Поиск по сайту: 
 

Архив
 январь 
 2019 
пн вт ср чт пт сб вс
 123456
78910111213
14151617181920
21222324252627
28293031   

 
 

 

Тема дня

МАРСТОНЬ САТФКСНЕ КЕНЯРТЬФТИХТЬ

Ковылкинскяй муниципальнай районцта
24 августста Мордовия Республикань Государственнай Собраниять Председателец В.В.Чибиркин рабочай визит мархта ульсь Ковылкинскяй муниципальнай районца. Тяса сон ванозень социальнай, культурнай и  спортивнай  од  объекттнень, конаса пяк козя районць.
Васенда В.В.Чибиркин Ковылкинскяй муниципальнай райононь оцюнять В.И.Ташкинонь мархта ванозь Кочелаево велеса физкультурно-оздоровительнай комплексть. Эсонза спортивнай и тренажернай оцю залда, тенниснай кортта башка, тяфта жа ули тя пингонь бассейна, конаса аф аньцек уендема, но и сай пингонь рекордонь путома тонафнихть велень 200 шаба. Синдедост башка, кода бассейнаса, стане и спортивнай залса недяляти колмоксть кемокснесазь эсь шумбрашиснон Российскяй армиянь военнослужащайхне и правоохранительнай органонь сотрудникне.
ФОК-са тяфта жа кемокснесазь эсь шумбрашиснон пенсионерхне, инвалиттне и социальнай ширде апак аралак ломаттне. «И тя фактсь кеняртьфти минь эсонк!»—мярьгсь Мордовия Республикань Государственнай Собраниять Председателец В.В.Чибиркин.
Сяда тов В.В.Чибиркин Кочелаеваса ванозень 75 вастонди «Сказка» идень садть, Ф.В.Сычковонь лемса рузонь культурань Центрать, а Ковылкинаса—250 вастонди «Улыбка» идень садть. «Улыбкаса» улихть спортивнай и музыкальнай залхт, бассейна, налхксеманди тя пингонь комнатат.
Лиякс мярьгомс, ня садикнень эса иттненди тифт стама условият, кодапт аф сидеста васьфтят ошса. Сяс, азомок эсь мяленц няйфть колга, В.В.Чибиркин мярьгсь: «Ковылкинскяй районца тиф сяшкава лама, што инксонт ули кода марямс гордость аф аньцек республикати, но и марнек странати. Ня оцю сатфксса—кода райононь сембе труженикнень, стане и райононь оцюнять В.И.Ташкинонь марстонь заслугасна».
Сяльде В.В.Чибиркин Ковылкино ошень Культурань дворецса Мордовия Республикань Оцюнять В.Д.Волковонь и Государственнай Собраниять лемста лямбоста поздравляндазень Ковылкинскяй электромеханическяй заводонь труженикнень предприятияснон 55 кизонь юбилеенц мархта. Эсь выступлениясонза Владимир Васильевич макссь оцю питне тя предприятиять сатфксонзонды. Мордовия Республикань Государственнай Собраниять Председателенц валонзон коряс, Ковылкинскяй электромеханическяй заводть оцю и козя историяц. Нинге ётай веконь 60-це кизотнень пингста, мзярда заводсь ушедсь ноляма радиотехническяй изделият, сон арась СССР-нь Радиопромышленностень министерствань няевикс и пяк эрявикс звенакс. И тячивок заводсь, ётамок 90-це кизонь сталмотнень пачк, келиста аськоляй касомань и вииямань киге.
Сувафнемок эрь кизоня производствас од технологият, сон ноляй тя пингонь продукция космическяй ракетань, самолётонь тиемста, а тяфта жа связьса, телевиденияса и лия отрасляса. Тянь вельде Ковылкинскяй электромеханическяй заводсь пяшкоди импортозамещениять коряс государственнай программать эса, конань кемокстазе Россиянь Президентсь В.В.Путин. Тяфта жа заводсь лама тиенди Мордовия Республикань Оцюнять В.Д.Волковонь Посланиянзон вешфксснон коряс.
Выступленияда меле В.В.Чибиркин Мордовия Республикань Оцюнять В.Д.Волковонь и Государственнай Собраниять лемста ламоц заводонь труженикнень казезень Благодарностьса, Почётнай грамотаса и питни казнеса.
Юбилейнай мероприятияса Ковылкинскяй электромеханическяй заводонь труженикнень илать мархта тяфта жа лямбоста поздравляндазь и казсть казнет Мордовия Республикань промышленностень, наукань и од технологиянь министрсь А.И.Седов и Ковылкинскяй муниципальнай райононь оцюнясь В.И.Ташкин.
В.НЕСТЕРОВ.

30.08.2018 №34
 
 
 

 
НОВОСТИ
 

Мордовиянь Оцюнясь Владимир Волков Ётафтсь национальнай проекттнень эряфс етафтомаснон коряс рабочай совещания

17.01.2019  № 2
 
 
 

Ули мезенкса кеняртькшнемс

Монь, кода од ломанень, пяк лад мялезон ся, кода кизоста кизос коль сяда и сяда мазыкс и арукс арси республиканьконь столицац—Саранскяйсь. Тяни ётат сонь ульцянзон, проспектонзон, парконзон, лия вастонзон эзга и седице пяшкоди кенярьдемада, гордостьта и ошть, и марнек Мордовиять инкса. Сембода лама полафткста, конешна, эвондась тяса футболть коряс Миронь чемпионатти анокламста. Ваносте, кодамот тяни ошень китне, вокзалхне! Мяльцень стане жа саласазь «Тавла» гостинично-жилой од комплекссь и Экопарксь. Марнек полафтсь, лиякс арась аэропортсь. Тяни тяста самолетса можна пачкодемс Москуву и Санкт-Петербургу. А мзяра строяф идень садта, школада, гипермаркетта, лама лия пяк эрявикс объектта. А кода аф лятфтамс уникальнай спортивнай объектть—«Мордовия Арена» стадионть. Сон сембоса отвечай тяниень пингонь инь оцю вешфксненди. Аф стак самай тяса меля налхксть миронь инь вии футбольнай командатне. Тя ли аф фантастика, тя ли аф честь сембонди тейнек. А ёфси аф кунара Саранскяйса ётафтфоль эйть лангса конькаса фигурнайста куркснемать коряс Россиянь чемпионатсь. И тяконь лаца спортонь оцю праздникт миньцонк ётафневихть аф шуроста.
Спортсь лихтезе столицаньконь пяк няевикс вастс, тиезе сонь содафокс аф аньцек Россияса, а марнек мирса-масторса. «Саранскяйсь—тя афкуксонь Европейскяй ош, тяса сембось тиф-ладяф оцю уровеньца»,—тяфта азондсазь эсь мяльснон-арьсемаснон столицаньконь колга тяза сашенды инжихне.
Мария Тарасова.
10.01.2019  № 1
 

10 январьста—Мордовиять шачема шиц

Панчфокс панчт, мокшэрзянь краеньке!
Тячи Мордовия Республиканьконь шачема шиц. Топодсь 89 киза, кода теенза максф государственность. 1930 кизонь 10 январьста ВЦИК-ть Президиумоц примась постановления Мордовскяй округть Мордовскяй автономнай областекс тиеманц колга. Тя шись и лувондови мокшэрзянь республикати шачема шикс. А ниле кизода меле тифоль Мордовскяй АССР-сь.
Тянь мархта путфоль цебярь ушеткс касоманди-виияманди. Ётаф пингста ламода кассь республикать экономическяй виец, кеподсь культурась, образованиясь, наукась. Ламоц земляконьке арасть гордостекс аф аньцек Мордовияса, но и сембе Россияса.
Сембода оцю сатфкст миньцонк сатфт мекольдень кизотнень. Мордовиясь путневи примеркс лиятненди, тяза сашендыхть опытонкса, тонафнема. И ули мезти тонафнемс. Республиканьке тячи—странать инь  вишкста вииякшни региононзон эзда фкясь.
10.01.2019  № 1
 

Мордовия Республикань культурань, национальнай политикань, туризмань и архивнай тевонь министрсь А.М.ЧУШКИН: «ЛАДЯМА СЕМЬЯСОНТ И САТФКСТ ТЕВСОНТ!»

28.12.2018
 

Н.П.Огарёвонь лемса Национальнай исследовательскяй Мордовскяй государственнай университетонь ректорсь С.М.ВДОВИН: «КАТК ЁТАФТОВИХТЬ ЭРЯФС СЕМБЕ ВАЛДА МЯЛЕНТЕ И ПЛАНОНТЕ!»

28.12.2018
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин