Поиск по сайту: 
 

Архив
 январь 
 2019 
пн вт ср чт пт сб вс
 123456
78910111213
14151617181920
21222324252627
28293031   

 
 

 

Национальная тематика

ВЕЛЬМИСКИТТНЕНЬ СЕМЕЙНАЙ ДУЭТСНА

«Сценать лангс тердьсаськ Мордовияста Вельмискиттнень семейнай дуэтснон»,—пуромксонь вятить ня валонзон кулемдост меле сценати лисендихть Краснослободскяй райононь Колапа велеса шачф-касф мирттне- рьвятне, мокшень ломаттне Наталья Борисовна и Николай Николаевич Вельмискиттне. Аф ваномок сянь лангс, што синь кунара эряйхть Московскяй областень Видное ошса, дуэтсна лувондови Мордовия Республикаста. Тяса синь шачсть, тонафнесть, пуроптсть семья, сяльде ни тусть Москуву работама.
Сидеста Вельмискиттнень ули кода няемс гармониять мархта сотф праздникнень пингста. Лисихть сценать лангс мокшень щамса-карямса и ушедсазь выступленияснон. Николай Николаевич морай гармонияса, а Наталья Борисовна—кургса. Визитнай карточкакс семейнай дуэтснонды кунара арась «Луганяса келунясь» лирическяй народнай морось. Аньцек морасыне Наталья Борисовна васенце валрисьмотнень эздонза, пуромфне весялгодыхть. «Точк-мочк, кума дярянь келуня, вишке кума, кума дярянь келуня!»—ня валхнень кулемдост меле кой-кит ушеткшнихть кштима, а меле ламотне малаткшнихть теенза и кизефнесазь мезень колга морось.
Наталья Борисовнань и Николай Николаевичень репертуарсост пяк лама мокшэрзянь морода, сиде мороняда. Ламотнень вельде синь ерайхть няфтемс родной ширети кельгомать, теенза лажадомать. Мзярда эняльдень мокшавати азондомс коса шачсь-кассь, Наталья Борисовна аф эряскодозь ушедозе корхтаманц, а вайгяльсонза марявсь Колапати кельгомась.
Тостонь школать шумордамдонза меле Наталья Борисовна тонафнесь Саранскяйса училищаса, сяльде тусь Москуву кондитерскяй фабрикав работама. Примсесь участия спортивнай, культурно-массовай ламоц пуромкснень эса. Эсонза фалу эрясь минценнети кельгомась, башка васта седисонза занцесть мокшэрзянь моротне, сиде моронятне. Москуса тя вятезе мокшавать  Мокшэрзянь землячествать видеса «Колапань вайгяльхть» ансамбльти, коса морсемста ниле мокшаватне бта пси шиня кельме лихтибряста ару ведьта копорясть. Тяда башка, Наталья Борисовнанди и Николай Николаевиченди удалась пуроптомс эсь семейнай дуэтснон. Тя тевти синь водендазь уноконяснон Миленать, кона кой-коста лисенди мархтост сценати.
Мокшень щапнень-каряпнень Вельмискиттне кочказь синць. Кой-мезе лядсь бабаснон и атяснон эзда, ускозь семботь тянь Колапаста Москуву, кой-мезе стафтсть заказс коре.
Николай Николаевич—цебярь гармонист. Виде, одста тя тевти аф пяк прафтсь. Гармонистоль патяц, морась балалайкаса тядяц, а акац—мандолинаса. Эсь лацонь семейнай ансамбль лисендсь, мзярда пуромкшнесть марс.
Н.Н.Вельмискин Колапаса школать шумордамдонза меле тонафнесь Саранскяйса училищаса. Меле Наталья Борисовнань мархта рьвяясть и тусть Москуву. Гармониять мархта кеме соткст ладясь 2010 кизоня. Тонадсь тя инструментса морама, да сяшкава лац, што арась кельгома рьванцты лездыкс. Тяни коллекциясонза несколька гармония.
Мокшалясь работай связистокс Москуса, эрь шиня сашендови арнемс столицав Видное ошста. Но сон эрь вастса кенери.
«ГАРМОНЬиЯ» гармонистонь районнай панжада фестивальсь, Г.Д.Заволокинонь лемса «Играй, гармонь!» Всероссийскяй XII фестивальсь, «Лети и пой, моя гармонь, над Волгой!» народнай творчествань праздниксь-фестивальсь, «Гармоника—душа России»—ня и ламоц лия пуромкснень эса примсесь участия Вельмискиттнень семейнай дуэтсна. Мирттне-рьвятне арсесть дипломантокс, сяськикс, теест казендевсть Благодарностть, Почётнай грамотат. Но инь питникс синь лувсазь ваныхнень кядень цяпамаснон.
Кизонда Вельмискиттне сашендыхть Краснослободскяй райононь Колапа шачема велезост. Аф кржа ялгадост тоса, улихть содафсна Саранскяйсовок.
Тя материалть анокламста мархтост корхнень «Мокшень правдать» редакцияса. Мирдсь и рьвясь уноконяснон Миленать мархта машинаса сашендсть Саранскяи. И, мзярда васьфтине синь, васендакиге мярьгсть: «Конашкава полафтсь Саранскяйсь цебярь шири! Мзяра од куд, объект строяф! Мзярда ардоме машинаса, бта сембось содаф, но и лия».
Вельмискиттне касфтсть кафта итть. Гордостень маряма вастокс теест ащихть цёрасна Евгений и стирьсна Маргарита, кона казезе Наталья Борисовнанди и Николай Николаевиченди инь питни казнеть—уноконяснон Миленать.
2015 кизоня Наталья Борисовна, Николай Николаевич и Милена ульсть «Поле чудес» телешоунь участникокс. Тоза пуромфнень мяльснон салазь мокшень щамсна-карямсна. Тяда башка, синь кулезь мокшень кяльть гармониять коряс мораф сиде моронятнень вельде.
Отпусконь, ваймамань пингсь шумордавсь кизоть аделавоманц мархта. Вельмискиттне Колапаста тага тусть Видное ошу. Работада, эсь тевдост башка, синь аноклайхть фестивальхненди, выступлениятненди. Арьсетяма Вельмискиттнень семейнай дуэтснонды сатфкст!
Т.АЛЬШИНА.

30.08.2018 №34
 
 
 

 
НОВОСТИ
 

Мордовиянь Оцюнясь Владимир Волков Ётафтсь национальнай проекттнень эряфс етафтомаснон коряс рабочай совещания

17.01.2019  № 2
 
 
 

Ули мезенкса кеняртькшнемс

Монь, кода од ломанень, пяк лад мялезон ся, кода кизоста кизос коль сяда и сяда мазыкс и арукс арси республиканьконь столицац—Саранскяйсь. Тяни ётат сонь ульцянзон, проспектонзон, парконзон, лия вастонзон эзга и седице пяшкоди кенярьдемада, гордостьта и ошть, и марнек Мордовиять инкса. Сембода лама полафткста, конешна, эвондась тяса футболть коряс Миронь чемпионатти анокламста. Ваносте, кодамот тяни ошень китне, вокзалхне! Мяльцень стане жа саласазь «Тавла» гостинично-жилой од комплекссь и Экопарксь. Марнек полафтсь, лиякс арась аэропортсь. Тяни тяста самолетса можна пачкодемс Москуву и Санкт-Петербургу. А мзяра строяф идень садта, школада, гипермаркетта, лама лия пяк эрявикс объектта. А кода аф лятфтамс уникальнай спортивнай объектть—«Мордовия Арена» стадионть. Сон сембоса отвечай тяниень пингонь инь оцю вешфксненди. Аф стак самай тяса меля налхксть миронь инь вии футбольнай командатне. Тя ли аф фантастика, тя ли аф честь сембонди тейнек. А ёфси аф кунара Саранскяйса ётафтфоль эйть лангса конькаса фигурнайста куркснемать коряс Россиянь чемпионатсь. И тяконь лаца спортонь оцю праздникт миньцонк ётафневихть аф шуроста.
Спортсь лихтезе столицаньконь пяк няевикс вастс, тиезе сонь содафокс аф аньцек Россияса, а марнек мирса-масторса. «Саранскяйсь—тя афкуксонь Европейскяй ош, тяса сембось тиф-ладяф оцю уровеньца»,—тяфта азондсазь эсь мяльснон-арьсемаснон столицаньконь колга тяза сашенды инжихне.
Мария Тарасова.
10.01.2019  № 1
 

10 январьста—Мордовиять шачема шиц

Панчфокс панчт, мокшэрзянь краеньке!
Тячи Мордовия Республиканьконь шачема шиц. Топодсь 89 киза, кода теенза максф государственность. 1930 кизонь 10 январьста ВЦИК-ть Президиумоц примась постановления Мордовскяй округть Мордовскяй автономнай областекс тиеманц колга. Тя шись и лувондови мокшэрзянь республикати шачема шикс. А ниле кизода меле тифоль Мордовскяй АССР-сь.
Тянь мархта путфоль цебярь ушеткс касоманди-виияманди. Ётаф пингста ламода кассь республикать экономическяй виец, кеподсь культурась, образованиясь, наукась. Ламоц земляконьке арасть гордостекс аф аньцек Мордовияса, но и сембе Россияса.
Сембода оцю сатфкст миньцонк сатфт мекольдень кизотнень. Мордовиясь путневи примеркс лиятненди, тяза сашендыхть опытонкса, тонафнема. И ули мезти тонафнемс. Республиканьке тячи—странать инь  вишкста вииякшни региононзон эзда фкясь.
10.01.2019  № 1
 

Мордовия Республикань культурань, национальнай политикань, туризмань и архивнай тевонь министрсь А.М.ЧУШКИН: «ЛАДЯМА СЕМЬЯСОНТ И САТФКСТ ТЕВСОНТ!»

28.12.2018
 

Н.П.Огарёвонь лемса Национальнай исследовательскяй Мордовскяй государственнай университетонь ректорсь С.М.ВДОВИН: «КАТК ЁТАФТОВИХТЬ ЭРЯФС СЕМБЕ ВАЛДА МЯЛЕНТЕ И ПЛАНОНТЕ!»

28.12.2018
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин