МАРЯТАМА ИНКСОСТ ГОРДОСТЬ

Пяк курокста ётни пингсь. Вейхкса кизот ни ётась эстоньбере, кода Москуса пуроптфоль «Трудовая доблесть России» Всероссийскяй общественнай организациясь.
Тяни тя организациять отделенияц ули и миньцонк республикаса. Ветераттне примсихть участия республикать общественно-политическяй эряфсонза, ётафнихть оцю работа од ломаттнень ёткса трудовой и патриотическяй воспитанияснон коряс.
Пара азомс, што Мордовиянь писательхне кирдихть кеме соткст тя организациять и ветераттнень мархта, башка мяль теест шарфнихть эсь творчествасост.
Мордовия Республикаса Региональнай отделениять Правлениянцты васенце председателькс кочкафоль Социалистическяй Трудонь Геройсь Р.И.Жидкова. Правленияв стане жа сувасть И.И.Дзюбак, Социалистическяй Трудонь Геройсь А.В.Парамонова.
Раиса Ивановнань мархта ламоксть улендеме завоттнень и учреждениятнень эса, коса тиендеме выступленият. Аф кунара улеме   Н.П.Огарёвонь лемса Мордовскяй государственнай университетть пуромксса. Аф ваномок кизонзон лангс, сон эрьгав, аф содай сизема.
Эняльдень теенза нюрьхкяняста азондомс эсь колганза.
—Саранскяйса средняй школать шумордамдонза меле поступань работама «Электровыпрямитель» заводу, тонафнине приборонь кочксиень профессиять. Меле содафтонь нинге несколька тев мархта, конат сотфт полупроводниковай приборхнень тиемаснон мархта. Тейне макссть бригада, коса ламоль од ломаньда. Тя коллективсь меле арась инь цебярькс аф аньцек заводса, но и отрасляса. Аф весть отмечсевсь государственнай казнеса,—пачфтсь тейне трудонь ветеранць.
Эстеенза Р.И.Жидковати максфоль Социалистическяй Трудонь Героень лемсь. Производственнай тевда башка, Раиса Ивановна фалу заняфоль общественнай работаса. Кельгома тевонцты макссь 35 лама киза.
Мзярда марса улеме  Н.П.Огаревонь лемса МГУ-са васедемаса, сон студенттненди мярьгсь: «Мялезе, штоба тевть, конанди максыне эряфозень инь цебярь пингонц, поладолесть тинь».
Войнань итть… Синь ётасть стака эряф, лац покодеманкса аф кржась эздост казьфт государственнай казнеса, вятсть и вятихть общественнай тефт.
Мялезе азондомс войнань идть Анна Павловна Пестовать (Гадаевать) колга. Шачсь сон 1940 кизоня Ичалковскяй райононь Ичалки велеса.
1941 кизоня аляц, Павел Григорьевич, тусь фронту. А 8 августста Аннань шачсь сазорняц Валентина. Лама стака-сталма савсь кирдемс семьяти, мзярс азорсь ашезь мрда фронтста. Войнада меле Пестофнень семьяса кассть вете итть.
1958 кизоня Ичалковскяй школать шумордамдонза меле Аня поступась Мордовскяй госуниверситетонь филологическяй факультету, коса эстокиге няфтезе эсь асувонц. Сон кочкафоль студенческяй научнай сообществань секретарькс.
Университетть шумордамдонза меле Анна Павловна кучфоль работама Атяшевскяй райононь Поводимовскяй средняй школав рузонь кялень и литературань учителькс. Эсь прянц няфтезе аньцек цебярь ширде.
Меле ётась эряма Саранскяи, коса тага ушедсь работама учителькс. И тага покодсь пяк цебярь сатфксонь сатнезь.
Аф стак 1978 кизоня кочкафоль РСФСР-нь Педагогическяй обществать Мордовскяй отделениянцты ответственнай секретарькс, а 1987 кизоня—председательти васенце заместителькс.
Аньцек шнамань валхт мялезе азомс Социалистическяй Трудонь Геройть, «Красное Сельцо» хозяйствань плодопитомническяй бригадань ингольдень бригадирть Пелагея Ивановна Борисовать колга. Сонь содасазь аф аньцек Рузаевскяй районца, но и марнек республикаса. Пцтай 40 киза работась «Красное Сельцо» совхозонь плодопитомникса, 26 киза ульсь питомниковскяй бригадань оцюнякс, кона кизоста кизос сатнесь пяк цебярь результатт. Борисовать бригадац кизоти касфнесь 170 тёжянти молемс од шуфтоня! 1966 кизоня Пелагея Ивановнанди максфоль Социалистическяй Трудонь Героень лем. Эста теенза ульсь аньцек 35 киза.
А кода аф лятфтамс учительть, Социалистическяй Трудонь Геройть Нина Федоровна Госткинать колга. Государствась учительхненди тяфтама оцю казнет макссель аф сидеста. СССР-нь Верховнай Советть Президиумонц Указоц, кона лиссь 1968 кизонь 1 июльста, фкя сякосель, мзярда тя лемсь фкя пингть максфоль странань 60 учителенди. Ётксост ульсь и Нина Федоровна.
1942 кизоня июньцта 18 кизоса Василий Сергеевич Оськин сявфоль фронту. Воявась эсь прянь аф ужяльдезь.
Войнада меле ламос ульсь Заполярьяса. Никель велеса работась металлоплавильщикокс. Лама киза виень аф ужяльдезь покодеманкса, трудовой оцю сатфксонь сатоманкса В.С.Оськинонди 1966 кизонь 20 майста максфоль Социалистическяй Трудонь Героень лем.
1972 кизоня семьянек ётась эряма эсь ёмла родиназонза, Саранскяи.
Оцю мяльса пара валхт азан и Социалистическяй Трудонь Геройть А.В.Долгановонь колга. Мзярда сон оцюняль племзаводса, цебярь соткст кирдсь Мордовиянь Писателень союзть мархта. Сон сидеста тернезень инжикс писательхнень. Синь васьфнесть тяса покодихнень мархта.
А.В.Долганов шумордась университет, 1969 кизоня примазе хозяйствать, коса ашель  диплом мархта фкявок специалист. Эрь гектарста сявондевсь эста аньцек 10-12 центнер зёрна, потьневсь пяк кржа лофца, техникась таштоль, ашесть сатне корматне и фуражсь.
Меле ни, хозяйствать прибыленц вельде, строяфоль 500 квартира, Культурань куд, школа, автогараж и стак тов.
1986 кизоня А.В.Долгановонди максфоль Социалистическяй Трудонь Героень лем.
Михаил Петрович Девятаевонь подвигонц колга мялямсь кармай эряма фалу. Теенза эсь ялганзон мархта удалась ворьгодемс фашистскяй пленцта врагонь самолетса. Земляконьконь тя героическяй подвигсонза няфтьф сембось: Родинати кельгомась, аф пелемась, ёнюшись.
Мокшэрзянь краеньке маряй гордость эсь цёранзон и стирензон инкса, конатнень лемсна лац содафт аф аньцек республикасонк, но и марнек странаса. Синь лама пара тисть и тиендихть эсь республиканьконди, странаньконди.