшнесть Мордовияса шачфне-касфне, а тяни Москуса эряйхне. Ся вастсь стане и лемневсь—«мокшэрзянь парк».
Гудкофнень од семьясост шачсть кафта итть—Светлана и Николай. Надежда Григорьевна кой-мзярс лоткась морсемда, но кали юкстави тя тевсь, кда морось эряй ваймоса, а сельминголет эрь шиня ащихть «Литова» ансамбльсь, Любимкиттнень семьяснон концертсна, Очижиста Ежовкань ульцятнень эзга кштизь-моразь аськоляйхть шачфтыхне-касфтыхне…
Мокшавась ушедсь работама КСУМ-са. И вов весть, мзярда аш ни кода лажадсь сценати, теенза маладсь культурань работниксь В.И.Канищева. Сон кучезе Гудкофнень семьяснон «Семья года—1996» конкурсти, конань Метростройсь етафтозе васенцеда. Гудкофне сатозь колмоце вастть. Сяльде тага ушедсть выступлениятне, концерттне, праздничнай иляттне, лия пуромксне.
Эряфонь кись вятезе «Тяштеня» коллективти
Пцтай комсь кизода инголе эряфонь кись вятезе Надеждань «Тяштеня» творческяй коллективти. Тага и тага Надежда Григорьевна ушедсь лисендема сценать лангс. Аф весть «Тяштенясь» концерт мархта ульсь родной Мордовияса, коса теенза максфоль «народнай» лем. Сембе пингс ляды мялямс Мокшэрзянь народть Российскяй государствань нароттнень мархта ладязь эрязь 1000 кизоть топодеманцты лемтьф пуромкссь, конань эса примась участия «Тяштеня» коллективсь.
«Шалом, Израиль!»
«Шалом, Израиль!»—тяфтама лем ала фестивальс Нетанияв тердемать «Тяштеня» мокшэрзянь ансамбльсь васьфтезе кенярдезь! Тоза сон тусь украинскяй хоровой капеллать, «Кавкасиони» грузинскяй кштимань ансамбльть, «Baby-danse» идень хоровой ансамбльть мархта.
«Тяштенять» концертонза етнесть фкя ваймоса. Рузонь, мокшэрзянь моротне, сиде моронятне васьфневсть кядень кайги цяпамаса. Коллективть гала-концертоц тусь сембонь мяльс.
Мекольце шить Нетанияса коллективонь участницатне ёразь лемдемс эстеест. Но, мзярда концертнай щамса-карямса лиссть ульцяв, штоба тифтемс фотографият Средиземнай морять трваса, мельгаст пиксокс таргавсть ломаттне. Кизефнезь коста састь, эняльдсть морамс. И «Тяштенясь» макссь концерт морять трваса.
«Мзярда, ялгат,
моратама?»
Тяни Надежда Григорьевна Гудкова морси «Тяштеня» и «Азорава» коллектифнень эса. Вайгялец сяшкава мазы, што эрсь ёрай арамс мархтонза партияс.
Кизонда, мзярда репетицияда уленди аф сяшкава лама, сон гайфни сценас коре ялганзонды и кизефни: «Мзярда ни моратама?»
Аф ваномок уликс стакатнень-сталмотнень лангс, Надежда Григорьевна ульсь и ляткшни пара вайме ломанькс. Аф пеняцяй эряфть лангс, фалу анок венептемс лездыень кяденц.
Музыкати кельгомась етась идензонды. Кафцьке шумордазь музыкальнай школать, Николай—баянонь, а Светлана—фортепианонь классть коряс.
Сяда тов кайгоза мазы вайгяльце, Надежда Григорьевна!
Т.АЛЬШИНА.

26.07.2018 №29
 
 
 

 
НОВОСТИ
 
 

ВАЛЕНТИН ВАСИЛЬЕВИЧ КОНАКОВ

2019 кизонь 27 январьста 80 кизонц лангса стакаста сярядемда меле тусь эряфста Валентин Васильевич Конаков—содаф государственнай и общественнай деятельсь, образованиянь и наукань пуроптысь, ученайсь.
Валентин Васильевич Конаков шачсь 1939 кизонь      9 июньцта Мордовскяй АССР-нь Атяшевскяй райононь Кулясово велеса крестьянонь семьяса.
Армияса служамда меле 1961 кизоня В.В.Конаков работась автомеханикокс Атяшевскяй «Сельхозтехникаса», а сяльде поступась Мордовскяй государственнай университету. Аделамок 1966 кизоня тонафнеманц, Валентин Васильевич кармась покодема образованиянь сфераса, 1966 кизоста сявомок 1979 кизоти молемс работась Мордовскяй государственнай университетса ассистентокс, старшай преподавателькс, металлонь технологиянь и машинань петемань кафедрань доцентокс, велень хозяйствань механизациянь факультетонь деканонь заместителькс. 1978 кизоня В.В.Конаков аделазе Московскяй лесотехническяй институтонь аспирантурать, теенза максфоль техническяй наукань кандидатонь лем.

31.01.2019  № 4
 

ДИПЛОПТ И ПРЕМИЯТ—АСУ ЛОМАТТНЕНДИ

Ётай недялять, 25 январьста, Российскяй студенчествань шиня Мокшэрзянь государственнай национальнай драматическяй театраса етась торжественнай пуромкс, конань пингста МР-нь Оцюнясь В.Д.Волков макссь казнет асу од ломаттненди. Мероприятияс пуромкшнесть аф фкя лацонь конкурсонь и олимпиадань сяськихне и призерхне, а стане жа  синь тонафтысна и тядясна-алясна.
Республикань Оцюнясь азозе, што асу од ломаттнень ширеснон кирдеманкса меля примафоль решения ладямс од премият школьниконь международнай и всероссийскяй олимпиадань сяськихненди и призерхненди.
«Международнай уровеньца сатфксонь сатоманкса премиять лувксоц 100 тежянь цалковайста сявомок 300 тежянь цалковайти молемс. Всероссийскяй олимпиадань мекольце этапонь сяськихне и призерхне получайхть 60 и 30 тежянень цалковай,—азозе Мордовиянь Оцюнясь.—Тядде лауреатокс арасть 43 школьниконьке. Тяда башка, казнет получайхть нинге 40 стирсь и церась, конат лац няфтезь пряснон  исследовательскяй тевса, социальнай и общественнай работаса, научно-техническяй творчествань и  профессиональнай мастерствань конкурснень эса».
31.01.2019  № 4
 

МОРДОВИЯНЬ ОЦЮНЯСЬ ВАНОНДОЗЕНЬ САРАНСКЯЙСА ОПТОВОЛОКОННАЙ ПРОИЗВОДСТВАТЬ ВИИЯФТОМАНЦ КОРЯС КИЗЕФКСНЕНЬ

Мордовиянь Оцюнясь Владимир Волков 22 январьста ётафтсь рабочай васедема «Оптиковолоконные системы» АО-ть генеральнай директоронц Андрей Николаевонь мархта. Ванондовсть предприятиять 2018 кизонь работань итогонза, а стане жа 2019 кизонди платтне. Ня кизефкснень ваномаса примась участия Правительствать Председателенц заместителец—промышленностень, наукань и од технологиянь министрсь Александр Седов.
Лятфтасаськ, оптическяй волокнань Саранскяй заводсь—фкясь и сякось странаса. Сон нолдафоль колма кизода инголе. Тя эсь лацонь производствать виияфтомань сембе этапонза етасть Россиянь промышленностень и торговлянь министрть  участиянц мархта. Владимир Волков аф весть васетькшнесь Денис Мантуровонь мархта, получсемок тя проектть, конанди вийс коре ладямс оптическяй волокнань производствать замкнутай цикланц марнек странать вешфксонзон мяльс сявозь, эряфс етафтоманц коряс республикать инициативанзонды ширень кирдема.
31.01.2019  № 4
 

МОКШЭРЗЯНЬ МАСТОРСЬ ТАГА ПУРОПТСЫНЕ ЭСЬ СТИРЕНЗОН И ЦЁРАНЗОН

Мордовскяй (мокшень и эрзянь) народть vii съездоц ётай тяддень
23-25 октябрьста республиканьконь столицаса
Мордовиянь Оцюнясь Владимир Волков 22 январьста Саранскяйса етафтсь мордовскяй (мокшень и эрзянь) народть VII съездонц, кона кармай тядде 23-25 октябрьста, етафтоманцты анокламать коряс совещания.
Совещанияса примасть участия Россиянь финно-угорскяй народонь Ассоциациять председателец Петр Тултаев, а тяфта жа мордовскяй народонь общественнай организациять Межрегиональнай представителенза, тяконь лувксса РФ-нь лия     субъекттнень эзда.
Владимир Волков мярьгсь, што мордовскяй народть съездоц работать важнай пяльксоц, кона мольфтеви властень оргаттнень и общественнай институттнень мархта традициятнень и межэтническяй ладямать ванфтоманц и ламолгофтоманц коряс—тя задачать путнесы странань Президентсь. Сай пингонь съездть инь главнай темац—«Мордовскяй (мокшень и эрзянь) народсь лама нациянь Россиять единай культурнай кодса».
31.01.2019  № 4
 
 

Мордовиянь Оцюнясь Владимир Волков Ётафтсь национальнай проекттнень эряфс етафтомаснон коряс рабочай совещания

17.01.2019  № 2
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин