Поиск по сайту: 
 

Архив
 июль 
 2019 
пн вт ср чт пт сб вс
1234567
891011121314
15161718192021
22232425262728
293031    

 
 

 

Тема дня

«ШУМБРАТ, КУРГОНЯ!» НАЦИОНАЛЬНО-ФОЛЬКЛОРНАЙ ПРАЗДНИКСЬ-ФЕСТИВАЛЬСЬ ПУРОПНЕСЬ ИНЖИХТЬ РОССИЯНЬ ЛАМОЦ РЕГИОТТНЕНЬ ЭЗДА

2015 кизоня Рузаевскяй райононь Левжа мокшень велеса ётафтовсь «Кургоня» национальнай культурань I-це Межрегиональнай фестивальсь, конанди главнай символкс кочкафоль модамарь мархта кургонясь—ватрушкась. Кизода меле «Кургонясь» ульсь Сузгярьге мокшень велеса. Форумс сашендсть участникт и творческяй коллектифт аф аньцек Мордовиянь райоттнень эзда, но и Эстонияста, Финляндияста, а стане жа Карелияста, Удмуртияста и Нижняй Новгородста.
TURSTAT.COM порталть версиянц коряс, пуромкссь сувась Россиянь 2017 кизонь инь содаф гастрономическяй фестивалень 10 топти.
Тядде, кода и меля, фестивальсь ульсь Рузаевскяй райононь  Приреченскяй велень поселениять (Левженский велеть) маласа. 25 августста тяса ётась муниципальнай тя районть 90 кизонь топодеманцты лемтьф пуромкс, а «Кургоня» национальнай культурань  IV-це Межрегиональнай фестивальсь примазе нинге фкя оцю праздникть—«Шумбрат!» Межрегиональнай национально-фольклорнай праздникть-фестивальть, сяс инжихне и сембе пуромфне ульсть «Шумбрат, Кургоня!» лем ала Межрегиональнай национально-фольклорнай праздникса-фестивальса.
Аф ваномок сянь лангс, што сонь официальнайста ушедомац азфоль шить кучканцты, нинге рана шобдава мазы вастса—оцю кужеса ушедсть работама «Колма спасонь ярмаркась», «Национальнай кужесь», «Литературнай кужесь», «Мастеронь ошсь», «Зоо кужесь», «Экологическяй кужесь» и лиятне. Тядде васенцеда няфтьфоль «Казачий курень» кужесь, коса ульсь кода содафтомс шашкать тевс ноляманц мархта, варжамс казаконь кухнянь ярхцамбяльхнень, примамс участия пялькстоматнень и налхкоматнень эса.
Оцю сценаста кулевсть тердемат, весяла морот, праздниконь программась. Моронь и хореографическяй казнеснон казендезь Мордовиянь и лия региононь фольклорнай коллектифне, башка морайхне. Сембе содафневсть рузонь, мокшэрзянь и татаронь нароттнень культураснон, эряфснон-ащефснон, койснон-обуцяснон, ярхцамбяльснон и симомбяльснон мархта. 
Фестивальса тевс нолдафоль праздникть валютац—КурБоттне. Лемсна тифоль кургоня  и боны (1905 кизоня Рузаевскяй республикаса ульсть  ярмаконь тяфтама знакт) валхнень эзда. КурБоттнень ульсь кода добувамс пялькстоматнень, викторинатнень, налхкоматнень пингста и етафтомс пяк оцю кургоняста пакшень рамамс.  Башка мяль шарфтсь эсь лангозонза «Национальнай кужесь», коза сувсесть рузонь, мокшэрзянь, татаронь подворьятне. Эрти ульсь кода содафтомс ня нароттнень койснон, кухняснон мархта. Лама нациянь хороводсь пуроптозень ломаттнень сценать инголи. И вов, кундамок кядьта, ушедсть шарома сят, кит састь тя фестивальти.
И вов торжественнайста панжемань пингсь.
Сценати тертьфоль Мордовия Республикань Правительствать Председателец В.Ф.Сушков.
—Тячи тяза пуромсть аф аньцек Рузаевскяй райононь землякне, конат эряйхть Мордовиять ламоц уженянзон эса, но и инжихть Российскяй Федерациянь кемнилие субъектста, тяконь лувксса и Приморскяй крайста,—мярьгсь сон.
Владимир Фёдорович Мордовия Республикань Оцюнять В.Д.Волковонь, республикань Правительствать лемста,  эсь эздонза азы сафненди приветствиянь лямбе валхт.
Меле В.Ф.Сушков казезень инь достойнайхнень. Синь получасть Мордовия Республикань Почетнай грамотат, «Футболть коряс Миронь чемпионатть ётафтомаса путксонкса» памятнай медальхть, Мордовия Республикань Оцюнять лемста Благодарностть, республикань Правительствань Почетнай грамотат.
Сяда тов пуромфнень поздравляндазень Мордовия Республикань Государственнай Собраниянь депутатсь Н.Б.Амбаев. Николай Борисовичень кядьста несколька ломань получазь Мордовия Республикань Государственнай Собраниять Почётнай грамотанц. Ётксост «Волгоградскяй областень Мокшэрзянь землячества» Региональнай общественнай организациять председателец В.Н.Кияев.
Ульсть поздравляндамань валхт Мордовия Республикань Профсоюснень Федерацияснон председателенц С.В.Борисовонь, Рузаевскяй муниципальнай райононь оцюнять В.Ю.Кормилицынонь, Мордовскяй (мокшень и эрзянь) народть межрегиональнай общественнай организациянц председателенц Ю.А.Мишанинонь, Ульяновскяй областной национально-культурнай автономиять председателенц  В.А.Софоновонь, лиятнень эзда.
Азфтольхть и казьфтольхть «Рузаевскяй муниципальнай райононь сембода благоустроеннай велень поселениясь» конкурсса сяськихне.
Сценати тертьфтольхть «Шумбрат, Кургоня!» Межрегиональнай национально-фольклорнай праздникти-фестивальти Волгоградскяй, Ульяновскяй, Саратовскяй, Пензенскяй   и     лия областтнень эзда саф делегациятнень представительсна.
Шить омбоце пялестонза ульсь праздничнай концерт. Фкя-фкянь мельге сценати лисендсть творческяй коллектифне, ськамост морайхне. Кулевсть рузонь, мокшень, эрзянь, татаронь морот. Самодеятельнай исполнительхне щафтольхть-каряфтольхть национальнай щамса. Ширеса ашесть аще ваныхневок: лисендсть сценать малас кштима, моронь морама.
Илять ульсь этнодискотека.
«Шумбрат, Кургоня!» Межрегиональнай национально-фольклорнай праздниксь-фестивальсь удалась!
«Шумбрат, Кургоня!» фестивальсь панжезе «Шумбрат» республиканскяй  национально-фольклорнай праздникть. Августста-сентябрьста Мордовия Республикань муниципальнай райоттнень эса етайхть тя проектти лемтьф этнокультурнай мероприятият.
Тяка шиня Мордовия Республикань Правительствать Председателец В.Ф.Сушков ульсь Рузаевскяй райононь Ключарево велеса «АгроК-С» ООО-са, коса ванозе кода моли тяса урожаень урядамась.
Т.АЛЬШИНА.

30.08.2018 №34
 
 
 

 
НОВОСТИ
 
 
 
 
 
 
 

«Сембось ушеткшни ёфксста!»

Тяддень 24-27 июньцта Мордовия Республикаса, республикань Общественнай палатать тердеманц коряс, рабочай визит мархта ульсь советскяй и российскяй содаф писательсь В.А.Бахревский.
24 июньцта Мордовия Республикань Пресс-центраса сон васетькшнесь республикань писательхнень, поэттнень и журналисттнень мархта. Васедемать вятезе Мордовия Республикань Общественнай палатать председателец, историческяй наукань докторсь И.В.Капитонов.
Васедемать ушетксста Иван Владимирович пуромфненди нюрьхкяняста азондсь писательть эряфонь и творческяй кинзон колга. Владислав Анатольевич Бахревский—советскяй и российскяй прозаик, поэт, идень писатель, драматург, публицист, критик—шачсь 1936 кизоня Воронежса. Сермадсь и нолдась иттненди и оцюфненди 30-да лама книга. Инь содафокс арасть сонь «Василий Шуйский», «Никон», «Аввакум», «Страстотерпцы» и лия историческяй романонза. Тяфта жа арасть содафокс «Дворец Золушки», «Кот в сапогах с секретами», «Первоклассник Митя и кролик Ушки-на-макушке» емла лувити ефксонза и азксонза.
27.06.2019  № 25
 

Саранскяйса казезь «Победань диктантса» сяськихнень

22 июньцта, Лятфнемань и ризнамань шиня, Мордовиять столицаса казезь «Победань Диктант»—Великай Отечественнай  войнань темас коре Всероссийскяй диктантть сяськиензон.
Сяськихнень чествовандазь 1941-1945 кк. военнай и трудовой подвигонь Мемориальнай музейса. Синь поздравляндазень и макссь питни казнет «Единая Россия» партиянь МРО-ть Секретарец, партиять Генеральнай советонц членоц Владимир Васильевич Чибиркин.
—Минь аф аньцек лятфнесаськ геройхнень, но и мяленьке шарфтомс общественностть мяленц етай шинь пелькс событиятнень лангс. Историять эряви содамс и мяляфтомс сембонди, штоба куломань канды войнась, кона сявсь 27 миллион ломанень эряф, афоль уле  вестевок. Историять содаманц касфтоманкса и героическяй етай пингть аф лац няфнеманц аф нолдаманкса «Единая Россия» партиять инициативанц коряс сембе странать эзга 7 майста етафтовсь Великай Отечественнай войнань темать коряс Всероссийскяй диктант—«Победань Диктант».
27.06.2019  № 25
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин